1-2. Sebutna conto sing nduduhké nèk ana pathokané Alkitab sing isa waé dadi luwih penting kanggo awaké dhéwé wektu keadaané awaké dhéwé berubah.

 WEKTU nikah, mantèn lanang karo mantèn wédok bakal ngrungokké ceramah sing dhasaré Alkitab. Wong loro kuwi mesthi wis kerep krungu pathokané Alkitab sing dibahas ing ceramah kuwi. Ning merga saiki wis dadi suami istri, pathokan kuwi dadi luwih penting manèh kanggo wong loro kuwi. Wong loro kuwi ya kudu bener-bener ngetrapké pathokan kuwi.

² Sedulur-sedulur sing nduwé anak ya kaya ngono. Mbiyèn, sedulur-sedulur kuwi mungkin wis kerep ngrungokké pathokané Alkitab soal carané ndhidhik anak. Tapi sakwisé nduwé anak, sedulur-sedulur kuwi nduwé tanggung jawab sing gedhé. Dadi, pathokané Alkitab soal ndhidhik anak mesthi dadi luwih penting kanggo sedulur-sedulur kuwi. Loro conto kuwi nduduhké nèk ana pathokané Alkitab sing isa waé dadi luwih penting kanggo awaké dhéwé wektu keadaané awaké dhéwé berubah. Pathokané Alkitab isa mbantu awaké dhéwé nggawé keputusan sing bener wektu situasi berubah. Mulané, awaké dhéwé kudu ”terus” maca lan ngrenungké isiné Kitab Suci saben dina, padha kaya raja-raja Israèl mbiyèn.​—PT. 17:19.

3. Apa sing bakal dirembug ing artikel iki?

³ Wong tuwa kudu ngajari anak-anaké soal Yéhuwah. Kuwi tugas sing istiméwa. Tapi, aja mung sekedar nyritakké soal Yéhuwah thok. Njenengan ya kudu mbantu anak-anaké njenengan bèn isa sayang karo Yéhuwah. Ning piyé carané? Ing artikel  iki, awaké dhéwé bakal ngrembug papat saran sing apik sing dhasaré Alkitab kanggo wong tuwa. (2 Tim. 3:16) Awaké dhéwé ya bakal nggatèkké koméntaré para sedulur sing éntuk manfaat merga ngetrapké saran-saran kuwi.

4. Apa saran sing pertama kanggo wong tuwa bèn isa mbantu anak-anaké sayang karo Yéhuwah? (Yakobus 1:5)

⁴ Saran 1: Njaluk tuntunané Yéhuwah. Bèn isa mbantu anak-anaké sayang karo Yéhuwah, wong tuwa kudu njaluk naséhaté Yéhuwah. (Wacanen Yakobus 1:5.) Kenapa? Pertama, Yéhuwah wis nduwé akèh pengalaman dadi wong tuwa. (Mzm. 36:9) Keloro, naséhat saka Yéhuwah mesthi bermanfaat. (Yés. 48:17) Dadi, sing paling cocog mènèhi naséhat kanggo para wong tuwa kuwi Yéhuwah.

5. (a) Apa waé sing disedhiakké organisasiné Yéhuwah kanggo para wong tuwa? (b) Saka vidéo ”Diwulang Yéhuwah Carané Ngurus Keluarga”, apa sing isa dipelajari para wong tuwa saka keluarga Sedulur Amorim?

⁵ Liwat Alkitab lan organisasiné, Yéhuwah nyedhiakké tuntunan kanggo wong tuwa bèn isa mbantu anak-anaké sayang karo Yéhuwah. (Mat. 24:45) Misalé, ana sèri artikel ”Bantuan untuk Keluarga” ing majalah Sedarlah! Artikel-artikel kuwi saiki ya ana ing situs wèb jw.org. Terus, ya ana vidéo-vidéo ing jw.org bèn para wong tuwa isa ngerti carané ngetrapké naséhat saka Yéhuwah soal ndhidhik anak. b—WB. 2:4-6.

