1. Cah-cah enom nduwé kelebihan apa?

CAH-CAH enom, * ana akèh sing isa mbok tindakké kanggo jemaat merga kowé isih kuwat. (WB. 20:29) Nèk kowé wis kerep mbantu sedulur-sedulur ing jemaat, mungkin kowé mikir, ’Kapan ya aku dilantik dadi abdiné jemaat?’ Ning, mungkin kowé ngrasa nèk sedulur-sedulur nganggep kowé isih enom lan kurang pengalaman. Nèk ngono, piyé carané kowé isa dadi wong sing dipercaya karo sedulur-sedulur senajan kowé isih enom?

2. Apa sing bakal dirembug ing artikel iki?

² Cah-cah enom isa sinau pengalamané Raja Daud lan loro raja Yéhuda, yaiku Asa lan Yéhosyafat. Ing artikel iki, awaké dhéwé bakal ngrembug apa sing ditindakké Raja Daud, Asa, lan Yéhosyafat wektu ngadhepi tantangan. Awaké dhéwé ya bakal ngrembug piyé cah-cah enom isa sinau saka pengalamané wong-wong kuwi.

3. Apa salah siji cara cah enom isa mbantu sedulur-sedulur sing wis tuwa ing jemaat?

³ Daud kuwi wong sing nduwé hubungan sing akrab karo Yéhuwah. Pas isih enom, Daud ngupaya bèn nduwé ketrampilan  sing isa dienggo mbantu wong liya. Misalé, dhèwèké ngupaya bèn isa pinter main harpa lan nggunakké ketrampilan kuwi kanggo mbantu raja sing wis dipilih Gusti Allah, yaiku Saul. (1 Sam. 16:16, 23) Cah-cah enom, apa kowé ya nduwé ketrampilan sing isa digunakké kanggo mbantu sedulur-sedulur? Misalé, merga luwih ngerti soal tèknologi, kowé isa mbantu sedulur-sedulur sing wis tuwa bèn isa nggunakké tablèt utawa HP-né kanggo sinau Alkitab pribadi lan berhimpun. Nèk mbok bantu, sedulur-sedulur sing wis tuwa kuwi mesthi seneng banget.

4. Wektu diwènèhi tugas, piyé cah-cah enom isa niru Daud? (Deloken gambar ing halaman 1.)

⁴ Daud kuwi wong sing tanggung jawab lan isa dipercaya. Misalé, pas isih enom, Daud kuwi tugasé njaga domba-dombané bapaké. Dhèwèké tenanan nindakké tugasé, senajan kuwi bahaya. Daud tau kandha karo Raja Saul, ”Raja, aku iki sing angon domba-dombané bapakku. Nèk ana singa utawa beruang teka terus nggondhol salah siji dombaku, kéwan kuwi bakal tak oyak, tak patèni, lan dombané tak slametké saka cangkemé.” (1 Sam. 17:34, 35) Merga ngerti nèk kudu ngopèni lan nglindhungi domba-dombané, Daud wani nglawan kéwan sing nyerang domba-dombané. Wektu diwènèhi tugas, cah-cah enom ya isa niru Daud sing tenanan nindakké tugasé.

5. Nurut Mazmur 25:14, apa sing paling penting kanggo cah-cah enom?

⁵ Kèt enom, Daud wis nduwé hubungan sing akrab karo Yéhuwah. Hubungan sing akrab karo Yéhuwah kuwi luwih penting timbang sipat kendel utawa ketrampilané Daud main musik. Yéhuwah kuwi ora mung Gusti Allahé Daud, ning ya kanca akrabé Daud. (Wacanen Mazmur 25:14.) Cah-cah enom, saiki sing paling penting kuwi kowé kudu nduwé hubungan sing akrab karo Yéhuwah. Nèk wis akrab karo Yéhuwah, isa waé sukmbèn kowé bakal éntuk tugas-tugas tambahan ing jemaat.

