1-2. (a) Piyé situasi ing Yudéa wektu Rasul Paulus nulis surat kanggo wong Kristen Ibrani ing kana? (b) Ngapa kok surat kuwi tepat waktu?

 BAR Yésus mati taun 33 M, ana akèh kesulitan sing diadhepi wong Kristen Ibrani ing Yérusalèm lan Yudéa. Ora suwé bar jemaat Kristen dibentuk, para sedulur dianiaya. (Kis. 8:1) Kira-kira 20 taun bar kuwi, murid-muridé Yésus ya ngadhepi masalah ékonomi, mungkin merga kelaparan sing kelakon sakdurungé. (Kis. 11:​27-30) Tapi kira-kira taun 61 M, meréka menikmati masa sing cukup damai. Disebut damai soalé kesusahan wektu kuwi ora separah sing bakal diadhepi. Selama masa kuwi, Yéhuwah ngongkon Rasul Paulus nulis surat kanggo meréka. Naséhat ing surat kuwi isa mbantu meréka siap ngadhepi apa sing bakal kelakon.

² Suraté Paulus kuwi tepat waktu soalé masa damai sing meréka nikmati bakal berakhir. Wong-wong Kristen kuwi bakal ngalami kesusahan. Kaya sing diramalké Yésus, sedhéla manèh Yérusalèm bakal dihancurké. (Luk. 21:20) Naséhat ing suraté Paulus bener-bener bermanfaat bèn meréka isa tetep setya ngadhepi kuwi. Mémang, Paulus lan wong-wong Kristen ing Yudéa kuwi ora ngerti persisé kapan Yérusalèm bakal dihancurké. Tapi, wong-wong Kristen kuwi isa nggunakké wektu sing isih ana kanggo siap-siap. Carané, meréka isa berupaya bèn imané tambah kuwat lan latihan sabar. —Ibr. 10:25; 12:​1, 2.

3. Ngapa kok suraté Paulus kanggo wong Kristen Ibrani menarik kanggo dipelajari?

 ³ Sedhéla manèh, awaké dhéwé bakal ngadhepi kesulitan sing luwih abot daripada sing diadhepi wong Kristen Ibrani. (Mat. 24:21; Why. 16:​14, 16) Makané, ayo mbahas beberapa naséhaté Yéhuwah kanggo meréka, sing ya bermanfaat kanggo awaké dhéwé.

”TERUS NGUPAYA DADI WONG SING DÉWASA”

4. Wong Kristen Ibrani kudu ngadhepi apa waé? (Deloken gambar.)

⁴ Wong Kristen Ibrani kuwi mauné agamané Yahudi. Merga dadi Kristen, meréka kudu nggawé akèh penyesuaian lan kuwi ora gampang. Mémang, mbiyèn wong Yahudi kuwi umat pilihané Yéhuwah. Selama bertaun-taun, Yérusalèm kuwi panggonan sing penting. Raja sing mewakili Yéhuwah, mréntahé saka kono. Terus, nèk arep nyembah Yéhuwah ya ing bait Yérusalèm. Wong Yahudi sing taat ya manut banget karo Hukum Musa lan aturan-aturan sing digawé para pemimpin agama Yahudi. Misalé, ana aturan soal panganan, sunat, lan carané memperlakukan wong sing dudu Yahudi. Tapi, bar ana korban tebusané Yésus, Yéhuwah wis ora nampa korban-korban sing dipersembahké ing bait. Penyesuaian kuwi ora gampang kanggo wong Yahudi sing dadi Kristen merga wis terbiasa manut Hukum Musa. (Ibr. 10:​1, 4, 10) Bahkan, wong Kristen sing imané kuwat, misalé Rasul Pétrus, ya angèl nggawé penyesuaian karo perubahan iki. (Kis. 10:​9-14; Gal. 2:​11-14) Merga dadi Kristen, meréka ditentang para pemimpin agama Yahudi.

5. Wong Kristen Ibrani ngadhepi tantangan saka sapa waé?

⁵ Wong Kristen Ibrani ngadhepi tantangan saka rong kelompok: (1) para pemimpin agama Yahudi, sing nganggep meréka wong murtad, lan (2) sedulur-sedulur ing jemaat sing ngomong nèk  wong Kristen isih kudu tetep manut Hukum Musa. Mungkin, merga meréka wedi dianiaya. (Gal. 6:12) Dadi, bèn isa tetep setya karo Yéhuwah, wong-wong Kristen kuwi kudu piyé?

