1-2. Menurut Mazmur 25:14, piyé carané bèn isa dadi kanca akrabé Yéhuwah?

 MENURUT njenengan, piyé bèn isa akrab karo kancané njenengan? Mungkin njenengan mikir, kudu saling mbantu lan saling nresnani. Kétoké karo kanca ora perlu wedi. Tapi menurut ayat téma, kabèh sing péngin dadi kanca akrabé Yéhuwah kudu ”wedi marang Dhèwèké”.​—Wacanen Mazmur 25:14.

² Ora soal wis suwé utawa lagi waé nglayani Yéhuwah, kabèh kudu tetep wedi karo Dhèwèké. Tapi, apa maksudé wedi karo Gusti Allah? Piyé carané isa wedi karo Yéhuwah? Apa sing isa dipelajari saka Obaja, Imam Agung Yéhoyada, lan Raja Yéhoas?

3. Ngapa kok awaké dhéwé wedi, lan apa manfaaté?

³ Awaké dhéwé isa waé wedi nèk ana bahaya. Merga wedi, awaké dhéwé nggawé keputusan sing apik. Merga wedi tiba, awaké dhéwé ora mlaku pinggir jurang. Merga wedi luka, awaké dhéwé ngati-ati pas ngapa-ngapa. Merga wedi nglarani atiné kancané awaké dhéwé, awaké dhéwé ora ngomong sak karepé dhéwé.

4. Sétan péngin awaké dhéwé mikir piyé soal Yéhuwah?

 ⁴ Sétan péngin wong-wong wedi karo Yéhuwah, tapi alesané ora bener. Sétan péngin wong-wong mikir kaya Èlifaz, nèk Yéhuwah kuwi nesunan lan awaké dhéwé ora mungkin isa nyenengké Dhèwèké. (Ayb. 4:18, 19) Sétan péngin awaké dhéwé kewedèn bèn ora nglayani Yéhuwah. Bèn ora kaya ngono, awaké dhéwé kudu wedi karo Yéhuwah tapi merga nduwé alesan sing bener.

5. Apa maksudé wedi karo Gusti Allah?

⁵ Wong sing wedi karo Yéhuwah, sayang karo Dhèwèké lan ora péngin nglarani atiné. Yésus ”wedi marang Gusti Allah”. (Ibr. 5:7) Yésus bener-bener ngajèni Yéhuwah. (Yés. 11:2, 3) Yésus ya sayang banget lan péngin manut karo Yéhuwah. (Yoh. 14:21, 31) Kaya Yésus, awaké dhéwé ngajèni lan kagum karo Yéhuwah merga Dhèwèké adil, wicaksana, mahakuwasa, lan sayang karo awaké dhéwé. Yéhuwah bener-bener perduli. Yéhuwah seneng nèk awaké dhéwé manut lan sedhih nèk awaké dhéwé ora manut.​—Mzm. 78:41; WB. 27:11.

6. Piyé carané bèn isa wedi karo Gusti Allah? (Mazmur 34:11)

⁶ Wedi karo Yéhuwah dudu gawan bayi. Kuwi kudu diupayakké. (Wacanen Mazmur 34:11.) Salah siji carané, ngamati ciptaan. Wektu nggatèkké ”kabèh ciptaané”, awaké dhéwé dadi ngerti nèk Gusti Allah wicaksana, nduwé kuwasa, lan sayang karo awaké dhéwé. (Rm. 1:20) Awaké dhéwé bakal saya sayang lan ngajèni Yéhuwah. Sedulur wédok sing jenengé Adrienne ngomong, ”Merga ngamati ciptaan, aku dadi sadhar nèk Yéhuwah wicaksana banget. Aku dadi kagum. Yéhuwah mesthi ngerti sing paling apik kanggo aku.” Merga kerep mikirké kuwi, dhèwèké isa nyimpulké, ”Yéhuwah kuwi sumber uripku. Mosok aku réla ana sing misahké aku saka Yéhuwah?” Seminggu iki, apa njenengan isa ngluangké wektu kanggo mikirké ciptaan? Njenengan bakal saya sayang lan ngajèni Yéhuwah.​—Mzm. 111:2, 3.