6. Merga Daud isih enom, wong-wong nduwé pandhangan apa soal Daud? Wènèhana conto.

⁶ Merga isih enom, Daud tau dirèmèhké wong liya. Misalé, wektu Daud arep nglawan Goliat, Raja Saul kandha karo Daud, ”Kowé isih cilik.” (1 Sam. 17:31-33) Sakdurungé kuwi, kakangé Daud ya kandha nèk Daud ora tanggung jawab karo tugasé. (1 Sam. 17:26-30) Ning, Yéhuwah ora nganggep nèk Daud  kuwi isih terlalu enom utawa ora tanggung jawab. Yéhuwah bener-bener ngerti Daud kuwi wong sing kaya piyé. Merga ngendelké Yéhuwah, akhiré Daud isa ngalahké Goliat.​—1 Sam. 17:45, 48-51.

7. Apa sing isa disinaoni saka pengalamané Daud?

⁷ Apa sing isa disinaoni saka pengalamané Daud? Wong-wong sing kenal kowé kèt cilik mungkin nganggep nèk kowé kuwi isih bocah. Mula kowé kudu sabar, merga wong-wong kuwi butuh wektu bèn pandhangané isa berubah. Ning, kowé isa yakin nèk Yéhuwah ora ngrèmèhké kowé senajan kowé isih enom. Yéhuwah kuwi kenal tenan karo kowé lan ngerti kemampuanmu. (1 Sam. 16:7) Kowé kudu ngupaya bèn isa cedhak karo Yéhuwah. Daud isa cedhak karo Yéhuwah merga ngrenungké sipat-sipaté Yéhuwah sing kétok saka ciptaané. (Mzm. 8:3, 4; 139:14; Rm. 1:20) Sakliyané kuwi, kowé kudu njaluk kekuwatan saka Yéhuwah. Misalé, apa kanca-kanca sekolahmu ngécé kowé merga kowé Seksi Yéhuwah? Nèk iya, kowé isa ndonga njaluk bantuané Yéhuwah. Kowé ya kudu ngetrapké saran-saran saka Alkitab utawa bacaan lan vidéo sing dhasaré Alkitab. Nèk kowé ngrasakké bantuané Yéhuwah, imanmu bakal dadi saya kuwat. Terus, nèk wong-wong ndelok kowé ngendelké Yéhuwah, wong-wong bakal luwih percaya karo kowé.

8-9. (a) Wektu ngentèni bèn isa dadi raja, Daud nindakké apa? (b) Apa sing isa disinaoni cah-cah enom saka Daud?

⁸ Gatèkna masalah liyané sing diadhepi Daud. Sakwisé dilantik dadi raja, Daud kudu ngentèni pirang-pirang taun nganti dhèwèké bener-bener dadi rajané suku Yéhuda. (1 Sam. 16:13; 2 Sam. 2:3, 4) Ning, Daud tetep sabar lan ora kecéwa. Daud ora terus-terusan mikirké masalahé lan malah ngupaya bèn isa mbantu wong liya. Misalé, wektu manggon ing dhaérahé wong Filistin, Daud nglawan mungsuhé wong Israèl bèn isa nglindhungi dhaérah perbatasané Yéhuda.​—1 Sam. 27:1-12.

⁹ Apa sing isa disinaoni cah-cah enom saka Daud? Kowé isa nggunakké wektumu kanggo mbantu wong liya, termasuk sedulur-sedulur. Gatèkna pengalamané Ricardo. * Kèt cilik, dhèwèké péngin dadi perintis biasa. Ning, wektu kuwi para pinituwa kandha nèk dhèwèké durung siap. Senajan ngono, Ricardo ora kecéwa lan malah luwih semangat nginjil. Ricardo kandha, ”Nèk tak pikir-pikir manèh, pancèn ana sing kudu tak upayakké sik bèn isa dadi perintis. Aku marani manèh wong-wong sing tanggepané apik. Aku ya persiapan sakdurungé marani manèh wong-wong kuwi. Akhiré, ana wong sing gelem sinau Alkitab karo aku. Merga luwih kerep nginjil, aku ya dadi luwih percaya diri.” Saiki, Ricardo wis dadi perintis biasa lan abdiné jemaat.

