1, 2. Apa sebabé kita perlu ngrembug carané nguwatké wong sing lagi sedhih? (Deloken gambar ing ndhuwur.)

SUSI kandha, ”Wis mèh setaun sakwisé anakku mati, aku isih krasa sedhih banget.” Ana uga sedulur lanang sing kandha nèk dhèwèké dadi ”strès banget” merga ditinggal mati bojoné. Akèh wong saiki uga ngalami sing padha. Ing jemaat Kristen, akèh sedulur sing ora nyangka nèk bakal ditinggal mati karo wong sing ditresnani sakdurungé Armagédhon. Mbokmenawa panjenengan utawa wong liya sing panjenengan kenal lagi waé ditinggal mati wong sing ditresnani. Piyé carané bèn wong sing lagi sedhih isa éntuk kekuwatan?

² Ana sing kandha nèk rasa sedhih kuwi suwé-suwé isa ilang dhéwé. Apa pancèn ngono? Ana salah siji randha sing ngomong, ”Sakjané rasa sedhih kuwi ora mung butuh wektu, ning uga kudu ana sing ditindakké kanggo ngatasi rasa sedhih kuwi.” Kaya luka sing butuh wektu lan kudu ditambani bèn mari, wong sing lagi sedhih uga  butuh wektu lan kudu digatèkké bèn isa ngatasi rasa sedhihé. Apa sing kususé isa mbantu wong sing lagi sedhih kuwi?

3, 4. Apa sebabé kita isa yakin nèk Yéhuwah ngertèni rasa sedhih sing kita rasakké?

³ Sing paling isa nguwatké kita wektu sedhih yaiku Yéhuwah, Bapak kita sing welas asih. (Wacanen 2 Korinta 1:3, 4.) Yéhuwah kuwi dadi conto sing paling apik bab nduduhké émpati, lan Yéhuwah wis janji marang umaté, ”Ingsun, iya Ingsun kang nglipur sira kabèh.”​—Yé. 51:12; Ms. 119:50, 52, 76.

⁴ Yéhuwah uga wis tau kélangan wong sing ditresnani, contoné yaiku Abraham, Iskak, Yakub, Musa, lan Raja Dawud. (Wi. 12:6-8; Mt. 22:31, 32; PR. 13:22) Alkitab nduduhké nèk Yéhuwah péngin banget nguripké manèh wong-wong sing setya kuwi. (Ay. 14:14, 15) Wektu diuripké manèh sukmbèn, wong-wong kuwi bakal dadi bungah, séhat, lan sampurna. Yéhuwah uga wis tau kélangan Putrané mbarep. Alkitab kandha nèk Yésus kuwi sing paling ditresnani Yéhuwah. (WB. 8:22, 30) Yéhuwah mesthi sedhih banget wektu ndelok Putrané sengsara nganti mati.​—Yo. 5:20; 10:17.

5, 6. Piyé carané Yéhuwah nguwatké kita?

⁵ Kita isa yakin tenan nèk Yéhuwah mesthi bakal mbantu. Dadi, wektu sedhih lan lara ati, kita isa nyritakké kuwi kabèh marang Yéhuwah liwat donga saka ati. Mesthi lega banget rasané wektu ngerti nèk Yéhuwah ngertèni perasaan kita lan maringi kekuwatan sing dibutuhké. Piyé carané Yéhuwah nindakké kuwi?

⁶ Salah siji cara Yéhuwah nguwatké kita yaiku liwat roh suciné. (PR. 9:31) Yésus janji nèk Bapak kita bakal maringi roh suciné marang kabèh wong sing nyuwun. (Lk. 11:13) Susi, sing disebutké mau, kandha, ”Kerep-kerepé aku mung isa sujud lan ndonga, nyuwun bèn dikuwatké. Wektu kuwi, Yéhuwah maringi rasa ayem sing isa bener-bener nguwatké ati lan pikiranku.”​—Wacanen Filipi 4:6, 7.

7, 8. Apa sebabé kita isa yakin nèk Yésus mesthi bakal nguwatké kita?

⁷ Wektu ing bumi, sipat-sipaté Yésus persis plek karo Bapaké. Kuwi kétok saka omongan lan tumindaké Yésus. (Yo. 5:19) Yéhuwah ngutus Yésus menyang bumi kanggo nguwatké wong-wong ”kang padha remuk atiné” lan ”kang nandhang susah”. (Yé. 61:1, 2; Lk. 4:17-21) Wong-wong ngerti nèk Yésus ngertèni kasusahané lan bener-bener péngin mbantu.​—Ib. 2:17.

⁸ Wektu isih enom, Yésus mesthiné wis tau ditinggal mati karo kanca-kanca  cedhaké lan keluargané. Contoné, Yusuf, bapak angkaté, isa waé wis mati wektu Yésus isih enom. * (Deloken katrangan ing ngisor.) Wektu kuwi, Yésus mesthi sedhih banget lan susah atiné, semono uga ibuké lan sedulur-seduluré.

