1. Nurut Matius 24:9, kenapa awaké dhéwé ora perlu nggumun nèk disengiti wong liya?

YÉHUWAH nyiptakké manungsa bèn isa nresnani wong liya. Awaké dhéwé mesthi ya seneng nèk wong liya nresnani awaké dhéwé. Mula, nèk ana sing sengit karo awaké dhéwé, awaké dhéwé mesthi ngrasa sedhih utawa mungkin malah wedi. Misalé, Sedulur Georgina saka Eropa kandha, ”Pas umurku 14 taun, ibuku sengit karo aku merga aku nglayani Yéhuwah. Aku sedhih banget lan ngrasa ora dianggep. Aku ya mikir apa keputusanku iki salah.” * Sedulur Danylo kandha, ”Merga ngerti nèk aku Seksi Yéhuwah, ana tentara-tentara sing ngantemi, ngécé, lan ngancam aku. Kuwi nggawé aku isin lan wedi banget.” Awaké dhéwé mesthi ora seneng nèk disengiti wong liya. Ning, nèk kuwi kelakon, awaké dhéwé ora perlu nggumun merga Yésus wis tau kandha nèk murid-muridé bakal disengiti wong liya.​—Wacanen Matius 24:9.

2-3. Kenapa murid-muridé Yésus disengiti wong liya?

² Kenapa murid-muridé Yésus disengiti wong liya? Kaya Yésus, awaké dhéwé ”ora padha kaya wong-wong ing donya iki”. (Yoh. 15:17-19) Misalé, Sétan lan ’keturunané’, yaiku wong-wong sing ndhukung Sétan, nganggep nèk Yéhuwah kuwi ora pantes mréntah manungsa. (Pd. 3:1-5, 15) Ning, ora kaya wong-wong ing donya iki, awaké dhéwé gelem ngabdi marang Yéhuwah merga ngerti nèk mung Yéhuwah sing nduwé hak mréntah manungsa. Dadi, senajan ngajèni pamréntah, awaké dhéwé ora gelem mèlu-mèlu urusan politik, hormat bendéra, utawa nyanyèkké lagu kebangsaan. Terus, awaké dhéwé ya martakké nèk mung Kerajaané Gusti Allah sing isa ngrampungké kabèh masalahé manungsa, lan Kerajaan kuwi bakal nyingkirké kabèh wong sing jahat. (Dan. 2:44; Why. 19:19-21) Iki pancèn kabar apik kanggo wong-wong sing  wataké alus. (Mzm. 37:10, 11) Ning, wong-wong sing jahat mesthi ora seneng krungu kabar kuwi.

³ Awaké dhéwé ya disengiti merga manut karo pathokané Gusti Allah. Pathokané Gusti Allah kuwi béda banget karo pathokané wong-wong ing donya iki. Misalé, mbiyèn Gusti Allah nyingkirké wong-wong Sodom lan Gomora merga wong-wong kuwi nindakké hubungan sèks sing ora pantes lan bejat. (Yud. 7) Kaya wong-wong Sodom lan Gomora, wong-wong jaman saiki ya nganggep nèk hubungan sèks sing ora pantes kuwi ora salah. Dadi, akhiré awaké dhéwé dièlèk-èlèk lan dianggep fanatik merga manut karo pathokané Alkitab soal hubungan sèks.​—1 Ptr. 4:3, 4.

4. Piyé carané bèn awaké dhéwé isa tetep nglayani Yéhuwah senajan disengiti lan dièlèk-èlèk karo wong liya?

⁴ Piyé carané bèn awaké dhéwé isa tetep nglayani Yéhuwah senajan disengiti lan dièlèk-èlèk karo wong liya? Awaké dhéwé kudu nduwé iman nèk Yéhuwah bakal nulungi awaké dhéwé. Imané awaké dhéwé kuwi kaya tamèng sing isa ”matèni kabèh panah geni saka Sétan”. (Éf. 6:16) Sakliyané iman, awaké dhéwé ya butuh katresnan, merga wong sing nduwé katresnan kuwi ”ora gampang nesu”. Wong sing nduwé katresnan ya sabar ngadhepi apa waé, termasuk sing isa nggawé sedhih. (1 Kor. 13:4-7, 13) Saiki, ayo dirembug kenapa nèk awaké dhéwé nresnani Yéhuwah, nresnani sedulur-sedulur, lan nresnani mungsuh-mungsuhé awaké dhéwé isa nggawé awaké dhéwé tetep nglayani Yéhuwah senajan disengiti.

