YÉSUS kandha ing Matéus 13:24-26, ”Kratoning Swarga iku umpamané kaya wong kang nyebar wiji becik ing pategalané. Nanging nalika wong-wong padha turu kabèh, satruné teka nyebar wiji alang-alang ing tengahé gandum banjur lunga. Bareng gandumé thukul lan wiwit metu wewulèné, alang-alangé iya katon.” Ana penulis sing ora yakin nèk gambaran iki bener-bener nyata, ning miturut cathetan kuna wong Roma, kedadéan kaya ngono kuwi ana tenan.

Salah siji kamus Alkitab kandha, nèk nurut hukum Roma nandur alang-alang ing ladhangé wong liya kanggo mbales dendam kuwi tumindak sing salah. Nèk nganti ana hukum kuwi tegesé kahanan kaya ngono wis tau kelakon. Ahli hukum sing jenengé Alastair Kerr kandha nèk ing taun 533 M, Kaisar Roma Yustinianus ngetokké buku Digest. Buku kuwi isiné ringkesan hukum Roma lan cuplikan saka para ahli hukum taun 100-250 M. Nurut buku Digest, salah siji ahli hukum sing jenengé Ulpian nerangké kahanan sing ana ing abad kepindho. Alang-alang sing ditandur nèng ladhangé wong liya marahi panènan rusak. Wong tani sing dadi kurban tumindak jahat kuwi isa éntuk ganti rugi sing wujudé dhuwit kanggo ngijoli panènan sing rusak.

Dadi, kahanan sing disebutké Yésus mau bener-bener nyata, merga kedadéan kaya ngono wis tau ana ing Kraton Roma kuna.