1. Kenapa wong sing sadhar nèk ”mbutuhké tuntunané Gusti Allah” kuwi wong sing bahagia?

 WONG sing bener-bener bahagia kuwi ora mung ngrasa seneng pas keadaané apik thok. Tapi, perasaan seneng kuwi kuduné tetep ana pas keadaan apa waé. Kok isa? Pas Ceramah ing Gunung, Yésus ngomong nèk wong sing bahagia kuwi sing sadhar nèk ”mbutuhké tuntunané Gusti Allah”. (Mat. 5:3) Yésus ngerti bèn manungsa isa bahagia kuwi kudu nyembah Gusti Allah lan manut tuntunané. Terus merga Yéhuwah kuwi ”Gusti Allah sing bahagia”, wong-wong sing nyembah Dhèwèké mesthi ya bakal bahagia.​—1 Tim. 1:11.

2-3. (a) Nurut Yésus, wong sing bahagia kuwi wong sing piyé? (b) Apa sing bakal dirembug ing artikel iki, lan kenapa kuwi penting?

² Ing ceramahé, Yésus ngomong nèk ”wong-wong sing sedhih”, misalé merga dosané utawa nduwé masalah sing abot, kuwi wong sing bahagia. Yésus ya ngomong nèk ”wong sing dianiaya merga nindakké sing bener” lan ’wong sing diécé’ merga dadi muridé Yésus kuwi wong sing bahagia. (Mat. 5:4, 10, 11) Tapi, kok isa wong sing lagi ngadhepi masalah-masalah kuwi disebut wong sing bahagia?

³ Pas Ceramah ing Gunung, Yésus ora lagi ngomongké keadaan sing apik-apik waé utawa ora ana masalah. Tapi, Yésus  ngomong nèk wong sing sadhar nèk butuh tuntunané Gusti Allah lan gelem nyedhak karo Gusti Allah kuwi wong sing bahagia. (Yak. 4:8) Piyé carané? Ing artikel iki, awaké dhéwé bakal mbahas telu cara bèn isa bener-bener bahagia.

4. Apa cara pertama bèn isa bener-bener bahagia? (Mazmur 1:1-3)

⁴ CARA 1: Kudu maca lan sinau Alkitab. Yésus madhakké omongané Gusti Allah kuwi kaya panganan. Yésus kandha nèk ”manungsa kudu urip ora mung saka panganan waé, ning saka saben omongan sing diucapké Yéhuwah”. (Mat. 4:4) Mémang, manungsa karo kéwan butuh mangan bèn isa tetep urip. Tapi sakliyané butuh mangan, manungsa ya butuh ngrungokké omongané Gusti Allah. Kuwi sebabé, aja nganti awaké dhéwé lali maca Alkitab saben dina. Sing nulis Mazmur kandha, ’Wong sing bahagia kuwi wong sing seneng karo hukumé Yéhuwah lan sing maca lan mikirké tenanan hukum kuwi awan lan bengi.’​—Wacanen Mazmur 1:1-3.

5-6. (a) Saka Alkitab, awaké dhéwé isa ngerti apa waé? (b) Apa hasilé nèk ngetrapké naséhat ing Alkitab?

⁵ Yéhuwah sayang banget karo awaké dhéwé. Mulané ing Alkitab, Dhèwèké ngandhani carané bèn isa bahagia. Saka Alkitab, awaké dhéwé isa ngerti apa tujuané manungsa diciptakké. Awaké dhéwé ya isa ngerti piyé carané bèn isa cedhak karo Yéhuwah lan isa diapura Dhèwèké. Terus, awaké dhéwé isa ngerti soal harapan ing masa depan. (Yér. 29:11) Kuwi kabèh mesthi nggawé awaké dhéwé bener-bener bahagia.

 ⁶ Ing Alkitab, ya ana naséhat-naséhat sing berguna. Nèk kuwi ditrapké, awaké dhéwé isa bahagia. Yésus ngomong, ”Wong sing bahagia kuwi wong sing ngrungokké lan nindakké omongané Gusti Allah.” (Luk. 11:28) Dadi nèk lagi sedhih merga akèh masalah, awaké dhéwé kudu nggunakké luwih akèh wektu kanggo maca lan ngrenungké Alkitab.