5. Kenapa Yésus tetep nglayani Yéhuwah senajan ngerti nèk bakal dianiaya?

⁵ Pas bengi sakdurungé dipatèni, Yésus kandha karo murid-muridé, ”Aku nindakké apa sing dipréntahké Bapak marang aku bèn donya ngerti nèk aku nresnani Bapak.” (Yoh. 14:31) Merga nresnani Yéhuwah, Yésus tetep gelem nglayani Yéhuwah senajan ngerti nèk bakal dianiaya. Kaya Yésus, awaké dhéwé ya isa tetep setya senajan dianiaya nèk nresnani Yéhuwah.

6. Nurut Roma 5:3-5, piyé perasaané awaké dhéwé nèk disengiti?

⁶ Umaté Yéhuwah isa tetep setya senajan dianiaya merga nresnani Yéhuwah. Contoné, pas dikongkon mandheg nginjil karo Mahkamah Agung Yahudi, para rasul kandha, ”Penguasa sing kudu tak turuti kuwi Gusti Allah dudu manungsa.” (Kis. 5:29) Para rasul isa kandha kaya ngono merga nresnani Gusti Allah. (1 Yoh. 5:3) Umaté Gusti Allah saiki ya nresnani Gusti Allah. Mula, umaté Gusti Allah saiki isa tetep setya senajan dianiaya karo pamréntah sing kejem lan jahat. Senajan disengiti, awaké dhéwé ora sedhih, ning malah seneng.​—Kis. 5:41; wacanen Roma 5:3-5.

7. Piyé tanggepané awaké dhéwé wektu ditentang karo keluarga?

⁷ Mungkin, masalah sing paling angèl diadhepi kuwi nèk awaké dhéwé ditentang karo keluarga. Pas awaké dhéwé mulai sinau Alkitab, mungkin ana anggota keluargané awaké dhéwé sing mikir nèk awaké dhéwé diapusi utawa nganggep nèk awaké dhéwé wis ora waras. (Bandhingna karo Markus 3:21.) Mula, isa waé ana keluargané awaké dhéwé sing kasar karo awaké dhéwé. Ning awaké dhéwé ora nggumun, merga Yésus wis kandha nèk murid-muridé ”bakal dimungsuhi karo keluargané dhéwé”. (Mat. 10:36) Senajan disengiti, awaké dhéwé ora bakal sengit karo keluargané awaké dhéwé. Merga nresnani Yéhuwah, mula awaké dhéwé ya bakal tetep nresnani keluargané awaké dhéwé. (Mat. 22:37-39) Ning, awaké dhéwé mesthi ya ora péngin nglanggar pathokané Alkitab mung merga péngin nyenengké keluargané awaké dhéwé.

8-9. Apa sing mbantu Georgina tetep nglayani Yéhuwah senajan ditentang ibuné?

⁸ Georgina, sing disebutké mau, isa tetep setya nglayani Yéhuwah senajan ditentang ibuné.  Georgina kandha, ”Awalé, aku lan ibuku mulai sinau Alkitab karo Seksi Yéhuwah. Ning, enem sasi sakwisé kuwi, sikapé ibuku berubah wektu aku mulai mèlu berhimpun. Jebulé, ibuku kena pengaruh ajarané wong murtad. Pandhangan-pandhangan sing salah kuwi sing bola-bali diomongké ibuku. Ibuku ya ngèlèk-èlèk aku, njambak rambutku, nekak aku, lan mbuwang buku-bukuku. Senajan ngono, aku tetep péngin nglayani Yéhuwah. Akhiré, aku dibaptis pas umur 15 taun. Merga ora seneng nèk aku dadi Seksi Yéhuwah, ibuku nglebokké aku ing panggonan sing isiné cah-cah nakal lan kecanduan narkoba. Iki abot banget kanggo aku, merga wong sing kuduné sayang lan perduli karo aku malah ora ndhukung aku.”

