1. Yésus mènèhi préntah apa marang murid-muridé? (Deloken gambar ing halaman 1.)

ING wengi sakdurungé Yésus mati, Yésus mènèhi préntah marang murid-muridé. Dhèwèké kandha, ”Kaya aku wis nresnani kowé, kowé uga kudu padha nresnani siji lan sijiné. Nganggo cara iki, kabèh wong bakal ngerti nèk kowé kuwi murid-muridku: yaiku nèk kowé padha nresnani siji lan sijiné.”​—Yoh. 13:34, 35.

2. Apa sebabé awaké dhéwé kudu sayang karo para sedulur?

² Kaya sing diomongké Yésus, wong-wong isa ngerti nèk awaké dhéwé kuwi wong Kristen sing sejati, nèk awaké dhéwé sayang karo wong liya kaya Yésus sing wis sayang karo awaké dhéwé. Omongané Yésus kuwi pancèn bener. Mula, awaké dhéwé kudu ngupaya bèn isa bener-bener sayang karo para sedulur senajan kuwi mungkin ora gampang.

3. Apa sing bakal dirembug ing artikel iki?

³ Merga ora sampurna, awaké dhéwé isa waé ngrasa angèl kanggo nduduhké nèk awaké dhéwé bener-bener sayang karo para sedulur. Ning, awaké dhéwé kudu ngupaya kanggo niru contoné Yésus. Ing artikel iki, awaké dhéwé bakal ngrembug piyé carané bèn awaké dhéwé isa tetep rukun karo para sedulur, ora mbédak-mbédakké wong, lan nduduhké sipat seneng nampa tamu. Terus, wektu ngrembug artikel iki, awaké dhéwé isa mikir, ’Apa sing isa tak sinaoni saka pengalamané para sedulur sing dicritakké ing artikel iki?’

4. Nurut Matius 5:23, 24, apa sebabé awaké dhéwé kudu ngupaya bèn isa tetep rukun karo sedulur sing lagi jèngkèl karo awaké dhéwé?

⁴ Yésus njelaské apa sebabé awaké dhéwé kudu ngupaya bèn isa tetep rukun karo sedulur sing lagi jèngkèl karo awaké dhéwé. (Wacanen Matius 5:23, 24.) Yésus kandha nèk Yéhuwah péngin  awaké dhéwé nduwé hubungan sing apik karo wong liya. Mula, Yéhuwah mesthi seneng nèk awaké dhéwé ngupaya tetep rukun karo para sedulur. Ning, nèk awaké dhéwé ora gelem ngupaya tetep rukun lan malah sengit karo sedulur sing lagi jèngkèl karo awaké dhéwé, Yéhuwah ora bakal nampa ibadahé awaké dhéwé.​—1 Yoh. 4:20.

5. Apa sing nggawé Markus ngrasa nèk ngupaya kanggo tetep rukun kuwi ora gampang?

⁵ Ngupaya tetep rukun karo para sedulur kuwi mungkin ora gampang. Apa sebabé? Coba gatèkna pengalamané salah siji sedulur sing jenengé Markus. * Dhèwèké ngrasa lara ati wektu ana sedulur sing ngèlèk-èlèk dhèwèké ing ngarepé sedulur-sedulur liyané. Markus dadi nesu lan ngunèk-unèkké sedulur kuwi. Ning, sakwisé kuwi Markus ngrasa bersalah. Akhiré, dhèwèké njaluk ngapura bèn isa tetep rukun karo sedulur kuwi. Sayangé, sedulur kuwi ora gelem ngapurani Markus. Markus dadi mikir, ’Nèk dhèwèké waé ora gelem ngapurani aku, ngapa aku kudu terus ngupaya rukun karo dhèwèké?’ Bar kuwi, ana pinituwa wilayah sing ngandhani Markus bèn dhèwèké terus ngupaya kanggo tetep rukun karo sedulur kuwi. Dadi, piyé tanggepané Markus?

6. (a) Apa sing ditindakké Markus bèn isa tetep rukun karo seduluré? (b) Piyé carané Markus ngetrapké Kolose 3:13, 14?

