Ing Alkitab ora langsung dijelaské. Tapi nèk maca kisahé, awaké dhéwé isa ngerti kira-kira apa alesané.

Ana malaékat sing ngomong karo Maria nèk dhèwèké bakal meteng lan nglairké. Wektu kuwi Maria karo Yusuf manggon ing Nazarèt, salah siji kutha ing Galiléa. (Luk. 1:26-31; 2:4) Terus, pas bali saka Mesir, keluarga kuwi bali ing Nazarèt. Yésus ya gedhé ing kono lan disebut wong Nazarèt. (Mat. 2:19-23) Dadi lumrah nèk mbahas soal Yésus, Yusuf, karo Maria, awaké dhéwé dadi kèlingan soal kutha Nazarèt.

Maria nduwé sedulur ing Yéhuda sing jenengé Èlisabèt. Èlisabèt kuwi bojoné imam Zakharia lan ibuné Yohanes Pembaptis. (Luk. 1:5, 9, 13, 36) Maria nginep ing omahé Èlisabèt selama telung sasi, terus bali ing Nazarèt. (Luk. 1:39, 40, 56) Dadi, Maria mesthi ngerti dhaérah Yéhuda.

Pamréntah ngongkon saben wong bali ing kutha asalé dhéwé-dhéwé bèn isa ”didaftar”. Kuwi sebabé Yusuf bali ing Bètlehèm, ”kuthané Daud”, sing ya bakal dadi kutha kelahirané Mésias. (Luk. 2:3, 4; 1 Sam. 17:15; 20:6; Mi. 5:2) Maria nglairké Yésus ing kono. Merga perjalanané adoh lan Yésus isih bayi, Yusuf ora langsung bali ing Nazarèt. Keluarga kuwi tetep manggon ing Bètlehèm sing jaraké kira-kira sangang kilomèter saka Yérusalèm. Dadi, jaraké luwih cedhak nèk mèh nggawa Yésus ing bait kanggo mènèhké persembahan sesuai hukum Musa.​—Km. 12:2, 6-8; Luk. 2:22-24.

Malaékat sing nemoni Maria ya ngomong nèk anaké bakal dadi ”raja kaya Daud”. Apa mungkin Yusuf karo Maria nyimpulké nèk lairé Yésus ing kuthané Daud ana tujuané? (Luk. 1:32, 33; 2:11, 17) Wong loro kuwi mungkin mikir luwih apik tetep manggon ing kono karo ngentèni arahan saka Yéhuwah.

Awaké dhéwé ora ngerti sepira suwéné keluarga kuwi wis manggon ing Bètlehèm wektu ahli ilmu bintang teka. Tapi, keluarga kuwi wis manggon ing omah lan Yésus wis dadi ”bocah cilik”, dudu bayi manèh. (Mat. 2:11) Keluarga kuwi ora bali ing Nazarèt lan tetep manggon ing Bètlehèm.

Hérodès ngongkon supaya ”kabèh bocah lanang ing Bètlehèm . . . sing umuré rong taun mengisor” dipatèni. (Mat. 2:16) Merga dikandhani Yéhuwah soal kuwi, Yusuf karo Maria nggawa Yésus mlayu ing Mesir, lan tetep manggon ing kono nganti Hérodès mati. Bar kuwi, Yusuf sak keluarga bali ing Nazarèt. Kenapa kok keluarga kuwi ora bali ing Bètlehèm? Soalé sing mréntah bar kuwi anaké Hérodès, yaiku Arkhélaus sing kejem banget. Yusuf ya manut arahané Yéhuwah. Nazarèt kuwi panggonan sing aman. Ing kono, Yusuf karo Maria nggedhèkké Yésus.​—Mat. 2:19-22; 13:55; Luk. 2:39, 52.

Kétoké Yusuf mati sakdurungé Yésus mati. Dadi, Yusuf bakal diuripké manèh ing bumi. Sukmbèn, awaké dhéwé isa takon kenapa kok Yusuf karo Maria tetep manggon ing Bètlehèm sakwisé Yésus lair.