1. Wong-wong sing kaya apa sing biyasané diajèni, lan apa sing bakal dirembug ing wulangan iki?

AWAKÉ dhéwé biyasané nggatèkké lan ngajèni wong-wong sing pancèn pantes diurmati utawa sing nduwé jabatan sarta tugas penting. Ing wulangan iki kita bakal ngrembug sapa waé sing pantes diajèni lan apa alesané.

2, 3. (a) Apa sebabé Yéhuwah sing paling pantes diurmati? (Deloken gambar ing ndhuwur.) (b) Sapa sing dimaksud ”Sang Cempé” ing Wahyu 5:13, lan apa sebabé dhèwèké pantes diajèni?

² Wahyu 5:13 kandha nèk ”Panjenenganipun ingkang lenggah ing dhampar”, yaiku Yéhuwah, lan ”Sang Cempé” pantes diajèni. Ing Wahyu bab 4, Yéhuwah uga disebut ”kang gesang langgeng ing salawas-lawasé”. Apa sebabé Yéhuwah pantes diurmati? Para malaékat kandha, ”Dhuh Pangéran saha Gusti Allah kawula, Paduka ingkang sayogya tampi pamuji sarta kaurmatan sarta panguwaos; amargi Paduka sampun nitahaken samukawis; sarta amargi saking karsa Paduka, samukawis punika wonten lan dumados.”—Wy. 4:9-11.

 ³ Sing dimaksud ”Sang Cempé” ing Wahyu 5:13 yaiku Yésus Kristus. Wektu ing bumi, Yésus disebut ”Cempéning Allah kang ngilangi dosané jagad”. (Yo. 1:29) Yésus gelem ngurbanké nyawané kanggo dadi tebusan. Ora mungkin ana raja liya sing gelem mati kanggo rakyaté. Kuwi sebabé Yésus pantes diajèni. Sakliyané kuwi, Yésus kuwi ”Ratuné para ratu sarta Gustiné para gusti”. (1 Tm. 6:14-16) Isa waé kita dadi nduwé perasaan sing padha karo para malaékat sing nyanyi, ”Sang Cempé ingkang sampun kapragat punika sembada nampèni panguwaos, lan kasugihan, sarta kawicaksanan, saha kakiyatan, tuwin kaurmatan, miwah kamulyan lan pangalembana.”—Wy. 5:12.

4. Apa sebabé kita kudu ngajèni Yéhuwah lan Yésus?

⁴ Yokanan 5:22, 23 kandha nèk Yéhuwah nglantik Yésus dadi hakim kanggo kabèh manungsa. Kuwi alesan sing paling penting kanggo ngajèni Yésus. Nèk ngajèni Yésus, kita uga ngajèni Yéhuwah lan bakal isa urip saklawasé.—Wacanen Jabur 2:7, 11.

5. Apa sebabé kabèh wong pantes diajèni?

⁵ Manungsa digawé ”mirib gambaring Allah”. (Pd. 1:27) Kuwi tegesé wong-wong umumé isa nduduhké sipat-sipat sing padha karo Gusti Allah. Contoné, rasa tresna, apikan, lan welas asih. Manungsa uga digawé nduwé hati nurani kanggo nitèni bab sing salah lan sing bener, sing pantes lan sing ora pantes, sing jujur lan sing ora jujur. (Rm. 2:14, 15) Yéhuwah kuwi Gusti Allah sing tertib lan seneng rukun. Mula, akèh wong biyasané seneng karo bab sing éndah utawa resik lan péngin urip rukun karo wong liya. Dadi, cetha nèk kabèh manungsa pancèn dirancang kanggo niru Yéhuwah. Mula, kabèh wong uga pantes diajèni.—Ms. 8:6.

6, 7. Apa bédané wong Kristen sejati karo akèh wong liyané ing bab ngajèni wong liya?