6. Ing suraté Paulus, wong Kristen Ibrani dikongkon apa? (Ibrani 5:14–6:1)

⁶ Ing suraté kanggo wong Kristen Ibrani, Paulus ngongkon meréka mempelajari tenanan lan ngrenungké omongané Gusti Allah. (Wacanen Ibrani 5:14–6:1.) Paulus ngutip saka Kitab-Kitab Ibrani lan njelaské ngapa kok cara ngibadahé wong Kristen luwih unggul timbang cara ngibadahé wong Yahudi. a Paulus péngin meréka nduwé akèh pengetahuan lan bener-bener paham ajaran sing bener bèn isa nitèni lan langsung nolak ajaran sing salah.

7. Awaké dhéwé saiki ngadhepi tantangan apa?

⁷ Saiki, ya ana akèh sing nyebarké informasi lan pandhangan sing bertentangan karo pathokané Yéhuwah soal apa sing bener. Ana sing ngomong nèk pandhangané Seksi Yéhuwah soal sèks kuwi salah lan terlalu kaku. Saya suwé, sikap lan pandhangané wong-wong ing donya iki semakin bertentangan karo karepé Yéhuwah. (WB. 17:15) Makané, penting kanggo isa nitèni pendapat sing salah lan langsung nolak. Aja nganti awaké dhéwé dadi terpengaruh, terus wedi, lan akhiré ora nglayani Yéhuwah manèh.—Ibr. 13:9.

8. Piyé bèn isa terus dadi wong Kristen sing déwasa?

⁸ Naséhaté Paulus kanggo wong Kristen Ibrani bèn dadi wong Kristen sing déwasa ya bermanfaat kanggo awaké dhéwé. Kuwi berarti awaké dhéwé kudu mempelajari Alkitab bèn isa ngerti lan niru pandhangané Yéhuwah. Kuwi kudu terus dilakukan bahkan sakwisé dibaptis. Ora soal sepira suwéné wis dadi umaté Yéhuwah, awaké dhéwé kudu maca lan mempelajari Alkitab saben dina. (Mzm. 1:2) Nèk rajin pelajaran pribadi, mengko imané awaké dhéwé isa tambah kuwat. Rasul Paulus nandheské soal iman ing suraté kanggo wong Kristen Ibrani.—Ibr. 11:​1, 6.

’WONG SING NDUWÉ IMAN BAKAL TETEP URIP’

9. Ngapa kok wong Kristen Ibrani kudu nduwé iman sing kuwat?

⁹ Wong Kristen Ibrani kudu nduwé iman sing kuwat bèn isa slamet wektu ngadhepi kesusahan sing ora suwé manèh bakal kelakon ing Yudéa. (Ibr. 10:​37-39) Yésus wis ngandhani murid-muridé bèn mlayu ing pegunungan wektu ndelok Yérusalèm dikepung. Préntah kuwi kanggo kabèh wong Kristen, ora soal sing manggon ing kutha Yérusalèm utawa ing désa-désa sekitaré. (Luk. 21:​20-24) Biasané, nèk ana mungsuh nyerang, wong-wong sing manggon ing désa-désa sekitar bakal mlayu mlebu kutha bertémbok bèn aman. Makané, wektu Yésus ngongkon mlayu ing pegunungan, kuwi kétoké préntah sing ora masuk akal. Dadi meréka butuh iman sing kuwat.

10. Menurut Ibrani 13:​17, nèk imané kuwat, wong Kristen Ibrani bakal piyé?

¹⁰ Wong Kristen Ibrani ya kudu percaya  karo wong-wong sing wis dipilih Yésus kanggo ngarahké jemaat. Isa waé para pengawas kuwi ngekèki petunjuk spésifik soal kapan kudu mlayu, lan apa sing kudu dilakukan. (Wacanen Ibrani 13:17.) Ing basa Yunaniné, sing dimaksud ”kudu manut” ing Ibrani 13:17 kuwi artiné gelem manut merga percaya karo sing ngekèki arahan. Manuté kuwi dudu merga wajib. Dadi, wong Kristen Ibrani kudu belajar kanggo percaya karo para pinituwa sakdurungé ana kesusahan. Nèk pas masa damai meréka manut, mengko pas masa susah ya dadi luwih gampang manut.

