1-2. Apa buktiné nèk keadaané saiki padha kaya jamané Lot?

 KEADAAN saiki mèh padha kaya jamané Lot. Lot ”sengsara banget merga tumindak kurang ajar sing ditindakké wong-wong jahat”. (2 Ptr. 2:7, 8) Lot ngrasa kaya ngono merga ngerti nèk Yéhuwah ora seneng karo perbuatané wong-wong kuwi. Merga wedi lan sayang karo Yéhuwah, Lot ora mèlu-mèlu. Wong-wong saiki moralé ya bobrok. Tapi awaké dhéwé ora bakal terpengaruh nèk terus sayang lan wedi karo Yéhuwah.​—WB. 14:2.

² Ing Wulang Bebasan ana akèh naséhaté Yéhuwah sing apik. Kabèh umaté Yéhuwah, lanang, wédok, tuwa, utawa enom, isa éntuk manfaat nèk manut.

3. Menurut Wulang Bebasan 17:3, kenapa kudu nglindhungi ati? (Deloken gambar kanggo paragraf 3.)

³ Awaké dhéwé péngin nglindhungi ati merga Yéhuwah ngerti isi ati. Yéhuwah ngerti tenan awaké dhéwé wongé piyé. (Wacanen Wulang Bebasan 17:3.) Yéhuwah seneng nèk awaké dhéwé terus mikirké naséhaté sing isa marahi urip saklawasé. (Yoh. 4:14) Nèk ngono, pandhangané Sétan karo wong-wong ing donya iki ora isa mlebu ing pikirané awaké dhéwé. (1 Yoh. 5:18, 19) Nèk tambah cedhak karo Yéhuwah, awaké dhéwé bakal tambah sayang lan ngajèni Yéhuwah. Merga ora péngin nglarani atiné, awaké dhéwé bakal sengit karo apa sing disengiti Yéhuwah. Nèk ana sing ngejak kanggo ora manut Yéhuwah, coba pikirna, ’Mosok aku téga nglarani Yéhuwah sing wis sayang karo aku?’​—1 Yoh. 4:9, 10.

4. Apa manfaaté merga sedulur Marta wedi karo Yéhuwah?

 ⁴ Gatèkna pengalamané sedulur wédok sing jenengé Marta b saka Kroasia. Dhèwèké dijak hubungan sèks. Dhèwèké ngomong, ”Jujur wektu dijak kaya ngono, angèl rasané kanggo nolak. Tapi merga wedi karo Yéhuwah, aku isa berhasil.” Kok isa? Marta mikirké apa akibaté. Awaké dhéwé isa niru Marta. Pikirna apa akibaté nèk awaké dhéwé kegodha kanggo hubungan sèks sing ora pantes. Awaké dhéwé isa nggawé Yéhuwah sedhih lan ora isa nglayani Dhèwèké nganti saklawasé.​—PD. 6:5, 6.

5. Apa waé sing isa dipelajari saka pengalamané Leo?

⁵ Nèk wedi karo Yéhuwah, awaké dhéwé ora bakal nggolèk-nggolèk alesan. Gatèkna pengalamané Leo saka Kongo. Patang taun sakwisé dibaptis, dhèwèké kancanan karo wong-wong sing kelakuané ora nggenah. Dhèwèké mikir nèk kancanan thok ora apa-apa sing penting ora mèlu-mèlu. Tapi suwé-suwé dhèwèké mulai terpengaruh. Dhèwèké mabuk-mabukan lan nindakké hubungan sèks sing ora pantes. Terus dhèwèké mikirké pathokan Alkitab sing tau diajarké wong tuwané. Dhèwèké dadi sadhar nèk nglayani Yéhuwah luwih bahagia. Akhiré dhèwèké berubah. Merga dibantu para pinituwa, dhèwèké isa nglayani Yéhuwah manèh. Saiki dhèwèké nglayani dadi pinituwa lan perintis istiméwa.

6. Wulang Bebasan bab 9 nyritakké soal apa?

⁶ Ing Wulang Bebasan bab 9, ana wong  wédok loro. Sing siji wicaksana, sing siji bodho. c Pas ngrembug kuwi, élinga nèk donyané Sétan dikebaki pornografi lan wong-wong sing mung mikirké sèks. (Éf. 4:19) Kuwi sebabé, wedi karo Yéhuwah lan ngedohi sing jahat kuwi penting banget. (WB. 16:6) Ora soal lanang utawa wédok, kabèh isa éntuk manfaat saka rembugan iki. Wong wédok loro kuwi ngundang ”wong sing kurang pertimbangan”, kaya-kayané ngomong, ’Mrénéa, mangana karo aku.’ (WB. 9:1, 5, 6, 13, 16, 17) Meskipun undangané padha, hasilé béda.

7. Menurut Wulang Bebasan 9:13-18, apa akibaté nèk nampa undangan saka wong wédok sing bodho? (Deloken gambar kanggo paragraf 7.)

