1, 2. (a) Tugas penting apa sing ditampa Salomo? (b) Apa sebabé Dawud nguwatirké Salomo?

YÉHUWAH wis milih Salomo kanggo tugas sing istiméwa lan penting banget, yaiku ngawasi pembangunan bait ing Yérusalèm. Bait kuwi ”gedhéné kudu ngleluwihi” lan bakal dadi kondhang merga saking éndahé. Sing luwih penting manèh, bait kuwi bakal dadi ”padalemaning Pangéran Yéhuwah, Gusti Allah kita”.​—1 Bb. 22:1, 5, 9-11.

² Raja Dawud yakin nèk Yéhuwah mesthi bakal ndhukung Salomo. Ning, Salomo ”isih timur [enom] lan pengalamané kurang”. Apa Salomo wani nampa tugas kuwi? Utawa, malah ora gelem merga isih enom lan kurang pengalaman? Bèn isa suksès, Salomo kudu kendel lan tumindak.

3. Apa sing isa Salomo sinaoni bab sipat kendel saka bapaké?

³ Salomo mesthi wis akèh sinau bab sipat kendel saka bapaké, yaiku Dawud. Wektu isih enom, Dawud wis tau nglawan kéwan buwas sing arep nyerang wedhusé bapaké. (1 Sa. 17:34, 35) Dawud uga kendel banget wektu nglawan Goliat, tentara raksasa sing kuwat lan medèni. Dawud isa  ngalahké Goliat nganggo watu merga bantuané Yéhuwah.​—1 Sa. 17:45, 49, 50.

4. Apa sebabé Salomo kudu dadi kendel?

⁴ Dawud kuwi pancèn wong sing cocog kanggo nyemangati Salomo bèn dadi kendel lan mulai mbangun bait. (Wacanen 1 Babad 28:20. *) Nèk wis wedi dhisik, Salomo isa dadi gagal, utawa malah ora gelem mulai nggarap proyèk kuwi.

5. Apa sebabé kita kudu kendel?

⁵ Kaya Salomo, kita butuh bantuané Yéhuwah bèn dadi kendel lan nindakké tugas saka Yéhuwah. Ayo saiki ngrembug tuladha saka para abdiné Yéhuwah sing kendel ing jaman mbiyèn. Banjur, kita isa mikirké carané bèn dadi kendel lan nindakké tugas.

6. Apa sing isa kita sinaoni saka sipat kendelé Yusuf?

⁶ Yusuf kendel nolak godhaan saka bojoné Potifar kanggo nindakké hubungan sèks sing bejat. Yusuf mesthi ngerti nèk dhèwèké isa waé dipatèni nèk nolak juragané. Ning, Yusuf tanpa wedi langsung nolak godhaan kuwi.​—Pd. 39:10, 12.

7. Apa buktiné nèk Rahab kuwi kendel? (Deloken gambar ing kaca 27.)

⁷ Tuladha liyané yaiku Rahab saka kutha Yérikho. Wektu mata-mata Israèl mara ing omahé, Rahab isa waé dadi wedi lan ora gelem nampa wong-wong kuwi. Ning, Rahab percaya marang Yéhuwah. Rahab tanpa wedi mbantu wong loro kuwi bèn isa ndhelik lan lunga saka kono tanpa gangguan. (Ys. 2:4, 5, 9, 12-16) Rahab percaya nèk Yéhuwah kuwi Gusti Allah sing bener, lan yakin nèk Yéhuwah mesthi bakal maringké dhaérah kuwi kanggo bangsa Israèl. Rahab ora wedi marang wong liya, klebu marang rajané kutha Yérikho lan para prajurité. Rahab lan keluargané isa slamet merga tumindaké sing kendel.​—Ys. 6:22, 23.

8. Apa pengaruhé sipat kendelé Yésus marang para rasulé?

⁸ Para rasulé Yésus sing setya uga isa kendel banget merga niru Yésus. (Mt. 8:28-32; Yo. 2:13-17; 18:3-5) Para rasul kuwi ora nyerah wektu dialang-alangi karo wong-wong Saduki bèn ora mulang bab Yésus.​—PR. 5:17, 18, 27-29.