⁶ Kita ngerti nèk kudu ngajèni wong liya. Ning, merga ora sampurna lan sikapé wong-wong ing donyané Sétan sing gedhé pengaruhé, ora gampang kanggo ngerti cara sing bener lan pantes kanggo ngajèni wong liya. Akèh wong sing ora ngajèni lan ngurmati Yéhuwah, ning malah nduwé idola lan dipuja-puja nganti dadi kaya allahé. Contoné, wong-wong niru dandanan lan tumindaké para artis, bintang film, atlét, sarta pemimpin agama lan politik.

⁷ Wong-wong Kristen sing sejati ngerti nèk tumindak kaya ngono kuwi ora bener. Ora ana manungsa sing isa dadi tuladha sing sampurna sakliyané Yésus. (1 Pt. 2:21) Kita kudu éling nèk ”kabèh wong wis padha gawé dosa sarta koncatan ing kamulyaning Allah”. (Rm. 3:23) Ora ana manungsa sing pantes disembah. Dadi, Yéhuwah mesthi ora seneng nèk kita muja-muja wong liya nganti dadi kaya allah.

8, 9. (a) Piyé pandhangané Seksi Yéhuwah marang para pejabat pamréntah? (b) Ing kahanan sing kaya apa kita ora perlu manut karo pamréntah?

⁸ Ana wong-wong sing pantes diajèni  merga nduwé jabatan. Contoné, kita isa ngrasakké akèh paédah merga pamréntah wis njaga masyarakat bèn tetep aman lan nggatèkké kebutuhané rakyaté. Rasul Paulus njelaské nèk pamréntah kuwi dadi ”panguwasa” lan kita kudu manut karo hukum-hukumé. Paulus kandha, ”Mbayara marang wong akèh, apa baé kang kudu kokbayar; pajeg marang wong kang wenang nampani pajeg, béya marang wong kang wenang nampani béya, . . . lan pakurmatan marang wong kang darbé hak nampani pakurmatan.”—Rm. 13:1, 7.

⁹ Kabèh Seksi Yéhuwah ngupaya kanggo ngajèni para pejabat pamréntah. Pancèn, saben negara nduwé aturan dhéwé-dhéwé kanggo rakyaté. Dadi, kita perlu manut karo aturan kuwi bèn pamréntah isa nindakké tugasé kanthi lancar. Ning, kita ora gelem nindakké aturan sing isa marahi kita nglanggar hukumé Yéhuwah. Ing kahanan kaya ngono, kita luwih manut lan ngurmati Yéhuwah timbang manungsa.—Wacanen 1 Pétrus 2:13-17.

10. Piyé abdiné Yéhuwah jaman mbiyèn dadi conto sing apik kanggo kita?

¹⁰ Kita isa sinau saka abdiné Yéhuwah jaman mbiyèn sing ngajèni pamréntah lan para pejabaté. Contoné, wektu pamréntah Roma péngin ngétung cacahé pendhudhuk ing negarané, Yusuf lan Maryam manut sarta lunga menyang Bètléhèm kanggo ndaftar, senajan Maryam wis arep nglairké. (Lk. 2:1-5) Conto liyané yaiku rasul Paulus. Wektu ditudhuh nindakké sing salah, dhèwèké tetep nganggo cara sing ngajèni wektu mbéla masalahé ing ngarepé Raja Hérodhès Agripa lan Féstus, sing dadi gubernur Roma ing propinsi Yudéa.—PR. 25:1-12; 26:1-3.

11, 12. (a) Apa sebabé awaké dhéwé ora ngurmati para pemimpin agama nganggo cara sing istiméwa? (b) Critakna pengalamané sedulur saka Austria sing ngajèni salah siji pejabat.

