1, 2. (a) Piyé perasaané Seksi-Seksi Yéhuwah marang Alkitab? (b) Buku ing Alkitab endi sing paling panjenengan senengi?

SEKSI-SEKSI YÉHUWAH seneng maca Alkitab, merga Alkitab isa ngekèki pengarep-arep, tuntunan sing isa dipercaya, lan rasa ayem. (Rm. 15:4) Isiné dudu pikirané manungsa, ning ”sabdaning Allah”.​—1 Ts. 2:​13.

² Akèh-akèhé wong nduwé buku sing paling disenengi ing Alkitab. Ana sing seneng maca Injil, merga isiné nduduhké sipat-sipaté Yéhuwah sing ditiru Yésus. (Yo. 14:9) Liyané seneng maca ramalan ing buku Wahyu, sing nduduhké ”bab apa kang pinasthi bakal énggal kalakon”. (Wy. 1:1) Ana sing krasa ayem wektu maca buku Jabur, lan liyané seneng maca wejangan ing buku Wulang Bebasan. Pancèn, Alkitab kuwi buku kanggo kabèh wong.

3, 4. (a) Piyé perasaané awaké dhéwé bab wacan-wacan Alkitab? (b) Wacan-wacan Alkitab ditulis kanggo sapa waé?

³ Merga seneng maca Alkitab, awaké dhéwé uga seneng maca wacan-wacan Alkitab. Kabèh buku, majalah, lan wacan liyané disedhiyakké Yéhuwah bèn nguwatké iman,  lan mbantu awaké dhéwé tetep cedhak karo Yéhuwah.​—Tt. 2:2.

⁴ Akèh wacan Alkitab ditulis kanggo kabèh Seksi Yéhuwah. Ning, ana uga sing kusus kanggo cah-cah enom utawa wong tuwa. Akèh-akèhé artikel lan vidhéo ing situs resminé Seksi-Seksi Yéhuwah, kusus digawé kanggo wong-wong sing dudu Seksi Yéhuwah. Kabèh kuwi nduduhké nèk Yéhuwah netepi janjiné kanggo nyedhiyakké akèh tuntunan kanggo manungsa.​—Yé. 25:6.

5. Yéhuwah seneng nèk awaké dhéwé nindakké apa?

⁵ Akèh-akèhé Seksi Yéhuwah péngin nduwé luwih akèh wektu kanggo maca Alkitab lan wacan Alkitab. Ning, mbokmenawa jumlah wektu sing digunakké kanggo sinau saben wacan Alkitab, ora padha. Nèk awaké dhéwé pinter nggunakké wektu kanggo maca lan sinau Alkitab sarta wacan Alkitab, mesthi Yéhuwah seneng banget. (Éf. 5:​15, 16) Ning, awaké dhéwé aja nganti nduwé pikiran sing salah. Pikiran apa?

6. Apa sing isa nggawé awaké dhéwé ora éntuk paédah saka kabèh sing disedhiyakké Yéhuwah?

⁶ Nèk ora ati-ati, awaké dhéwé isa mikir nèk ana isiné Alkitab utawa wacan Alkitab sing ora cocog kanggo awaké dhéwé. Contoné, piyé nèk ana bagéan saka Alkitab lan wacan Alkitab sing kétoké ora cocog, utawa ora ana hubungané karo awaké dhéwé? Apa awaké dhéwé péngin cepet-cepet rampung utawa malah ora diwaca? Nèk kaya ngono, awaké dhéwé bakal ora éntuk paédah saka wacan kuwi. Piyé carané bèn aja mikir ngono? Awaké dhéwé kudu éling nèk kabèh tuntunan kuwi asalé saka Yéhuwah. Alkitab kandha, ”Iya Ingsun iki Yéhuwah, Allahira, kang mulang marang sira bab apa kang maédahi.” (Yé. 48:17) Ing wulangan iki, bakal dirembug telung cara bèn awaké dhéwé éntuk paédah saka kabèh sing disedhiyakké Yéhuwah.

7. Apa sebabé awaké dhéwé perlu maca Alkitab merga rasa péngin ngerti tenan?

⁷ Wacanen merga rasa péngin ngerti tenan. Pancèn bener nèk ana buku ing Alkitab sing ditulis kanggo wong utawa kelompok kusus. Alkitab kandha, ”Sakèhing tulisan kang diwangsitaké déning Gusti Allah iku pancèn migunani.” (2 Tm. 3:16) Mula, wektu maca Alkitab awaké dhéwé kudu maca merga rasa péngin ngerti tenan. Ana sedulur sing kandha nèk dhèwèké isa sinau akèh bab sing penting mung saka salah sijiné kedadéan ing Alkitab. Kuwi nggawé dhèwèké ngerti bab-bab sing angèl dingertèni. Dadi, sakdurungé maca Alkitab, awaké dhéwé kudu njaluk Yéhuwah mbantu nyiapké ati lan pikiran bèn isa ngerti sing disinaoni.​—Éz. 7:10; wacanen Yakobus 1:5.