10. Apa sing ditindakké Daud sakdurungé nggawé keputusan sing penting?

¹⁰ Gatèkna manèh pengalamané Daud wektu manggon ing dhaérahé wong Filistin. Wektu kuwi, Daud lan anak buahé ninggalké keluargané merga arep perang. Pas Daud lan anak buahé lagi lunga, ana wong-wong sing ngrampok omahé lan nggawa lunga keluargané Daud lan keluargané anak buahé dadi tawanan. Merga Daud wis kerep perang, dhèwèké isa waé langsung nggolèk cara bèn isa nylametké wong-wong sing ditawan kuwi. Ning, Daud ora nindakké kuwi. Dhèwèké tetep njaluk tuntunané Yéhuwah liwat Imam Abiatar. Daud takon karo Yéhuwah, ”Apa aku kudu ngoyak grombolan rampok kuwi?” Yéhuwah kandha nèk Daud kudu ngoyak grombolan rampok kuwi. Yéhuwah ya ngyakinké Daud  nèk dhèwèké bakal berhasil nylametké wong-wong sing ditawan kuwi. (1 Sam. 30:7-10) Apa sing isa disinaoni saka peristiwa iki?

11. Apa sing isa mbok tindakké sakdurungé nggawé keputusan?

¹¹ Sakdurungé nggawé keputusan, kowé isa njaluk pendapaté wong liya. Misalé, kowé isa takon karo wong tuwamu utawa para pinituwa sing wis pengalaman. Kowé isa percaya karo para pinituwa, merga Yéhuwah ya percaya karo para pinituwa. Yéhuwah wis mènèhké para pinituwa dadi ”hadiah” kanggo jemaat. (Éf. 4:8) Kowé bakal éntuk akèh manfaat nèk niru imané lan ngrungokké saran-sarané para pinituwa. Saiki, ayo ngrembug pengalamané Raja Asa.

12. Pas isih enom, Raja Asa kuwi wong sing kaya piyé?

¹² Pas isih enom, Raja Asa kuwi rendah hati lan kendel. Misalé, sakwisé dadi raja nggantèni bapaké, yaiku Abiya, Asa mulai nyingkirké penyembahan berhala. Asa ya ”ngongkon wong Yéhuda nglayani Yéhuwah Gusti Allahé nènèk moyangé wong-wong kuwi lan manut karo Hukum lan préntahé Gusti Allah”. (2 Bb. 14:1-7) Terus, pas Zérah wong Étiopia nyerang Yéhuda karo nggawa sak juta prajurité, Asa njaluk tulung karo Yéhuwah. Dhèwèké kandha, ”Oh Yéhuwah, kanggoné Njenengan ora masalah nulungi wong sing kuwat utawa ringkih. Oh Yéhuwah Gusti Allahku, tulungana aku lan bangsaku merga aku ngendelké Njenengan.” Asa bener-bener yakin nèk Yéhuwah isa nylametké umaté. Asa percaya karo Yéhuwah, lan akhiré ”Yéhuwah ngalahké wong Étiopia”.​—2 Bb. 14:8-12.

13. Apa sing ditindakké Asa wektu diancam karo Baasya, lan apa akibaté?

¹³ Ngadhepi prajurit sak juta kuwi mesthi medèni banget. Ning, Asa isa berhasil. Sayangé, pas Asa ngadhepi masalah liyané, dhèwèké malah ora ngendelké Yéhuwah. Wektu diancam karo Baasya Raja Israèl, Asa malah njaluk tulung karo Raja Siria. Keputusané Asa kuwi akhiré nyebabké masalah. Liwat Nabi Hanani, Yéhuwah kandha marang Asa, ”Merga kowé ngendelké raja Siria lan ora ngendelké Yéhuwah Gusti Allahmu, pasukané raja Siria bakal lolos.” Malah, mulai wektu kuwi, kerajaané Asa dadi ora damai merga kerep perang. (2 Bb. 16:7, 9; 1 Raj. 15:32) Apa sing isa disinaoni saka pengalamané Asa?

14. Apa buktiné nèk kowé ngendelké Yéhuwah, lan nurut 1 Timotius 4:12, apa hasilé?

 ¹⁴ Cah-cah enom, kowé kudu tetep rendah hati lan terus ngendelké Yéhuwah. Pancèn, pas dibaptis kowé wis nduduhké nèk kowé nduwé iman lan percaya karo Yéhuwah. Yéhuwah ya seneng banget merga kowé wis dadi umaté. Ning saiki, kowé kudu terus ngendelké Yéhuwah. Pancèn nèk masalahé abot, biasané awaké dhéwé bakal njaluk bantuané Yéhuwah. Ning, piyé nèk masalahé kétoké mung sepélé? Kowé kudu tetep ngendelké Yéhuwah wektu nggawé keputusan, misalé soal hiburan, gawéan, lan cita-citamu. Timbang ngendelké kepinteranmu dhéwé, kowé kudu nggolèk pathokané Alkitab sing cocog karo situasimu. Terus, kowé ya kudu ngetrapké pathokan kuwi. (WB. 3:5, 6) Nèk terus ngendelké Yéhuwah, kowé bakal nggawé Yéhuwah seneng, lan sedulur-sedulur ya bakal luwih percaya karo kowé.​—Wacanen 1 Timotius 4:12.