⁶ Markus ngrenungké apa sing wis dhèwèké tindakké. Hasilé, Markus sadhar nèk kadhang kala dhèwèké nganggep nèk dhèwèké kuwi luwih apik ketimbang wong liya. Markus ya ngerti nèk dhèwèké kudu berubah. (Kol. 3:8, 9, 12) Mula, dhèwèké nemoni manèh sedulur kuwi kanggo njaluk ngapura. Markus ya nulis surat kanggo sedulur kuwi sing isiné ngandhani nèk Markus bener-bener gela lan péngin dadi kancané manèh. Terus, Markus mènèhi hadiah sing kira-kira bakal disenengi karo sedulur kuwi. Ning, sedulur kuwi tetep ora gelem ngapurani Markus. Senajan ngono, Markus tetep manut karo préntahé Yésus. Markus tetep sayang  karo sedulur kuwi lan gelem ngapurani dhèwèké. (Wacanen Kolose 3:13, 14.) Ora soal piyé tanggepané wong liya, wong Kristen sing bener-bener manut karo Yésus mesthi gelem ngapurani seduluré lan bakal terus ndonga bèn isa tetep rukun karo kabèh sedulur.​—Mat. 18:21, 22; Gal. 6:9.

7. (a) Yésus péngin awaké dhéwé nindakké apa? (b) Apa sing dialami karo Laura?

⁷ Yésus kandha nèk awaké dhéwé péngin wong liya sayang karo awaké dhéwé, awaké dhéwé kudu sayang dhisik karo wong kuwi. Yésus ya kandha nèk kuduné awaké dhéwé ora mung sayang karo wong sing sayang karo awaké dhéwé. (Luk. 6:31-33) Piyé nèk ana sedulur sing ora gelem nyapa lan malah ngedohi awaké dhéwé? Biasané, kuwi jarang kelakon. Ning, kuwi sing dialami karo Laura. Laura kandha, ”Ana sedulur sing ngedohi aku, padahal aku ora ngerti apa sebabé. Kuwi nggawé aku sedhih lan aku dadi ora semangat kanggo berhimpun.” Laura mikir, ’Aku kan ora salah apa-apa. Apa manèh sedulur-sedulur liyané ya nganggep nèk dhèwèké kuwi anèh.’

8. Apa sing ditindakké Laura bèn tetep rukun, lan apa sing isa disinaoni saka pengalamané Laura?

⁸ Apa sing ditindakké Laura bèn tetep rukun karo sedulur kuwi? Dhèwèké ndonga karo Yéhuwah lan mutuské kanggo ngomong karo sedulur kuwi. Sakwisé ngrembug masalahé, Laura lan sedulur kuwi pelukan lan dadi rukun manèh. Pancèn, kétoké masalahé wis rampung. Ning, Laura kandha, ”Sakwisé kuwi, sedulur wédok mau nduduhké sikap sing padha kaya sakdurungé. Kuwi bener-bener nggawé aku sedhih.” Laura mikir nèk dhèwèké ora bakal isa seneng nèk sedulur kuwi ora berubah. Ning, Laura sadhar nèk dhèwèké kuduné tetep sayang karo sedulur kuwi lan ”saktulusé ati ngapurani” dhèwèké. (Éf. 4:32–5:2) Laura ngerti nèk wong Kristen sing sayang karo seduluré kuwi ”ora ngéling-éling salahé” seduluré. Laura ya ngerti nèk ”wong sing nduwé katresnan kuwi nanggung samubarang kabèh, percaya samubarang kabèh, tansah nduwé pangarep-arep, lan tekun ngadhepi samubarang kabèh”. (1 Kor. 13:5, 7) Akhiré, Laura dadi ora sedhih manèh lan sedulur wédok kuwi dadi luwih ramah karo dhèwèké.  Dadi, nèk awaké dhéwé bener-bener sayang lan ngupaya tetep rukun karo para sedulur, awaké dhéwé isa yakin nèk ”Gusti Allah sing kebak katresnan lan katentreman [bakal] terus ngayomi” awaké dhéwé.​—2 Kor. 13:11.

9. Nurut Kisah Para Rasul 10:34, 35, apa sebabé awaké dhéwé ora mbédak-mbédakké wong?

⁹ Yéhuwah kuwi ora mbédak-mbédakké wong. (Wacanen Kisah Para Rasul 10:34, 35.) Nèk awaké dhéwé ora mbédak-mbédakké, kuwi nduduhké nèk awaké dhéwé dadi anak-anaké Gusti Allah. Kuwi ya nduduhké nèk awaké dhéwé manut karo préntah sing kandha nèk awaké dhéwé kudu sayang karo wong liya, kaya awaké dhéwé sayang karo awaké dhéwé. Kuwi ya dadi bukti nèk awaké dhéwé ngupaya tetep rukun karo para sedulur.​—Rm. 12:9, 10; Yak. 2:8, 9.

10-11. Piyé carané Ruth isa ngowahi pandhangané sing klèru?

