1. Nurut Maléakhi 3:16, Yéhuwah nulis buku apa, lan apa isiné?

 ANA buku sing ditulis Yéhuwah selama éwonan taun. Buku kuwi isiné jenengé wong-wong sing setya. Sing ditulis pertama ing buku kuwi yaiku Habèl. * (Luk. 11:50, 51) Nganti saiki, wis ana wong akèh sing ditulis jenengé ing buku kuwi. Ing Alkitab, buku kuwi disebut ”buku kanggo nyathet jenengé wong-wong sing diéling-éling”, ”buku kehidupan”, lan ”gulungan kehidupan”. Tapi ing artikel iki, buku kuwi bakal disebut ”buku kehidupan”.​—Wacanen Maléakhi 3:16; Why. 3:5; 17:8.

2. Sapa sing jenengé ditulis ing buku kehidupan, lan piyé carané bèn jenengé awaké dhéwé ana ing buku kuwi?

² Buku kuwi isiné jenengé wong-wong sing nyembah Yéhuwah lan ngajèni jenengé. Wong-wong kuwi sukmbèn bakal isa urip saklawasé. Jenengé awaké dhéwé ya isa ditulis ing buku kehidupan. Tapi, awaké dhéwé kudu cedhak karo Yéhuwah lan nduwé iman karo korban tebusané Yésus. (Yoh. 3:16, 36)  Ora soal nduwé harapan urip ing swarga utawa ing bumi, awaké dhéwé mesthi péngin jenengé ana ing buku kehidupan.

3-4. (a) Apa wong-wong sing jenengé ditulis ing buku kehidupan wis pasti bakal urip saklawasé? Jelasna. (b) Apa sing bakal dibahas ing artikel iki lan artikel berikuté?

³ Tapi, apa kuwi berarti wong-wong sing jenengé ditulis ing buku kehidupan wis pasti bakal urip saklawasé? Ing Pangentasan 32:33, Yéhuwah tau kandha karo Musa, ”Wong sing dosa marang Aku, jenengé bakal Tak hapus saka buku-Ku.” Kuwi berarti jeneng ing buku kehidupan isa dihapus. Kuwi seolah-olah Yéhuwah nulis jenengé awaké dhéwé nganggo pènsil, dadi isa dibusak. (Why. 3:5) Mula, awaké dhéwé kudu ngupaya bèn jenengé awaké dhéwé terus ana ing buku kehidupan, seolah-olah ditulis nganggo tinta.

⁴ Tapi awaké dhéwé mungkin mikir: Sapa sing jenengé ditulis ing buku kehidupan lan sing ora? Kapan wong-wong sing ditulis jenengé isa urip saklawasé? Piyé nèk ana wong sing mati tapi durung kenal karo Yéhuwah? Apa jenengé wong-wong kuwi isa ditulis ing buku kehidupan? Pertanyaan-pertanyaan kuwi bakal dibahas ing artikel iki lan artikel berikuté.

SAPA SING JENENGÉ ANA ING BUKU KEHIDUPAN?

5-6. (a) Nurut Filipi 4:3, sapa sing jenengé ditulis ing buku kehidupan? (b) Kapan jenengé wong-wong kuwi terus ana ing buku kehidupan?

⁵ Sapa waé sing jenengé ditulis ing buku kehidupan lan sing ora? Ing paragraf-paragraf berikuté, awaké dhéwé bakal mbahas soal kuwi.

⁶ Wong-wong sing bakal mréntah bareng karo Yésus ing swarga jenengé ditulis ing buku kehidupan. Ing suraté kanggo ’kanca nyambut gawéné’ ing Filipi, Rasul Paulus  kandha nèk jenengé wong-wong kuwi ana ing buku kehidupan. (Wacanen Filipi 4:3.) Tapi bèn jenengé isa terus ana ing kono, wong-wong kuwi kudu terus setya nganti akhir. Wong-wong sing bakal mréntah bareng karo Yésus kuwi bakal diwènèhi meterai sing dadi tandha nèk wis pasti bakal munggah swarga. (Why. 7:3) Kuwi bakal kelakon sakdurungé wong-wong kuwi mati utawa sakdurungé sengsara gedhé dimulai. Kuwi artiné jenengé wong-wong kuwi bakal ana sakterusé ing buku kehidupan.