¹¹ Nèk para pemimpin agama piyé? Apa ya kudu diurmati? Kita tetep ngajèni para pemimpin agama kayadéné wektu ngajèni wong liya. Nanging, kita ora perlu ngurmati para pemimpin agama nganggo cara sing istiméwa, senajan wong-wong kuwi péngin kita tumindak kaya ngono. Lha ngapa? Merga agama palsu ora ngajarké piwulang sing bener bab Gusti Allah lan Alkitab. Yésus ngelokké lan ngarani nèk para pemimpin agama palsu kuwi jahat lan munafik. (Mt. 23:23, 24) Nanging, ngajèni para pejabat pamréntah kuwi ora salah. Kadhang kala, para pejabat kuwi malah isa mbantu awaké dhéwé.

¹² Salah siji contoné yaiku Dr. Heinrich Gleissner, pejabat saka Austria. Saksuwéné Perang Donya II, dhèwèké dicekel karo Nazi lan dikirim numpak sepur menyang kamp konsèntrasi. Wektu kuwi, dhèwèké ketemu karo Leopold Engleitner, Seksi Yéhuwah saka Austria. Sedulur Engleitner njelaské kapracayané nganggo cara sing ngajèni marang Dr. Gleissner sing gelem ngrungokké. Wektu perangé wis bubar, Gleissner bola-bali nggunakké  jabatané kanggo mbantu Seksi-Seksi Yéhuwah ing Austria. Isih ana akèh pengalaman liya sing nyritakké asil-asil apik merga wong Kristen ngajèni para pejabat pamréntah.

13. Sapa sing kususé pantes kita ajèni lan apa sebabé?

¹³ Kabèh sedulur seiman kita pantes diajèni, kususé para sedulur sing nduwé wewenang ing jemaat. Contoné, para pinituwa, pinituwa wilayah, sarta anggotané Panitya Cabang lan Pengurus Pusat. (Wacanen 1 Timotéus 5:17.) Alkitab nyebutké nèk para sedulur kuwi hadiah saka Yéhuwah, sing ngurus kebutuhané umaté Yéhuwah. (Éf. 4:8, Terjemahan Dunia Baru) Dadi, para sedulur kuwi pancèn pantes diajèni ora masalah saka ngendi asalé, pendhidhikané, status sosialé, utawa kondhisi ékonominé. Wong-wong Kristen ing abad kapisan dadi conto sing apik bab ngajèni para sedulur sing nduwé wewenang. Kita ora nganggep para sedulur kuwi kaya malaékat utawa manungsa sing super. Ning, kita ngajèni merga para sedulur kuwi wis kerja mempeng lan andhap-asor.—Wacanen 2 Korinta 1:24; Wahyu 19:10.

14, 15. Apa bédané para pinituwa ing jemaat Kristen karo para pemimpin agama?

¹⁴ Para pinituwa kuwi kaya pangon sing andhap-asor lan ora gelem dianggep kaya artis. Dadi, wong-wong kuwi béda banget karo para pemimpin agama ing jaman saiki lan jamané Yésus.  Yésus kandha nèk para pemimpin agama kuwi ”padha linggih ing papan kang kajèn dhéwé ana ing pahargyan lan ing ngarep dhéwé ana ing papan pangibadah. Padha seneng diurmati ana ing pasar-pasar”.—Mt. 23:6, 7.

¹⁵ Yésus kandha, ”Kowé aja gelem disebut guru, amarga mung siji Gurumu lan kowé kabèh padha-padha sadulur. Apamanèh kowé aja nyebut rama marang sapa baé ana ing bumi iki, awit mung siji Ramamu, yaiku kang ana ing swarga. Kowé aja gelem disebut panutan, amarga mung siji Panutanmu, yaiku Sang Kristus. Sing sapa dadi gedhé ana ing satengahmu iku dadia paladènmu. Lan sing sapa ngluhuraké awaké dhéwé, bakal kaasoraké, déné kang ngasoraké awaké dhéwé bakal kaluhuraké.” (Mt. 23:8-12) Nèk para pinituwa andhap-asor lan manut karo kandhané Yésus kuwi, para sedulur mesthi bakal nresnani lan ngajèni para pinituwa.