7. Ngapa kok nèk ndonga awaké dhéwé isa dadi wedi karo Yéhuwah?

⁷ Cara liyané bèn isa wedi karo Gusti Allah kuwi kerep ndonga. Saya kerep ndonga, saya ngerti sipat-sipaté Yéhuwah. Wektu ndonga njaluk kekuwatan, awaké dhéwé kèlingan nèk Yéhuwah mahakuwasa. Wektu ndonga maturnuwun merga wis mènèhi tebusan, awaké dhéwé kèlingan nèk Yéhuwah sayang karo awaké dhéwé. Wektu ndonga njaluk tulung kanggo ngatasi masalah, awaké dhéwé kèlingan nèk Yéhuwah wicaksana. Merga ndonga, awaké dhéwé semakin ngajèni Yéhuwah. Tékadé awaké dhéwé kanggo nyenengké Yéhuwah ya saya gedhé.

8. Piyé bèn isa tetep wedi karo Gusti Allah?

⁸ Awaké dhéwé isa tetep wedi karo Gusti Allah nèk sinau Alkitab. Ing Alkitab ana conto sing apik, ana sing èlèk. Ayo ngrembug loro abdiné Yéhuwah sing setya, yaiku Obaja, pengawas istanané Raja Ahab, lan Imam Agung Yéhoyada. Bar kuwi, awaké dhéwé bakal ngrembug Raja Yéhoas saka Yéhuda, sing akhiré ninggalké Yéhuwah.

9. Apa manfaaté merga Obaja wedi karo Yéhuwah? (1 Para Raja 18:3, 12)

⁹ Ing Alkitab disebutké nèk Obaja b kuwi ”wong sing bener-bener wedi marang Yéhuwah”. (Wacanen 1 Para Raja 18:3, 12.) Merga wedi karo Yéhuwah, dhèwèké jujur lan isa dipercaya. Kuwi sebabé, dhèwèké dipercaya dadi pengawas istanané raja. (Bandhingna karo Néhémia 7:2.) Obaja ya kendel banget. Kuwi sipat sing penting. Wektu kuwi nglayani Yéhuwah ora gampang, merga sing mréntah kuwi Raja Ahab sing ”luwih jahat timbang [raja-raja] sakdurungé dhèwèké”. (1 Raj. 16:30) Ahab ya nikah karo Izebèl sing nyembah Baal. Izebèl sengit banget karo Yéhuwah. Dhèwèké berupaya bèn kabèh wong ing kerajaan Israèl sepuluh suku ora nyembah Yéhuwah manèh. Dhèwèké ya matèni akèh banget nabiné Yéhuwah.​—1 Raj. 18:4.

10. Apa buktiné nèk Obaja kendel banget?

¹⁰ Apa buktiné Obaja kendel banget? Wektu Izebèl mèh matèni nabi-nabiné Yéhuwah, Obaja ndhelikké 100 nabiné Yéhuwah ing guwa-guwa, ”saben guwa wong 50”. Obaja ”ya terus nyedhiakké roti lan banyu kanggo wong-wong kuwi”. (1 Raj. 18:13, 14) Nèk konangan, Obaja mesthi dipatèni. Obaja mesthi ora péngin mati. Tapi, Obaja luwih nresnani Yéhuwah lan wong-wong sing nglayani Dhèwèké, timbang nyawané dhéwé.