7. Pas maca Alkitab, awaké dhéwé kuduné piyé?

⁷ Awaké dhéwé kuduné ora kesusu pas maca Alkitab. Maca Alkitab kuwi kaya lagi mangan panganan sing disenengi. Umpamané ngéné. Bayangna ana sing masakké njenengan panganan sing njenengan senengi. Tapi merga lagi sibuk utawa mikirké liyané, njenengan mangané kesusu. Bar mangané wis rampung, njenengan lagi sadhar nèk mangané kuduné alon-alon karo dinikmati. Nah pas maca Alkitab, isa waé awaké dhéwé ya kaya ngono. Akibaté, awaké dhéwé dadi ora ngerti apa pelajarané saka ayat-ayat sing diwaca mau. Mulané, macané aja kesusu. Nèk pas maca kisah-kisah ing Alkitab, coba bayangna situasiné, wong-wong ing kisah kuwi sing lagi padha omong-omongan, terus renungna kuwi. Nèk ngupayakké kuwi kabèh, awaké dhéwé mesthi luwih bahagia.

8. Apa buktiné nèk ”budhak sing setya lan wicaksana” nyedhiakké bahan-bahan ing wektu sing pas? (Deloken cathetan ngisor.)

⁸ Yésus nglantik ”budhak sing setya lan wicaksana” kanggo nyedhiakké bahan-bahan sing dhasaré Alkitab ing wektu sing pas. b (Mat. 24:45) Awaké dhéwé ngrasakké nèk sing disedhiakké budhak sing setya kuwi mémang apik lan pas banget. (1 Tés. 2:13) Nèk maca bahan-bahan sing disedhiakké budhak sing setya, awaké dhéwé isa ngerti apa waé sing disenengi lan sing disengiti Yéhuwah. Sakliyané Warta Penting lan Gatèkna!, budhak sing setya ya nyedhiakké artikel liyané ing situs wèb jw.org. Terus, ya ana bahan-bahan sing dirembug ing pertemuan ibadah tengah pekan lan akhir pekan. Saben sasi, awaké dhéwé ya menikmati JW Broadcasting^®. Liwat bahan-bahan sing disedhiakké budhak sing setya, awaké dhéwé isa ngerti pathokané Yéhuwah. Sakwisé ngerti, kudu piyé? Ayo ngrembug cara keloro bèn isa bener-bener bahagia.

9. Apa cara keloro bèn isa bener-bener bahagia?

⁹ CARA 2: Kudu manut pathokané Yéhuwah. Sing nulis Mazmur kandha, ”Wong sing wedi marang Yéhuwah lan manut karo préntahé kuwi bahagia.” (Mzm. 128:1) Wedi marang Gusti Allah kuwi berarti bener-bener ngajèni Gusti Allah lan wedi nggawé Gusti Allah ora seneng. (WB. 16:6) Ing Alkitab, Yéhuwah wis ngandhani soal endi sing bener lan sing salah. (2 Kor. 7:1) Awaké dhéwé isa bahagia nèk manut pathokané Yéhuwah kuwi. Awaké dhéwé ya kudu sengit karo apa sing jahat lan terus ngupaya berbuat sing apik.​—Mzm. 37:27; 97:10; Rm. 12:9.

10. Nurut Roma 12:2, awaké dhéwé kudu piyé?

¹⁰ Wacanen Roma 12:2. Awaké dhéwé mesthiné ngerti nèk Yéhuwah nduwé hak nentokké sing bener lan sing salah. Tapi, mung ngerti thok ora cukup. Awaké dhéwé ya kudu manut karo pathokané Yéhuwah. Umpamané ngéné. Awaké dhéwé ngerti nèk pamréntah kuwi nduwé hak kanggo nggawé aturan soal batas kecepatan ing jalan tol. Tapi, mung ngerti thok ora cukup. Awaké dhéwé ya kudu manut karo aturan kuwi. Terus,  piyé nèk ora gelem manut? Awaké dhéwé isa waé nyetiré ngluwihi batas kecepatan kuwi. Padha kaya ngono, awaké dhéwé manut apa ora karo pathokané Yéhuwah kuwi kétok saka perbuatané awaké dhéwé. Nèk gelem terus manut karo pathokané Yéhuwah, awaké dhéwé isa bahagia. (WB. 12:28) Daud ya ngrasakké kuwi. Dhèwèké ngomong, ”Njenengan ngandhani aku bèn aku isa nindakké préntah-Mu. Aku bahagia merga ana ing cedhak-Mu. Aku bahagia nganti saklawasé merga ana ing sebelah tengen-Mu.”​—Mzm. 16:11.