7. Saka Wahyu 7:16, 17, apa buktiné nèk umaté Yéhuwah sing slamet ngliwati Armagédon jenengé bakal terus ana ing buku kehidupan?

⁷ Wong-wong sing dadi bagéan saka ”kumpulan gedhé” jenengé ya ana ing buku kehidupan. Apa saiki jenengé wong-wong kuwi wis ditulis ing buku kehidupan? Iya. Apa sakwisé Armagédon jenengé ya bakal tetep ana ing buku kehidupan? Iya. (Why. 7:9, 14) Yésus ngomong nèk wong-wong kuwi digambarké kaya domba lan bakal ”urip saklawasé”. (Mat. 25:46; Yoh. 10:16) Tapi kuwi ora otomatis. Jenengé wong-wong kuwi kaya ditulis nganggo pènsil. Terus pas Pamréntahan Sèwu Taun, Yésus ”bakal dadi gembala lan ngarahké wong-wong kuwi ing mata air kehidupan”. Wong-wong sing gelem manut karo arahané Yésus lan tetep setya karo Yéhuwah, jenengé bakal terus ana ing buku kehidupan.​—Wacanen Wahyu 7:16, 17.

8. Sapa waé sing jenengé ora ditulis ing buku kehidupan, lan wong-wong kuwi bakal diapakké?

⁸ Wong-wong sing disingkirké pas Armagédon jenengé ora ditulis ing buku kehidupan. Yésus ngomong nèk wong-wong kuwi ”bakal mati saklawasé”. (Mat. 25:46) Terus, Paulus ya ngomong nèk ”wong-wong kuwi bakal dihukum lan disingkirké saklawasé”. (2 Tés. 1:9; 2 Ptr. 2:9) Sakliyané kuwi, wong-wong sing sengaja ora manut arahané roh suci ya bakal ngalami sing padha. Kabèh wong sing kaya ngono kuwi bakal disingkirké saklawasé lan ora bakal diuripké manèh. (Mat. 12:32; Mrk. 3:28, 29; Ibr. 6:4-6) Saiki, ayo ngrembug sapa wong-wong sing bakal diuripké manèh ing bumi.

WONG-WONG SING BAKAL DIURIPKÉ MANÈH

9. Nurut Kisah 24:15, sapa waé sing bakal diuripké manèh? Jelasna.

⁹ Menurut Alkitab, Gusti Allah bakal nguripké manèh ”wong-wong sing bener lan sing ora bener”. (Wacanen Kisah 24:15.) ”Wong-wong sing bener” kuwi maksudé wong-wong sing setya nglayani Yéhuwah nganti akhir. Terus, wong-wong ”sing ora bener” kuwi wong sing ora nglayani Yéhuwah. Malah, wong-wong kuwi akèh-akèhé kelakuané ora nggenah lan jahat. Merga diuripké manèh, apa kuwi artiné jenengé wong-wong kuwi ditulis ing buku kehidupan? Ayo ngrembug soal kuwi.

10. Kenapa ”wong-wong sing bener” bakal diuripké manèh, lan wong-wong kuwi bakal dilantik dadi apa? (Deloken ”Pitakonané Sing Maca” ing majalah iki sing mbahas soal wong-wong sing bakal diuripké ing bumi.)

¹⁰ ”Wong-wong sing bener.” Jenengé wong-wong kuwi ana ing buku kehidupan. Pas mati, apa jenengé wong-wong kuwi dihapus saka buku kehidupan? Ora, merga Yéhuwah kuwi ”Gusti Allahé wong urip, dudu Gusti Allahé wong mati”. Dadi nurut pandhangané Gusti Allah, kabèh wong kuwi isih ”urip”. (Luk. 20:38) Mémang kaya sing disebutké mau, jenengé wong-wong kuwi isih ana ing buku kehidupan pas wong-wong kuwi diuripké manèh. Tapi, kuwi kaya ditulis nganggo pènsil. (Luk. 14:14) Terus, wong-wong sing bener  kuwi ana sing dilantik dadi ”para pemimpin ing bumi”.​—Mzm. 45:16.