11. Piyé umaté Yéhuwah jaman saiki niru Obaja? (Deloken gambar kanggo paragraf 11.)

¹¹ Saiki, akèh sedulur manggon ing negara sing nglarang Seksi-Seksi Yéhuwah. Sedulur-sedulur kuwi niru Obaja. Meskipun manut karo pamréntah, sedulur-sedulur ora gelem mandheg nglayani Yéhuwah. (Mat. 22:21) Sedulur-sedulur kuwi luwih manut karo Gusti Allah timbang manungsa. (Kis. 5:29) Buktiné, sedulur-sedulur kuwi tetep nginjil lan ngibadah meskipun  ndhelik-ndhelik. (Mat. 10:16, 28) Sing penting kanggo sedulur-sedulur kuwi, kabèh isa tetep cedhak karo Yéhuwah. Gatèkna pengalamané Henri. Dhèwèké manggon ing salah siji negara ing Afrika sing sempat nglarang Seksi-Seksi Yéhuwah. Tapi, dhèwèké gelem ngeterké bacaan kanggo sedulur-sedulur. Dhèwèké crita, ”Aku wongé wedinan. Dadi aku yakin, aku isa kendel merga ngajèni Yéhuwah.” Apa njenengan ya isa kendel kaya Henri? Isa, nèk njenengan wedi karo Gusti Allah.

12. Apa buktiné nèk Imam Agung Yéhoyada lan bojoné setya karo Yéhuwah?

¹² Merga wedi karo Yéhuwah, Yéhoyada setya lan ndhukung ibadah sing murni. Misalé pas anaké wédok Izebèl, Atalia, péngin dadi ratu ing Yéhuda. Wajar nèk wong-wong wedi karo Atalia. Dhèwèké kejem banget. Saking pénginé dadi ratu, dhèwèké matèni putu-putuné dhéwé sing sakjané berhak dadi raja. (2 Bb. 22:10, 11) Salah sijiné, Yéhoas. Tapi Yéhoas slamet merga ditulungi Yéhosyabéat, bojoné Yéhoyada. Yéhoyada karo Yéhosyabéat ndhelikké Yéhoas lan ngopèni dhèwèké. Merga wong loro kuwi, tetep ana keturunané Raja Daud sing isa dadi raja. Yéhoyada sing wis lansia ora wedi karo Atalia lan tetep setya karo Yéhuwah.​—WB. 29:25.

13. Pas Yéhoas umur pitung taun, piyé Yéhoyada mbuktèkké manèh nèk setya karo Yéhuwah?

¹³ Pas Yéhoas umur pitung taun, Yéhoyada mbuktèkké manèh nèk setya karo Yéhuwah. Dhèwèké nggawé rencana bèn Yéhoas isa dadi raja. Tapi nèk rencana kuwi gagal, Yéhoyada mesthi dipatèni. Merga dibantu Yéhuwah, rencana kuwi berhasil. Bareng-bareng karo para pemimpin lan wong Lèwi, Yéhoyada nggawé Yéhoas dadi raja lan matèni Atalia. (2 Bb. 23:1-5, 11, 12, 15; 24:1) Terus, Yéhoyada ”nggawé perjanjian antarané Yéhuwah karo Raja lan rakyat, yaiku nèk wong-wong kuwi bakal terus dadi umaté Yéhuwah”. (2 Raj. 11:17) Yéhoyada ”ya nugaské para penjaga ing gerbang omahé Yéhuwah bèn ora ana wong najis siji-sijia sing isa mlebu ing omah kuwi”.​—2 Bb. 23:19.

14. Piyé Yéhoyada diajèni merga ngajèni Yéhuwah?

¹⁴ Yéhuwah tau ngomong, ”Wong sing ngajèni Aku bakal Tak ajèni.” (1 Sam. 2:30) Kuwi sebabé Yéhoyada diberkahi. Misalé, kisahé ditulis ing Alkitab bèn awaké dhéwé isa sinau saka kisah kuwi. (Rm. 15:4) Pas Yéhoyada mati, dhèwèké dikubur ing ”Kutha Daud bareng karo para raja, merga dhèwèké nindakké apa sing apik ing Israèl kanggo Gusti Allah sing bener lan omahé”.​—2 Bb. 24:15, 16.

