1. Harapané Abraham dhasaré saka apa?

 YÉHUWAH wis janji nèk Abraham bakal nduwé anak lan kabèh bangsa ing bumi bakal éntuk berkah liwat keturunané. (PD. 15:5; 22:18) Masalahé, nganti Abraham umur 100 lan Sara 90, meréka isih durung nduwé anak. Tapi, Abraham isih terus berharap merga dhèwèké percaya banget karo Yéhuwah. Dhèwèké yakin nèk janjiné Yéhuwah mesthi bakal dadi kenyataan. (PD. 21:1-7) Ing Alkitab disebutké, ”Abraham tetep nduwé harapan lan iman nèk dhèwèké bakal dadi bapaké akèh bangsa.” (Rm. 4:18) Harapané Abraham kuwi akhiré dadi kenyataan. Dhèwèké nduwé anak sing jenengé Ishak. Apa sing marakké Abraham percaya nèk janjiné Yéhuwah mesthi ditepati?

2. Ngapa kok Abraham yakin nèk janjiné Yéhuwah mesthi ditepati?

² Merga kenal banget karo Yéhuwah, Abraham ”yakin banget nèk [Yéhuwah] sanggup nepati kabèh janjiné”. (Rm. 4:21) Merga nduwé iman, Abraham disayang lan dianggep bener karo Yéhuwah. (Yak. 2:23) Menurut Roma 4:18, imané Abraham kuwi ana kaitané karo harapané. Saiki, ayo mbahas kata-katané Rasul Paulus soal harapan sing ditulis ing Roma bab 5.

3. Soal harapan, apa waé sing dijelaské Paulus?

³ Paulus njelaské nèk harapané awaké dhéwé ’ora bakal nggawé kecéwa’. (Rm. 5:5) Paulus ya njelaské apa sing marakké awaké dhéwé tambah berharap karo janjiné Yéhuwah. Mengko selama mbahas Roma 5:1-5, njenengan  mungkin dadi menyadari nèk selama iki njenengan saya suwé saya ngarep-arep donya anyar. Terus ya bakal dibahas, piyé bèn njenengan tambah yakin manèh karo harapan kuwi. Saiki, ayo mbahas sik harapan sing ora bakal nggawé kecéwa kuwi apa?

4. Apa sing dibahas ing Roma 5:1, 2?

⁴ Wacanen Roma 5:1, 2. Paulus nulis kata-kata kuwi kanggo jemaat ing Roma. Sedulur-sedulur ing kana wis sinau soal Yéhuwah lan Yésus, wis nduwé iman, lan wis dadi wong Kristen. Gusti Allah ’nganggep meréka bener merga nduwé iman’, lan meréka wis dipilih nganggo roh suci. Meréka nduwé harapan sing luar biasa.

5. Wong-wong sing dipilih roh suci nduwé harapan apa?

⁵ Bar kuwi, Paulus nulis kanggo wong Kristen ing Éfésus soal harapan sing bakal meréka tampa. Meréka bakal nampa ”warisan kanggo wong-wong suci”. (Éf. 1:18) Paulus ya ngandhani wong Kolose ing endi harapan kuwi bakal terwujud. Paulus ngomong nèk kuwi ”berkah sing wis disiapké kanggo [meréka] ing swarga”. (Kol. 1:4, 5) Dadi, wong-wong sing dipilih roh suci bakal diuripké manèh, terus urip saklawasé ing swarga, lan mréntah karo Kristus.—1 Tés. 4:13-17; Why. 20:6.

6. Salah siji sedulur sing dipilih roh suci ngomong apa soal harapané?

⁶ Wong Kristen sing wis dipilih roh suci seneng banget karo harapan kuwi. Salah sijiné Sedulur Frederick Franz. Dhèwèké ngomong, ”Harapan kuwi pasti. Janjiné Gusti Allah kanggo 144.000 mesthi bakal dadi kenyataan. Harapan kuwi ora ana tandhingané.” Sakwisé nglayani Yéhuwah selama puluhan taun, taun 1991 Sedulur Franz ngomong, ”[Kami] isih ngrasa nèk harapan kuwi berharga banget. . . .  Saya suwé ngentèni, harapan kuwi malah saya berharga kanggo kami. Meskipun kudu ngentèni suwé banget, kami réla ngentèni. Kanggoku, harapan iki saya suwé saya istiméwa.”

7-8. Akèh-akèhé umaté Yéhuwah nduwé harapan apa? (Roma 8:20, 21)

⁷ Akèh-akèhé umaté Yéhuwah saiki nduwé harapan sing padha kaya Abraham. Harapané kuwi urip saklawasé ing bumi pas Kerajaané Gusti Allah mréntah. (Ibr. 11:8-10, 13) Paulus ngandhani apa waé berkah sing bakal meréka tampa. (Wacanen Roma 8:20, 21.) Pas pertama kali sinau soal harapan ing masa depan, apa sing paling menarik kanggo njenengan? Apa harapan nèk njenengan sukmbèn bakal dadi sampurna lan ora nduwé dosa manèh? Utawa, harapan nèk sukmbèn isa ketemu manèh karo keluarga lan kanca sing wis mati? Merga harapan saka Gusti Allah kuwi, njenengan isa nampa akèh berkah sing luar biasa.