11. Piyé bèn wong-wong ”sing ora bener” kuwi jenengé isa ditulis ing buku kehidupan?

¹¹ Wong-wong ”sing ora bener”. Pas isih urip, wong-wong kuwi durung nglayani Yéhuwah. Mula, jenengé ora ditulis ing buku kehidupan. Tapi merga wong-wong kuwi diuripké manèh, Yéhuwah mènèhi kesempatan bèn jenengé wong-wong kuwi isa ditulis ing buku kehidupan. Wong-wong ”sing ora bener” kuwi mbiyèn mungkin ana sing jahat. Dadi, wong-wong kuwi kudu dibantu bèn isa manut pathokané Yéhuwah lan ora berbuat jahat manèh. Bèn kuwi isa kelakon, mesthi bakal ana akèh banget wong sing kudu diwulang. Liwat Kerajaané, Yéhuwah bakal ngarahké gawéan kuwi.

12. (a) Sapa sing bakal mulang wong-wong sing ora bener? (b) Wong-wong sing ora gelem manut bakal diapakké?

¹² Lha terus, sapa sing bakal mulang wong-wong sing ora bener kuwi? Sing mulang kuwi umaté Yéhuwah sing slamet ngliwati Armagédon lan wong-wong sing bener sing diuripké manèh. Bèn jenengé isa ditulis ing buku kehidupan, wong-wong sing ora bener kuwi kudu akrab karo Yéhuwah lan nglayani Dhèwèké. Saka swarga, Yéhuwah karo Yésus bakal ndelok wong-wong kuwi gelem manut apa ora. (Why. 20:4) Wong-wong sing ora gelem manut bakal disingkirké meskipun umuré wis 100 taun. (Yés. 65:20) Yéhuwah karo Yésus isa bener-bener ngerti isi atiné manungsa. Dadi, nèk ana sing arep berbuat jahat ing donya anyar, Yéhuwah karo Yésus mesthi ora bakal meneng waé.​—Yés. 11:9; 60:18; 65:25; Yoh. 2:25.

SING BAKAL URIP SAKLAWASÉ LAN SING BAKAL DIADILI

13-14. (a) Mbiyèn, awaké dhéwé ngertiné piyé soal omongané Yésus ing Yohanes 5:29? (b) Tapi sakjané Yésus ngomongé piyé, lan kenapa kuwi masuk akal?

¹³ Yésus ngandhani nèk bakal ana wong-wong sing diuripké manèh ing bumi.  Yésus kandha, ”Bakal tekan wektuné kabèh wong sing ana ing njero kuburan bakal krungu swarané lan metu. Wong-wong sing tumindaké apik bakal urip saklawasé, ning wong-wong sing tumindaké èlèk bakal diadili.” (Yoh. 5:28, 29) Apa maksudé?

¹⁴ Mbiyèn, awaké dhéwé ngertiné nèk sing dimaksud Yésus kuwi perbuatané wong-wong sakwisé diuripké manèh. Dadi, wong-wong sing diuripké manèh kuwi bakal ana sing tumindaké apik lan ana sing tumindaké èlèk. Tapi, Yésus ora ngomong nèk wong sing diuripké manèh kuwi bakal tumindak apik utawa bakal tumindak èlèk. Yésus ngomongé ”wong-wong sing tumindaké apik” lan ”wong-wong sing tumindaké èlèk”. Maksudé Yésus kuwi perbuatané wong-wong kuwi selama isih urip. Kuwi masuk akal, merga ing donya anyar ora ana wong-wong sing tumindaké èlèk. Terus, apa maksudé omongané Yésus nèk wong-wong bakal diuripké manèh kanggo ”urip saklawasé” lan diuripké manèh kanggo ”diadili”?

15. Wong-wong kaya apa sing bakal diuripké manèh kanggo ”urip saklawasé”, lan kenapa?

¹⁵ Wong-wong sing bener yaiku sing tumindaké apik bakal diuripké manèh kanggo ”urip saklawasé”, merga jenengé ana ing buku kehidupan. Kuwi berarti, ”wong-wong sing tumindaké apik” sing disebutké ing Yohanes 5:29 padha karo ”wong-wong sing bener” sing disebutké ing Kisah 24:15. Mémang menurut Roma 6:7, wong sing wis mati wis dibébaské saka dosané. Nah merga wong kuwi tetep setya nganti mati, Yéhuwah ora bakal lali. (Ibr. 6:10) Tapi, wong-wong sing bener sing diuripké manèh kuwi kudu terus setya bèn jenengé isa terus ana ing buku kehidupan.