8, 9. (a) Wektu maca Alkitab, pitakonan-pitakonan apa sing isa dipikirké? (b) Apa sing isa disinaoni bab Yéhuwah saka syarat-syaraté dadi pinituwa?

⁸ Gunakna pitakonan. Wektu maca Alkitab, pikiren pitakonan-pitakonan  iki, ’Apa sing isa disinaoni bab Yéhuwah? Piyé carané ngetrapké ing urip saben dina? Piyé carané nggunakké ayat iki kanggo mbantu liyané?’ Nèk mikirké tenanan pitakonan-pitakonan kuwi, awaké dhéwé bakal éntuk luwih akèh paédah wektu maca Alkitab. Contoné, Alkitab nduduhké syarat-syaraté dadi pinituwa. (Wacanen 1 Timotéus 3:​2-7.) Nèk awaké dhéwé dudu pinituwa, mesthi awaké dhéwé mikir nèk ayat kuwi ora ana hubungané karo awaké dhéwé. Telung pitakonan mau isa mbantu awaké dhéwé ngerti paédahé ayat kuwi.

⁹ ”Apa sing isa disinaoni bab Yéhuwah?” Yéhuwah ngekèki syarat-syarat kusus nèk arep dadi pinituwa jemaat. Kuwi nduduhké nèk jemaat aji banget kanggo Yéhuwah. Alkitab kandha nèk Yéhuwah nuku jemaat nganggo ”sarana rahé [getihé] kang Putra piyambak”. (PR. 20:28) Yéhuwah péngin para pinituwa dadi conto sing apik lan nindakké tugasé manut karo kersané, bèn jemaat ayem-tentrem. (Yé. 32:​1, 2) Saka syarat-syarat kuwi, awaké dhéwé isa ngerti nèk Yéhuwah nggatèkké tenanan awaké dhéwé.

10, 11. (a) Wektu maca syarat-syaraté dadi pinituwa, piyé carané ngetrapké ing urip saben dina? (b) Piyé carané nggunakké ayat iki kanggo mbantu liyané?

 ¹⁰ ”Piyé carané ngetrapké ing urip saben dina?” Nèk wis dadi pinituwa, panjenengan kudu kerep mriksa syarat-syarat kuwi, lan ngupaya nindakké luwih apik manèh. Nèk péngin dadi pinituwa, panjenengan kudu ngupaya tenanan bèn cocog karo syarat-syaraté. (1 Tm. 3:1) Kabèh wong Kristen isa sinau saka syarat-syarat kuwi. Contoné, Yéhuwah péngin awaké dhéwé ora kaku lan isa nggawé keputusan sing bener. (Fp. 4:5; 1 Pt. 4:7) Nèk para pinituwa ’dadi tuladha’ kanggo jemaat, awaké dhéwé isa sinau saka para pinituwa lan niru imané.​—1 Pt. 5:3; Ib. 13:7.

¹¹ ”Piyé carané nggunakké ayat iki kanggo mbantu liyané?” Awaké dhéwé isa nggunakké ayat kuwi kanggo mbantu sing sinau Alkitab lan wong sing tanggepané apik, bèn ngerti bédané pinituwa lan pendhéta. Ayat kuwi uga ngélingké nèk para pinituwa kerja mempeng kanggo jemaat. Kuwi sing nggawé awaké dhéwé péngin ngajèni para pinituwa. (1 Ts. 5:​12) Saya ngajèni para pinituwa, saya seneng para pinituwa nindakké tugasé.​—Ib. 13:17.

12, 13. (a) Wektu sinau Alkitab, piyé carané bèn isa ngerti luwih akèh? (b) Piyé katrangan bab buku Yéheskièl mbantu bèn isa ngerti piwulang sing angèl dingertèni?

¹² Kudu luwih akèh sinau. Wektu sinau Alkitab, awaké dhéwé isa njawab pitakonan-pitakonan iki:

• Sapa sing nulis buku iki?

• Kapan lan ing endi ditulis?

• Ana kedadéan penting apa wektu buku kuwi ditulis?

Saka katrangan-katrangan kuwi, awaké dhéwé isa ngerti piwulang-piwulang sing angèl dingertèni.

¹³ Contoné, Yéheskièl 14:13, 14 kandha, ”Manawa ana sawijining nagara kang dosa marang Ingsun kanthi patrap ora setya lan Ingsun banjur ngayataké astaningSun prelu nglawan kalawan nyirnakaké pasadhiyané pangan lan ndhatengaké mangsa pailan marang nagara iku sarta manungsa lan kéwan ing nagara kono kasirnakaké, sanadyan ing kono tinemu wong telu iki, yaiku Nuh, Dhanièl lan Ayub, wong iki bakal mung bisa nylametaké awaké dhéwé marga saka kamursidané. Mangkono pangandikané Pangéran Yéhuwah.” Buku Yéheskièl ditulis taun 612 SM. Wektu kuwi, umuré Dhanièl kira-kira 20 taun. Yéhuwah kandha nèk Dhanièl nduwé iman kaya Nuh lan Ayub, padhahal Nuh lan Ayub wis mati atusan taun kepungkur. Yéhuwah isih éling karo imané Nuh lan  Ayub. Apa sing isa disinaoni? Yéhuwah nggatèkké lan ngajèni kabèh abdiné sing setya, klebu sing isih enom.​—Ms. 148:12-​14.

