1. Sakdurungé mati, Pétrus dikèki tugas apa?

 RASUL PÉTRUS wis setya nglayani Yéhuwah puluhan taun. Dhèwèké ngancani Yésus nginjil ing endi-endi. Dhèwèké ya sing mulai nginjil ing wong-wong sing dudu Yahudi. Terus, dhèwèké ya dadi anggota pengurus pusat. Nah pas arep mati, Yéhuwah ngekèki dhèwèké tugas manèh. Kira-kira taun 62-64 M, dhèwèké dikon nulis surat 1 Pétrus lan 2 Pétrus. Pétrus berharap surat-suraté kuwi isa nguwatké wong-wong Kristen, bahkan sakwisé dhèwèké mati.—2 Ptr. 1:​12-15.

2. Ngapa kok surat-suraté Pétrus kuwi tepat waktu?

² Wektu Pétrus nulis loro surat iki, sedulur-sedulur lagi padha ’sengsara merga ngalami akèh cobaan’. (1 Ptr. 1:6) Ana wong-wong sing kelakuané bejat lan nyebarké ajaran palsu ing jemaat. (2 Ptr. 2:​1, 2, 14) Wong Kristen ing Yérusalèm ngerti nèk ”kabèh wis arep diakhiri”. Yérusalèm karo baité sedhéla manèh bakal dihancurké tentara Romawi. (1 Ptr. 4:7) Nèk mempelajari loro suraté Pétrus kuwi, wong-wong Kristen isa tetep setya meskipun lagi ngadhepi tantangan, lan ngerti kudu piyé pas sukmbèn ana tantangan manèh. b

3. Ngapa kok suraté Pétrus kuwi kudu dipelajari?

 ³ Mémang, surat-suraté Pétrus iki kanggo wong-wong jaman kuwi. Tapi merga wis dadi bagéan saka Alkitab, awaké dhéwé saiki ya isa éntuk manfaat. (Rm. 15:4) Saiki, ya ana akèh wong sing kelakuané bejat. Kuwi isa waé dadi tantangan kanggo awaké dhéwé. Terus, ora suwé manèh ya ana sengsara gedhé. Kuwi luwih medèni daripada kehancurané Yérusalèm. Ing loro suraté Pétrus kuwi, ana naséhat bèn awaké dhéwé terus mikirké dinané Yéhuwah, ora wedi karo manungsa, lan tambah sayang karo para sedulur. Terus, ya ana naséhat kanggo para pinituwa bèn terus nggatèkké domba-dombané Yéhuwah.

4. Kaya sing ditulis ing 2 Pétrus 3:​3, 4, apa sing isa marakké awaké dhéwé dadi ragu-ragu?

⁴ Saiki, akèh wong ora percaya keterangan ing Alkitab soal apa sing bakal kelakon. Seksi-Seksi Yéhuwah wis bertaun-taun ngandhani wong-wong soal akhir donya iki. Tapi, wong-wong padha ngécé merga akhir kuwi ora ndang kelakon-kelakon. Malah, ana sing ngomong nèk kuwi ora bakal kelakon. (Wacanen 2 Pétrus 3:​3, 4.) Nèk anggota keluarga, kanca kerja, utawa pas nginjil ana sing ngomong kaya ngono, kuwi isa marakké awaké dhéwé dadi ragu-ragu. Ing suraté Pétrus, ana naséhat apa soal kuwi?

5. Bèn awaké dhéwé sabar ngentèni akhir donya, apa sing kudu diéling-éling? (2 Pétrus 3:​8, 9)

⁵ Kanggoné wong-wong, Yéhuwah kuwi kesuwèn, ora ndang ngukum wong jahat. Tapi saka kata-katané Pétrus, awaké dhéwé diélingké nèk pandhangané Yéhuwah soal wektu kuwi béda karo manungsa. (Wacanen 2 Pétrus 3:​8, 9.) Kanggoné Yéhuwah, sèwu taun kuwi padha karo sedina. Yéhuwah kuwi sabar, ora péngin ana sing mati. Tapi nèk wis wektuné, Yéhuwah bakal nyingkirké wong jahat. Mulané mumpung saiki isih ana wektu, awaké dhéwé péngin ngandhani sak akèh-akèhé wong bèn meréka isa slamet.