16. Apa sebabé kita perlu ngupaya tenanan kanggo ngajèni wong liya?

¹⁶ Mbokmenawa ngajèni wong liya kuwi ora gampang. Kuwi butuh wektu. Wong-wong Kristen ing abad kapisan uga rumangsa kaya ngono. (PR. 10:22-26; 3 Yo. 9, 10) Ning, nèk ngupaya ngajèni wong liya kaya sing dikersakké Yéhuwah, kita bakal isa ngrasakké akèh paédah.

17. Apa paédahé nèk ngajèni wong-wong sing nduwé wewenang?

¹⁷ Nèk ngajèni wong-wong sing nduwé wewenang ing masyarakat, wong-wong kuwi isa mbantu lan mbéla haké awaké dhéwé kanggo nginjil. Wong-wong kuwi malah isa nduwé pandhangan sing apik bab gawéan nginjil. Kuwi sing pirang-pirang taun kepungkur dialami karo salah siji perintis ing Jerman sing jenengé Birgit. Wektu Birgit teka ing acara lulusané anaké, para guru kandha nèk anak-anaké Seksi Yéhuwah kuwi nduwé sikap sing apik. Birgit kandha karo para guru kuwi, ”Anak-anaké Seksi Yéhuwah diajari manut karo pathokané Gusti Allah bab tumindak sing apik, klebu ngajèni para guru ing sekolahan.” Salah siji guru kandha nèk umpamané kabèh murid kuwi kaya Seksi Yéhuwah, mesthi dadi nyenengké banget wektu mulang. Pirang-pirang minggu sakwisé kuwi, ana salah siji guru sing teka ing kebaktian.

18, 19. Apa sing kudu diéling-éling wektu ngajèni pinituwa?

¹⁸ Alkitab njelaské piyé carané ngajèni para pinituwa ing jemaat. (Wacanen Ibrani 13:7, 17.) Kita kudu ngalem para pinituwa sing wis kerja  mempeng kuwi. Bèn para pinituwa kuwi ngabdi kanthi bungah ati, kita perlu manut karo arahané. Alkitab kandha nèk kita uga kudu niru imané para pinituwa. Ning, kuwi ora ateges awaké dhéwé kudu persis plek niru pinituwa sing dianggep ”favorit”. Contoné, niru dandanané utawa carané mulang lan ngomong. Nèk nganti kaya ngono, kuwi tegesé kaya-kayané kita luwih ngajèni manungsa timbang Kristus. Aja lali nèk para pinituwa kuwi uga ora sampurna kaya kita kabèh.

¹⁹ Kita perlu tetep ngajèni para pinituwa, ning aja dianggep kaya artis. Kuwi isa mbantu para pinituwa dadi luwih gampang andhap asor lan ora mikir nèk dhèwèké luwih apik timbang liyané utawa tumindaké sing paling bener.

20. Apa paédahé nèk kita ngajèni wong liya?

²⁰ Nèk seneng ngajèni wong liya, kita isa dadi luwih mikirké kepentingané wong liya lan tetep andhap-asor wektu dialem. Kuwi uga isa mbantu kita bèn ora mandheg ngabdi wektu wong sing kita ajèni mbokmenawa nggawé gela. Awaké dhéwé uga isa tetep dadi bagéan saka pakumpulané Yéhuwah. Kabèh sing ana ing pakumpulané Yéhuwah padha ngajèni siji lan sijiné, klebu ngajèni sing ora seiman, ning ora nganti dipuja-puja.

21. Apa manèh paédahé nèk kita ngajèni wong liya?

²¹ Sing paling penting, nèk ngajèni wong liya, kuwi isa nyenengké Yéhuwah. Kuwi tegesé kita nindakké kersané lan isa tetep setya marang Yéhuwah sarta isa njawab tudhuhané Sétan. (WB. 27:11) Kita seneng merga wis ngerti carané ngajèni wong liya nganggo cara sing cocog karo kersané Yéhuwah, senajan akèh wong ora ngerti cara sing bener lan pantes kanggo ngajèni wong liya.