6. Piyé perasaané Joe merga organisasiné Yéhuwah mènèhi bahan-bahan sing isa mbantu dhèwèké ndhidhik anak-anaké?

⁶ Akèh wong tuwa sing bersyukur merga Yéhuwah wis mènèhi tuntunan liwat organisasiné. Sedulur lanang sing jenengé Joe ngomong, ”Aku nduwé anak telu. Mbantu anak-anakku bèn isa sayang karo Yéhuwah kuwi ora gampang. Aku karo bojoku selalu ndonga njaluk bantuané Yéhuwah. Aku ya ngrasa nèk organisasiné Yéhuwah selalu mènèhi artikel lan vidéo sing cocog karo situasi sing lagi tak adhepi. Aku selalu nggolèk tuntunané Yéhuwah bèn isa ndhidhik anak-anakku.” Joe lan bojoné ngerti nèk kabèh sing disedhiakké organisasiné Yéhuwah isa mbantu anak-anaké cedhak karo Yéhuwah.

7. Kenapa wong tuwa kudu ngupaya mènèhi conto sing apik kanggo anak-anaké? (Roma 2:21)

 ⁷ Saran 2: Mènèhi conto sing apik. Anak-anak biasané nggatèkké lan seneng niru wong tuwané. Mémang, ora ana wong tuwa sing sampurna. (Rm. 3:23) Tapi, wong tuwa kudu ngupaya mènèhi conto sing apik kanggo anak-anaké. (Wacanen Roma 2:21.) Ana sedulur lanang sing wis nduwé anak kandha, ”Anak-anak kuwi kaya spons sing nyerep kabèh sing ana ing sekitaré. Nèk perbuatané awaké dhéwé ora sesuai karo apa sing diajarké, biasané anak-anak bakal ngelokké.” Dadi bèn anak-anak isa sayang karo Yéhuwah, wong tuwa kudu nduduhké sik nèk dhèwèké sayang karo Yéhuwah.

8-9. Apa sing isa dipelajari saka koméntaré Andrew lan Emma?

⁸ Ana akèh cara sing isa diupayakké wong tuwa kanggo mbantu anak-anaké sayang karo Yéhuwah. Sedulur Andrew sing umuré 17 taun kandha, ”Wong tuwaku kerep ngandhani aku nèk ndonga kuwi penting. Saben bengi, bapakku ngejak aku ndonga, meskipun aku wis ndonga dhéwé. Wong tuwaku kerep ngélingké aku nèk aku isa ndonga karo Yéhuwah kapan waé. Merga contoné wong tuwaku kuwi, aku ya nganggep nèk ndonga kuwi penting. Saiki, nèk ana apa-apa, aku langsung ndonga. Aku ya nganggep nèk Yéhuwah kuwi kaya Bapak sing sayang karo aku.” Dadi para wong tuwa, nèk njenengan sayang karo Yéhuwah, anak-anaké njenengan ya isa sayang karo Yéhuwah.

⁹ Gatèkna conto liyané, yaiku pengalamané Sedulur Emma. Bapaké minggat pas Emma isih cilik. Bapaké utangé akèh. Dadi, ibuné sing kudu mbayar. Emma kandha, ”Ibuku kerep ora nduwé dhuwit. Ning, ibuku kerep ngomong nèk Yéhuwah selalu nyukupi kebutuhané umaté. Aku ndelok nèk ibuku percaya tenan karo Yéhuwah. Ibuku ora mung ngajari, ning ya nglakoni.” Apa pelajarané? Wong tuwa kudu mènèhi conto sing apik meskipun keadaané angèl.​—Gal. 6:9.

10. Wong tuwa ing Israèl isa kerep ngobrol karo anaké pas apa waé? (Pangandharing Torèt 6:6, 7)

¹⁰ Saran 3: Kudu kerep ngobrol karo anak-anak. Wektu jaman bangsa Israèl mbiyèn, Yéhuwah mréntahké para wong tuwa bèn mulang anak-anaké soal Yéhuwah ping bola-bali. (Wacanen Pangandharing Torèt 6:6, 7.) Wong-wong kuwi isa kerep nyritakké soal Yéhuwah bèn anak-anaké isa sayang karo Yéhuwah. Misalé nèk pas kerja ing ladhang, para bapak dibantu karo anaké lanang. Terus, para ibu dibantu karo anaké wédok resik-resik omah. Hasilé, wong tuwa isa nduwé akèh wektu karo anak-anaké. Pas kerja bareng, wong tuwa isa luwih kerep ngobrol karo anak-anaké. Misalé soal sipat-sipaté Yéhuwah, lan piyé Yéhuwah wis nggatèkké umaté.