6. Piyé carané ”terus mikirké” dinané Yéhuwah? (2 Pétrus 3:​11, 12)

⁶ Pétrus ngongkon awaké dhéwé bèn ”terus mikirké” dinané Yéhuwah. (Wacanen 2 Pétrus 3:​11, 12.) Piyé carané? Saben dina, awaké dhéwé isa mbayangké berkah-berkah ing donya anyar. Bayangna sukmbèn udarané resik, panganané bergizi, lan isa ketemu manèh karo kanca utawa keluarga sing wis mati. Terus, wong-wong jaman mbiyèn sing wis diuripké manèh ya isa dicritani soal ramalan ing Alkitab sing wis kelakon. Nèk ngrenungké kuwi, awaké dhéwé bakal tambah péngin donya anyar ndang kelakon, lan tambah yakin nèk kuwi mung tinggal sedhéla manèh. Nèk ”wis ngerti soal” masa depan, awaké dhéwé ora bakal ”diblasukké” wong-wong sing nyebarké ajaran palsu.—2 Ptr. 3:17.

7. Apa akibaté nèk wedi karo manungsa?

⁷ Merga ngerti donya anyar wis ora suwé manèh, awaké dhéwé mesthi dadi péngin nyritakké kabar apik karo wong-wong. Tapi kadhang-kadhang isa waé dadi ora wani ngomong. Lha ngapa? Mungkin awaké dhéwé wedi karo tanggepané wong. Kuwi ya dialami Pétrus. Pas Yésus diadili, Pétrus ora gelem  ngakoni nèk dhèwèké muridé Yésus. Malah, dhèwèké bola-bali ngomong nèk ora kenal karo Yésus. (Mat. 26:​69-75) Tapi sakwisé berupaya bèn dadi wong sing kendel, Pétrus ngomong, ”Aja wedi karo apa sing nggawé wong-wong wedi lan aja kuwatir.” (1 Ptr. 3:14) Kaya Pétrus, awaké dhéwé ya isa ora wedi manèh karo manungsa.

8. Piyé bèn ora wedi karo manungsa? (1 Pétrus 3:15)

⁸ Piyé bèn awaké dhéwé ora wedi karo manungsa? Pétrus ngomong, ”Kowé kudu ngakoni ing atimu nèk Kristus kuwi Gusti lan dhèwèké kuwi suci.” (Wacanen 1 Pétrus 3:15.) Kuwi berarti kudu ngrenungké nèk Yésus kuwi Raja lan kuwasané gedhé. Dadi nèk pas arep ngekèki kesaksian tapi ngrasa wedi utawa dheg-dhegan, njenengan isa mbayangké soal Yésus. Dhèwèké lagi ing swarga lan ing sekitaré ana akèh banget malaékat. Yésus nduwé ”kabèh wewenang ing swarga lan ing bumi”. Dhèwèké ya janji nèk bakal ”terus ngancani [njenengan] nganti akhir jaman”. (Mat. 28:​18-20) Pétrus ya ngomong nèk kudu selalu ”siap” nyritakké apa sing awaké dhéwé percaya. Piyé carané bèn selalu siap ngekèki kesaksian ing gawéan, sekolahan, utawa panggonan  liya? Isa mikirké sik arep ngomong apa lan ngomongé pas apa. Terus ya kudu ndonga, percaya nèk Yéhuwah bakal mbantu awaké dhéwé bèn kendel.—Kisah 4:29.  

9. Apa buktiné nèk Pétrus isih kudu berjuang manut préntahé Yésus? (Deloken gambar kanggo paragraf 9.)

⁹ Pétrus krungu pas Yésus ngomong, ”Aku mènèhi kowé préntah anyar, yaiku kowé kudu padha-padha nresnani. Kaya aku wis nresnani kowé, kowé ya kudu padha-padha nresnani.” (Yoh. 13:34) Tapi, Pétrus isih kudu berjuang bèn isa manut préntahé Yésus kuwi. Misalé, Pétrus mauné gelem bergaul karo sedulur-sedulur sing dudu Yahudi. Tapi merga wedi karo wong Kristen Yahudi, dhèwèké akhiré ora gelem mangan bareng manèh. Rasul Paulus ngomong nèk Pétrus kuwi ”munafik”. (Gal. 2:​11-14) Pétrus gelem dinaséhati. Ing surat-suraté, Pétrus ngekèki naséhat nèk awaké dhéwé kudu berusaha bèn para sedulur ora mung ngerti nèk disayangi, tapi ya isa ngrasakké kuwi.

