1. Piyé bèn isa slamet pas dinané Yéhuwah teka?

 ING Alkitab, ”dinané Yéhuwah” kuwi maksudé pas Yéhuwah nyingkirké mungsuh-mungsuhé lan nylametké umaté. (Yés. 13:1, 6; Yèh. 13:5; Zéf. 1:8) Mbiyèn kuwi wis tau kelakon. Jaman saiki, ”dinané Yéhuwah” dimulai pas Babilon Gedhé disingkirké nganti Armagédon. Bèn isa slamet, awaké dhéwé kudu siap mulai saiki. Malah, Yésus ora mung ngongkon bèn siap pas ”sengsara gedhé”, tapi ”tetep siap”.​—Mat. 24:21; Luk. 12:40.

2. Apa manfaaté mbahas 1 Tésalonika?

² Liwat suraté, Paulus ngandhani bèn wong Tésalonika tetep siap kanggo dinané Yéhuwah. Paulus njelaské nganggo beberapa perumpamaan. Paulus ngerti nèk dinané Yéhuwah ora bakal langsung teka. (2 Tés. 2:1-3) Tapi, Paulus ngandhani nèk kaya-kayané dinané Yéhuwah tekané sésuk. Naséhaté Paulus ya isa bermanfaat kanggo awaké dhéwé. Ayo ngrembug, (1) dinané Yéhuwah tekané piyé, (2) sapa sing ora bakal slamet, lan (3) piyé carané bèn isa siap.

3. Apa maksudé dinané Yéhuwah tekané kaya maling pas bengi? (Deloken gambar kanggo paragraf 3.)

³ ”Kaya maling pas bengi.” (1 Tés. 5:2) Kuwi perumpamaan pertama soal dinané Yéhuwah. Wong nèk maling biasané cepet-cepet lan pas bengi bèn ora konangan. Dinané Yéhuwah sukmbèn ya cepet lan ora disangka-sangka. Bahkan mungkin awaké dhéwé ya kagèt merga kuwi cepet banget. Tapi, awaké dhéwé ora bakal disingkirké kaya wong jahat.

4. Apa maksudé dinané Yéhuwah kaya wong wédok sing arep nglairké?

⁴ ”Kaya wong wédok sing ujug-ujug ngrasakké lara merga arep nglairké.” (1 Tés. 5:3) Wong wédok sing hamil ora ngerti kapan persisé arep lairan. Tapi, dhèwèké yakin nèk bayiné bakal lair. Kuwi bakal lara banget lan ora isa ditunda. Awaké dhéwé ora ngerti kapan dina lan jamé dinané Yéhuwah teka. Tapi, awaké dhéwé yakin nèk kuwi bakal teka. Kabèh wong jahat bakal ujug-ujug dihukum lan ora isa mlayu.

5. Apa maksudé dinané Yéhuwah kaya padhang?

⁵ Kaya padhang. Ing perumpamaané sing ketelu, Paulus nyebutké manèh soal maling. Tapi sing dibahas dudu malingé. Paulus kétoké madhakké dinané Yéhuwah kaya padhang. (1 Tés. 5:4) Maling sing teka pas bengi isa waé ora nggagas nèk wis padhang. Nèk wis padhang, dhèwèké isa konangan. Padha kaya ngono, pas sengsara gedhé, bakal kétok sapa waé wong-wong sing ora manut Yéhuwah. Ora kaya wong-wong kuwi, awaké dhéwé péngin nyenengké  Yéhuwah lan nglakoni ”apa waé sing apik, adil, lan bener”. (Éf. 5:8-12) Paulus ya njelaské nganggo perumpamaan, sapa waé sing ora slamet pas dinané Yéhuwah teka.

6. Kenapa akèh wong saiki dipadhakké kaya wong turu? (1 Tésalonika 5:6, 7)

⁶ Wong sing ”turu”. (Wacanen 1 Tésalonika 5:6, 7.) Paulus madhakké wong-wong sing ora slamet pas dinané Yéhuwah kaya wong turu. Wong sing turu ora sadhar karo apa sing kelakon ing sekitaré. Akèh wong saiki kaya ngono. (Rm. 11:8) Wong-wong kuwi ora percaya nèk saiki wis ”akhir jaman” lan nèk sengsara gedhé wis mèh teka, padahal wis ana bukti-bukti sing jelas. Merga ndelok bukti-bukti kuwi, ana sing gelem ngrungokké kabar apik, tapi ora gelem berubah. Ana sing percaya nèk dinané Yéhuwah bakal teka, tapi mikir nèk kuwi isih suwé. (2 Ptr. 3:3, 4) Awaké dhéwé ora kaya ngono. Awaké dhéwé péngin tetep siap nganti dinané Yéhuwah teka.

