1-2. Situasiné awaké dhéwé padha kaya situasiné cah lanang ing paragraf 1. Kok isa?

 BAYANGNA ana cah lanang sing wong tuwané sugih banget. Tapi, ngerti-ngerti wong tuwané mati merga kecelakaan. Cah lanang kuwi mesthi kagèt lan sedhih banget. Tapi sing marakké luwih kagèt manèh, ternyata wong tuwané selama iki ngentèk-entèkké dhuwit lan nduwé utang akèh banget. Dadi, dhèwèké ora éntuk warisan, tapi malah dioyak-oyak kon mbayar utangé wong tuwané. Merga saking akèhé utang kuwi, dhèwèké ora bakal isa nglunasi.

² Situasiné awaké dhéwé kaya situasiné cah lanang kuwi. Wong tuwané awaké dhéwé sing pertama, Adam karo Hawa, mauné sampurna lan manggon ing Firdaus. (PD. 1:27; 2:​7-9) Meréka uripé kecukupan lan isa urip saklawasé. Tapi, Adam karo Hawa nggawé dosa. Akibaté, Yéhuwah ngusir meréka saka Taman Èden lan meréka ora isa urip saklawasé. Terus, keturunané éntuk warisan apa? Ing Alkitab disebutké, ”Dosa mlebu ing donya liwat wong siji [Adam], lan kematian nyebar liwat dosa kuwi. Kuwi sebabé kabèh wong bakal mati merga kabèh wong wis dosa.” (Rm. 5:12) Sing diwariské Adam kanggo keturunané kuwi dosa sing marakké kematian. Dosa warisan iki kaya utang sing gedhé banget, lan ora ana keturunané Adam sing isa nglunasi utang kuwi.—Mzm. 49:8.

 3. Kok isa dosa dipadhakké kaya ”utang”?

³ Yésus madhakké dosa kaya ”utang”. (Mat. 6:12; Luk. 11:​4, cathetan ngisor, lan keterangan tambahan saka Kitab Suci Terjemahan Dunia Baru edisi pelajaran) Merga  dosa, awaké dhéwé seolah-olah nduwé utang karo Yéhuwah. Utang kuwi kudu dibayar. Nèk ora dibayar, awaké dhéwé kudu mati kanggo nglunasi dosa kuwi.—Rm. 6:​7, 23.

 4. (a) Nèk ora dibantu Yéhuwah, apa sing bakal dialami kabèh wong sing dosa? (Mazmur 49:​7-9) (b) Ing Alkitab, kata ”dosa” isa maksudé apa waé? (Deloken kothak ” Dosa”.)

⁴ Nèk ngendelké kemampuané dhéwé, ora mungkin awaké dhéwé isa éntuk manèh kabèh sing wis diilangké Adam karo Hawa. (Wacanen Mazmur 49:​7-9.) Nèk ora dibantu Yéhuwah, awaké dhéwé ora bakal nduwé harapan diuripké manèh utawa urip saklawasé. Kaya kéwan, awaké dhéwé mung bakal mati lan ora isa urip manèh.—Pkh. 3:19; 2 Ptr. 2:12.

 5. Piyé carané Yéhuwah nglunasi ”utang” dosané awaké dhéwé? (Deloken gambar.)

⁵ Pikirna manèh cah lanang sing disebutké ing awal artikel. Nèk ana wong sugih nawani arep nglunasi utang-utangé, dhèwèké mesthi bersyukur banget lan gelem nampa bantuan kuwi. Padha kaya ngono, Yéhuwah gelem nglunasi ”utang” dosa sing awaké dhéwé warisi saka Adam. Piyé carané? Yésus ngomong, ”Merga tresna banget karo wong-wong ing donya iki, Gusti Allah nganti gelem mènèhké Anaké siji-sijiné, supaya saben wong sing nduduhké iman marang Anaké ora mati, ning isa urip saklawasé.” (Yoh. 3:16) Hadiah sing luar biasa kuwi ya marakké awaké dhéwé nduwé hubungan sing apik karo Yéhuwah.