¹⁰ Mungkin ana sing ngrasa angèl kanggo ora mbédak-mbédakké wong. Coba gatèkna pengalamané salah siji sedulur wédok sing jenengé Ruth. Pas Ruth isih cilik, keluargané tau dijahati karo wong sing asalé saka negara liya. Apa pengaruhé kanggo Ruth? Dhèwèké kandha, ”Aku sengit karo kabèh sing ana hubungané karo negara kuwi. Kanggoku, kabèh wong saka negara kuwi termasuk para sedulur ing kana nduwé sipat sing padha.” Piyé carané Ruth ngowahi pandhangané sing klèru?

¹¹ Ruth ngerti nèk dhèwèké kudu ngupaya tenanan kanggo ngowahi pandhangané sing klèru. Dhèwèké maca pengalamané para sedulur saka negara kuwi sing dicathet ing Buku Tahunan. Ruth kandha, ”Aku ngupaya tenanan bèn isa nduwé pandhangan sing positif soal wong-wong saka negara kuwi. Para sedulur ing kana bener-bener semangat kanggo nglayani Yéhuwah. Kuwi nggawé aku yakin nèk para sedulur kuwi ya dadi bagéan saka organisasiné Yéhuwah.” Ruth ya ngerti nèk ana manèh sing kudu dhèwèké tindakké. Ruth kandha, ”Pas ketemu karo sedulur-sedulur saka negara kuwi aku ngupaya tenanan bèn isa ramah. Sedulur-sedulur kuwi tak jak omong-omongan bèn aku isa luwih kenal karo dhèwèké.” Apa hasilé? Ruth kandha, ”Akhiré pandhanganku soal sedulur-sedulur saka negara kuwi isa berubah.”

12. Apa buktiné nèk Sarah isih mbédak-mbédakké wong?

¹² Ana sing ora sadhar nèk sakjané dhèwèké wis mbédak-mbédakké wong. Misalé, salah siji sedulur wédok sing jenengé Sarah rumangsa nèk dhèwèké ora mbédak-mbédakké wong nurut werna kulité, keadaan ékonominé, utawa tanggung jawabé ing jemaat. Ning, dhèwèké kandha, ”Aku sadhar nèk jebulé aku isih mbédak-mbédakké wong.” Kok isa? Sarah lan keluargané kuwi wong-wong sing pendidikané dhuwur. Mula, dhèwèké luwih seneng bergaul karo para sedulur sing latar belakangé padha. Sarah tau kandha karo kancané, ”Aku ora gelem bergaul terlalu akrab karo sedulur-sedulur sing ora kuliah.” Dadi, piyé carané Sarah isa ngowahi sikapé?

13. Apa sing isa awaké dhéwé sinaoni saka pengalamané Sarah?

¹³ Ana pinituwa wilayah sing mènèhi naséhat marang Sarah. Sarah kandha, ”Dhèwèké ngalem aku merga aku wis ngupaya bèn tetep setya, wis mènèhi koméntar-koméntar sing apik ing perhimpunan, lan nduwé akèh pengetahuan Alkitab. Pinituwa wilayah kuwi ya kandha nèk aku kudu ngupaya bèn isa dadi wong sing rendah hati lan nduwé welas asih marang para sedulur.” Sarah ngetrapké naséhaté pinituwa wilayah kuwi. Dhèwèké kandha, ”Aku ngerti nèk aku kudu apikan lan sayang karo para sedulur.” Sarah ya kandha, ”Aku ngupaya bèn isa ngerti apa sebabé Yéhuwah nganggep para sedulur kuwi berharga.” Hasilé, sikapé Sarah marang para sedulur isa berubah. Apa sing isa awaké dhéwé  sinaoni? Aja nganti awaké dhéwé nganggep nèk awaké dhéwé luwih apik ketimbang wong liya merga awaké dhéwé nduwé pendidikan sing dhuwur. Nèk awaké dhéwé bener-bener ’tresna marang kabèh sedulur seiman’, awaké dhéwé ora bakal mbédak-mbédakké para sedulur.​—1 Ptr. 2:17.

14. Nurut Ibrani 13:16, piyé perasaané Yéhuwah nèk awaké dhéwé nduduhké sipat seneng nampa tamu?

¹⁴ Yéhuwah mesthi seneng nèk awaké dhéwé nduduhké sipat seneng nampa tamu. (Wacanen Ibrani 13:16.) Yéhuwah nganggep nèk mbantu para sedulur sing mbutuhké kuwi dadi bagéan saka ibadahé awaké dhéwé. (Yak. 1:27; 2:14-17) Mula, Alkitab kandha, ”Nduwéa kebiasaan kanggo nduduhké sipat seneng nampa tamu.” (Rm. 12:13) Nèk awaké dhéwé nduduhké sipat seneng nampa tamu, kuwi dadi bukti nèk awaké dhéwé péngin akrab karo para sedulur. Para sedulur ya isa ngerti nèk awaké dhéwé bener-bener perduli lan sayang karo dhèwèké. Yéhuwah seneng nèk awaké dhéwé isa mènèhi panganan, minuman, utawa wektuné awaké dhéwé kanggo para sedulur. (1 Ptr. 4:8-10) Ning, kadhang kala ora gampang kanggo nduduhké sipat seneng nampa tamu. Apa waé tantangané?