9. Nurut 2 Timotéus 1:7, sipat kendel kuwi asalé saka ngendi?

⁹ Yusuf, Rahab, Yésus, lan para rasul nduwé tékad kanggo nindakké sing bener. Wong-wong kuwi isa kendel dudu merga kemampuané dhéwé, ning merga ngendelké Yéhuwah. Dadi, bèn isa  kendel, kita uga kudu ngendelké Yéhuwah. (Wacanen 2 Timotéus 1:7.) Ayo ngrembug carané bèn isa kendel ing keluarga lan ing jemaat.

10. Apa sebabé cah-cah enom kudu kendel?

¹⁰ Cah-cah enom Kristen uga kudu kendel wektu ngabdi marang Yéhuwah. Cah-cah enom isa sinau lan niru tuladhané Salomo, sing kendel nggawé keputusan sing wicaksana kanggo ngrampungké pembangunan bait. Cah-cah enom pancèn isih kudu diarahké karo wong tuwané, ning ana keputusan-keputusan penting sing kudu digawé dhéwé. (WB. 27:11) Contoné, cah enom kudu kendel wektu nggawé keputusan sing wicaksana bab milih kanca lan hiburan, carané njaga moralé bèn tetep apik, sarta kapan arep dibaptis. Cah-cah enom kudu kendel merga kudu nglawan Sétan, sing ngèlèk-èlèk Gusti Allah lan pathokané.

11, 12. (a) Apa buktiné nèk Musa kendel? (b) Piyé carané cah-cah enom isa niru tuladhané Musa?

¹¹ Salah siji keputusan penting sing kudu digawé karo cah enom yaiku bab cita-citané. Ing akèh negara, cah-cah enom biyasané dikon sekolah sak dhuwur-dhuwuré bèn isa éntuk gawéan sing gajiné gedhé. Ing negara-negara sing ngalami kasusahan ékonomi, akèh cah enom rumangsa kudu nyambut gawe mempeng kanggo mbantu keluargané. Nèk kowé ngalami kahanan sing kaya ngono, pikirna tuladhané Musa. Musa digedhèkké karo putriné Firaun lan nduwé kesempatan kanggo dadi panguwasa utawa wong sugih. Keluarga kerajaan Mesir, para guru, lan para penaséhat kerajaan mesthi bola-bali meksa Musa bèn ngoyak cita-cita kuwi. Ning, Musa tetep kendel lan pilih dadi abdiné Yéhuwah. Sakwisé ninggalké Mesir lan kabèh bandhané, Musa bener-bener ngendelké Yéhuwah. (Ib. 11:24-26) Asilé, Musa wis ngrasakké akèh berkah saka Yéhuwah, lan sukmbèn Yéhuwah uga bakal maringi berkah sing luwih akèh manèh.

¹² Cah-cah enom isa niru tuladhané Musa. Nèk kowé tanpa wedi mutuské kanggo ngabdi marang Yéhuwah lan ngutamakké Kratoné Allah, Yéhuwah mesthi bakal mberkahi lan nyukupi kebutuhanmu sarta keluargamu. Tirunen uga tuladhané Timotéus, cah enom saka abad kapisan, sing ngutamakké ngabdi marang Yéhuwah. * (Deloken katrangan ing ngisor.)—Wacanen Filipi 2:19-22.

13. Critakna pengalamané sedulur wédok sing isa mujudké cita-citané merga nduwé sipat kendel.

¹³ Ana sedulur wédok ing Alabama, AS, sing kudu kendel wektu netepké cita-cita rohani. Dhèwèké crita, ”Kèt cilik, aku iki isinan. Arep omong-omongan karo para sedulur ing Balé Ibadah waé angèl, apa manèh nèk kudu ndhodhogi omahé wong-wong sing ora tak kenal.” Ning, akiré sedulur wédok kuwi isa dadi perintis biasa merga bantuan saka wong tuwané lan  para sedulur ing jemaat. Dhèwèké kandha, ”Donyané Sétan nggembar-nggemborké cita-cita kanggo sekolah dhuwur, dadi terkenal, lan nduwé akèh bandha.” Ning, dhèwèké uga sadhar nèk ora kabèh wong isa mujudké cita-cita kuwi lan kuwi malah mung marahi strès lan susah. Dhèwèké uga kandha, ”Kosok baliné, ngabdi marang Yéhuwah kuwi bener-bener isa nggawé bungah lan puas.”