7. Kenapa wong-wong sing ora slamet dipadhakké kaya wong mabuk?

⁷ Wong sing ”mabuk”. Rasul Paulus madhakké wong-wong sing ora slamet pas sengsara gedhé kaya wong mabuk. Nèk mabuk, biasané ora isa mikir terus akhiré nggawé keputusan sing salah. Wong-wong sing kelakuané ora sesuai karo Alkitab ya kaya ngono. Wong-wong kuwi sengaja ora manut karo Gusti Allah. Tapi, wong Kristen dikongkon bèn tetep tangi lan sadhar. (1 Tés. 5:6) Menurut ahli Alkitab, wong sing sadhar bakal ”tetep tenang lan isa nggawé keputusan sing apik”. Nèk sadhar, meskipun wong-wong ing sekitaré awaké dhéwé berdebat merga nduwé pendapat sing béda-béda, awaké dhéwé ora bakal mèlu-mèlu. Mémang saya suwé kuwi saya angèl. Tapi ora perlu kuwatir. Yéhuwah isa mbantu liwat roh suciné bèn awaké dhéwé tetep tenang lan isa nggawé keputusan sing apik.​—Luk. 12:11, 12.

8. Menurut 1 Tésalonika 5:8, awaké dhéwé kudu nduwé sipat apa waé bèn tetep siap? (Deloken gambar kanggo paragraf 8.)

⁸ ’Nganggo tutup dhadha lan topi wesi.’ Paulus madhakké awaké dhéwé kaya prajurit sing siap perang. (Wacanen 1 Tésalonika 5:8.) Prajurit kudu selalu siap kapan waé. Nèk terus nganggo tutup dhadha yaiku iman lan katresnan lan nganggo topi wesi yaiku harapan, kuwi bukti nèk tetep siap kanggo dinané Yéhuwah.

9. Apa maksudé iman nglindhungi ati?

⁹ Tutup dhadha nglindhungi jantung. Iman lan katresnan nglindhungi ati. Nèk nduwé iman, awaké dhéwé yakin Yéhuwah bakal mberkahi awaké dhéwé. (Ibr. 11:6) Nèk nduwé iman, awaké dhéwé ya bakal tetep setya karo Yésus meskipun ngadhepi masalah. Bèn isa nguwatké iman, gatèkna sedulur-sedulur sing tetep setya meskipun dianiaya utawa ngadhepi masalah ékonomi. Awaké dhéwé ya ora bakal nresnani dhuwit nèk niru sedulur-sedulur sing urip sederhana kanggo ngutamakké Kerajaané Gusti Allah. b

10. Apa hasilé nèk nresnani Gusti Allah lan wong liya?

 ¹⁰ Nduwé katresnan kuwi penting bèn isa tetep siap. (Mat. 22:37-39) Nèk nresnani Gusti Allah, awaké dhéwé bakal tetep nginjil meskipun ora gampang. (2 Tim. 1:7, 8) Merga nresnani wong liya, awaké dhéwé ya tetep nginjil ing dhaérah sing ditugaské, bahkan liwat télpon utawa surat. Awaké dhéwé yakin nèk wong-wong kuwi bakal berubah dadi wong sing apik.​—Yèh. 18:27, 28.

11. Apa manfaaté nresnani sedulur-sedulur? (1 Tésalonika 5:11)

¹¹ Awaké dhéwé ya nresnani sedulur-sedulur. Mula, awaké dhéwé ”terus nguwatké lan mbantu liyané”. (Wacanen 1 Tésalonika 5:11.) Awaké dhéwé ya saling nyemangati kaya prajurit sing maju bareng pas perang. Merga keadaané kacau, isa waé ana prajurit sing nyilakani kancané. Tapi kuwi mesthi ora disengaja. Awaké dhéwé mesthi ora péngin sengaja nglarani sedulur-sedulur seiman. (1 Tés. 5:13, 15) Nèk nresnani, awaké dhéwé ya bakal ngajèni para pinituwa. (1 Tés. 5:12) Pas Paulus nulis surat kanggo jemaat ing Tésalonika, jemaat kuwi lagi waé setaun dibentuk. Para pinituwa ing kana mungkin ora nduwé pengalaman lan isa nggawé salah. Tapi sedulur-sedulur kuwi tetep pantes diajèni. Pas sengsara gedhé, mungkin awaké dhéwé ora isa ngubungi kantor cabang utawa kantor pusat. Dadi awaké dhéwé bakal éntuk luwih akèh arahan saka para pinituwa. Mula awaké dhéwé kudu luwih ngajèni mulai saiki. Ora soal piyé keadaané, awaké dhéwé aja nggatèkké kesalahané. Pikirna fakta nèk Yéhuwah ngarahké para pinituwa liwat Yésus Kristus.

