1. Apa pengaruhé ceramah sing disampèkké ing kebaktian taun 1935 kanggo salah siji sedulur?

MBIYÈN, Seksi-Seksi Yéhuwah kuwi disebut Siswa-Siswa Alkitab. Pas kuwi, ana suami istri sing dadi Siswa Alkitab sing nduwé anak lanang telu lan anak wédok loro. Suami istri kuwi ndhidhik anak-anaké kanggo nglayani Yéhuwah lan dadi muridé Yésus. Salah siji anak lanangé dibaptis ing taun 1926 pas umuré 18 taun. Kaya kebiasaané Siswa Alkitab wektu kuwi, dhèwèké ya mèlu mangan roti lan ngombé anggur ing acara Pèngetan. Ning, merga ngrungokké ceramah sing judhulé ”Kumpulan Gedhé”, dhèwèké dadi ngerti nèk dhèwèké ora bakal munggah swarga. Ceramah kuwi disampèkké karo Sedulur J. F. Rutherford ing kebaktian sing dianakké ing Washington, D.C., Amerika Serikat taun 1935. Apa sing disampèkké ing ceramah kuwi?

2. Katrangan anyar apa sing disampèkké Sedulur Rutherford ing ceramahé?

² Ing ceramahé, Sedulur Rutherford njelaské sapa sakjané sing dimaksud ”kumpulan gedhé” sing disebutké ing Wahyu 7:9. Sakdurungé taun 1935, Siswa-siswa Alkitab nganggep nèk kumpulan gedhé kuwi wong-wong sing bakal munggah swarga, ning ora bener-bener manut karo Yéhuwah. Sedulur Rutherford nggunakké Alkitab kanggo njelaské nèk kumpulan gedhé kuwi dudu wong-wong sing dipilih munggah swarga, ning wong Kristen sing dadi bagéan saka domba-domba liyané * sing bakal slamet ngliwati ”sengsara  gedhé” lan urip saklawasé ing bumi. (Why. 7:14) Yésus kandha, ”Aku ya nduwé domba-domba liyané sing dudu saka kandhang iki. Domba-domba kuwi ya kudu tak klumpukké. Domba-domba kuwi bakal ngrungokké swaraku. Kabèh domba kuwi bakal dadi sak kelompok, lan gembalané mung siji.” (Yoh. 10:16) Wong-wong sing digambarké kaya domba iki maksudé umaté Yéhuwah sing nduwé harapan urip saklawasé ing bumi firdaus. (Mat. 25:31-33, 46) Saiki, ayo dirembug apa pengaruhé katrangan anyar sing disampèkké Sedulur Rutherford mau kanggo umaté Yéhuwah sing mauné percaya nèk bakal munggah swarga, termasuk sedulur lanang mau.​—Mzm. 97:11; WB. 4:18.

3-4. Ing kebaktian taun 1935, akèh sedulur ngerti soal apa, lan apa sebabé?

³ Ing kebaktian kuwi, ana peristiwa sing luar biasa. Pas ceramah, Sedulur Rutherford kandha, ”Sapa waé sing nduwé harapan urip saklawasé ing bumi, mangga ngadeg.” Sing teka ing kebaktian kuwi kira-kira ana 20.000. Salah siji sedulur lanang sing teka ing kebaktian kuwi kandha nèk ana luwih saka separoné hadirin kebaktian kuwi sing ngadeg. Terus, Sedulur Rutherford kandha, ”Deloken! Iki kumpulan gedhé!” Bar kuwi, kabèh hadirin padha sorak-sorak merga seneng. Para sedulur sing ngadeg kuwi ngerti nèk ora dipilih munggah swarga merga sadhar nèk ora dilantik nganggo roh suci. Sésuké, ana 840 sing dibaptis, lan akèh-akèhé nduwé harapan urip ing bumi.

⁴ Sakwisé ngrungokké ceramah kuwi, akèh sedulur ora mangan roti lan ngombé anggur manèh pas acara Pèngetan, termasuk sedulur lanang sing disebutké ing paragraf siji mau. Akèh sedulur ngrasa kaya salah siji sedulur sing kandha, ”Terakhir aku mèlu mangan roti lan ngombé anggur ing acara Pèngetan kuwi pas taun 1935. Aku ngerti nèk Yéhuwah ora milih aku bèn urip ing swarga. Harapanku kuwi urip ing bumi lan bakal mèlu nggawé bumi dadi firdaus.” (Rm. 8:16, 17; 2 Kor. 1:21, 22) Sakwisé kuwi, jumlahé kumpulan gedhé dadi saya akèh lan wong-wong kuwi ndhukung gawéané sedulur-sedulur sing dipilih munggah swarga sing isih urip ing bumi.