⁹ Apa sing mbantu Georgina bèn isa tetep nglayani Yéhuwah? Dhèwèké kandha, ”Pas ibuku mulai nentang aku, aku lagi waé rampung maca Alkitab saka awal nganti akhir. Aku dadi yakin nèk sing tak sinaoni kuwi pancèn bener, lan aku ya ngrasa cedhak karo Yéhuwah. Aku kerep ndonga, lan Yéhuwah ngrungokké aku. Pas aku manggon karo cah-cah nakal kuwi, ana sedulur wédok sing ngejak aku dolan ing omahé bèn isa sinau Alkitab bareng. Sedulur-sedulur liyané ya akèh sing nguwatké aku. Sedulur-sedulur kuwi nganggep aku kaya keluargané dhéwé. Aku ndelok dhéwé nèk Yéhuwah kuwi luwih kuwat timbang sapa waé sing nentang awaké dhéwé.”

10. Awaké dhéwé isa yakin apa soal Yéhuwah?

¹⁰ Rasul Paulus kandha nèk ”ora ana sing isa nggawé Gusti Allah ora sayang manèh karo awaké dhéwé”. (Rm. 8:38, 39) Senajan awaké dhéwé isa waé ditentang, ning Yéhuwah ora bakal ninggalké lan bakal terus nguwatké awaké dhéwé. Saka pengalamané Georgina, awaké dhéwé ya isa ngerti nèk Yéhuwah isa nggunakké sedulur-sedulur kanggo mbantu awaké dhéwé.

11. Apa manfaaté nèk murid-muridé Yésus ngetrapké naséhaté Yésus sing dicathet ing Yohanes 15:12, 13? Wènèhana conto.

¹¹ Ing bengi sakdurungé mati, Yésus ngandhani murid-muridé bèn padha-padha nresnani. (Wacanen Yohanes 15:12, 13.) Yésus ngerti nèk kabèh muridé padha-padha nresnani lan réla berkorban, murid-muridé kuwi bakal isa bersatu lan tetep setya senajan disengiti wong liya. Gatèkna pengalamané wong-wong Kristen ing jemaat Tésalonika. Kèt jemaat kuwi dibentuk, sedulur-sedulur ing kono wis kerep dianiaya. Ning, sedulur-sedulur kuwi tetep nglayani Yéhuwah lan terus nduduhké katresnan. Kuwi dadi conto sing apik kanggo jemaat-jemaat liyané. (1 Tés. 1:3, 6, 7) Paulus  nyemangati sedulur-sedulur ing kono bèn terus nresnani wong liya lan ”luwih tenanan [manèh] nindakké kuwi”. (1 Tés. 4:9, 10) Nèk terus nduduhké katresnan, sedulur-sedulur kuwi bakal isa menghibur wong sing cilik ati lan mbantu wong sing lemah. (1 Tés. 5:14) Sedulur-sedulur ing kono manut karo kata-katané Paulus. Mula, ing suraté sing keloro sing ditulis kira-kira setaun sakwisé kuwi, Paulus isa kandha nèk sedulur-sedulur ing Tésalonika ”saya nresnani liyané”. (2 Tés. 1:3-5) Merga nduduhké katresnan, sedulur-sedulur kuwi isa tetep nglayani Yéhuwah senajan akèh masalah lan dianiaya.

12. Piyé sedulur-sedulur nduduhké katresnan marang Danylo lan bojoné pas ana perang?

¹² Gatèkna pengalamané Danylo sing disebutké mau. Wektu kuwi, ana perang ing kuthané Danylo. Ning, Danylo lan bojoné tetep teka berhimpun, mèlu nginjil, lan mbantu nyedhiakké panganan kanggo sedulur-sedulur liyané. Bar kuwi, ana tentara-tentara sing nggawa senjata teka ing omahé Danylo. Danylo kandha, ”Tentara-tentara kuwi ngongkon aku mandheg dadi Seksi Yéhuwah. Merga aku ora gelem, tentara-tentara kuwi ngantemi aku lan némbak ndhuwur sirahku kanggo medèn-medèni aku. Sakdurungé lunga, tentara-tentara kuwi ya ngancam arep memperkosa bojoku. Sedulur-sedulur cepet-cepet mbantu bèn aku lan bojoku isa pindhah ing kutha liya numpak sepur. Aku ora bakal lali karo katresnané sedulur-sedulur kuwi. Pas tekan ing kutha sing anyar, sedulur-sedulur ing kono mbantu nyedhiakké panganan kanggo aku lan bojoku. Sedulur-sedulur kuwi ya mbantu bèn aku isa éntuk gawéan lan omah. Merga bantuané sedulur-sedulur, saiki aku ya isa nyedhiakké panggonan kanggo sedulur-sedulur sing ngungsi saka dhaérah perang.” Saka pengalamané Danylo, awaké dhéwé isa ngerti nèk katresnan sing diduduhké sedulur-sedulur isa mbantu awaké dhéwé bèn tetep nglayani Yéhuwah senajan dianiaya.

