1-2. Apa waé sing isa marakké wong nangis?

 KABÈH wong mesthi tau nangis. Merga saking senengé, wong isa waé ngguyu nganti nangis. Kuwi isa merga anaké bar lair, kèlingan kenangan sing indah, utawa ketemu manèh karo kanca sing wis suwé banget ora ketemu.

² Tapi, kerep-kerepé wong nangis kuwi merga sedhih. Misalé merga dikecéwakké, lara ora mari-mari, utawa ditinggal mati kanca lan keluarga. Perasaan-perasaan kaya ngono mungkin kaya sing dirasakké Nabi Yérémia wektu Yérusalèm dihancurké wong Babilonia. Yérémia ngomong, ”Air mataku dlèwèran terus . . . Mripatku terus-terusan nangis tanpa mandheg.”—KP. 3:​48, 49.

3. Piyé perasaané Yéhuwah wektu ana umaté sing susah? (Yésaya 63:9)

³ Selama awaké dhéwé urip, Yéhuwah ngerti wis ping pira waé awaké dhéwé nangis merga susah. Bahkan, kapan waé awaké dhéwé sedhih, Yéhuwah ngerti. Wektu awaké dhéwé njaluk tulung nganti nangis-nangis, Yéhuwah ya ngrungokké. (Mzm. 34:15) Tapi, Yéhuwah ora mung ndelok lan ngrungokké. Yéhuwah kuwi kaya wong tuwa sing sayang anaké. Wektu anaké nangis, wong tuwa mesthi mèlu sedhih lan péngin cepet-cepet mbantu.—Wacanen Yésaya 63:9.

4. Conto-contoné sapa sing bakal dibahas, lan saka conto-conto kuwi, awaké dhéwé dadi ngerti soal apa?

 ⁴ Saka contoné Hana, Daud, lan Raja Hizkia, awaké dhéwé isa ngerti piyé perasaané Yéhuwah wektu umaté nangis merga susah. Ing artikel iki bakal dibahas: Apa sing marakké Hana, Daud, lan Hizkia nangis? Yéhuwah mbantuné piyé? Saka conto-conto kuwi, mengko ya isa ngerti piyé Yéhuwah menghibur wektu awaké dhéwé susah, dikhianati, utawa ngrasa ora nduwé harapan.

NANGIS MERGA ATINÉ SUSAH BANGET

5. Apa sing diadhepi Hana, lan kuwi marakké dhèwèké ngrasa piyé?

⁵ Ana beberapa masalah sing marakké atiné Hana dadi susah banget nganti nangis. Salah sijiné, merga bojoné Hana, yaiku Èlkana, nduwé bojo liya sing jenengé Pénina. Nah, Pénina jahat karo Hana. Terus, Hana ya mandhul, tapi Pénina isa nduwé anak. (1 Sam. 1:​1, 2) Pénina terus-terusan ngécé Hana merga Hana mandhul. Nèk njenengan sing dadi Hana, piyé perasaané njenengan? Hana wektu kuwi ”sedhih banget” nganti ”nangis lan ora gelem mangan”.—1 Sam. 1:​6, 7, 10.

6. Bèn ora sedhih manèh, apa sing dilakukan Hana?

⁶ Apa sing marakké Hana dadi ora sedhih manèh? Salah sijiné merga dhèwèké lunga ing tabernakel kanggo ngibadah. Kétoké, ing cedhak pintu masuk halaman tabernakel, Hana ”mulai ndonga marang Yéhuwah karo nangis sesenggukan”. Hana njaluk bèn Yéhuwah nggatèkké kesusahané lan ngéling-éling dhèwèké. (1 Sam. 1:10b, 11) Sing lagi dipikirké lan dirasakké Hana, kabèh dicritakké ing Yéhuwah. Yéhuwah sayang banget karo Hana. Yéhuwah mesthi sedhih banget wektu ndelok Hana nangis.