11. Ngapa kok awaké dhéwé saiki kudu nduwé iman sing kuwat?

¹¹ Kaya wong Kristen Ibrani, awaké dhéwé ya kudu nduwé iman. Saiki, akèh-akèhé wong ora percaya nèk donya iki sedhéla manèh bakal diakhiri. Meréka malah ngécé awaké dhéwé merga percaya soal kuwi. (2 Ptr. 3:​3, 4) Terus, meskipun ing Alkitab ana beberapa keterangan soal peristiwa-peristiwa sing bakal kelakon selama sengsara gedhé, tapi isih ana hal-hal sing awaké dhéwé ora ngerti. Makané, bèn isa percaya nèk akhir kuwi mesthi bakal kelakon lan Yéhuwah bakal nglindhungi, awaké dhéwé butuh iman sing kuwat.—Hab. 2:3.

12. Bèn isa ngadhepi sengsara gedhé, mulai saiki kudu piyé?

¹² Awaké dhéwé ya kudu beriman nèk saiki Yéhuwah nuntun umaté liwat ”budhak sing setya lan wicaksana”. (Mat. 24:45) Wektu sengsara gedhé dimulai, mungkin awaké dhéwé ya bakal éntuk petunjuk sing spésifik, kaya wong Kristen Ibrani wektu Yérusalèm dikepung tentara Romawi. Dadi, awaké dhéwé kudu percaya karo wong-wong sing dikèki wewenang ing organisasiné Yéhuwah. Nèk saiki ora percaya lan ora manut arahané meréka, mengko pas sengsara gedhé ya angèl manut.

13. Ngapa kok naséhat ing Ibrani 13:5 kuwi penting?

¹³ Karo nunggu wektuné kanggo mlayu, wong Kristen Ibrani ya kudu tetep urip sederhana. Meréka ora éntuk ”nresnani dhuwit”. (Wacanen Ibrani 13:5.) Ana beberapa sing wis tau ngalami kemiskinan lan kelaparan. (Ibr. 10:​32-34) Meskipun sakdurungé meréka réla susah demi kabar apik, ana sing mulai mikir nèk bakal luwih aman nèk meréka nduwé dhuwit akèh. Tapi sing isa marakké meréka slamet wektu Yérusalèm dihancurké kuwi dudu dhuwit. (Yak. 5:3) Malah, wong-wong sing nresnani dhuwit mungkin bakal luwih abot ninggalké omah lan hartané, lan dadi ragu-ragu kanggo mlayu.

14. Nèk nduwé iman sing kuwat, piyé pandhangané awaké dhéwé soal harta?

¹⁴ Nèk beriman sedhéla manèh Yéhuwah bakal nyingkirké kabèh sing jahat, awaké dhéwé ora bakal ngutamakké harta. Pas sengsara gedhé, dhuwit kuwi ora berharga. Ing Alkitab disebutké nèk ’pérak bakal dibuwang ing dalan-dalan’, merga ”wektu Yéhuwah nesu, pérak lan emas ora bakal isa nylametké”. (Yèh. 7:19) Awaké dhéwé tetep kudu nyukupi kebutuhan diri sendiri lan keluarga bèn isa terus nglayani Yéhuwah, tapi sing penting fokusé kuwi dudu nggolèk dhuwit sak akèh-akèhé. Berarti, nèk isa aja nganti nduwé utang nèk ora perlu, lan aja nganti wektuné entèk mung dienggo ngurusi harta. Terus ya kudu ngati-ati, aja nganti barang-barang sing diduwèni dadi sing paling penting. (Mat.  6:​19, 24) Tambah cedhak karo akhir kuwi, awaké dhéwé kudu mbuktèkké, apa luwih ngendelké harta utawa luwih percaya karo Yéhuwah.

”KOWÉ KUDU SABAR”

15. Ngapa kok wong Kristen Ibrani kudu sabar?

¹⁵ Wong Kristen Ibrani kudu sabar wektu nglayani Yéhuwah soalé keadaan ing Yudéa tambah angèl. (Ibr. 10:36) Mémang, meréka akèh-akèhé dadi Kristen pas masa sing cukup damai. Tapi, beberapa wis tau dianiaya. Nah, Paulus ngélingké nèk meréka bakal ngadhepi penganiayaan sing luwih hébat, bahkan isa waé nganti mati kaya Yésus. (Ibr. 12:4) Merga akèh wong Yahudi sing dadi Kristen, wong-wong Yahudi liyané ya dadi saya sengit lan kejem karo meréka. Misalé, beberapa taun sakdurungé Paulus nulis surat kanggo wong Kristen Ibrani, ana grombolan sing isiné luwih saka 40 wong Yahudi sing nyerang Paulus wektu dhèwèké nginjil ing Yérusalèm. Meréka ”nganti sumpah ora arep mangan utawa ngombé nèk durung matèni Paulus”. (Kis. 22:22; 23:​12-14) Meskipun disengiti lan dianiaya, wong-wong Kristen kuwi kudu terus ngumpul kanggo ngibadah, nginjil, lan ngupaya bèn imané tetep kuwat.