 6. Apa sing bakal dibahas ing artikel iki, lan apa manfaaté mempelajari kuwi?

⁶ Kok isa hadiah sing luar biasa kuwi marakké dosa-dosané awaké dhéwé sing dipadhakké kaya utang dadi diampuni? Bèn isa ngerti jawabané, ayo mbahas artiné beberapa keterangan ing Alkitab sing ana hubungané karo hadiah kuwi. Nèk ngrenungké kuwi, awaké dhéwé bakal semakin menghargai pengampunan saka Yéhuwah.

TUJUAN: MANUNGSA ISA RUKUN KARO YÉHUWAH

 7. (a) Sakliyané ora isa urip saklawasé, apa manèh akibaté merga Adam lan Hawa nggawé dosa? (b) Keturunané Adam lan Hawa bener-bener butuh diapakké? (Roma 5:​10, 11)

⁷ Bar nggawé dosa, Adam karo Hawa ora isa urip saklawasé. Tapi, ora mung kuwi. Meréka ya dadi mungsuhé Gusti Allah. Kok isa? Sakdurungé dosa, Adam karo Hawa kuwi anggota keluargané  Yéhuwah. (Luk. 3:38) Tapi merga ora manut Yéhuwah, meréka ora éntuk dadi anggota keluargané Yéhuwah manèh. Kuwi kabèh kelakon sakdurungé meréka nduwé anak. (PD. 3:​23, 24; 4:1) Makané kabèh keturunané, termasuk awaké dhéwé, butuh dirukunké karo Yéhuwah. (Wacanen Roma 5:​10, 11.) Kuwi berarti ora dadi mungsuhé Yéhuwah manèh, tapi dadi kancané. Sing luar biasa, Yéhuwah sing nduwé inisiatif kanggo memulai iki. Piyé carané?

PENGATURAN: PENGAMPUNAN

 8. Yéhuwah nggawé pengaturan apa bèn manungsa isa rukun manèh karo Dhèwèké?

⁸ Yéhuwah nggawé pengaturan soal pengampunan bèn manungsa sing dosa isa rukun manèh karo Dhèwèké. Bèn sing diilangké Adam isa balik manèh, Yéhuwah nyedhiakké sesuatu sing nilainé padha. Ing Kitab-Kitab Yunani Kristen, istilah ”pengampunan” diterjemahké dadi upayané Yéhuwah bèn manungsa isa diampuni lan nduwé hubungan sing apik karo Dhèwèké.—Rm. 3:25.

 9. Bèn dosané bangsa Israèl isa diampuni, Yéhuwah nggawé pengaturan sementara apa?

⁹ Mbiyèn, Yéhuwah nggawé pengaturan sementara bèn dosané wong Israèl isa diampuni lan meréka isa nduwé hubungan sing apik karo Yéhuwah. Setaun pisan, wong Israèl ngrayakké Dina Mènèhké Korban kanggo Ngapura Dosa. Pas dina kuwi, imam agung bakal ngekèkké korban kéwan bèn dosané bangsa Israèl isa diapura. Ya mémang, korban kéwan ora isa nggawé meréka bener-bener diampuni. Tapi, selama wong Israèl bertobat lan ngekèkké korban kuwi, Yéhuwah gelem ngampuni meréka. (Ibr. 10:​1-4) Pengaturan kuwi lan korban persembahan pas dina-dina liyané ya dadi pengingat kanggo bangsa Israèl nèk meréka dosa lan butuh korban sing bener-bener isa ngampuni meréka.

10. Bèn dosané kabèh manungsa isa bener-bener diampuni, Yéhuwah nggawé pengaturan apa?

¹⁰ Yéhuwah nggawé pengaturan bèn dosané kabèh manungsa isa bener-bener diampuni. Yéhuwah ngatur bèn anaké sing disayangi ”dikorbanké ping pisan kanggo saklawasé kanggo nanggung dosané akèh wong”. (Ibr. 9:28) Yésus ”masrahké uripé dadi tebusan kanggo wong akèh”. (Mat. 20:28) Tebusan kuwi apa?