5. Piyé pandangané Yéhuwah marang para sedulur sing ora mangan roti lan ngombé anggur manèh ing Pèngetan?

⁵ Piyé pandangané Yéhuwah marang para sedulur sing sakwisé taun 1935 ora mangan roti lan ngombé anggur manèh ing Pèngetan? Terus, piyé nèk ana Seksi Yéhuwah sing mauné nganggep nèk dhèwèké kudu mangan roti lan ngombé anggur pas acara Pèngetan, ning akhiré sadhar nèk ora dilantik nganggo roh suci? (1 Kor. 11:28) Pancèn, ana sedulur-sedulur sing ngira nèk dhèwèké dipilih munggah swarga, padahal sakjané ora. Ning, nèk para sedulur kuwi sadhar nèk kuwi salah, ora mangan roti lan ngombé anggur manèh pas Pèngetan, lan terus nglayani Yéhuwah, Yéhuwah bakal nganggep nèk sedulur-sedulur kuwi pantes dadi bagéan saka domba-domba liyané. Senajan ora mangan roti lan ngombé anggur manèh, sedulur-sedulur kuwi tetep teka ing acara Pèngetan merga bersyukur kanggo pengorbanané Yéhuwah lan Yésus.

6. Yésus mréntahké malaékat papat nindakké apa?

⁶ Sengsara gedhé sedhéla manèh bakal kelakon. Mula, awaké dhéwé bakal dikuwatké nèk ngrembug Wahyu bab 7 sing nyebutké soal wong Kristen sing dipilih munggah  swarga lan kumpulan gedhé. Ing kono disebutké nèk Yésus mréntahké malaékat papat nahan angin papat sing ngrusak bumi nganti kabèh wong Kristen sing dipilih munggah swarga nampa meterai, maksudé dianggep setya karo Yéhuwah. (Why. 7:1-4) Merga wis setya, wong 144.000 sing dipilih munggah swarga kuwi akhiré dadi imam lan raja bareng karo Yésus. (Why. 20:6) Pas kuwi kelakon, Yéhuwah, Yésus, lan para malaékat bakal seneng banget.

7. Nurut Wahyu 7:9, 10, critakna apa sing didelok Yohanes. (Deloken gambar ing halaman 1.)

⁷ Sakwisé nyritakké soal wong 144.000 sing wis dadi raja lan imam, Yohanes kandha nèk ana ”kumpulan gedhé wong akèh” sing slamet ngliwati Armagédon. Wong-wong kuwi jumlahé luwih akèh timbang wong-wong sing dadi raja lan imam, lan awaké dhéwé ya ora ngerti jumlah pastiné pira. (Wacanen Wahyu 7:9, 10.) Wong-wong kuwi nganggo ”jubah putih”, maksudé wong-wong kuwi ”ngedohi tumindak sing najis” saka donyané Sétan lan tetep setya marang Gusti Allah lan Yésus. (Yak. 1:27) Nganggo swara banter, wong-wong kuwi kandha nèk isa slamet merga Gusti Allah lan Anak Domba, yaiku Yésus. Wong-wong kuwi ya nggawa cabang-cabangé wit palem, maksudé wong-wong kuwi ngakoni nèk Yésus kuwi raja sing dilantik Yéhuwah.​—Bandhingna karo Yohanes 12:12, 13.

8. Apa sing dicritakké ing Wahyu 7:11, 12 soal kabèh sing ana ing swarga?

⁸ Wacanen Wahyu 7:11, 12. Ing wahyu sing ditampa Yohanes, kabèh sing ana ing swarga ngrasa seneng lan muji Gusti Allah wektu ndelok kumpulan gedhé. Wahyu kuwi kelakon pas kumpulan gedhé slamet ngliwati sengsara gedhé. Wektu kuwi, kabèh sing ana ing swarga bakal ngrasa seneng banget.

9. Nurut Wahyu 7:13-15, apa sing ditindakké kumpulan gedhé?

⁹ Wacanen Wahyu 7:13-15. Yohanes kandha nèk kumpulan gedhé kuwi wis ”ngumbah lan nggawé putih jubahé nganggo getihé anak Domba”. Iki nggambarké nèk wong-wong kuwi nduwé hati nurani sing apik lan wis nggawé Yéhuwah seneng. (Yés. 1:18) Kumpulan gedhé kuwi isiné wong Kristen sing wis dibaptis, nduwé iman sing kuwat marang korban tebusané Yésus, lan nduwé hubungan sing akrab karo Yéhuwah. (Yoh. 3:36; 1 Ptr. 3:21) Mula, wong-wong kuwi isa nyenengké Yéhuwah lan isa ”nindakké tugas suci awan lan bengi” ing bumi. Merga ngutamakké Kerajaané Gusti Allah, wong-wong kuwi nindakké bagéan sing luwih akèh ing gawéan nginjil lan ndadèkké murid.​—Mat. 6:33; 24:14; 28:19, 20.