7. Bar nyritakké kabèh ing Yéhuwah, Hana dadi piyé?

⁷ Bar kabèh dicritakké ing Yéhuwah lan dikandhani Imam Agung Èli nèk Yéhuwah bakal njawab dongané, piyé perasaané Hana? Ing Alkitab disebutké, ”Dhèwèké metu lan mangan. Dhèwèké ora sedhih manèh.” (1 Sam. 1:​17, 18) Meskipun situasiné ora berubah, Hana ngrasa luwih tenang. Dhèwèké yakin nèk Yéhuwah memahami perasaané, ngerti sing dhèwèké adhepi, lan bakal nulungi dhèwèké. Nah, Yéhuwah terbukti nggatèkké Hana, ngrungokké dongané, lan akhiré Hana nduwé anak.—1 Sam. 1:​19, 20; 2:21.

8-9. Menurut Ibrani 10:​24, 25, ngapa kok kudu tetep ngupaya kanggo teka ngibadah? (Deloken gambar.)

 ⁸ Pelajarané. Isa waé, njenengan ya ngadhepi masalah sing marakké njenengan sedhih banget nganti nangis. Mungkin merga ditinggal mati karo keluarga utawa kanca. Nèk ngalami kaya ngono, biasané dadi péngin dhèwèkan. Tapi, élinga nèk Yéhuwah menghibur lan nguwatké Hana merga Hana lunga ing tabernakel. Nah, Yéhuwah ya bakal nguwatké njenengan nèk njenengan tetep teka ngibadah meskipun ora semangat utawa sedhih. (Wacanen Ibrani 10:​24, 25.) Liwat ayat-ayat sing diwacakké pas pertemuan ibadah, Yéhuwah isa mbantu bèn awaké dhéwé ora terus-terusan mikirké sing marakké sedhih. Émosiné awaké dhéwé dadi terkontrol, meskipun situasiné ora langsung berubah.

⁹ Ing pertemuan ibadah, awaké dhéwé isa bergaul karo sedulur-sedulur sing nguwatké, nyemangati, lan sayang karo awaké dhéwé. (1 Tés. 5:​11, 14) Ana sedulur lanang perintis istiméwa sing bojoné mati. Dhèwèké ngomong, ”Nèk pas kangen bojoku, aku dadi nangis terus. Nèk wis ngono, aku pénginé dhèwèkan. Tapi nèk teka ing pertemuan ibadah, aku éntuk kekuwatan sing tak butuhké. Aku dikuwatké pas krungu omongané para sedulur sing apikan lan koméntaré meréka pas pertemuan ibadah. Meskipun pas arep mangkat ngibadah rasané abot banget, tapi bar kuwi mesthi aku dadi luwih tenang.” Ing pertemuan ibadah, Yéhuwah isa nguwatké awaké dhéwé liwat para sedulur.

10. Kaya Hana, wektu lagi sedhih banget, apa sing isa dilakukan?

¹⁰ Atiné Hana ya dadi tenang sakwisé ndonga lan nyritakké kabèh sing dirasakké. Njenengan ya isa ’masrahké kabèh rasa kuwatir marang Yéhuwah’ lan yakin nèk Dhèwèké mesthi bakal ngrungokké. (1 Ptr. 5:7) Ana sedulur wédok sing bojoné dipatèni perampok. Sedulur kuwi crita, ”Wektu kuwi, atiku rasané remuk nganti aku mikir nèk aku ora bakal isa bahagia manèh. Tapi, bar ndonga karo Yéhuwah, atiku dadi lega. Kadhang, aku mèh nyritakké perasaanku tapi bingung mèh ngomong apa. Tapi, Yéhuwah isa memahami aku. Wektu sedhih lan kuwatir banget, aku ndonga njaluk kedamaian. Bar kuwi, aku ngrasa luwih tenang lan isa menjalani dina kuwi.” Dadi, wektu njenengan ndonga karo nangis lan nyritakké kabèh sing dirasakké, Yéhuwah ya mèlu sedhih lan isa memahami perasaané njenengan. Bahkan nèk masalahé isih ana, Yéhuwah isa nggawé njenengan luwih tenang. (Mzm. 94:19; Flp. 4:​6, 7) Yéhuwah ya bakal mberkahi kesetiaané njenengan.—Ibr. 11:6.