14. Piyé cah enom isa éntuk paédah saka wacan sing dikususké kanggo dhèwèké, lan apa paédahé kanggo sing dudu cah enom? (Deloken gambar ing kaca 27.)

¹⁴ Wacan kanggo cah enom. Awaké dhéwé ngerti nèk kabèh isiné Alkitab ana paédahé. Semono uga, kabèh wacan Alkitab ana paédahé. Contoné, pirang-pirang taun iki, Yéhuwah nyedhiyakké akèh katrangan kanggo cah enom. ^[1] (Deloken katrangan ing kaca 32.) Katrangan kuwi mbantu ngadhepi masalahé cah enom, klebu ing sekolahan. Senajan dudu cah enom, piyé carané entuk paédah saka artikel lan buku kanggo cah enom? Awaké dhéwé isa sinau masalahé cah enom bèn isa mbantu lan nggedhèkké atiné.

15. Apa sebabé Seksi Yéhuwah sing wis diwasa aja nganti ora gelem maca wacan-wacan kanggo cah enom?

¹⁵ Seksi Yéhuwah sing diwasa, aja nganti ora gelem maca wacan-wacan kanggo cah enom. Akèh masalah sing dirembug ing kono ana gunané kanggo kabèh Seksi Yéhuwah. Contoné, cara mbéla agamané, ora gampang nesu, ora mèlu-mèlu kancané, lan ora gelem kekancan lan nonton hiburan sing ora bener. Senajan kuwi ditulis kanggo cah enom, katrangan-katrangan kuwi dhasaré saka Alkitab lan mesthi ana gunané kanggo kabèh Seksi Yéhuwah.

16. Apa paédah liyané saka wacan kanggo cah enom?

¹⁶ Wacan-wacan sing ditulis kanggo cah enom uga isa nguwatké hubungan karo Yéhuwah. (Wacanen Kohèlèt 12:​1, 13.) Wong diwasa uga isa éntuk paédah. Contoné, ing Sedarlah! April 2009 ana artikel Kaum Muda Bertanya . . . Bagaimana Aku Bisa Menikmati Pembacaan Alkitab? Ing kono ana saran-saran sing isa ditrapké, klebu kothak sing isa digunting, disimpen, lan digunakké wektu sinau. Apa wong diwasa isa éntuk paédah saka artikel iki? Ana ibu sing kandha nèk angèl ajeg maca Alkitab. Ning, dhèwèké manut saran-saran ing kono, lan saiki dadi seneng maca Alkitab. Dhèwèké seneng merga ngerti nèk buku-buku ing Alkitab kuwi ana hubungané siji lan sijiné. Dhèwèké kandha, ”Saiki, aku seneng banget maca Alkitab timbang mbiyèn.”

17, 18. Apa paédahé nèk maca wacan kanggo umum? Wénéhana conto.

¹⁷ Wacan kanggo umum. Mulai taun 2008, ana Menara Pengawal édhisi wulangan kanggo Seksi Yéhuwah, lan édhisi umum. Piyé bèn isa éntuk paédah saka majalah Menara Pengawal  kanggo umum? Gatèkna conto iki. Wektu ngundang wong teka ing Balé Ibadah, panjenengan mesthi seneng nèk dhèwèké teka. Wektu ceramah mulai, panjenengan mikirké wong sing diundang mau. Panjenengan mbayangké perasaané wong kuwi nèk krungu lan ngetrapké ceramah mau. Ati panjenengan dadi trenyuh lan saya ngajèni isiné ceramah kuwi.

¹⁸ Semono uga, kuwi sing dirasakké wektu maca wacan kanggo umum. Contoné, édhisi umum Menara Pengawal lan artikel ing jw.org nerangké isiné Alkitab, nggunakké tembung lan katrangan sing gampang dingertèni. Wektu maca katrangan kuwi, awaké dhéwé dadi luwih ngerti lan seneng sinau Alkitab, lan wektu nginjil isa nerangké bab kuwi nganggo cara werna-werna. Majalah Sadarlah! isa nguwatké iman merga nerangké nèk ana Sing Nggawé jagat sak isiné. Uga, mbantu awaké dhéwé trampil njawab pitakonan bab Seksi Yéhuwah.​—Wacanen 1 Pétrus 3:​15.

19. Piyé carané ngajèni kabèh sing wis disedhiyakké Yéhuwah?

¹⁹ Pancèn, Yéhuwah wis nyedhiyakké akèh tuntunan lan katrangan sing ana gunané kanggo awaké dhéwé. (Mt. 5:3) Terusa maca lan ngetrapké kabèh tuntunan sing wis disedhiyakké. Nèk kuwi ditindakké, awaké dhéwé bakal éntuk paédah, lan kuwi bukti nèk awaké dhéwé ngajèni kabèh sing wis disedhiyakké Yéhuwah.​—Yé. 48:17.