11-12. (a) Nèk lagi sedhih utawa akèh masalah, awaké dhéwé aja nganti piyé? (b) Apa manfaaté nèk ngrenungké kata-kata ing Filipi 4:8 pas milih hiburan?

¹¹ Nèk lagi sedhih utawa akèh masalah, awaké dhéwé biasané butuh sesuatu bèn ora terus mikirké masalahé awaké dhéwé. Kuwi wajar. Tapi ati-ati, aja nganti awaké dhéwé berbuat sesuatu sing disengiti Yéhuwah.—Éf. 5:10-12, 15-17.

¹² Ing suraté kanggo jemaat Filipi, Paulus ngandhani sedulur-sedulur ing kono bèn terus mikirké apa waé ”sing bener, . . . sing murni, sing nggawé awaké dhéwé nresnani wong liya, . . . [lan] sing apik”. (Wacanen Filipi 4:8.) Mémang, ing ayat kuwi Paulus ora lagi mbahas soal hiburan. Tapi, kata-katané Paulus kuwi isa ditrapké wektu milih lagu, film, buku, utawa vidéo game. Hasilé, awaké dhéwé isa ngerti endi hiburan sing apik nurut pandhangané Yéhuwah. Awaké dhéwé mesthi ora péngin kaya wong-wong ing donya iki sing moralé bobrok. (Mzm. 119:1-3) Terus nèk manut pathokané Yéhuwah, awaké dhéwé ya isa nduwé hati nurani sing apik. (Kis. 23:1) Saiki, ayo ngrembug cara sing ketelu bèn isa bener-bener bahagia.

13. Apa cara ketelu bèn isa bener-bener bahagia? (Yohanes 4:23, 24)

¹³ Cara 3: Mung nyembah Yéhuwah. Yéhuwah kuwi sing nyiptakké awaké dhéwé. Mula, mung Yéhuwah sing kudu disembah. (Why. 4:11; 14:6, 7) Tapi, awaké dhéwé kudu nyembah Yéhuwah ”sesuai karo tuntunané roh suci lan sesuai karo apa sing bener”. (Wacanen Yohanes 4:23, 24.) Merga dituntun roh suci, awaké dhéwé isa nyembah Yéhuwah nganggo cara sing bener yaiku sing sesuai karo Alkitab. Tapi, piyé nèk Seksi Yéhuwah ora isa bébas ngibadah lan nginjil? Awaké dhéwé kudu tetep nyembah Yéhuwah. Ing beberapa negara, ana luwih saka 100 sedulur sing dipenjara mung merga wong-wong kuwi Seksi Yéhuwah. c Meskipun ngono, sedulur-sedulur kuwi isa tetep bahagia merga kerep ndonga, maca Alkitab, lan nyritakké soal Yéhuwah lan Kerajaané karo wong-wong liyané. Dadi meskipun diécé utawa dianiaya, awaké dhéwé bakal tetep bahagia merga ngerti nèk Yéhuwah ora bakal ninggalké umaté. Yéhuwah ya bakal mberkahi umaté sing setya.​—Yak. 1:12; 1 Ptr. 4:14.