9. Apa buktiné nèk Yésus nduduhké émpati wektu Lazarus mati?

⁹ Wektu ing bumi, Yésus nduduhké nèk dhèwèké bener-bener ngertèni wong-wong lan nduwé émpati. Contoné, wektu kanca cedhaké sing jenengé Lazarus mati, Yésus isa mèlu ngrasakké rasa sedhihé Maryam lan Marta. Saking sedhihé, Yésus nganti nangis, senajan ngerti nèk dhèwèké bakal nguripké Lazarus manèh.​—Yo. 11:33-36.

10. Apa sebabé kita isa yakin nèk Yésus ngertèni perasaané awaké dhéwé saiki?

¹⁰ Piyé omongané Yésus sing nentremké ati isa mbantu kita? Alkitab kandha, ”Yésus Kristus iku dhèk wingi apadéné ing dina iki sarta ing salawas-lawasé tetep ora éwah gingsir [ora malih].” (Ib. 13:8) Yésus disebut ”Panuntuning gesang”, merga awaké dhéwé isa urip saklawasé liwat Yésus. Yésus uga ngertèni rasa sedhihé saben wong lan isa ”mitulungi marang wong kang padha kena ing panggodha”. (PR. 3:15; Ib. 2:10, 18) Dadi, kita isa yakin nèk Yésus isih isa ngrasakké rasa sedhihé wong liya. Yésus ngertèni kasusahané wong-wong lan isa mènèhi kekuwatan ing wektu sing pas.​—Wacanen Ibrani 4:15, 16.

11. Ayat endi sing kususé isa nguwatké panjenengan?

¹¹ Crita bab Yésus sing sedhih banget wektu Lazarus mati kuwi dadi salah siji conto sing nduduhké nèk Alkitab isa nguwatké kita. Pancèn, ”samubarang kang katulisan ing sadurungé, iku katulisan minangka piwulang kanggo kita, supaya kita ngandhemana ing pangarep-arep kalawan sabar mantep sarta kalawan gondhèlan panglipur kang saka ing Kitab Suci”. (Rm. 15:4) Nèk lagi sedhih, panjenengan uga isa mikirké ayat-ayat sing nguwatké iki:

• ”Pangéran Yéhuwah ana ing sacedhaké para wong kang rempu atiné, sarta para wong kang pepes budiné padha dipitulungi.”​—Ms. 34:19, 20.

• ”Manawi ing batos kawula saya mindhak kathah ingkang kawula manah; panglipur Paduka ingkang ngayemaken manah kawula.”​—Ms. 94:19.

• ”Gusti kita Yésus Kristus, lan Gusti Allah, Rama kita, kang sajroning sih-rahmaté wus ngasihi kita sarta kang wus ngganjar panglipur kang langgeng tuwin pangarep-arep becik marang kita, muga karsaa paring  panglipur lan nyantosakna atimu.”​—2 Ts. 2:16, 17. *—Deloken katrangan ing ngisor.

12. Piyé carané nguwatké wong liya?

¹² Wong sing lagi sedhih uga isa dikuwatké ing jemaat Kristen. (Wacanen 1 Tésalonika 5:11.) Piyé carané nguwatké wong-wong sing ’ilang semangaté’? (WB. 17:22) Élinga nèk ”ana wayahé meneng, ana wayahé caturan”. (Ko. 3:7) Ana randha sing jenengé Dalene nerangké nèk wong sing sedhih kuwi butuh ngetokké uneg-unegé. Mula, sing paling penting rungokna waé, aja nyela omongané. Junia, sing kakangé bunuh dhiri, kandha, ”Duduhna nèk panjenengan péngin ngertèni perasaané, senajan ora isa ngerti perasaané sing saktenané.”

13. Apa sing kudu diéling-éling bab perasaan sedhih?

¹³ Kita perlu éling nèk carané wong ngutarakké perasaan sedhihé kuwi ora padha. Kadhang kala ora gampang kanggo ngutarakké perasaan sing saktenané. Alkitab kandha, ”Ati iku ngrasakaké kasusahané dhéwé, déné wong liya ora bisa mèlu ngrasakaké kabungahané.” (WB. 14:10) Malah, senajan wis diutarakké, mbokmenawa wong liya ora langsung ngerti apa sing dikarepké.

14. Apa sing isa diomongké marang wong-wong sing lagi sedhih?

¹⁴ Isa waé ora gampang kanggo ngertèni apa sing arep diomongké marang wong sing lagi sedhih. Ning, Alkitab kandha nèk ”ilaté wong wicaksana nekakaké kawarasan”. (WB. 12:18) Ana sing isa nemokké tetembungan sing nguwatké saka buku Bila Seseorang yang Anda Kasihi Meninggal. * (Deloken katrangan ing ngisor.) Biyasané, sing isa panjenengan tindakké yaiku ’nangis karo wong sing lagi nangis’. (Rm. 12:15, Basa Jawi Padintenan [BJP]) Gaby, sing bojoné wis mati, kandha nèk kadhang kala dhèwèké mung péngin nangis. Dhèwèké kandha, ”Aku dadi lega lan ora rumangsa dhèwèkan manèh nèk ana kanca sing nangis bareng aku.”