10. Bèn isa ”tulus sayang” karo sedulur seiman, awaké dhéwé kudu piyé? Jelasna. (1 Pétrus 1:22)

¹⁰ Pétrus ngomong nèk awaké dhéwé kudu ”tulus sayang” karo sedulur seiman. (Wacanen 1 Pétrus 1:22.) Bèn isa ngono, kudu ”manut karo apa sing bener” ing Alkitab. Ing Alkitab disebutké nèk ”Gusti Allah kuwi ora mbédak-mbédakké”. (Kis. 10:​34, 35) Mémang kaya Yésus, isa waé awaké dhéwé luwih cedhak karo wong-wong tertentu. (Yoh. 13:23; 20:2) Tapi nèk manut préntahé Yésus, sing kudu disayangi kuwi kabèh sedulur. Pétrus ngomong nèk awaké dhéwé kudu berusaha bèn ”sayang” karo sedulur seiman kaya karo keluargané dhéwé.—1 Ptr. 2:17.

11. Apa maksudé ”tenanan sayang karo liyané saka ati”?

¹¹ Pétrus ya ngongkon awaké dhéwé bèn ”tenanan sayang karo liyané saka ati”. Maksudé ”tenanan” iki kudu tetep sayang meskipun kuwi ora gampang. Misalé, nèk ana sedulur seiman sing marakké tersinggung utawa lara ati, mungkin awaké dhéwé pénginé mbales. Tapi saka pengalamané Pétrus, jelas nèk Gusti Allah ora seneng nèk wong balas dendam. (Yoh. 18:​10, 11) Pétrus nulis, ”Aja mbales kejahatan nganggo kejahatan. Nèk diécé aja mbales ngécé. Ning, kowé kudu mbales nganggo tumindak sing apik.” (1 Ptr. 3:9) Nèk tenanan sayang, mesthi bakal tetep apikan lan perduli bahkan karo wong sing wis nglarani ati.

12. (a) Nèk ”sayang banget” mesthi bakal piyé? (b) Saka vidéo Ngupaya Rukun karo Sedulur-Sedulur, apa sing péngin njenengan upayakké?

¹² Ing suraté sing pertama, Pétrus ya nyebutké nèk awaké dhéwé ”sayang banget . . . mesthi gelem ngapura”. (1 Ptr. 4:8) Pétrus mungkin kèlingan karo sing diajarké Yésus. Pas kuwi, Pétrus ngrasa nèk dhèwèké ngampuni ”nganti ping pitu” kuwi wis apik banget. Tapi jaréné Yésus, dhèwèké kudu ngampuni ”nganti ping 77”, berarti ora ana batesé. (Mat. 18:​21, 22) Aja cilik ati nèk durung isa ngetrapké kuwi. Kabèh umaté Yéhuwah kudu berjuang bèn isa ngampuni. Sing penting, kudu berupaya bèn isa ngampuni lan rukun manèh. c

13. Ngapa kok tugasé para pinituwa kanggo nggatèkké domba-dombané Yéhuwah kuwi ora gampang?

¹³ Bar diuripké manèh, Yésus ngongkon Pétrus, ”Engonen anak-anak dombaku.” (Yoh. 21:16) Préntahé Yésus kuwi ya kanggo para pinituwa. Tapi isa waé tugas kuwi ora gampang, soalé para pinituwa kudu isa mbagi wektu. Para pinituwa kudu mastèkké keluargané ngrasa digatèkké, kebutuhané tercukupi, lan tetep akrab karo Yéhuwah. Para pinituwa ya kudu semangat nginjil lan nyiapké bagéan ing pertemuan-pertemuan ibadah. Terus ya ana sing dadi anggota Panitia Penghubung Rumah Sakit lan ing Departemèn Rancang/Bangun Setempat. Para pinituwa bener-bener sibuk banget.