⁷ ”Wong wédok sing bodho” ngundang wong sing ora nduwé pengalaman, ”Ayo mréné” lan mangan bareng karo aku. (Wacanen Wulang Bebasan 9:13-18.) Apa akibaté? ”Omahé wong wédok kuwi kebak mayat.” Mungkin njenengan dadi kèlingan karo ayat-ayat liyané ing Wulang Bebasan. Awaké dhéwé dikon ngati-ati karo ”wong wédok sing bejat” lan ”ora nggenah”. ”Nèk kowé mara ing omahé, kuwi padha waé karo golèk mati.” (WB. 2:11-19) Terus ing Wulang Bebasan 5:3-10, awaké dhéwé diélingké soal ”wong wédok sing bejat” sing ”sikilé mudhun ing kematian”.

8. Awaké dhéwé kudu nggawé keputusan soal apa?

⁸ Wektu diundang karo ”wong wédok sing bodho”, isa milih arep ditampa apa ora. Awaké dhéwé ya isa milih. Wektu dijak hubungan sèks utawa ana pornografi ing TV utawa internèt, awaké dhéwé bakal piyé?

9-10. Apa waé alesané awaké dhéwé ora nindakké hubungan sèks sing ora pantes?

⁹ Kenapa awaké dhéwé péngin ngedohi hubungan sèks sing ora pantes? ”Wong wédok sing bodho” kuwi ngomong, ”Banyu hasil colongan kuwi legi.” Apa kuwi ”banyu hasil colongan”? Ing Alkitab, hubungan sèks sing wajar antara suami istri sing menikah sah dipadhakké kaya banyu sing seger. (WB. 5:15-18) Nèk ”banyu hasil colongan” kuwi mungkin maksudé hubungan  sèks sing ora pantes utawa perilaku sèks sing menyimpang. Kuwi biasané ndhelik-ndhelik kaya maling sing ndhelik-ndhelik wektu nyolong. ”Banyu hasil colongan” kuwi kétoké ”legi” merga sing ngombé mikir nèk ora konangan. Tapi Yéhuwah ndelok kabèh. Nggawé Yéhuwah ora seneng kuwi ora ”legi” babar blas. (1 Kor. 6:9, 10) Sakliyané kuwi, apa manèh akibaté?

¹⁰ Wong sing nindakké hubungan sèks sing ora pantes isa waé isin, ora nduwé harga diri, hamil diluar nikah, lan cerai. Kuwi sebabé wong sing wicaksana ora bakal teka ing ”omahé” wong wédok sing bodho lan mangan panganané. Terus, wong sing nindakké hubungan sèks sing ora pantes isa kena penyakit sèks menular lan mati. (WB. 7:23, 26) Kuwi cocog karo Wulang Bebasan 9:18, ”Tamu-tamuné ana ing Kuburan sing jero.” Lha tapi kok akèh sing nampa undangané?​—WB. 9:13-18.

11. Kenapa nonton pornografi kuwi berbahaya?

¹¹ Akèh sing mikir nonton pornografi kuwi ora apa-apa. Nyatané kuwi bahaya banget. Wong sing nonton pornografi ora nduwé harga diri, kecanduan, lan isa mikir saru soal wong liya. Sepisan nonton, bakal kèlingan terus. Nonton pornografi ora matèni kepénginan sing salah, tapi malah nggawé kepénginan kuwi saya kuwat. (Kol. 3:5; Yak. 1:14, 15) Akèh sing nonton pornografi akhiré nindakké hubungan sèks sing ora pantes.

12. Apa buktiné awaké dhéwé nduwé tékad kanggo nolak pornografi?

¹² Nèk ngerti-ngerti ing perangkat èlèktronik ana gambar pornografi piyé? Aja didelok. Pikirna nèk hubungané awaké dhéwé karo Yéhuwah luwih berharga. Terus, meskipun gambar kuwi dudu pornografi tapi nèk marahi nafsu, ya aja didelok. Kenapa? Awaké dhéwé babar blas ora gelem mikirké sing saru-saru. (Mat. 5:28, 29) David, pinituwa saka Thailand, ngomong, ”Aku mikir, ’Meskipun gambar kuwi dudu pornografi, tapi apa Yéhuwah seneng nèk aku ndelok kuwi terus?’ Merga mikir kaya ngono aku isa nggawé keputusan sing wicaksana.”

13. Piyé carané bèn isa nggawé keputusan sing wicaksana?

¹³ Awaké dhéwé isa nggawé keputusan sing wicaksana nèk wedi nggawé Yéhuwah kecéwa. ”Awalé kawicaksanan yaiku wedi marang Yéhuwah.” (WB. 9:10, cathetan ngisor) Ing Wulang Bebasan bab 9, ”kawicaksanan” digambarké kaya wong wédok sing sijiné.