15-16. (a) Apa sebabé ana sing ngrasa ragu-ragu kanggo nduduhké sipat seneng nampa tamu? (b) Piyé carané Dita isa ngatasi perasaan ragu-ragu wektu arep nduduhké sipat seneng nampa tamu?

¹⁵ Merga keadaan, mungkin awaké dhéwé ngrasa ragu-ragu kanggo nduduhké sipat seneng nampa tamu. Gatèkna pengalamané salah siji sedulur wédok sing jenengé Dita. Dhèwèké kuwi randha. Sakdurungé dadi Seksi Yéhuwah, Dita kuwi wongé isinan. Dhèwèké ya ngrasa luwih apik nèk wong liya waé sing nduduhké sipat seneng nampa tamu.

¹⁶ Ning, sakwisé dadi Seksi Yéhuwah, Dita ngupaya kanggo nduduhké sipat seneng nampa tamu. Dita kandha, ”Wektu pembangunan Balé Ibadah sing anyar, ana pinituwa sing ngandhani aku nèk ana suami istri sing mèh mbantu proyèk  kuwi lan butuh penginepan saksuwéné rong minggu. Aku dadi kèlingan kisahé randha saka Zaréfat sing diberkahi karo Yéhuwah.” (1 Ra. 17:12-16) Dita setuju nèk suami istri kuwi nginep ing omahé. Apa pengaruhé kuwi kanggo Dita? Dita kandha, ”Aku seneng merga suami istri kuwi ora mung nginep rong minggu, ning malah nganti rong sasi ing omahku. Suami istri kuwi akhiré dadi sahabatku.” Dita ya dadi luwih akrab karo para sedulur ing jemaat. Dita saiki dadi perintis lan para sedulur sing nginjil karo dhèwèké kerep dijak dolan ing omahé. Dita kandha, ”Merga nduduhké sipat seneng nampa tamu, aku dadi isa bahagia lan éntuk akèh berkah.”​—Ibr. 13:1, 2.

17. Lukas lan bojoné sadhar nèk wis nindakké apa?

¹⁷ Awaké dhéwé mungkin wis nduduhké sipat seneng nampa tamu. Ning, apa manèh sing isa awaké dhéwé tindakké? Misalé, ana pengalaman saka sedulur Lukas lan bojoné. Wong loro kuwi seneng ngejak wong tuwané, keluargané, kanca-kanca cedhaké, lan pinituwa wilayah kanggo dolan ing omahé. Ning, Lukas kandha, ”Aku sadhar nèk sing tak jak kuwi mung wong-wong sing cedhak karo aku.” Dadi, apa manèh sing isa ditindakké Lukas lan bojoné kanggo nduduhké sipat seneng nampa tamu?

18. Apa manèh sing ditindakké Lukas lan bojoné kanggo nduduhké sipat seneng nampa tamu?

¹⁸ Pandhangané Lukas lan bojoné isa berubah sakwisé ngrenungké kata-katané Yésus sing kandha, ”Nèk kowé mung nresnani wong sing nresnani kowé, apa opahmu?” (Mat. 5:45-47) Lukas sadhar nèk dhèwèké lan bojoné kudu niru Yéhuwah sing apikan karo kabèh wong. Dadi, Lukas lan bojoné ngejak para sedulur sing durung tau diundang sakdurungé kanggo dolan ing omahé. Lukas kandha, ”Aku seneng banget merga isa dadi saya akrab karo kabèh sedulur. Aku lan para sedulur bener-bener ngrasa dikuwatké.”

19. Piyé carané nduduhké nèk awaké dhéwé kuwi muridé Yésus sing sejati, lan apa sing dadi tékadé njenengan?

¹⁹ Awaké dhéwé wis ngrembug piyé carané bèn awaké dhéwé isa tetep rukun karo para sedulur, ora mbédak-mbédakké wong, lan nduduhké sipat seneng nampa tamu. Kuwi bukti nèk awaké dhéwé bener-bener sayang karo para sedulur. Nèk nduwé pandhangan sing klèru soal para sedulur, awaké dhéwé kudu cepet-cepet ngowahi kuwi lan terus nduduhké nèk awaké dhéwé bener-bener sayang karo para sedulur. Awaké dhéwé bakal bahagia lan wong-wong isa ngerti nèk awaké dhéwé kuwi muridé Yésus sing sejati.​—Yoh. 13:17, 35.