13. Kenapa roh suci isa mbantu awaké dhéwé bèn tetep sabar lan terus nglayani Yéhuwah senajan disengiti wong liya?

¹³ Yésus ngandhani murid-muridé bèn terus nresnani wong-wong sing sengit karo murid-muridé. (Mat. 5:44, 45) Kuwi mesthiné ora gampang. Senajan ngono, awaké dhéwé isa nresnani mungsuh nèk gelem dibantu roh suci. Alkitab kandha nèk wong sing dituntun roh suci bakal nduwé katresnan, sabar, apikan, nduwé watak sing alus, lan isa ngendhalèni dhiri. (Gal. 5:22, 23) Sipat-sipat kuwi bakal mbantu awaké dhéwé bèn isa tetep sabar lan terus nglayani  Yéhuwah senajan disengiti wong liya. Wong-wong sing mauné nentang awaké dhéwé saiki sikapé isa berubah merga bojoné, anaké, utawa kanca-kancané sing Seksi Yéhuwah nduduhké sipat-sipat kuwi. Malah, ing antarané wong-wong sing nentang kuwi, saiki wis ana sing dadi Seksi Yéhuwah. Mungkin, ana wong-wong sing sengit karo njenengan merga njenengan nglayani Yéhuwah. Nèk njenengan ngrasa angèl nresnani wong-wong kuwi, njenengan isa ndonga njaluk roh suciné Yéhuwah. (Luk. 11:13) Njenengan ya isa yakin nèk manut karo Yéhuwah kuwi hasilé mesthi apik.​—WB. 3:5-7.

14-15. Piyé carané Yasmin ngetrapké Roma 12:17-21 wektu ditentang bojoné?

¹⁴ Gatèkna pengalamané Yasmin saka Timur Tengah. Wektu Yasmin dadi Seksi Yéhuwah, bojoné nganggep nèk Yasmin wis diapusi lan ngupaya bèn Yasmin ora nglayani Yéhuwah manèh. Sakliyané ngèlèk-èlèk Yasmin, bojoné Yasmin ya njaluk keluargané, pemimpin agamané, lan dhukuné bèn ngancam Yasmin lan nudhuh Yasmin wis nggawé keluargané dadi ora bahagia. Malah, bojoné Yasmin ya mbengok-mbengok lan ngécé sedulur-sedulur pas ing perhimpunan. Yasmin kerep nangis merga bojoné kasar karo dhèwèké.

¹⁵ Wektu Yasmin ngalami kuwi, sedulur-sedulur ing perhimpunan menghibur lan nguwatké Yasmin. Para pinituwa ya kandha nèk Yasmin perlu ngetrapké Roma 12:17-21. (Wacanen.) Yasmin kandha, ”Kuwi angèl banget. Ning, aku ndonga njaluk bantuané Yéhuwah lan ngupaya sak isa-isané bèn isa ngetrapké naséhaté Alkitab. Misalé, pas bojoku mbuwang sampah ing lantai dapur, kuwi tak resiki. Pas bojoku ngomongé kasar, jawabanku tetep alus, lan pas dhèwèké lara, aku ya tetep ngrawat dhèwèké.”

16-17. Apa sing isa disinaoni saka pengalamané Yasmin?