⁸ Ora soal urip saklawasé ing swarga utawa ing bumi, harapan kuwi luar biasa lan marakké awaké dhéwé bahagia. Awaké dhéwé ya isa tambah yakin nèk harapan kuwi mesthi dadi kenyataan. Awaké dhéwé bakal mbahas kuwi saka omongané Paulus ing ayat-ayat selanjuté.

9-10. Kaya Paulus, awaké dhéwé saiki ya isa ngalami apa? (Roma 5:3) (Deloken gambar kanggo paragraf 9-10.)

⁹ Wacanen Roma 5:3. Paulus nyebutké nèk lagi susah, awaké dhéwé bakal semakin ngarep-arep donya anyar. Nah, kabèh muridé Yésus bakal ngalami kesusahan. Misalé Paulus. Dhèwèké ngomong kanggo sedulur-sedulur ing Tésalonika, ”Wektu aku isih bareng karo kowé, aku wis kerep ngandhani kowé nèk awaké dhéwé bakal ngalami kesusahan. Kowé ngerti nèk kuwi kelakon tenan.” (1 Tés.  3:4) Terus kanggo jemaat Korintus, dhèwèké nulis, ”Sedulur-sedulur, aku péngin kowé ngerti soal kesusahan sing tak alami . . . Aku mikir nèk aku mesthi mati.”—2 Kor. 1:8; 11:23-27.

¹⁰ Awaké dhéwé saiki ya isa ngalami kesusahan. (2 Tim. 3:12) Bar dadi muridé Yésus, apa njenengan ya dadi susah? Misalé, apa kanca lan keluarga dadi ngécé utawa malah sikapé kasar karo njenengan? Apa njenengan malah dadi éntuk masalah merga berupaya tetep jujur ing gawéan? (Ibr. 13:18) Apa njenengan ya ditentang pamréntah merga nginjil? Ora soal kesusahan apa sing njenengan alami, Paulus ngomong nèk njenengan isa tetep bahagia. Lha ngapa?

11. Ngapa kok kudu tetep sabar pas ngadhepi kesusahan?

¹¹ Awaké dhéwé isa tetep bahagia meskipun lagi susah, nèk mikirké hasilé. Ing Roma 5:3 disebutké, ’Kesusahan isa nggawé awaké dhéwé sabar.’ Kabèh wong Kristen bakal ngalami kesusahan. Dadi, kabèh kudu ngupaya terus sabar. Awaké dhéwé bakal ndelok harapan kuwi terwujud mung nèk terus sabar lan setya nglayani Yéhuwah. Yésus tau nyritakké perumpamaan soal benih sing tiba ing panggonan sing akèh watuné. Wong-wong sing kaya ngono awalé nampa berita saka Alkitab. Tapi, sakwisé ngalami ”kesengsaraan utawa dianiaya”, meréka dadi ora percaya manèh. Awaké dhéwé aja nganti kaya ngono. (Mat. 13:5, 6, 20, 21) Mémang ngadhepi kesusahan utawa dianiaya kuwi ora pénak, tapi nèk tetep sabar, mesthi ana manfaaté. Apa waé manfaaté?

12. Apa waé manfaaté nèk terus sabar?

¹² Rasul Yakobus nyebutké manfaaté nèk terus sabar pas ngadhepi kesusahan. Dhèwèké nulis, ”Nèk kowé terus sabar, kowé bakal bener-bener nglatih awakmu dhéwé bèn kowé dadi sampurna lan ora kurang apa-apa.” (Yak. 1:2-4) Yakobus nyebutké nèk sabar kuwi ana manfaaté. Kuwi isa nggawé awaké dhéwé dadi luwih tabah, imané tambah kuwat, lan saya ngendelké Gusti Allah. Apa manèh manfaaté nèk sabar?

13-14. Apa manèh manfaaté nèk tetep sabar, lan apa hasilé? (Roma 5:4)

¹³ Wacanen Roma 5:4. Paulus ngomong, ”Nèk awaké dhéwé sabar, Gusti Allah bakal seneng.” Kuwi ora berarti Yéhuwah seneng awaké dhéwé susah. Sing nggawé Yéhuwah seneng kuwi merga awaké dhéwé tetep sabar lan setya. Isa nggawé Yéhuwah seneng kuwi rasané mesthi nyenengké banget.—Mzm. 5:12.   

¹⁴ Élinga, Abraham tetep sabar lan setya wektu ngadhepi kesusahan. Makané, Yéhuwah seneng. Yéhuwah nyebut dhèwèké sahabaté lan nganggep Abraham wong sing bener. (PD. 15:6; Rm. 4:13, 22) Yéhuwah sayang dudu merga awaké dhéwé nduwé tugas-tugas tambahan ing organisasi, utawa awaké dhéwé wis berbuat apa waé kanggo Yéhuwah. Yéhuwah sayang merga awaké dhéwé tetep setya karo Dhèwèké. Ora soal umuré pira utawa keadaan lan kemampuané piyé, awaké dhéwé isa tetep sabar lan terus setya. Nèk saiki njenengan lagi berjuang bèn tetep sabar ngadhepi kesusahan, yakina nèk njenengan wis nggawé Gusti Allah seneng. Hasilé, njenengan bakal tambah yakin nèk harapané njenengan bakal dadi kenyataan.