14. Bèn isa nggatèkké domba-dombané Yéhuwah, para pinituwa kudu piyé? (1 Pétrus 5:​1-4)

¹⁴ Pétrus ngongkon para pinituwa, ”Kowé kudu dadi gembala sing ngopèni domba-dombané Gusti Allah.” (Wacanen 1 Pétrus 5:​1-4.) Para pinituwa, njenengan mesthi sayang karo sedulur-sedulur lan péngin nggatèkké meréka. Tapi kadhang ora isa merga sibuk lan wis kesel. Terus, kudu piyé? Critakna kabèh karo Yéhuwah. Pétrus nulis, ”Nèk kowé mbantu wong liya, kowé kudu ngendelké kekuwatan saka Gusti Allah.” (1 Ptr. 4:11) Mungkin njenengan ora isa mbantu sedulur-sedulur ngatasi kabèh masalahé. Tapi élinga, nèk ana ”gembala sing utama” yaiku Yésus Kristus. Yésus sing luwih sanggup nulungi sedulur-sedulur, embuh saiki utawa sukmbèn. Yéhuwah péngin para pinituwa sayang, nggatèkké, lan ”dadi conto kanggo domba-dombané Gusti Allah”.

15. Critakna pengalamané William. (Deloken gambar kanggo paragraf 15.)

¹⁵ William, sing wis suwé dadi pinituwa, ngerti pentingé kunjungan penggembalaan. Pas awal pandemi COVID-19, dhèwèké karo para pinituwa liyané saben minggu ngubungi sedulur-sedulur ing kelompok nginjilé. Dhèwèké crita, ”Merga ing omah terus, para sedulur dadi kesepian, gampang kuwatir, lan  cilik ati.” Nèk ana sing lagi nyritakké kekuwatirané, William ngrungokké tenanan bèn isa ngerti masalahé lan piyé carané mbantu. Terus, dhèwèké nggolèki publikasi utawa vidéo saka jw.org sing isa bermanfaat kanggo sedulur kuwi. Dhèwèké ngomong, ”Saiki para pinituwa kudu luwih kerep kunjungan penggembalaan. Nèk kanggo mbantu wong-wong sing durung kenal Yéhuwah waé ngupaya tenanan, apa manèh kanggo mbantu para sedulur, sing wis dadi dombané Yéhuwah. Kuduné luwih tenanan manèh.”

16. Bar mempelajari surat-suraté Pétrus, apa waé sing isa diupayakké?

¹⁶ Awaké dhéwé wis mbahas surat-suraté Pétrus. Mungkin njenengan dadi ngerti apa waé sing kudu diupayakké manèh. Apa njenengan péngin luwih kerep ngrenungké berkah-berkah ing donya anyar? Apa njenengan péngin ngekèki kesaksian ing gawéan, sekolahan, utawa panggonan liya? Apa manèh sing kudu diupayakké bèn isa mbuktèkké nèk sayang banget karo sedulur-sedulur? Para pinituwa, apa njenengan péngin luwih semangat lan réla nggembalakké domba-dombané Gusti Allah? Nèk ternyata ana akèh sing kudu diupayakké, aja cilik ati. ”Gusti [Yésus] kuwi apikan” lan bakal mbantu njenengan. (1 Ptr. 2:3) Pétrus ngomong, ”Gusti Allah . . . bakal nglatih kowé nganti rampung. Dhèwèké bakal nggawé kowé kuwat. Dhèwèké bakal mbantu kowé bèn tetep setya. Dhèwèké bakal ndhukung kowé.”—1 Ptr. 5:10.

17. Apa berkahé nèk terus berjuang lan gelem dilatih Yéhuwah?

¹⁷ Pétrus tau ngrasa ora pantes cedhak karo Yésus. (Luk. 5:8) Tapi merga Yéhuwah lan Yésus terus nyemangati, Pétrus isa dadi muridé Yésus sing setya. Akhiré, Pétrus ya isa ’mlebu menyang Kerajaan sing ana saklawasé, duwèké Yésus Kristus Gusti sing nylametké awaké dhéwé’. (2 Ptr. 1:11) Kuwi berkah sing luar biasa. Nèk njenengan ya berjuang kaya Pétrus lan gelem dilatih Yéhuwah, mengko mesthi bakal éntuk berkah urip saklawasé. Ing Alkitab disebutké, ”Imanmu bakal nggawé kowé dislametké.”—1 Ptr. 1:9.