11. Wong tuwa isa ngobrol karo anak-anaké misalé pas apa?

¹¹ Tapi, jaman saiki ora isa kaya ngono. Wong tuwa biasané sibuk kerja, lan anak-anak ya sibuk sekolah. Akibaté, wong tuwa karo anak-anaké ora isa kerep ngobrol. (Éf. 5:15, 16; Flp. 1:10) Ning sakjané, pas ibadah keluarga, wong tuwa isa ngobrol karo anak-anaké. Sedulur Alexander sing umuré 15 taun crita ngéné, ”Bapakku selalu nggawé jadwal kanggo ibadah keluarga. Dhèwèké ya ngomong nèk kabèh kudu mèlu. Terus nèk ana kegiatan liyané, kuwi kudu ditunda merga ana ibadah keluarga. Bar ibadah keluarga, biasané aku karo bapak ibuku crita-crita soal apa waé.”

12. Pas ibadah keluarga, wong tuwa ora éntuk piyé?

¹² Piyé carané bèn anak-anaké njenengan  seneng pas mèlu ibadah keluarga? Biasané, anak-anak luwih seneng nèk isa dijak rembugan pas ibadah keluarga. Dadi, njenengan sak keluarga mungkin isa sinau Alkitab bareng nganggo buku Bahagia Saklawasé. Buku kuwi dirancang bèn isa dienggo rembugan bareng. Dadi nèk ibadah keluargané nganggo buku kuwi, anak-anaké njenengan isa nyampèkké pendapaté lan nyritakké perasaané. Tapi, aja nganti ibadah keluarga dienggo nyenèni anak-anak. Nèk anak-anak mènèhi pendapat sing ora sesuai karo pathokané Alkitab, aja langsung nyalahké. Njenengan kuduné malah seneng, merga anak-anak isa leluasa nyampèkké pendapaté. Nèk wis ngerti apa sing dipikirké anak-anak, njenengan mesthi bakal luwih gampang mbantu anak-anak, ta?

13. Apa wong tuwa isa nyritakké soal Yéhuwah karo anak-anaké nèk mung pas ibadah keluarga utawa sinau Alkitab thok? Jelasna.

¹³ Sakjané, wong tuwa isa nyritakké soal Yéhuwah karo anak-anaké kapan waé, meskipun ora lagi sinau Alkitab utawa ibadah keluarga. Gatèkna pengalamané Sedulur Lisa. Dhèwèké ngomong ngéné, ”Aku karo bojoku isa nyritakké soal Yéhuwah karo anak-anakku ora mung pas sinau Alkitab thok. Misalé, aku kan nduwé kirik ing omah. Anak-anakku seneng pas ndelok tingkahé kiriké sing lucu. Terus, aku ngomong karo anak-anakku nèk iki bukti nèk Yéhuwah kuwi Gusti Allah sing bahagia. Dhèwèké ya péngin awaké dhéwé bahagia.”

14. Kenapa wong tuwa kudu mbantu anak-anaké milih kanca sing apik? (Wulang Bebasan 13:20)

¹⁴ Saran 4: Mbantu anak-anak milih kanca sing apik. Ing Alkitab disebutké nèk kanca kuwi pengaruhé gedhé kanggo awaké dhéwé, ora soal kuwi apik utawa èlèk. (Wacanen Wulang Bebasan 13:20.) Nèk njenengan wis nduwé anak, apa njenengan ngerti sapa waé kanca-kancané anaké njenengan? Apa njenengan ya kenal lan wis tau ngobrol karo kanca-kancané anaké njenengan? Piyé bèn anak-anaké njenengan isa nduwé kanca sing apik sing sayang karo Yéhuwah? (1 Kor. 15:33) Salah siji carané, njenengan isa ngejak sedulur-sedulur sing nduwé sipat-sipat sing apik bèn dolan lan bergaul karo anak-anaké njenengan.​—Mzm. 119:63.