10. Kumpulan gedhé isa yakin soal apa, lan apa sing bakal dinikmati wong-wong kuwi?

¹⁰ Kumpulan gedhé sing slamet ngliwati sengsara gedhé isa yakin nèk Gusti Allah bakal terus nggatèkké wong-wong kuwi merga ’Gusti Allah sing lungguh ing takhta bakal nglindhungi wong-wong kuwi’. Wong-wong kuwi ya bakal ngrasakké janjiné Gusti Allah kelakon, yaiku, ”Gusti Allah bakal ngusapi air matané wong-wong kuwi. Ora bakal ana manèh kesusahan, tangisan, lan rasa lara. Malah, kematian ya ora bakal ana manèh.”​—Why. 21:3, 4.

11-12. (a) Nurut Wahyu 7:16, 17, berkah apa sing bakal ditampa karo kumpulan gedhé? (b) Apa sing isa ditindakké domba-domba liyané pas acara Pèngetan, lan apa sebabé?

¹¹ Wacanen Wahyu 7:16, 17. Saiki, ana umaté Yéhuwah sing kelaparan merga ora nduwé dhuwit utawa merga ana perang, lan sing liyané dipenjara merga imané. Ning,  umaté Yéhuwah sing dadi bagéan saka kumpulan gedhé tetep bahagia merga ngerti nèk sakwisé slamet saka sengsara gedhé, wong-wong kuwi bakal nduwé akèh panganan lan terus diwulang Yéhuwah. Wektu donyané Sétan dihancurké, wong-wong bakal ngrasa ”kepanasen”, maksudé kesiksa merga rasa nesuné Yéhuwah. Ning, Yéhuwah bakal mastèkké bèn kumpulan gedhé ora ngrasakké kuwi. Sakwisé sengsara gedhé rampung, Yésus bakal ngarahké kumpulan gedhé ing ”mata air kehidupan” sing nggawé wong-wong kuwi urip saklawasé. Dadi, kumpulan gedhé nduwé harapan sing luar biasa. Wong-wong kuwi ora bakal mati.​—Yoh. 11:26.

¹² Domba-domba liyané mesthi bersyukur banget marang Yéhuwah lan Yésus merga wis diwènèhi harapan sing luar biasa. Senajan ora dipilih munggah swarga, ning Yéhuwah tetep nresnani wong-wong kuwi, padha kaya Yéhuwah nresnani wong-wong sing dipilih munggah swarga. Pas acara Pèngetan, domba-domba liyané lan wong-wong sing dipilih munggah swarga isa bareng-bareng muji Gusti Allah lan Yésus.

13-14. Apa sebabé domba-domba liyané lan wong-wong sing dipilih munggah swarga teka ing acara Pèngetan?

¹³ Nurut laporan soal acara Pèngetan sing kelakon pirang-pirang taun iki, saka wong 1.000 sing teka, rata-rata mung siji sing mèlu mangan roti lan ngombé anggur. Iki nduduhké nèk akèh-akèhé sing teka ing acara Pèngetan kuwi nduwé harapan urip ing bumi. Nèk ngono, kenapa kok wong-wong kuwi teka ing acara Pèngetan? Kuwi isa dipadhakké kaya wong sing teka ing acara nikahané kancané. Dhèwèké gelem teka merga sayang lan péngin ndhukung kancané sing nikah kuwi. Domba-domba liyané ya ngono. Wong-wong kuwi gelem teka ing acara Pèngetan merga sayang lan péngin ndhukung Yésus lan wong-wong sing dipilih munggah swarga. Domba-domba liyané ya péngin nduduhké nèk bersyukur kanggo pengorbanané Yésus sing wis nggawé wong-wong kuwi nduwé harapan urip saklawasé ing bumi.

¹⁴ Sakliyané kuwi, domba-domba liyané teka ing Pèngetan merga péngin manut préntahé Yésus. Pas Yésus nduduhké carané acara Pèngetan ditindakké, Yésus kandha marang para  rasul, ”Terus tindakna iki kanggo ngéling-éling aku.” (1 Kor. 11:23-26) Dadi, saksuwéné wong-wong sing dipilih munggah swarga isih urip ing bumi, domba-domba liyané bakal terus teka ing acara Pèngetan lan ngundang wong-wong bèn teka ing acara kuwi.