16. Sapa sing bakal diuripké manèh kanggo ”diadili”?

¹⁶ Terus, wong-wong sing tumindaké èlèk piyé? Mémang pas mati, wong-wong kuwi wis dibébaské saka dosané. Tapi, wong-wong kuwi ora nglayani Yéhuwah. Dadi, jenengé ora ana ing buku kehidupan. ”Wong-wong sing tumindaké èlèk” kuwi padha karo wong-wong ”sing ora bener” sing disebutké ing Kisah 24:15. Wong-wong kuwi bakal diuripké manèh kanggo ”diadili”. * Yésus bakal ndelok perbuatané wong-wong kuwi. (Luk. 22:30) Butuh wektu nganti akhiré jenengé wong-wong kuwi ana ing buku kehidupan. Nèk wong-wong sing ora bener kuwi mertobat lan gelem nglayani Yéhuwah, jenengé isa ana ing buku kehidupan.

17-18. Kabèh wong sing diuripké manèh ing bumi kudu ngapa, lan apa maksudé wong-wong kuwi bakal diadili nurut ”tumindaké”?

¹⁷ Pas diuripké manèh, wong sing bener karo wong sing ora bener kudu manut karo hukumé Yéhuwah sing ana ing gulungan-gulungan anyar. Gulungan-gulungan kuwi bakal dibukak selama sèwu taun. Rasul Yohanes éntuk wahyu soal kuwi. Dhèwèké kandha, ”Aku ndelok wong-wong mati, yaiku wong biasa lan wong penting, ngadeg ing ngarepé takhta kuwi, lan gulungan-gulungan dibukak. Ning ana gulungan liya sing dibukak, yaiku gulungan kehidupan. Wong-wong mati kuwi diadili sesuai karo apa sing ditulis ing gulungan kuwi, nurut tumindaké wong-wong kuwi.”​—Why. 20:12, 13.

 ¹⁸ Terus, apa maksudé wong-wong kuwi bakal diadili nurut ”tumindaké”? Apa kuwi maksudé tumindaké sakdurungé mati? Ora. Wong sing wis mati kuwi wis dibébaské saka dosané. Dadi, ora mungkin nèk kuwi maksudé tumindaké wong-wong kuwi sakdurungé mati. Sing dimaksud kuwi tumindaké wong-wong kuwi selama ing donya anyar. Sukmbèn Nuh, Samuèl, Daud, karo Danièl ya kudu sinau soal Yésus lan nduwé iman karo korban tebusané. Lha nèk wong-wong sing setya kuwi waé kudu sinau, apa manèh wong-wong sing ora bener.

19. Piyé nèk wong-wong sing diuripké manèh kuwi ora gelem manut hukumé Yéhuwah?

¹⁹ Piyé nèk wong-wong sing diuripké manèh kuwi ora gelem manut hukumé Yéhuwah? Wong-wong kuwi bakal disingkirké saklawasé. Ing Wahyu 20:15 disebutké, ”Sapa waé sing jenengé ora ditulis ing buku kehidupan ya bakal diuncalké ing danau geni.” Mula, awaké dhéwé kudu terus ngupaya bèn jenengé awaké dhéwé ditulis ing buku kehidupan lan terus ana ing kono.

20. Apa sing bakal kelakon selama Pamréntahan Sèwu Taun? (Deloken gambar halaman 1.)

²⁰ Pas Pamréntahan Sèwu Taun, bakal ana akèh banget wong sing kudu diwulang soal Yéhuwah. Kuwi mesthi nyenengké banget. Terus, wong sing bener karo sing ora bener ya kudu mbuktèkké nèk gelem terus manut karo Yéhuwah. (Yés. 26:9; Kis. 17:31) Ing artikel berikuté, awaké dhéwé bakal ngrembug soal wong-wong sing sukmbèn kudu diwulang lan sapa sing bakal mulang wong-wong kuwi.