Wektu ngalami masalah, awaké dhéwé mesthi péngin ana kanca sing mbantu. Akèh wong nganggep Gusti Allah kuwi dudu kanca sing apik merga ngrasa nèk Gusti Allah ora mbantu manungsa. Padahal, wis akèh banget sing dilakukan Gusti Allah kanggo manungsa. Gusti Allah ya ora bakal meneng waé ndelok manungsa menderita. Apa sing bakal dilakukan Gusti Allah?

Kabèh kejahatan bakal ora ana manèh nèk sumberé wis disingkirké. Sapa sumberé? Ing Alkitab disebutké, ”Donya iki dikuwasani Sétan.” (1 Yohanes 5:19) Yésus nyebut Sétan kuwi ”penguasa donya iki”. (Yohanes 12:31) Dadi, Sétan sing nggawé manungsa ngalami kesusahan. Apa sing bakal dilakukan Gusti Allah?

Ora suwé manèh, Yéhuwah ngongkon Anaké, yaiku Yésus Kristus, kanggo ’nyingkirké Iblis’. (Ibrani 2:14; 1 Yohanes 3:8) Ing Alkitab disebutké nèk Sétan ngerti ”wektuné mung tinggal sedhéla” merga dhèwèké bakal disingkirké. (Wahyu 12:12) Yéhuwah ya bakal nyingkirké wong-wong sing jahat.​—Mazmur 37:9; Wulang Bebasan 2:22.

Sakwisé nyingkirké kabèh sing jahat, Yéhuwah bakal nggawé bumi dadi firdaus lan manungsa bakal urip saklawasé ing kono. Mengko keadaané bakal piyé?

Aman lan tentrem sakterusé. ”Wong sing wataké alus bakal terus manggon ing bumi. Wong-wong kuwi bakal seneng merga ngrasa ayem banget.”​—Mazmur 37:11.

Akèh panganan sing bergizi. ”Bakal ana akèh pangan ing bumi nganti tekan puncak pegunungan.”​—Mazmur 72:16.

Saben wong bakal nduwé omah sing nyaman lan gawéan sing nyenengké. ”Wong bakal mbangun omah lan manggon ing kono. Wong bakal nggawé kebon anggur lan mangan buahé. . . . Wong-wong sing Tak pilih bakal ngrasa puas merga hasil kerja kerasé.”​—Yésaya 65:21, 22.

Apa njenengan péngin ngrasakké kuwi kabèh? Ora suwé manèh kuwi bakal kelakon ing bumi.

Kabèh wong isa lara lan mati. Tapi, Yéhuwah janji nèk ora suwé manèh ”saben wong sing nduduhké iman” karo Yésus bakal ngrasakké manfaat saka korban tebusané Yésus. (Yohanes 3:16) Apa waé manfaaté?

Penyakit bakal disingkirké. ”Wong-wong sing manggon ing tanah kuwi ora bakal ngomong, ’Aku lara.’ Wong-wong sing manggon ing kono bakal diapura kesalahané.”​—Yésaya 33:24.

Kematian ora bakal ana manèh. ”Dhèwèké bakal nyingkirké kematian saklawasé. Gusti Yéhuwah sing Mahakuwasa bakal ngusapi air matané kabèh wong.”​—Yésaya 25:8.

Manungsa bakal urip saklawasé. ”Hadiahé Gusti Allah kuwi urip saklawasé liwat Kristus Yésus Gustiné awaké dhéwé.”​—Roma 6:23.

Wong mati bakal urip manèh. Wong mati ya bakal éntuk manfaat saka korban tebusané Yésus. Ing Alkitab ditulis, ”Gusti Allah bakal nguripké manèh wong-wong sing bener lan sing ora bener.”​—Kisah 24:15.

Bèn kuwi kabèh kelakon, apa sing dilakukan Gusti Allah?

Gusti Allah bakal nggunakké pamréntahan ing swarga sing dipimpin Yésus Kristus bèn manungsa isa urip saklawasé ing bumi firdaus. (Mazmur 110:1, 2) Wektu mulang para muridé soal donga, Yésus ngongkon para muridé ndongakké pamréntahan, utawa kerajaan iki. Yésus kandha, ”Bapakku sing ana ing swarga, . . . muga-muga Kerajaan-Mu teka.”​—Matius 6:9, 10.

Kerajaané Gusti Allah bakal nguwasani bumi lan nyingkirké kabèh kesusahan. Iki bakal dadi pamréntahan sing sampurna kanggo manungsa. Mula, wektu ing bumi, Yésus ngupaya tenanan kanggo martakké ”kabar apik soal Kerajaané Gusti Allah”. Yésus ya ngongkon para muridé kanggo martakké kuwi.​—Matius 4:23; 24:14.

Merga sayang banget karo manungsa, Yéhuwah bakal nepati kabèh sing wis dijanjèkké. Kuwi mesthi nggawé awaké dhéwé péngin kenal lan luwih akrab karo Yéhuwah. Terus, apa manfaaté kanggo awaké dhéwé? Kuwi bakal dirembug ing artikel berikuté.