15. Piyé awaké dhéwé isa muji Yéhuwah lan Yésus pas teka ing acara Pèngetan?

¹⁵ Wektu mèlu nyanyi lan ndonga pas acara Pèngetan, awaké dhéwé muji Gusti Allah lan Yésus. Ceramah sing bakal disampèkké ing acara Pèngetan taun iki judhulé ”Duduhna Rasa Maturnuwun kanggo sing Wis Ditindakké Gusti Allah lan Kristus”. Ceramah kuwi bakal nggawé awaké dhéwé luwih bersyukur marang Yéhuwah lan Yésus. Pas roti lan anggur sing nglambangké badan lan getihé Yésus diédarké, awaké dhéwé dadi isa ngrenungké pengorbanané Yésus kanggo awaké dhéwé. Awaké dhéwé ya isa ngrenungké katresnan sing diduduhké Yéhuwah wektu Dhèwèké ngorbanké Anaké bèn awaké dhéwé isa urip saklawasé. (Mat. 20:28) Nèk nresnani Yéhuwah lan Yésus, awaké dhéwé mesthi gelem teka ing acara Pèngetan.

16. Wong Kristen sing dipilih munggah swarga lan domba-domba liyané nduwé persamaan apa waé?

¹⁶ Senajan harapané béda, ning wong Kristen sing dipilih munggah swarga lan domba-domba liyané nduwé persamaan. Wong-wong kuwi padha-padha ditresnani Gusti Allah merga Yéhuwah ora mung mènèhké Anaké dadi tebusan kanggo wong Kristen sing munggah swarga, ning ya kanggo domba-domba liyané. Terus, wong-wong kuwi ya padha-padha kudu setya karo Gusti Allah lan Yésus. (Mzm. 31:23) Sakliyané kuwi, wong Kristen sing dipilih munggah swarga lan domba-domba liyané padha-padha éntuk roh suci, merga Yéhuwah mènèhi roh suciné marang kabèh umaté sing mbutuhké.

17. Wong Kristen sing dipilih munggah swarga nduwé kepénginan apa?

¹⁷ Wong Kristen sing dipilih munggah swarga awalé ora nduwé kepénginan munggah swarga. Ning, wong-wong kuwi dadi péngin urip ing swarga merga Yéhuwah sing mènèhi kepénginan kuwi. Wong-wong kuwi mikirké harapané, ndongakké kuwi, lan kepéngin banget harapané kelakon. Pancèn, wong-wong kuwi ora ngerti sukmbèn bakal dadi kaya apa wektu nduwé badan sing wujudé roh. (Flp. 3:20, 21; 1 Yoh. 3:2) Ning, wong-wong kuwi tetep péngin ketemu karo Yéhuwah, Yésus, lan para malaékat. Wong-wong kuwi ya péngin ana ing Kerajaané Gusti Allah bareng karo wong-wong liyané sing dipilih munggah swarga.

18. Domba-domba liyané sukmbèn isa nindakké apa waé?

 ¹⁸ Domba-domba liyané péngin banget isa urip saklawasé ing bumi. Manungsa pancèn diciptakké nduwé kepénginan kuwi. (Pkh. 3:11) Domba-domba liyané mesthi seneng merga sukmbèn isa mèlu nggawé bumi dadi firdaus. Wong-wong kuwi bakal séhat, isa mbangun omah, nduwé kebon, lan nduwé anak-anak sing ora bakal lara. (Yés. 65:21-23) Wong-wong kuwi mesthi ya seneng merga isa belajar soal ciptaané Yéhuwah lan isa lunga ing gunung, hutan, lan laut kanggo menikmati pemandangané. Sing paling penting, domba-domba liyané seneng banget merga sukmbèn bakal nduwé hubungan sing akrab karo Yéhuwah.

19. Pas acara Pèngetan, awaké dhéwé nduwé kesempatan apa, lan kapan acara Pèngetan dianakké taun iki?

¹⁹ Yéhuwah mènèhi harapan sing luar biasa kanggo kabèh umaté. (Yér. 29:11) Pas acara Pèngetan, awaké dhéwé nduwé kesempatan muji Yéhuwah lan Yésus sing wis mènèhi harapan urip saklawasé. Kanggoné wong Kristen sing sejati, acara Pèngetan dadi acara sing paling penting. Taun iki, acara kuwi bakal dianakké dina Setu tanggal 27 Maret 2021 sakwisé matahari terbenam. Taun iki, bakal ana akèh sing teka ing acara Pèngetan, termasuk sedulur-sedulur sing lagi ngadhepi tantangan. Malah, ana sedulur-sedulur sing kudu nganakké acara Pèngetan ing penjara. Yéhuwah, Yésus, para malaékat, lan wong-wong Kristen sing wis ana ing swarga mesthi nggatèkké upayané awaké dhéwé kanggo teka ing acara Pèngetan. Ora soal mèlu acara Pèngetan ing jemaat, ing kelompok cilik, utawa malah dhèwèkan, muga-muga njenengan isa menikmati acara kuwi.