Ing akèh kutha gedhé sakdonya, pejalan kaki wis biasa ndelok rak beroda sing majang wacan Alkitab saka Seksi-Seksi Yéhuwah. Contoné, ing Jerman. Para Seksi masang rak beroda ing kutha Berlin, Cologne, Hamburg, Munich, lan liyané.

Ning, apa kuwi ana hasilé nèk dianakké ing kutha-kutha cilik sing dadi tempat wisatané wong Jerman? Piyé carané rak beroda isa digunakké kanggo nginjil ing kutha-kutha wisata ing sisih lor Jerman, dhaérah pinggir laut, lan pulau-pulau ing Laut Baltik lan Laut Utara? Taun 2016, kantor cabang Seksi-Seksi Yéhuwah ing Eropa Tengah nganakké kagiyatan kusus sing bakal njawab pitakonan-pitakonan kuwi. Sasi Mei nganti Oktober, ana kira-kira 800 Seksi sing nggunakké rak beroda ing dhaérah métropolitan, nganti kutha Wina ing negara Austria. Para Seksi nginjil nggunakké rak beroda ing 60 lokasi ing Jerman sisih lor.

Wong-wong padha seneng karo Seksi-Seksi Yéhuwah. Ana sedulur wédok sing kandha, ”Wong-wong nèng kono ramah, péngin ngerti bab Seksi Yéhuwah, lan gelem dijak omong-omongan.” Sedulur Heidi, sing mèlu nginjil ing kutha Plön, kandha, ”Aku dianggep penduduk asli kutha kuwi sakwisé pirang-pirang dina nèng kono. Wong sing wis tau ngerti aku, nyapa aku.” Ana wong lanang tunarungu sing ngomong nganggo basa isyarat, ”Kok Seksi-Seksi Yéhuwah ana nèng endi-endi?” Wong lanang kuwi lan kanca-kancané bar mulih saka pertemuan tunarungu ing dhaérah Jerman sisih tenggara. Ing kana, dhèwèké ya ketemu karo Seksi-Seksi Yéhuwah.

Malah, ana penduduk kutha sing nawani bantuan. Misalé, ing pulau Wangerooge, ana polisi nyedhaki para Seksi lan ngandhani carané bèn isa ketemu luwih akèh wong. Ing kutha Waren an der Müritz, ana kaptèn kapal wisata sing lagi nggawa para wisatawan menyang tempat wisata. Dhèwèké nunjuk rak beroda kuwi karo kandha, ”Nèk péngin ngerti bab Gusti Allah, njupuka wacan nèng rak beroda kuwi.” Akèh turis mara lan maca poster sing ditèmpèl ing rak beroda.

Turis lan penduduk kutha seneng lan péngin ngerti luwih akèh buku-buku iki:

• Punapa Gusti Allah Temen-Temen Migatosaken Kita? (Apakah Allah Benar-Benar Mempedulikan Kita?) Ana turis sing kandha, ”Wis suwé aku mikir kaya ngono. Lha kok malah pas liburan iki aku éntuk jawabané.”

• Kabar Apik saka Gusti Allah! Ana bapak-bapak sing kandha karo salah siji Seksi nèk dhèwèké gela karo agama. Para Seksi nerangké nèk ora ana manungsa sing isa ngrampungi kabèh masalah. Mung Gusti Allah sing isa ngrampungi. Akhiré bapak-bapak kuwi gelem nampa buku Kabar Apik lan janji arep maca.

• Aku Sinau Alkitab. Ana bapak sing ngeterké anaké njupuk buku Aku Sinau Alkitab, buku sing isiné kusus kanggo bocah-bocah. Terus bapak kuwi njupuk Buku Cerita Alkitab lan kandha, ”Buku iki cocog nggo keluargaku.”

Ana luwih saka 3.600 wacan Alkitab sing dijupuk wong-wong sing liwat. Ana sing njaluk ditekani lan péngin ngrembug Alkitab karo para Seksi.

Para Seksi sing mèlu kegiatan kuwi nduwé pengalaman sing nyenengké. Misalé, Jörg lan bojoné sing jenengé Marina. Wong loro kuwi mèlu nginjil ing dhaérah cedhak Laut Baltik. Jörg lan Marina kandha, ”Iki hadiah sing istiméwa banget merga aku ra mung isa ndelok ciptaané Gusti Allah, ning uga isa nginjil bab Gusti Allah.” Sedulur Lukas sing umuré 17 taun kandha, ”Aku seneng banget. Merga aku ra mung liburan thok, ning ya isa nginjil.”