15. Kaya sing dicathet ing 2 Babad 18:1-3 lan 19:2, Raja Yéhosyafat tau nggawé kesalahan apa?

¹⁵ Awaké dhéwé pancèn ora sampurna lan isa nggawé kesalahan. Ning, aja nganti kowé nyerah. Kowé ya kudu terus ngupaya bèn isa nglayani Yéhuwah. Gatèkna pengalamané Raja Yéhosyafat. Dhèwèké kuwi nduwé sipat-sipat sing apik. Kèt awal mréntah dadi raja, Yéhosyafat ”nglayani Gusti Allah sing disembah bapaké lan manut karo préntahé”. Dhèwèké ya ngutus para pejabaté kanggo mulang wong-wong ing kutha Yéhuda soal Yéhuwah. (2 Bb. 17:4, 7) Ning, senajan nduwé sipat-sipat sing apik, Yéhosyafat ya tau nggawé kesalahan. Merga nggawé keputusan sing salah, akibaté Yéhosyafat dinaséhati karo salah siji nabiné Yéhuwah. (Wacanen 2 Babad 18:1-3; 19:2.) Apa sing isa mbok sinaoni saka pengalamané Raja Yéhosyafat?

16. Apa sing isa mbok sinaoni saka pengalamané Rajeev?

¹⁶ Cah-cah enom, aja lara ati wektu dinaséhati. Kowé ya kudu manut karo naséhat kuwi. Aja patah semangat. Gatèkna pengalamané Sedulur Rajeev. Dhèwèké kandha, ”Pas isih remaja, kadhang aku bingung uripku iki arep tak enggo apa. Kaya cah-cah enom liyané, aku luwih seneng olahraga lan dolan karo kanca-kancaku timbang mèlu berhimpun utawa nginjil.” Ning, ana pinituwa sing apikan lan mènèhi Rajeev naséhat. Rajeev kandha,  ”Pinituwa kuwi nggunakké 1 Timotius 4:8 kanggo mbantu aku bèn isa nggawé keputusan sing apik.” Apa hasilé? Rajeev kandha, ”Pirang-pirang taun sakwisé aku ngetrapké naséhat kuwi, akhiré aku isa dadi abdiné jemaat.”

17. Piyé pandhangané sedulur-sedulur soal cah-cah enom ing jemaat?

¹⁷ Cah-cah enom, sedulur-sedulur ing jemaat seneng banget merga isa ”bersatu” nglayani Yéhuwah bareng karo kowé. (Zéf. 3:9) Sedulur-sedulur kuwi ya seneng wektu ndelok kowé semangat lan tenanan nindakké tugasmu. Sedulur-sedulur kuwi bener-bener nganggep kowé berharga.​—1 Yoh. 2:14.

18. Nurut Wulang Bebasan 27:11, piyé perasaané Yéhuwah marang cah-cah enom sing nglayani Dhèwèké?

¹⁸ Cah-cah enom, Yéhuwah sayang lan percaya karo kowé. Yéhuwah kandha nèk pas akhir jaman bakal ana akèh cah enom sing réla nggunakké uripé kanggo nglayani Dhèwèké. (Mzm. 110:1-3) Yéhuwah ngerti nèk kowé sayang karo Dhèwèké lan péngin ngupaya sak isa-isané nglayani Dhèwèké. Mula, kowé kudu sabar karo wong liya lan aja nyerah. Nèk kowé nggawé kesalahan, kowé kudu gelem dinaséhati lan nganggep nèk kuwi naséhat saka Yéhuwah. (Ibr. 12:6) Kowé ya kudu tenanan nindakké tugasmu. Sing paling penting, gawénen Yéhuwah seneng.​—Wacanen Wulang Bebasan 27:11.