12. Apa maksudé harapan nglindhungi pikiran?

¹² Topi wesi nglindhungi sirahé prajurit. Harapan nglindhungi pikiran.  Merga nduwé harapan nèk bakal dislametké, awaké dhéwé ngerti nèk kabèh sing ana ing donya iki ora ana gunané. (Flp. 3:8) Wektu ana masalah, awaké dhéwé isa tetep ayem merga nduwé harapan. Kuwi sing dirasakké Wallace lan Laurinda sing nglayani ing Afrika. Ibuné Laurinda mati, terus telung minggu bar kuwi bapaké Wallace ya mati. Merga COVID-19, wong loro kuwi ora isa bali ing omah. Wallace crita, ”Aku isih mikirké wong tuwaku. Tapi sing tak pikirké ora pas wong tuwaku menderita mèh mati. Aku mikirké pas wong tuwaku diuripké manèh ing donya anyar. Pas aku sedhih, aku mikirké harapan kuwi. Aku dadi isa tenang.”   

13. Piyé carané bèn nduwé roh suci?

¹³ ”Aja matèni geniné roh suci.” (1 Tés. 5:19) Paulus madhakké roh suci kaya geni. Nèk dituntun roh suci, awaké dhéwé bakal nduwé semangat kanggo nglayani Yéhuwah kaya geni sing berkobar-kobar. (Rm. 12:11) Piyé bèn isa dadi ”wong sing dituntun roh suci”? (Gal. 5:22, 23) Ndonga njaluk roh suci, sinau Alkitab, lan tetep cedhak karo organisasiné Yéhuwah.

14. Nèk péngin nampa roh suci, awaké dhéwé aja nganti piyé? (Deloken gambar kanggo paragraf 14.)

¹⁴ Sakwisé dikèki roh suci, aja nganti awaké dhéwé ”matèni geniné roh suci”. Gusti Allah mung bakal mènèhi roh suci nèk pikiran lan perbuatané awaké dhéwé bener. (1 Tés. 4:7, 8) Bèn isa terus éntuk roh suci ”aja ngrèmèhké ramalan”. (1 Tés. 5:20) Sing dimaksud ”ramalan” kuwi kabèh sing disampèkké Yéhuwah liwat roh suciné, termasuk keterangan nèk dinané Yéhuwah wis cedhak. Aja nganti mikir nèk Armagédon tekané isih sukmbèn, sakwisé awaké dhéwé mati. Nèk terus sibuk ”ngabdi  marang Gusti Allah” lan mikirké soal dinané Yéhuwah, tekané dinané Yéhuwah bakal krasa luwih cepet.​—2 Ptr. 3:11, 12.

15. Piyé carané bèn ora kapusan? (1 Tésalonika 5:21)

¹⁵ Sedhéla manèh mungsuhé Gusti Allah bakal ngumumké ”tentrem lan aman”. (1 Tés. 5:3) Sétan bakal ngapusi akèh wong. (Why. 16:13, 14) Tapi awaké dhéwé ora bakal kapusan nèk ”mastèkké apa sing bener”. (Wacanen 1 Tésalonika 5:21.) Kata ”mastèkké” ing basa Yunani kuwi maksudé kaya nèk nguji emas asli apa ora. Padha kaya ngono, kabèh sing diwaca lan dirungokké kudu dipastèkké bener apa ora. Nèk mbiyèn wong Tésalonika waé kudu kaya ngono, apa manèh awaké dhéwé sing bakal ngalami sengsara gedhé. Daripada langsung percaya karo kabèh keterangan, luwih apik nèk kuwi dibandhingké sik karo keterangan sing ana ing Alkitab lan organisasi. Nèk ngono, awaké dhéwé ora bakal kapusan.​—WB. 14:15; 1 Tim. 4:1.

16. Awaké dhéwé nduwé harapan apa, lan apa tékadé njenengan?

¹⁶ Secara kelompok, umaté Yéhuwah mesthi bakal slamet ngliwati sengsara gedhé. Tapi njenengan dhéwé piyé? Apa njenengan termasuk sing bakal dislametké? (Yak. 4:14) Ora soal slamet ngliwati sengsara gedhé utawa mati sakdurungé kuwi, kabèh bakal éntuk berkah nèk tetep setya. Mengko ana sing bakal munggah swarga lan sing liyané bakal urip ing bumi firdaus. Ayo terus mikirké harapan kuwi lan tetep siap kanggo dinané Yéhuwah.