14. Ing kahanan apa waé para wong tuwa kudu kendel?

¹⁴ Para wong tuwa Kristen uga kudu kendel. Contoné, mbokmenawa panjenengan kudu kendel nolak wektu dikongkon lembur ing dina-dina sing kuduné digunakké kanggo ibadah keluarga, nginjil, lan ngibadah. Kuwi isa dadi tuladha kanggo anak panjenengan. Utawa, mbokmenawa panjenengan wis nggawé aturan kanggo anak panjenengan, ning ana wong tuwa liyané ing jemaat sing ora setuju karo aturan kuwi. Panjenengan kudu kendel lan isa njelaské nganggo cara sing ngajèni wektu ditakoni alesané.

15. Apa sing isa disinaoni para wong tuwa saka Jabur 37:25 lan Ibrani 13:5?

¹⁵ Para wong tuwa uga kudu kendel bèn isa mbantu anak-anaké mujudké cita-cita rohaniné. Contoné, mbokmenawa ana sing wedi ndhukung anak-anaké bèn dadi perintis, ngabdi ing Bètel, ing dhaérah sing mbutuhké luwih akèh penginjil, utawa ing pembangunan Balé Ibadah lan Kebaktian. Wong tuwa  isa waé wedi nèk anak-anaké sukmbèn ora isa nyukupi kebutuhané dhéwé utawa ngopèni wong tuwané sing wis tuwa. Ning, wong tuwa sing wicaksana mesthi yakin nèk Yéhuwah bakal netepi janjiné. (Wacanen Jabur 37:25; Ibrani 13:5.) Wong tuwa sing kendel lan percaya karo Yéhuwah kaya ngono kuwi isa dadi tuladha kanggo anak-anaké.​—1 Sa. 1:27, 28; 2 Tm. 3:14, 15.

16. Critakna pengalamané para wong tuwa sing wis isa mbantu anak-anaké netepké cita-cita rohani. Apa paédahé kanggo anak-anaké?

¹⁶ Ana wong lanang saka Amerika Serikat karo bojoné sing mbantu anak-anaké bèn ngutamakké ngabdi marang Yéhuwah. Dhèwèké kandha, ”Sakdurungé anak-anak isa mlaku lan ngomong, aku lan bojoku kerep nyritakké bab senengé dadi perintis lan ngabdi ing jemaat. Saiki, kuwi sing dadi cita-citané anak-anakku.” Dhèwèké uga kandha nèk anak-anaké isa nglawan godhaan saka Sétan lan ngutamakké ngabdi marang Yéhuwah merga wis netepké cita-cita rohani lan ngupaya mujudké kuwi. Ana sedulur lanang sing nduwé anak loro kandha, ”Akèh wong tuwa ngupaya kanggo ngragadi anak-anaké bèn isa mujudké cita-citané ing bidang olahraga, hobi, lan pendidikan. Ning, sakjané luwih apik nèk ngupaya ndhukung anak-anaké bèn isa mujudké cita-cita rohani sing isa mbantu anak-anak bèn tetep cedhak karo Yéhuwah. Para wong tuwa mesthi seneng banget nèk ndelok anak-anaké isa mujudké cita-cita rohaniné, utawa malah isa nindakké kuwi bareng-bareng sak keluarga.” Panjenengan isa yakin nèk para wong tuwa sing nindakké kuwi mesthi bakal diberkahi.

17. Wènèhana conto sipat kendel ing jemaat.

¹⁷ Kita uga kudu nduduhké sipat kendel ing jemaat. Contoné, para pinituwa kudu kendel wektu nangani sedulur sing nindakké dosa serius utawa wektu mbantu sing lara parah lan ngalami kahanan sing darurat. Ana pinituwa sing kudu mulang Alkitab utawa mandhu pakumpulan ibadah ing penjara. Sakliyané kuwi, para sedulur wédok sing ora nduwé bojo uga isa nduwé akèh kesempatan kanggo nduduhké sipat kendel lan ngabdi marang Yéhuwah. Para sedulur kuwi isa dadi perintis, pindhah menyang dhaérah sing mbutuhké luwih akèh penginjil, ngéwangi bagéan Rancang/Bangun Setempat, lan isa ndaftar mèlu Sekolah kanggo Penginjilé Kratoné Allah. Malah ana uga sing diundang mèlu Sekolah Giléad.