15. Piyé carané nguwatké nèk isih kangèlan kanggo ngomong langsung? (Deloken uga kothak ” Tetembungan sing Isa Nguwatké”.)

¹⁵ Nèk isih kangèlan kanggo ngomong langsung marang wong sing lagi sedhih, panjenengan isa ngirim kartu ucapan, e-mail, SMS, utawa surat. Panjenengan isa ngutip ayat sing nguwatké, nyebutké sipat-sipat apiké  wong sing wis mati kuwi, utawa nyritakké kenangan sing nyenengké. Junia kandha, ”Nampa surat sing nguwatké utawa undangan kanggo srawung bareng karo para sedulur kuwi bener-bener isa nguwatké aku. Aku dadi rumangsa ditresnani lan digatèkké.”

16. Cara apa sing paling cocog kanggo nguwatké liyané?

¹⁶ Kanggo nguwatké para sedulur, kita isa ndongakké utawa ndonga bareng karo sedulur kuwi. Kadhang kala kuwi ora gampang merga wektu ndonga kita isa dadi nangis. Ning, donga sing saktulusé ati isa bener-bener nguwatké. Dalene kandha, ”Wektu sedulur-sedulur wédok teka kanggo nguwatké, aku njaluk didongakké. Biyasané, awalé rada angèl kanggo mulai ngomong pas ndonga. Ning, suwé-suwé dongané isa ditutugké lan para sedulur kuwi isa ngetokké isi atiné. Kétok cetha nèk para sedulur kuwi nduwé iman sing kuwat, sarta nresnani lan nggatèkké aku. Kuwi dadi nguwatké imanku.”

17-19. Apa sebabé kita kudu terus nguwatké?

¹⁷ Ora ana sing ngerti nganti sepira suwéné rasa sedhih kuwi tetep ana. Dadi, kita kudu siap mbantu ora mung pas awal-awalé thok, wektu isih ana akèh kanca lan sedulur sing teka kanggo nguwatké. Sakwisé padha balik ing kagiyatané dhéwé-dhéwé, wong sing lagi sedhih kuwi isih butuh dikuwatké. Alkitab kandha, ”Mitra iku ing samangsa-mangsa  ajeg baé katresnané, lan dadi sadulur ing sajroning kasusahan.” (WB. 17:17) Kita kudu terus nguwatké bèn dhèwèké isa ngatasi rasa sedhihé.​—Wacanen 1 Tésalonika 3:7.

¹⁸ Élinga nèk wong kuwi isa waé ujug-ujug rumangsa sedhih merga ana sing nggawé dhèwèké kèlingan manèh karo wong sing ditresnani, contoné lagu, foto, kagiyatan, utawa acara penting saben taun. Sedulur sing wis ditinggal mati bojoné isa waé dadi sedhih banget lan rumangsa dhèwèkan wektu teka ing kebaktian utawa acara Pèngetan. Ana sedulur lanang sing crita, ”Aku mbayangké nèk aku mesthi sedhih banget wektu ngrayakké ulang tahun pernikahanku sakwisé bojoku mati. Ning, para sedulur nganakké acara ngumpul bareng karo aku lan kanca-kanca cedhakku bèn aku ora rumangsa dhèwèkan.”

¹⁹ Kita isa nguwatké ora mung pas ana acara sing penting thok. Junia njelaské, ”Kita isa mènèhi bantuan utawa ngancani sedulur sing lagi sedhih kuwi sak wayah-wayah, senajan ora pas ana acara sing istiméwa. Kuwi mesthi isa migunani lan nggedhèkké atiné.” Pancèn, kita ora isa ngilangi rasa sedhih lan rasa kélangané, ning kita isa nguwatké lan mènèhi bantuan sing dibutuhké. (1 Yo. 3:18) Gaby kandha, ”Aku maturnuwun banget marang Yéhuwah merga para pinituwa wis nggedhèkké atiku wektu aku lagi susah. Aku dadi rumangsa kaya lagi dirangkul karo Yéhuwah.”

20. Apa sebabé janjiné Yéhuwah isa bener-bener nguwatké?

²⁰ Kita mesthi dadi lega banget merga ngerti nèk Yéhuwah, ”kang dadi sumbering panglipur”, bakal nyingkirké kabèh rasa sedhih wektu nguripké manèh wong sing wis mati. (Yo. 5:28, 29) Yéhuwah janji ’bakal ngicali pati ing saterusé; tuwin ngusapi eluh saka ing sakèhing rai’. (Yé. 25:8) Dadi, sukmbèn ora bakal ana manèh wong sing ’nangis karo wong sing lagi nangis’. Kabèh wong bakal ’padha bungah-bungah karo wong sing bungah’.​—Rm. 12:15, BJP.