REGA SING DIBAYAR: TEBUSAN

11. (a) Menurut Alkitab, tebusan kuwi apa? (b) Sing isa dadi tebusan kuwi mung sapa?

¹¹ Menurut Alkitab, tebusan kuwi rega sing dibayar bèn éntuk pengampunan lan rukun manèh. a Nah bèn sing wis diilangké Adam isa balik manèh, Yéhuwah wis nentokké kudu ana tebusan. Tebusané apa? Élinga nèk sing diilangké Adam karo Hawa kuwi urip sing sampurna lan kesempatan kanggo urip saklawasé. Nah, tebusané ya kudu sesuatu sing nilainé padha karo sing wis diilangké. (1 Tim. 2:6) Makané, sing isa dadi tebusan mung wong lanang sing wis déwasa sing (1) sampurna, (2) isa urip saklawasé ing bumi, lan (3) gelem ngorbanké utawa masrahké uripé kanggo manungsa. Nah, nyawané wong sing memenuhi telu syarat kuwi mau sing bakal ngganti apa sing wis ilang.

12. Ngapa kok Yésus cocog dadi tebusan?

 ¹² Nah, Yésus cocog dadi tebusan. Alesané: (1) Dhèwèké sampurna. ”Dhèwèké ora nindakké dosa.” (1 Ptr. 2:22) (2) Merga sampurna, dhèwèké isa urip saklawasé ing bumi. (3) Dhèwèké gelem mati lan masrahké uripé kanggo manungsa. (Ibr. 10:​9, 10) Yésus kuwi manungsa sing sampurna, padha kaya Adam sakdurungé nggawé dosa. (1 Kor. 15:45) Dadi merga Yésus mati, dhèwèké isa mbayar rega sing nilainé padha karo sing diilangké Adam. (Rm. 5:19) Makané, Yésus dadi ”Adam sing terakhir”. Ora perlu ana manèh wong sing sampurna kanggo mbayar apa sing wis diilangké Adam. Yésus mati ”ping pisan kanggo saklawasé”.—Ibr. 7:27; 10:12.

13. Apa hubungané pengampunan karo tebusan?

¹³ Apa hubungané pengampunan karo tebusan? Pengaturan soal pengampunan kuwi upayané Gusti Allah bèn manungsa sing dosa isa nduwé hubungan sing apik karo Dhèwèké. Tapi bèn pengampunan kuwi isa dilakukan, kudu ana tebusan, utawa rega sing dibayar. Nah, tebusané kuwi uripé Yésus sing sampurna.—Éf. 1:7; Ibr. 9:14.

HASIL: DIBÉBASKÉ LAN DIANGGEP BENER

14. Saiki apa sing arep dipelajari, lan ngapa kok kuwi dipelajari?

¹⁴ Apa hasilé pengaturan soal pengampunan kuwi? Bèn isa ngerti jawabané, ayo mbahas loro istilah ing Alkitab sing digunakké kanggo njelaské soal kuwi. Nèk mempelajari istilah-istilah kuwi, mengko bakal ngerti manfaat pengampunané Yéhuwah kanggo awaké dhéwé masing-masing.

15-16. (a) Menurut Alkitab, awaké dhéwé isa dibébaské kuwi merga apa lan saka apa? (b) Merga dibébaské, awaké dhéwé dadi ngrasa piyé?

¹⁵ Ing Alkitab disebutké nèk awaké dhéwé isa dibébaské merga tebusan wis dibayar. Rasul Pétrus njelaskéné kaya ngéné, ”Kowé ngerti nèk apa waé sing isa hancur, contoné pérak utawa emas, ora isa mbébaské [literal: ”ora isa nebus”] kowé saka kebiasaan sing ora ana gunané saka nènèk moyangmu. Ning, kowé dibébaské nganggo getihé Kristus sing berharga, sing kaya getihé domba sing séhat lan ora ana cacadé.”—1 Ptr. 1:​18, 19, lan cathetan ngisor.