¹⁶ Ana hasil sing apik merga Yasmin terus nduduhké katresnan marang bojoné. Yasmin kandha, ”Merga aku mesthi jujur, bojoku dadi luwih percaya karo aku. Dhèwèké dadi gelem ngrungokké lan menghargai wektu aku karo dhèwèké lagi ngobrol soal Alkitab. Bojoku kandha nèk dhèwèké wis ora péngin nesu-nesu manèh lan malah ngijinké aku teka berhimpun. Saiki, aku lan bojoku luwih bahagia merga luwih akrab lan ora tau padu. Aku berharap sukmbèn bojoku gelem sinau Alkitab lan nglayani Yéhuwah bareng karo aku.”

¹⁷ Saka pengalamané Yasmin, awaké dhéwé isa ngerti nèk wong sing nduwé katresnan kuwi ”ora bakal nyerah, ora soal apa sing kelakon”. Wong kuwi ya bakal ”terus nduwé harapan lan sabar ngadhepi apa waé”. (1 Kor. 13:4, 7) Pancèn, awaké dhéwé isa sedhih nèk disengiti wong liya. Ning, nèk awaké dhéwé terus nduduhké katresnan,  wong-wong sing sengit karo awaké dhéwé isa waé sikapé berubah. Kuwi mesthi ya nggawé Yéhuwah seneng. Ning, nèk wong-wong kuwi tetep sengit karo awaké dhéwé, awaké dhéwé ya isa tetep bahagia. Kok isa?

18. Kenapa awaké dhéwé isa bahagia nèk disengiti wong liya?

¹⁸ Yésus kandha, ”Kowé kuwi wong sing bahagia nèk ana wong sing sengit karo kowé.” (Luk. 6:22) Awaké dhéwé mesthiné ora péngin disengiti wong liya utawa seneng nèk dianiaya. Lha terus, kenapa kok awaké dhéwé isa bahagia nèk disengiti wong liya? Ana telu alesan. Sing pertama, nèk awaké dhéwé tetep nglayani Yéhuwah senajan disengiti wong liya, kuwi isa nggawé Yéhuwah seneng. (1 Ptr. 4:13, 14) Sing keloro, merga wis diuji, imané awaké dhéwé dadi luwih berharga lan luwih kuwat. (1 Ptr. 1:7) Lan sing ketelu, sukmbèn Gusti Allah bakal mènèhi awaké dhéwé urip saklawasé.​—Rm. 2:6, 7.

19. Senajan dianiaya, kenapa kok para rasul tetep bahagia?

¹⁹ Ora suwé sakwisé Yésus munggah swarga, para rasul mbuktèkké dhéwé nèk omongané Yésus kuwi bener. Wektu kuwi, para rasul dianiaya lan dikongkon mandheg nginjil. Senajan ngono, para rasul tetep bahagia ”merga Gusti Allah wis mènèhi kesempatan marang para rasul bèn dirèmèhké merga jenengé Yésus”. (Kis. 5:40-42) Merga nresnani Yésus, para rasul ora wedi karo mungsuh-mungsuhé lan ”tanpa mandheg martakké kabar apik”. Saiki, ana akèh sedulur sing tetep nglayani Yéhuwah senajan ngalami tantangan. Sedulur-sedulur kuwi yakin nèk Yéhuwah ora bakal lali karo apa sing wis sedulur-sedulur kuwi tindakké lan karo katresnan sing diduduhké sedulur-sedulur kuwi kanggo jenengé Yéhuwah.​—Ibr. 6:10.

20. Apa sing bakal dirembug ing artikel sakbanjuré?

²⁰ Nèk donyané Sétan durung disingkirké, murid-muridé Yésus bakal terus disengiti karo wong liya. (Yoh. 15:19) Ning, awaké dhéwé ora perlu wedi. Kaya sing bakal dirembug ing artikel sakbanjuré, Yéhuwah bakal ”nguwatké . . . lan nglindhungi” umaté sing setya. (2 Tés. 3:3) Mula, ayo awaké dhéwé terus nresnani Yéhuwah, sedulur-sedulur, lan mungsuh-mungsuhé awaké dhéwé. Nèk ngupayakké kuwi, awaké dhéwé bakal bersatu, nduwé iman sing kuwat, lan isa ngluhurké Yéhuwah. Sakliyané kuwi, wong-wong sing sengit karo awaké dhéwé sikapé ya bakal berubah. Kuwi kabèh dadi bukti nèk awaké dhéwé terus nduduhké katresnan, awaké dhéwé isa tetep nglayani Yéhuwah senajan disengiti wong liya.