16. Nèk lagi dianiaya, kuwi sakjané dipadhakké kaya apa? Kok isa? (Ibrani 12:​7, cathetan ngisor)

¹⁶ Apa sing marakké wong Kristen Ibrani isa tetep sabar ngadhepi tantangan? Paulus njelaské nèk wektu meréka ngadhepi tantangan kuwi sakjané meréka lagi dilatih karo Gusti Allah. (Wacanen Ibrani 12:​7, cathetan ngisor.) Pelatihan kuwi bakal marakké meréka nduwé sifat-sifat sing apik, lan nggawé sifat-sifat sing apik kuwi dadi luwih apik manèh. Nèk terus mikirké manfaat saka pelatihan kuwi, wong-wong Kristen Ibrani bakal dadi luwih  gampang kanggo tetep sabar.—Ibr. 12:11.

17. Paulus ngekèki naséhat apa soal bèn isa tetep sabar ngadhepi penganiayaan?

¹⁷ Paulus ngongkon wong Kristen Ibrani bèn terus sabar, kendel, lan ora nyerah wektu ngadhepi tantangan. Ngapa kok dhèwèké isa ngekèki naséhat sing apik soal sabar ngadhepi penganiayaan? Sakdurungé dadi wong Kristen, dhèwèké tau nganiaya lan ngerti dhéwé para penganiaya kuwi kejemé kaya apa. Terus sakwisé dadi Kristen, dhèwèké dhéwé ya kerep dianiaya. (2 Kor. 11:​23-25) Dadi, Paulus ngerti tenan apa sing dibutuhké bèn isa tetep sabar. Paulus ngomong nèk wektu ngadhepi penganiayaan, meréka aja ngendelké diri sendiri, tapi ngendelké Yéhuwah. Makané Paulus ngomong, ”Yéhuwah kuwi sing nulungi aku, aku ora bakal wedi.”—Ibr. 13:6.

18. Apa sing bakal diadhepi kabèh wong Kristen? Mula, kèt saiki kudu piyé?

¹⁸ Saiki, ana sedulur-sedulur seiman sing lagi dianiaya. Kanggo mbuktèkké nèk sayang karo meréka, awaké dhéwé isa ndongakké lan ngekèki bantuan sing dibutuhké. (Ibr. 10:33) Tapi ing Alkitab wis disebutké nèk ”kabèh wong sing dadi muridé Kristus Yésus lan ngabdi marang Gusti Allah ya bakal dianiaya”. (2 Tim. 3:12) Dadi, kabèh wong Kristen kudu siap-siap ngadhepi apa sing bakal kelakon. Ayo terus ngendelké Yéhuwah lan yakin nèk Dhèwèké bakal mbantu awaké dhéwé tetep sabar ngadhepi tantangan apa waé. Nèk wis wektuné, Yéhuwah bakal nylametké kabèh umaté sing setya.—2 Tés. 1:​7, 8.

19. Bèn siap ngadhepi sengsara gedhé, apa sing isa awaké dhéwé upayakké saiki? (Deloken gambar.)

¹⁹ Suraté Paulus kanggo wong Kristen Ibrani bener-bener bermanfaat kanggo nyiapké meréka ngadhepi kesengsaraan sing bakal kelakon. Paulus ngongkon meréka bèn mempelajari tenanan lan paham omongané Gusti Allah. Manfaaté, meréka dadi isa nitèni lan nolak apa waé sing marakké dadi ragu-ragu karo ajaran sing bener. Paulus ya ngongkon meréka bèn nduwé iman sing kuwat bèn isa langsung manut arahané Yésus lan para pengawas ing jemaat. Paulus ya ngandhani nèk bèn isa tetep sabar ngadhepi penganiayaan, meréka kudu nganggep nèk kuwi pelatihan saka Yéhuwah. Nèk awaké dhéwé ya ngetrapké naséhaté Paulus iki, mengko ya isa tetep setya nganti akhir.—Ibr. 3:14.