¹⁶ Merga ana korban tebusan, awaké dhéwé isa bébas saka dosa lan kematian sing marakké sengsara. (Rm. 5:21) Makané, awaké dhéwé mesthi maturnuwun banget karo Yéhuwah lan Yésus.—1 Kor. 15:22.

17-18. (a) Dianggep bener kuwi berarti apa? (b) Apa manfaaté merga dianggep bener?

¹⁷ Hasil liyané yaiku umaté Yéhuwah dianggep bener. Kuwi berarti Yéhuwah ora nuntut awaké dhéwé mbayar ”utang” dosa sing wis dilakukan. Tapi, kuwi ora berarti Yéhuwah nglanggar pathokané soal keadilan. Yéhuwah nganggep umaté kuwi wong sing bener dudu merga meréka mémang bener. Yéhuwah tetep ora seneng karo dosa. Tapi merga tebusan wis dibayar lan awaké dhéwé beriman karo pengaturan soal pengampunan, Yéhuwah dadi gelem ngampuni awaké dhéwé.—Rm. 3:24; Gal. 2:16.

¹⁸ Apa manfaaté merga dianggep bener? Ana sing dipilih kanggo mréntah ing swarga bareng karo Yésus lan dadi anak-anaké Gusti Allah. (Tit. 3:7; 1 Yoh. 3:1) Meréka wis diampuni lan dianggep  ora tau melakukan dosa-dosa kuwi, makané memenuhi syarat kanggo dadi raja ing Kerajaané Gusti Allah. (Rm. 8:​1, 2, 30) Terus ya ana wong-wong sing dianggep bener sing bakal urip saklawasé ing bumi. Yéhuwah wis ngampuni meréka lan nganggep meréka dadi sahabaté. (Yak. 2:​21-23) Kumpulan gedhé sing bakal slamet ngliwati Armagédon bakal nduwé kesempatan kanggo babar blas ora mati. (Yoh. 11:26) ”Wong-wong sing bener lan sing ora bener” sing wis mati bakal diuripké manèh. (Kis. 24:15; Yoh. 5:​28, 29) Akhiré, kabèh umaté Yéhuwah sing setya ing bumi ”bakal nduwé kebébasan kaya anak-anaké Gusti Allah”. (Rm. 8:21) Awaké dhéwé mesthi ngentèni banget wektuné isa rukun manèh karo Yéhuwah, Bapaké awaké dhéwé.

19. Situasiné awaké dhéwé isa berubah dadi luwih apik. Kok isa? (Deloken kothak ” Pengampunané Yéhuwah”.)

¹⁹ Situasiné awaké dhéwé mauné padha kaya cah lanang sing disebutké ing paragraf awal, sing wis ora nduwé apa-apa, utangé akèh banget, lan ora isa mbayar. Tapi, situasiné awaké dhéwé isa berubah merga Yéhuwah nulungi. Yéhuwah nyedhiakké pengaturan soal pengampunan lan Yésus dadi tebusané. Merga beriman karo Yésus, awaké dhéwé isa dibébaské saka dosa lan kematian. Awaké dhéwé ya diampuni lan dianggep ora tau melakukan dosa. Sing paling penting, saiki awaké dhéwé isa nduwé hubungan sing apik karo Yéhuwah, Bapaké awaké dhéwé.

20. Apa sing bakal dibahas ing artikel berikuté?

²⁰ Wektu ngrenungké sing wis dilakukan Yéhuwah karo Yésus kanggo awaké dhéwé, rasané mesthi bersyukur banget. (2 Kor. 5:15) Nèk ora ditulungi meréka, awaké dhéwé babar blas ora nduwé harapan. Nah, ing artikel berikuté bakal dijelaské beberapa perumpamaan ing Alkitab sing nduduhké nèk awaké dhéwé ora perlu terus-terusan ngrasa bersalah nèk wis diampuni Yéhuwah.