15. Piyé carané wong tuwa isa mbantu anak-anaké bèn nduwé kanca sing apik?

 ¹⁵ Sedulur lanang sing jenengé Tony nyritakké pengalamané wektu mbantu anak-anaké milih kanca sing apik. Dhèwèké ngomong ngéné, ”Aku karo bojoku kerep ngundang sedulur-sedulur sing umuré lan asalé béda-béda. Biasané, sedulur-sedulur kuwi tak ajak mèlu ibadah keluarga lan mangan bareng ing omahku. Hasilé, aku karo anak-anakku dadi luwih kenal karo sedulur-sedulur kuwi. Terus, ya ana pinituwa wilayah lan utusan injil sing nginep ing omahku. Pas ngobrol bareng, kétok nèk sedulur-sedulur kuwi semangat banget lan gelem berkorban kanggo nglayani Yéhuwah. Sedulur-sedulur kuwi dadi conto sing apik kanggo anak-anakku.” Apa kesimpulané? Wong tuwa kudu bener-bener ngupaya bèn anak-anaké isa nduwé kanca sing apik.

16. Piyé nèk anaké njenengan ora gelem nglayani Yéhuwah?

¹⁶ Piyé nèk njenengan wis ngupaya tenanan, tapi akhiré anaké njenengan ora gelem nglayani Yéhuwah? Aja mikir nèk njenengan wis gagal ndhidhik anaké njenengan. Malah, Yéhuwah ora tau meksa wong bèn nglayani Dhèwèké. Nèk anaké njenengan ora gelem nglayani Yéhuwah, njenengan tetep isa berharap nèk sukmbèn dhèwèké mungkin bakal gelem nglayani Yéhuwah. Njenengan ya isa mikirké perumpamaané Yésus soal anak sing ilang. (Luk. 15:11-19, 22-24) Ing perumpamaan kuwi dicritakké nèk anak sing keloro lunga saka omahé bapaké lan urip sak karepé dhéwé. Tapi akhiré, dhèwèké gelem bali ing omahé bapaké. Mungkin ana sing ngomong, ”Tapi kuwi kan mung perumpamaan. Mosok ya ana tenan sing kaya ngono?” Sakjané ya ana tenan. Gatèkna pengalamané Elie Khalil.

17. Apa sing isa dipelajari saka kisahé Sedulur Khalil?

¹⁷ Sedulur Khalil nyritakké pengalamané. Kèt cilik, dhèwèké wis diajari Alkitab karo wong tuwané. Tapi pas remaja, dhèwèké mulai akrab karo kanca-kancané sing dudu Seksi Yéhuwah, lan tingkah lakuné ya ora nggenah. Awalé, wong tuwané mémang ora ngerti. Tapi pas ngerti nèk Khalil ora gelem nglayani Yéhuwah,  wong tuwané ngupaya mbantu Khalil bèn isa berubah. Meskipun wong tuwané wis mbantu, Khalil tetep ora gelem manut. Bar kuwi, Khalil metu saka omah. Terus, Khalil mulai nganggo narkoba, mèlu pésta-pésta, lan sèks bébas. Meskipun uripé ora nggenah, tapi Khalil kadhang isih ngobrol-ngobrol soal Alkitab karo kancané. Khalil ngomong, ”Nèk bar ngomongké soal Alkitab, biasané aku dadi mikirké soal Yéhuwah. Aku kèlingan manèh sing diajarké wong tuwaku mbiyèn. Suwé-suwé, aku sadhar nèk kudu berubah.” Akhiré, dhèwèké gelem sinau Alkitab manèh lan dibaptis. c Bayangna perasaané wong tuwané Sedulur Khalil. Bapak ibuné mesthi seneng banget merga Sedulur Khalil akhiré gelem nglayani Yéhuwah.​—2 Tim. 3:14, 15.

18. Piyé perasaané njenengan karo para wong tuwa sing wis ngupaya tenanan mbantu anak-anaké bèn sayang karo Yéhuwah?

¹⁸ Para wong tuwa nduwé tugas istiméwa yaiku mbantu anak-anaké bèn gelem nglayani Yéhuwah. (Mzm. 78:4-6) Mémang, kuwi ora gampang. Tapi, Yéhuwah lan sedulur-sedulur menghargai upayané njenengan. Upayané njenengan kanggo mbantu anak-anak bèn sayang karo Yéhuwah lan ndhidhik anak-anak sesuai pathokan lan petunjuké Yéhuwah mesthi nggawé Yéhuwah seneng.—Éf. 6:4.