Wektu kuwi, Siswa-Siswa Alkitab semangat banget nginjil. Mula, dibutuhké akèh bacaan kanggo nginjil. Ya mémang Bètel Brooklyn isa nyétak bacaan dhéwé. Tapi nèk buku, isih kudu dicétak ing percétakan umum. Sakwisé beberapa bulan, percétakané ora sanggup nyétak buku sing dienggo nginjil. Wektu kuwi, sing ngawasi gawéan percétakan ing Bètel Brooklyn kuwi Sedulur Robert Martin. Dadi, Sedulur Rutherford takon karo dhèwèké apa mungkin Bètel Brooklyn isa nyétak buku dhéwé.

Sedulur Martin ngomong, ”Idéné njenengan apik sih. Tapi, awaké dhéwé berarti kudu tuku akèh peralatan kanggo nyétak buku.” Terus, sedulur-sedulur nyéwa panggonan ing 18 Concord Street, Brooklyn, lan tuku peralatan-peralatan sing dibutuhké.

Tapi, ana sing ora seneng. Pas kuwi, pimpinan percétakan sing biasané nyétak buku-bukuné Siswa-Siswa Alkitab teka mrono. Terus dhèwèké ngomong, ”Alat-alat sing mbok tuku kuwi mémang apik. Tapi, nèk kowé ora ngerti cara nganggoné, paling enem sasi manèh wis rusak kabèh iki.”

Sedulur Martin njawab, ”Iya ya Pak, kétoké mémang ngono. Tapi, aku karo sedulur-sedulur yakin nèk Gusti mesthi bakal mbantu.” Sing diomongké Sedulur Martin kuwi bener. Ora let suwé, percétakan kuwi isa nyétak nganti 2.000 buku saben dina.

Sakliyané nyétak bacaan-bacaan, Siswa- Siswa Alkitab ya nggunakké siaran radio kanggo nginjil. Dadi akhiré, dina Minggu awan tanggal 26 Februari 1922, Sedulur Rutherford nyampèkké ceramah sing judhulé ”Jutaan Wong sing Saiki Urip Ora Bakal Mati”. Kuwi pertama kaliné dhèwèké ceramah ing radio. Ceramahé disiarké ing stasiun radio KOG ing Los Angeles, Kalifornia, AS.

Sing ngrungokké ceramah kuwi kira-kira 25.000 wong. Ana wong-wong sing ngirimké surat ucapan maturnuwun karo Sedulur Rutherford. Salah siji suraté saka Willard  Ashford, sing manggon ing Santa Ana, Kalifornia. Dhèwèké ngucapké maturnuwun karo Sedulur Rutherford merga ceramahé sing ”menarik lan apik banget”. Dhèwèké ya ngomong, ”Ing omahku ana telu sing lagi lara. Dadi nèk ora liwat radio, ora mungkin aku karo keluargaku isa ngrungokké ceramahé njenengan, meskipun njenengan ceramahé ing cedhak omahku.”

Pirang-pirang minggu bar kuwi, ana akèh ceramah sing disiarké liwat radio. Ing majalah The Watch Tower disebutké nèk ing akhir taun 1922 ”ana kira-kira 300.000 wong sing ngrungokké ceramah liwat siaran radio”.

Merga ana akèh tanggepan sing apik, akhiré Siswa-Siswa Alkitab péngin mbangun stasiun radio dhéwé. Kuwi dibangun ora pati adoh saka Bètel Brooklyn, yaiku ing Staten Island. Dadi ing taun 1924, stasiun radioné Siswa-Siswa Alkitab, sing jenengé WBBR, mulai dienggo nyiarké ceramah-ceramah Alkitab.

Ing The Watch Tower 15 Juni 1922 disebutké nèk ana pertemuan istiméwa ing Cedar Point, Ohio, tanggal 5 nganti 13 September 1922. Siswa-Siswa Alkitab wektu kuwi seneng banget isa mèlu ing pertemuan kuwi.

Ing ceramah pertamané, Sedulur Rutherford ngomong, ”Aku yakin Gusti mesthi . . . mberkahi pertemuan iki lan bakal ngutus seksi-seksi sing akèh banget. Mesthi durung tau ana seksi-seksi sing seakèh kuwi.” Kabèh sing ceramah ing pertemuan kuwi bola-bali nyemangati bèn sedulur-sedulur mèlu nginjil.

Dina Jumat 8 September, ana 8.000 sing teka kanggo ngrungokké ceramahé Sedulur Rutherford. Wong-wong kuwi mesthi mikir nèk Sedulur Rutherford bakal nerangké apa artiné kata ”ADV” sing ana ing undangan kanggo pertemuan kuwi. Wong-wong kuwi mesthi ya padha weruh nèk ing ndhuwur panggung ana gulungan spandhuk sing gedhé banget. Sedulur Arthur Claus saka Tulsa, Oklahoma, AS, teka ing pertemuan kuwi. Wektu tekan ing gedhung, dhèwèké kudu nggolèk panggonan sing pénak kanggo ngrungokké ceramahé Sedulur Rutherford merga ing gedhung pertemuan kuwi ora nggunakké mikrofon lan speaker.