NANGIS MERGA DIKHIANATI

11. Merga dijahati, Daud dadi ngrasa piyé?

¹¹ Ana akèh kesulitan sing diadhepi Daud sakjegé uripé, sing marakké dhèwèké nangis. Dhèwèké dimungsuhi akèh wong lan bahkan dikhianati karo kanca lan keluargané. (1 Sam. 19:​10, 11; 2 Sam. 15:​10-14, 30) Daud tau ngomong, ”Aku wis kesel sambat. Sewengi aku nangis terus nganti panggonanku turu dadi teles. Panggonanku turu kebak banyu merga tangisanku.” Ngapa kok Daud nganti kaya ngono? Dhèwèké ngomong, ”Kabèh  wong nindhes aku.” (Mzm. 6:​6, 7) Merga dijahati, Daud dadi sedhih banget nganti nangis terus.

12. Daud yakin apa soal Yéhuwah? (Mazmur 56:8)

¹² Meskipun ngadhepi akèh kesulitan, Daud yakin nèk Yéhuwah sayang karo dhèwèké. Daud nulis, ”Yéhuwah bakal ngrungokké swara tangisku.” (Mzm. 6:8) Daud ya tau nulis puisi sing ditulis ing Mazmur 56:8. (Wacanen.) Daud ngomong nèk Yéhuwah seolah-olah nyimpen air matané Daud ing wadhah, utawa nulis kuwi ing buku. Daud yakin nèk Yéhuwah nggatèkké lan éling karo kesusahané Daud. Daud ya yakin nèk Yéhuwah ora mung ngerti masalahé, tapi ya memahami sing dhèwèké rasakké. Dadi liwat kata-kata kuwi, awaké dhéwé dadi ngerti nèk Yéhuwah paham perasaané awaké dhéwé.

13. Meskipun dikecéwakké utawa dikhianati, awaké dhéwé isa éling apa? (Deloken gambar.)

¹³ Pelajarané. Apa saiki njenengan lagi lara ati merga dikecéwakké utawa dikhianati wong sing njenengan percaya? Mungkin merga putus karo pacar, pegatan, utawa wong sing disayangi ditokké saka jemaat. Ana sedulur lanang sing bojoné selingkuh, terus ninggalké dhèwèké. Sedulur kuwi ngomong, ”Aku ora nyangka bakal ngalami iki. Aku sedhih, nesu, lan ngrasa gagal.” Sedulur lanang mau crita manèh, ”Nèk manungsa, isa waé ora setya. Tapi nèk Yéhuwah, ora mungkin ora setya. Ora soal apa sing kelakon, Dhèwèké selalu siap nulungi. Dhèwèké ora bakal ninggalké umaté sing setya.” (Mzm. 37:28) Nèk njenengan dikhianati utawa dikecéwakké, élinga nèk Yéhuwah ora bakal ninggalké njenengan. Kasih sayangé Yéhuwah ngluwihi kasih sayangé manungsa. Meskipun njenengan dikhianati, Yéhuwah bakal tetep sayang lan nganggep njenengan berharga. (Rm. 8:​38, 39) Intiné: Yéhuwah bakal selalu sayang ora soal piyé perlakuané wong liya karo njenengan.

14. Ing Mazmur 34:18 ana jaminan apa?

¹⁴ Wektu dikhianati, njenengan isa dihibur karo kata-katané Daud ing Mazmur 34:18. (Wacanen.) Ana réferènsi sing nyebutké nèk ”wong sing putus asa” isa waé ngrasa nèk wis ora ana manèh hal apik ing masa depan. Piyé Yéhuwah mbantu wong-wong sing ngrasa kaya ngono? Yéhuwah ”cedhak” karo wong-wong kuwi. Dhèwèké bakal mèlu ngrasakké lan langsung mbantu meréka.  Kaya wong tuwa sing nggéndhong lan ngeneng-eneng anaké sing lagi nangis, Yéhuwah péngin menghibur lan nambani lara atiné wong-wong kuwi. Dhèwèké ngekèki harapan bèn meréka isa bertahan ngadhepi masalah.—Yés. 65:17.