18. Piyé para sedulur wédok sing luwih tuwa isa nduduhké sipat kendel?

¹⁸ Kita nresnani lan ngajèni para sedulur wédok sing luwih tuwa ing jemaat. Para sedulur kuwi isih kendel lan semangat ngabdi marang Yéhuwah, senajan mbokmenawa wis ora isa tumindak akèh kaya mbiyèné. (Wacanen Titus 2:3-5.) Contoné, sedulur wédok sing wis tuwa perlu dadi kendel wektu dijaluki tulung karo para pinituwa kanggo ngandhani sedulur wédok sing luwih enom bab sandhangan sing prasaja. Sedulur sing wis tuwa kuwi kudu ngandhani nganggo cara sing alus bèn isa mbantu sing luwih  enom mikirké pengaruh saka pilihané marang wong liya. (1 Tm. 2:9, 10) Nèk nduduhké katresnan nganggo cara sing kaya ngono, para sedulur wédok sing luwih tuwa kuwi isa nguwatké jemaat.

19. (a) Piyé carané para sedulur lanang sing wis dibaptis isa nduduhké sipat kendel? (b) Piyé Filipi 2:13 lan 4:13 isa mbantu para sedulur lanang bèn dadi kendel?

¹⁹ Para sedulur lanang sing wis dibaptis uga perlu kendel lan nindakké tugasé. Semangaté para sedulur sing lila ngabdi dadi abdiné jemaat lan pinituwa kuwi isa migunani kanggo jemaat. (1 Tm. 3:1) Ning, mbokmenawa ana sing rumangsa ora pantes dadi abdiné jemaat utawa pinituwa merga mbiyèn wis tau nggawé kesalahan, utawa rumangsa ora mampu nindakké tugas. Nèk panjenengan rumangsa kaya ngono, Yéhuwah isa mbantu bèn dadi kendel. (Wacanen Filipi 2:13; 4:13.) Élinga contoné Musa sing wis tau rumangsa ora sanggup nindakké tugas saka Yéhuwah. (Pa. 3:11) Ning, Yéhuwah mbantu Musa bèn dadi kendel lan nindakké tugasé. Piyé carané bèn para sedulur lanang sing wis dibaptis isa dadi kendel? Para sedulur kuwi isa ndonga njaluk bantuané Yéhuwah lan ajeg maca Alkitab. Dhèwèké isa ngrenungké conto saka wong-wong ing Alkitab sing nduduhké sipat kendel. Dhèwèké uga isa kanthi andhap asor njaluk bèn dilatih karo para pinituwa lan siap mbantu jemaat. Dadi, kabèh sedulur lanang sing wis dibaptis kudu kendel lan ngupaya tumindak luwih akèh ing jemaat.

20, 21. (a) Dawud ngélingké Salomo bab apa? (b) Kita isa yakin bab apa?

²⁰ Raja Dawud ngélingké Salomo nèk Yéhuwah bakal nulungi nganti Salomo ngrampungké pembangunan bait. (1 Bb. 28:20) Salomo mesthi mikirké tenanan pangéling-éling kuwi. Salomo kendel lan tumindak kanggo ngrampungké tugas kuwi senajan isih enom lan kurang pengalaman. Salomo isa ngrampungké bait sing megah kuwi saksuwéné pitung taun setengah merga bantuané Yéhuwah.

²¹ Yéhuwah isa mbantu kita bèn dadi kendel lan ngrampungké tugas ing keluarga lan ing jemaat, kayadéné Yéhuwah wis mbantu Salomo mbiyèn. (Yé. 41:10, 13) Mula, ”dadia kendel . . . lan tumindaka”. Yéhuwah mesthi bakal mberkahi kita saiki lan sukmbèn.