14. Ing Wulang Bebasan 9:1-6 ana undangan apa?

¹⁴ Wacanen Wulang Bebasan 9:1-6. Ana undangan saka Yéhuwah, sumberé kawicaksanan. (WB. 2:6; Rm. 16:27) Ing perumpamaan kuwi disebutké soal omah gedhé sing nduwé pondhasi pitu. Kuwi nggambarké nèk Yéhuwah murah hati lan péngin ngundang kabèh wong bèn dadi wicaksana.

15. Yéhuwah ngundang awaké dhéwé kanggo apa?

¹⁵ Ing basa asliné, ”kawicaksanan” sing disebutké ing Wulang Bebasan bab 9 digambarké kaya wong wédok. Saka perumpamaan kuwi awaké dhéwé  isa ngerti nèk Yéhuwah murah hati. Wong wédok ing perumpamaan kuwi wis nyiapké daging, nyampur anggur, lan nata méja. (WB. 9:2) Ing ayat 4 karo 5 disebutké, ”Dhèwèké ngomong karo wong sing kurang pertimbangan, ’Ayo mréné lan mangan rotiku.’” Kenapa awaké dhéwé kudu teka ing omahé lan mangan panganané? Yéhuwah péngin awaké dhéwé wicaksana lan bahagia. Yéhuwah ora péngin awaké dhéwé nggawé kesalahan, ngrasakké akibaté, lagi ngerti sing bener. Kuwi sebabé kawicaksanané Yéhuwah ”diwènèhké marang wong sing bener”. (WB. 2:7) Nèk wedi karo Yéhuwah, awaké dhéwé mesthi péngin nyenengké Dhèwèké. Awaké dhéwé ngrungokké naséhaté lan péngin ngetrapké.​—Yak. 1:25.

16. Apa manfaaté merga Alain wedi karo Yéhuwah?

¹⁶ Gatèkna pengalamané pinituwa sing jenengé Alain. Dhèwèké kuwi guru. Alain crita, ”Akèh kanca kerjaku sing nganggep nèk film porno kuwi mung édukasi sèks.” Tapi dhèwèké ngerti nèk kuwi ora bener. Dhèwèké ngomong, ”Merga wedi karo Yéhuwah aku ora gelem mèlu nonton. Aku ya njelaské alesané.” Merga ngetrapké naséhat saka ”kawicaksanan”, Alain isa ”tumindak nganggo pemahaman”. (WB. 9:6) Kanca-kancané Alain dadi kagum lan saiki mulai sinau Alkitab lan teka ing pertemuan ibadah.

17-18. Apa waé berkahé nèk gelem nampa undangané ”kawicaksanan”? (Deloken gambar kanggo paragraf 17-18.)

¹⁷ Saka perumpamaan wong wédok loro, Yéhuwah ngandhani carané bèn awaké dhéwé isa bahagia. Wong-wong sing nampa undangané ”wong wédok sing bodho” sing cerèwèt, gelem nindakké hubungan sèks sing ora pantes. Meskipun kétoké ”legi”, wong-wong kuwi bakal ngrasakké akibaté. Wong-wong kuwi bakal ana ing ”Kuburan sing jero”.​—WB. 9:13, 17, 18.

¹⁸ Hasilé béda nèk nampa undangané wong wédok sing ’wicaksana’. Wong-wong kuwi bakal puas merga akèh panganan rohani. (Yés. 65:13) Liwat nabi Yésaya, Yéhuwah ngomong, ”Rungokna Aku tenanan. Mangana panganan sing énak, lan kowé bakal ngrasa seneng merga mangan panganan sing énak.” (Yés. 55:1, 2) Awaké dhéwé dadi seneng  karo sing disenengi Yéhuwah lan sengit karo sing disengiti Yéhuwah. (Mzm. 97:10) Awaké dhéwé ya péngin ngundang sak akèh-akèhé wong kanggo sinau saka ”kawicaksanan”, kaya-kayané lagi ”bengok-bengok ngéné saka panggonan sing paling dhuwur ing kutha, ’Sapa waé sing ora nduwé pengalaman, ayo mréné.’” Awaké dhéwé lan wong-wong sing ngrungokké bakal ngrasakké manfaaté ora mung saiki. Awaké dhéwé bakal ”isa terus urip” saklawasé merga ”tumindak nganggo pemahaman”.​—WB. 9:3, 4, 6.

19. Sesuai Pengkhotbah 12:13, 14, apa tékadé awaké dhéwé? (Deloken kothak ” Manfaaté Wedi karo Yéhuwah”.)

¹⁹ Wacanen Pengkhotbah 12:13, 14. Muga-muga awaké dhéwé terus wedi karo Yéhuwah. Awaké dhéwé bakal isa terus nglindhungi ati lan tetep resik ing donya sing bejat saiki. Merga wedi karo Yéhuwah, awaké dhéwé mesthi ya péngin ngundang sak akèh-akèhé wong sinau saka ”kawicaksanan”.