14. Critakna pengalamané Sedulur Jovidon Bobojonov.

¹⁴ Saiki, ayo ngrembug buktiné nèk telu cara sing wis disebutké mau isa nggawé bener-bener bahagia. Gatèkna pengalamané Sedulur Jovidon Bobojonov sing umuré 19 taun saka Tajikistan. Sedulur kuwi ora gelem mèlu wajib militèr. Tanggal 4 Oktober 2019, dhèwèké ditangkep ing omahé, terus ditahan nganti beberapa bulan, lan dianggep kaya penjahat. Dhèwèké digebugi, dipeksa sumpah  nèk bakal setya karo negara, lan dikongkon nganggo seragam militèr. Beberapa negara ngerti soal kasus kuwi. Bar kuwi, pengadilan mutuské nèk dhèwèké bersalah, lan dhèwèké dipenjara. Tapi akhiré, présidèn Tajikistan mutuské nèk Jovidon ora bersalah lan ngongkon bèn Jovidon dibébaské. Jovidon isa tetep setya merga dhèwèké ngupaya tetep cedhak karo Gusti Allah.

15. Piyé carané Jovidon isa tetep maca lan sinau Alkitab selama dipenjara?

¹⁵ Selama dipenjara, Jovidon tetep maca lan sinau Alkitab. Padahal, dhèwèké ora nduwé Alkitab lan bacaan-bacaan saka organisasi. Terus, piyé carané? Sedulur-sedulur sing ngirimi panganan nulis ayat harian ing plastik sing dienggo nggawa panganan kuwi. Dadi, saben dina Jovidon isa maca Alkitab lan ngrenungké kuwi. Bar dibébaské saka penjara, dhèwèké ngomong ngéné, ”Nèk ing negarané njenengan Seksi Yéhuwah isa bébas ngibadah, njenengan kudu manfaatké kesempatan kuwi kanggo maca Alkitab lan bacaan-bacaan saka organisasi. Hasilé, njenengan isa luwih kenal karo Yéhuwah.”

16. Jovidon terus mikirké apa bèn isa tetep setya?

¹⁶ Jovidon ya manut karo pathokané Yéhuwah. Dhèwèké ora mikirké sing èlèk-èlèk lan  ora berbuat sing disengiti Yéhuwah. Dhèwèké terus mikirké Yéhuwah lan kabèh sing dianggep penting karo Yéhuwah. Terus, dhèwèké ya menikmati ciptaané Yéhuwah. Misalé, saben ésuk dhèwèké krungu ocèhan manuk. Pas bengi, dhèwèké ndelok langit sing ana bulan lan bintangé. Dhèwèké ngomong, ”Rasané bahagia banget pas nggatèkké ciptaané Yéhuwah. Tékadku dadi saya kuwat kanggo setya karo Yéhuwah.” Awaké dhéwé kudu bersyukur merga Yéhuwah wis nyedhiakké kabèh sing awaké dhéwé butuhké. Hasilé, awaké dhéwé isa bahagia lan tetep sabar.

17. Nèk ngalami masalah kaya Jovidon, apa hasilé nèk awaké dhéwé tetep setya? (1 Pétrus 1:6, 7)

¹⁷ Sakliyané kuwi, Jovidon tetep nyembah Yéhuwah. Dhèwèké éling kata-katané Yésus ing Lukas 4:8. Ing kono Yésus ngomong, ”Mung Yéhuwah Gusti Allahmu sing kudu mbok sembah, lan mung marang Dhèwèké kowé kudu ngabdi.” Komandan militèr lan para tentara péngin bèn Jovidon ora nglayani Yéhuwah manèh. Mulané, Jovidon luwih tenanan lan luwih kerep ndonga. Dhèwèké njaluk Yéhuwah mbantu dhèwèké bèn terus setya. Yéhuwah njawab dongané. Jovidon isa tetep setya meskipun dipenjara lan digebugi. Dhèwèké seneng banget merga imané wis diuji.​—Wacanen 1 Pétrus 1:6, 7.

18. Piyé carané bèn isa bener-bener bahagia?

¹⁸ Yéhuwah ngerti carané bèn njenengan isa bener-bener bahagia. Nèk ngetrapké telu cara sing wis disebutké mau, njenengan isa bahagia meskipun ngadhepi masalah sing abot. Njenengan bakal bener-bener ngrasakké nèk ”wong-wong sing Gusti Allahé Yéhuwah kuwi bahagia”.​—Mzm. 144:15.