 Pas acarané arep dimulai, ketua acarané ngumumké nèk ora ana sing éntuk mlebu ing gedhung nèk ceramahé Sedulur Rutherford wis dimulai. Tujuané bèn kabèh sing teka isa fokus ngrungokké ceramahé. Terus jam 09.30, Sedulur Rutherford mulai ceramah. Dhèwèké ngutip omongané Yésus sing dicathet ing Matius 4:17, ”Kerajaan swarga wis cedhak.” Tapi, piyé carané bèn wong-wong ngerti soal kerajaan iki? Sedulur Rutherford ngomong nèk ”pas Yésus mulai mréntah dadi Raja, Yésus bakal ngumpulké wong-wong sing setya, sing bener-bener manut préntahé”.

Sedulur Arthur sing disebutké mau lagi ngrungokké ceramahé Sedulur Rutherford. Dhèwèké crita, ”Aku karo sedulur-sedulur liyané ngrungokké tenanan ceramahé Sedulur Rutherford.” Ning ujug-ujug, dhèwèké ngrasa nèk awaké ora pénak. Terus, dhèwèké kudu metu saka gedhung kuwi. Sakjané dhèwèké ora péngin metu saka gedhung kuwi merga wedi nèk ora éntuk mlebu manèh.

Sakwisé beberapa menit, awaké wis krasa luwih pénak. Dadi, dhèwèké arep bali manèh ing gedhung. Pas krungu kabèh sing teka padha tepuk tangan, dhèwèké dadi penasaran. Meskipun kudu mènèk atap, Sedulur Arthur tetep péngin isa ngrungokké ceramahé Sedulur Rutherford. Terus, dhèwèké mikir piyé carané isa mènèk gedhung kuwi. Wektu kuwi, Sedulur Arthur, sing umuré isih 23 taun, akhiré isa berhasil mènèk atap. Pas tekan ing ndhuwur, dhèwèké isa ngrungokké swarané Sedulur Rutherford ”jelas banget”.

Jebulé, ing atap wis ana sedulur-sedulur liyané. Salah sijiné kuwi Sedulur Frank Johnson. Dhèwèké takon, ”Kowé nggawa pisau lipat ora?”

Arthur kandha, ”Ya, nggawa. Piyé?”

Frank ngomong, ”Wah, untung kowé nggawa pisau ya. Kowé ndelok ora ing kono ana  spandhuk. Rungokna tenanan omongané Pak Hakim. a Nèk pas dhèwèké ngomong, ’umumna, umumna,’ nah taliné iki kudu dikethok.”

Dadi wektu kuwi, Sedulur Arthur karo kanca-kancané nunggu kapan Sedulur Rutherford ngomong, ”Umumna, umumna.” Ora let suwé, kétoké Sedulur Rutherford wis arep ngomongké kata-kata kuwi. Saka swarané, kétok banget nèk Sedulur Rutherford semangat wektu ceramah. Pas kuwi dhèwèké ngomong, ”Njenengan kudu dadi seksi sing setya kanggo Gusti. Aja nyerah nganti agama palsu disingkirké. Umumna berita iki kanggo kabèh wong ing endi-endi. Kabèh kudu ngerti nèk Yéhuwah kuwi Gusti Allah sing bener lan Yésus kuwi Rajané kabèh sing mréntah dadi raja lan Gustiné kabèh sing mréntah dadi gusti. Iki dina sing penting banget. Sang Raja wis mréntah. Njenengan kudu nyritakké kuwi marang wong liya. Dadi, umumna, umumna, umumna, Sang Raja lan Kerajaané.”

Sedulur Arthur lan kanca-kancané ngethok tali spandhuk kuwi. Terus spandhuk kuwi kebukak. Spandhuk kuwi tulisané, ”Advertise the King and Kingdom”. Dadi akhiré kabèh sing teka ngerti apa artiné kata ”ADV”. Jebulé kuwi singkatan saka kata advertise, sing artiné umumna.

Sakwisé pertemuan ing Cedar Point kuwi, sedulur-sedulur dadi luwih semangat nginjil. Sedulur-sedulur kuwi ya seneng nyritakké pengalamané. Ana kolpotir (saiki disebut perintis) saka Oklahoma, AS, sing crita, ”Aku nginjil ing dhaérah sing wong-wongé kerja ing tambang batubara. Wong-wong ing kana ya miskin.” Tapi sedulur kuwi crita, ”Wektu maca majalah The Golden Age, wong-wong kuwi padha terharu.” Dhèwèké ya ngomong, ”Aku seneng banget isa menghibur wong-wong kuwi.”

Siswa-Siswa Alkitab semangat banget nginjilé merga ngrasakké kata-katané Yésus sing dicathet ing Lukas 10:2 kuwi bener. Ing ayat kuwi Yésus kandha, ”Panènané pancèn akèh, ning sing manèn mung sithik.” Sepanjang taun 1922, Siswa-Siswa Alkitab dadi luwih semangat ngumumké Kerajaané Gusti Allah.