NANGIS MERGA NGRASA ORA ANA HARAPAN

15. Apa sing marakké Raja Hizkia nangis?

¹⁵ Wektu umur 39, Raja Hizkia saka Yéhuda lara parah. Liwat Nabi Yésaya, Yéhuwah ngomong nèk Hizkia bakal mati. (2 Raj. 20:1) Penyakité Hizkia ora bakal mari. Merga ngrasa wis ora nduwé harapan, Hizkia nangis banter banget. Terus, dhèwèké ndonga tenanan karo Yéhuwah.—2 Raj. 20:​2, 3.

16. Wektu Hizkia ndonga karo nangis, Yéhuwah piyé?

¹⁶ Wektu ngrungokké dongané Hizkia lan ndelok Hizkia nangis, Yéhuwah ngrasa mesakké. Yéhuwah ngomong, ”Aku wis krungu dongamu lan ndelok kowé nangis. Aku arep marèkké kowé.” Liwat Yésaya, Yéhuwah janji nèk umuré Hizkia bakal ditambahi lan Yéhuwah ya bakal nylametké Yérusalèm saka Asiria.—2 Raj. 20:​4-6.

17. Wektu awaké dhéwé lara parah, Yéhuwah mbantuné piyé? (Mazmur 41:3) (Deloken gambar.)

¹⁷ Pelajarané. Nèk saiki lagi lara parah lan kétoké ora bakal mari, ndongaa lan critakna perasaané njenengan karo Yéhuwah. Bahkan nèk ndongané nganti nangis-nangis, Yéhuwah bakal ngrungokké. Ing Alkitab disebutké nèk Yéhuwah kuwi ”Bapak sing gampang mesakké lan Gusti Allah sing mènèhi penghiburan ing keadaan apa waé”. (2 Kor. 1:​3, 4) Saiki, Yéhuwah ora bakal nyingkirké kabèh masalah, tapi Dhèwèké terbukti selalu isa diendelké. (Wacanen Mazmur 41:3.) Liwat roh suciné, Yéhuwah bakal ngekèki kekuwatan, kawicaksanan, lan kedamaian. (WB. 18:14; Flp. 4:13) Yéhuwah ya ngekèki harapan nèk sukmbèn ora bakal ana sing lara.—Yés. 33:24.

18. Ayat apa sing isa menghibur njenengan wektu ngadhepi kesulitan? (Deloken kothak ” Omongané Yéhuwah sing Menghibur Wong sing Nangis”.)

¹⁸ Hizkia dadi tenang bar ngrungokké omongané Yéhuwah. Wektu lagi tertekan, awaké dhéwé ya isa dadi tenang nèk maca omongané Yéhuwah ing Alkitab. (Rm. 15:4) Ana sedulur wédok ing Afrika Barat sing dadi kerep nangis bar ngerti nèk dhèwèké lara kanker. Dhèwèké crita, ”Aku dikuwatké banget karo ayat ing Yésaya 26:3. Meskipun situasiku ora isa diubah, ayat kuwi ngyakinké aku nèk Yéhuwah bakal mbantu aku bèn  tenang lan isa ngadhepi laraku iki.” Apa ana ayat sing marakké njenengan dadi tenang wektu ngadhepi situasi sing kétoké wis ora ana harapan manèh?

19. Masa depan apa sing bakal awaké dhéwé nikmati?

¹⁹ Saya suwé, ana saya akèh sing marakké awaké dhéwé nangis merga sedhih. Tapi kaya contoné Hana, Daud, lan Raja Hizkia, Yéhuwah ndelok lan mèlu sedhih wektu awaké dhéwé nangis. Air matané awaké dhéwé kuwi berharga kanggo Yéhuwah. Dadi wektu ngrasa tertekan, critakna kabèh ing Yéhuwah. Aja ngedoh saka para sedulur ing jemaat. Terus, ya kudu tetep maca Alkitab bèn isa dikuwatké omongané Yéhuwah. Awaké dhéwé isa yakin nèk terus setya karo Yéhuwah, Yéhuwah bakal mberkahi. Awaké dhéwé isa menikmati janjiné nèk sukmbèn ora ana manèh sing nangis merga susah, dikhianati, lan ngrasa ora nduwé harapan. (Why. 21:4) Sukmbèn, sing ana mung wong sing nangis merga bahagia.