15. Ing Roma 5:4, 5, Paulus ngomong apa? Terus, dadi muncul pertanyaan apa?

¹⁵ Paulus wis njelaské nèk Yéhuwah seneng nèk awaké dhéwé tetep sabar lan setya meskipun ngadhepi kesusahan. Bar kuwi, Paulus ya ngomong, ”Nèk Gusti Allah seneng karo awaké dhéwé, awaké dhéwé dadi nduwé harapan. Harapan kuwi ora bakal nggawé awaké dhéwé kecéwa.” (Rm. 5:4, 5) Ing Roma 5:2, Paulus wis nyebutké nèk wong Kristen ing Roma ”nduwé harapan nampa kemuliaan saka Gusti Allah”. Dadi, nèk meréka wis nduwé harapan, ngapa kok ing ayat 4 karo 5 Paulus nyebutké manèh soal harapan?

16. Kèkana conto nèk harapan isa dadi tambah kuwat. (Deloken gambar kanggo paragraf 16.)

¹⁶ Bèn isa ngerti maksudé Paulus, kudu éling nèk harapan kuwi isa dadi tambah kuwat. Contoné, pikirna pas pertama kali njenengan ngerti soal janjiné Gusti Allah ing Alkitab. Mungkin wektu kuwi njenengan mikir nèk harapan isa urip saklawasé ing firdaus kuwi apik, tapi kuwi ora mungkin kelakon. Tapi semakin njenengan kenal karo Yéhuwah lan luwih akèh mempelajari janji kuwi ing Alkitab, njenengan saya yakin nèk harapan kuwi bakal dadi kenyataan.

17. Sakwisé dibaptis, apa sing isa marakké njenengan dadi tambah yakin karo harapan ing masa depan?

¹⁷ Sakwisé dibaptis, njenengan tambah kenal karo Yéhuwah lan tambah sayang karo Dhèwèké. Njenengan akhiré dadi semakin percaya karo harapan ing masa depan. (Ibr. 5:13–6:1) Mungkin njenengan ya tau ngalami sing disebutké ing Roma 5:2-4. Meskipun wis ngalami akèh kesusahan, njenengan tetep sabar lan setya karo Yéhuwah. Kuwi nggawé Yéhuwah seneng. Merga ngerti nèk disayang Yéhuwah, njenengan ya tambah yakin nèk bakal ngrasakké janjiné Yéhuwah kelakon.  Njenengan ya semakin ngarep-arep janji kuwi. Terus, merga yakin banget karo harapan kuwi, njenengan dadi berupaya nggawé keputusan sing bener, wektuné mung dienggo sing penting-penting waé, lan njenengan dadi luwih sayang karo keluarga.

18. Yéhuwah ngekèki jaminan apa?

¹⁸ Paulus wis njelaské nèk awaké dhéwé nduwé harapan merga Gusti Allah seneng karo awaké dhéwé. Terus, Paulus ya ngomong nèk harapan kuwi bakal dadi kenyataan. Bèn awaké dhéwé yakin, Gusti Allah wis ngekèki jaminan, ”Harapan kuwi ora bakal nggawé awaké dhéwé kecéwa. Kuwi merga Gusti Allah wis mènèhi awaké dhéwé roh suciné kanggo mbuktèkké nèk Dhèwèké sayang karo awaké dhéwé.” (Rm. 5:5) Dadi, awaké dhéwé isa yakin banget nèk harapan kuwi bakal bener-bener dadi kenyataan.

19. Awaké dhéwé isa yakin soal apa?

¹⁹ Pikirna janjiné Yéhuwah kanggo Abraham. Yéhuwah nganggep Abraham dadi sahabaté lan sayang banget karo dhèwèké. Sing diharapké Abraham akhiré dadi kenyataan. Ing Alkitab disebutké, ”Sakwisé Abraham sabar, dhèwèké nampa janji kuwi.” (Ibr. 6:15; 11:9, 18; Rm. 4:20-22) Abraham blas ora kecéwa. Kaya Abraham, awaké dhéwé ya isa yakin nèk tetep setya, awaké dhéwé bakal ngrasakké janjiné Yéhuwah kelakon. Awaké dhéwé bahagia merga harapan kuwi ora bakal nggawé kecéwa. (Rm. 12:12) Paulus nulis, ”Muga-muga Gusti Allah, sing mènèhi kowé harapan, nggawé kowé bener-bener bahagia lan ngrasa ayem merga kowé percaya marang Dhèwèké. Muga-muga harapanmu isa saya kuwat lan kowé éntuk kekuwatan saka roh suci.”—Rm. 15:13.