15. Apa waé sing isa dipelajari saka kisahé Yéhoyada? (Deloken gambar kanggo paragraf 15.)

¹⁵ Saka kisahé Yéhoyada, awaké dhéwé dadi ngerti carané mbuktèkké nèk wedi karo Yéhuwah. Para pinituwa sing niru Yéhoyada bakal terus nggolèk cara kanggo nglindhungi sedulur-sedulur ing jemaat. (Kis. 20:28) Kaya Yéhoyada, para lansia ya isa digunakké Yéhuwah bèn tujuané kelakon nèk tetep wedi karo Dhèwèké lan tetep setya. Kaya Yéhuwah sing mberkahi Yéhoyada, cah-cah enom isa niru Yéhuwah nèk terus ngajèni para lansia terutama sing wis suwé nglayani Yéhuwah. (WB. 16:31) Nèk niru para  pemimpin lan wong Lèwi sing ndhukung Yéhoyada, awaké dhéwé bakal ndhukung ”wong-wong sing mimpin” ing jemaat.​—Ibr. 13:17.

16. Apa buktiné Yéhoas ora wedi manèh karo Yéhuwah?

¹⁶ Yéhoyada ngajari Raja Yéhoas bèn dadi wong apik. (2 Raj. 12:2) Kuwi sebabé pas enom, Yéhoas péngin nyenengké Yéhuwah. Tapi bar Yéhoyada mati, Yéhoas ngrungokké para pejabat Yéhuda sing ora nyembah Yéhuwah. Dhèwèké karo wong Israèl ”mulai nyembah cagak suci lan patung brahala”. (2 Bb. 24:4, 17, 18) Meskipun sedhih, Yéhuwah ”bola-bali ngutus para nabi marang wong-wong kuwi bèn wong-wong kuwi gelem bali marang Yéhuwah, . . . ning wong-wong kuwi ora gelem ngrungokké”. Zakharia, c anaké Yéhoyada, ya ora dirungokké. Padahal dhèwèké dudu mung nabi lan imam, tapi ya sepupuné Yéhoas. Yéhoas malah matèni Zakharia, padahal mbiyèn bapaké Zakharia sing nylametké dhèwèké.​—2 Bb. 22:11; 24:19-22.

17. Apa akibaté merga Yéhoas ora wedi manèh karo Yéhuwah?

¹⁷ Apa akibaté merga Yéhoas ora wedi  manèh karo Yéhuwah? Yéhuwah ngomong, ”Wong sing ngrèmèhké Aku bakal Tak rèmèhké.” (1 Sam. 2:30) Yéhoas ”luka parah” wektu perang nglawan pasukané Siria sing jumlahé sithik, padahal pasukané Yéhoas ”akèh banget”. Sakwisé pasukané Siria lunga, Yéhoas dipatèni pelayané dhéwé merga wis matèni Zakharia. Raja kuwi ya ora dikubur ”ing kuburané para raja”.​—2 Bb. 24:23-25.

18. Menurut Yérémia 17:7, 8, piyé bèn ora kaya Yéhoas?

¹⁸ Yéhoas kaya wit sing disangga. Sakwisé penyanggané dicabut, wit kuwi ambruk pas kena angin. Sakwisé Yéhoyada mati, Yéhoas ora wedi manèh karo Yéhuwah pas dipengaruhi karo wong-wong sing ora nyembah Dhèwèké. Apa pelajarané? Mung merga keluarga utawa sedulur-sedulur ing jemaat dadi teladan, ora otomatis awaké dhéwé wedi karo Yéhuwah. Awaké dhéwé isa tetep cedhak karo Yéhuwah mung nèk maca Alkitab, ngrenungké kuwi, lan ndonga.​—Wacanen Yérémia 17:7, 8; Kol. 2:6, 7.

19. Yéhuwah péngin awaké dhéwé piyé?

¹⁹ Yéhuwah ora njaluk sing ngluwihi kesanggupané awaké dhéwé. Yéhuwah mung péngin awaké dhéwé ’wedi karo Dhèwèké lan manut karo préntahé, merga iki kabèh kewajibané manungsa’. (Pkh. 12:13) Nèk wedi karo Yéhuwah, awaké dhéwé isa ngadhepi masalah apa waé lan tetep setya kaya Obaja lan Yéhoyada. Ora ana sing isa misahké awaké dhéwé saka Yéhuwah.