Saka taun 1999 tekan 2015, Seksi-Seksi Yéhuwah wis mbangun luwih saka 5.000 Balé Ibadah ing Amerika Tengah * lan Meksiko. Supaya sakyuta Seksi Yéhuwah lan wong-wong liyané ing wilayah kuwi isa ngibadah ing panggonan ibadah, dibutuhaké luwih saka 700 Balé Ibadah manèh.

Mbiyèn, angèl banget kanggo mbangun panggonan ibadah ing wilayah iki. Contoné, mbiyèn Seksi-Seksi Yéhuwah ing Meksiko ngibadah ing omahé jemaat, merga hukum ing kana nglarang organisasi agama nduwé panggonan ibadah dhéwé. Ing taun 1990-an, peraturané diowahi, mula Seksi-Seksi Yéhuwah mulai mbangun Balé Ibadah. Ning, butuh pirang-pirang sasi kanggo mbangun saben Balé Ibadah.

Taun 1999, mbangun Balé Ibadah dadi cepet banget merga Kelompok sing Mbangun Balé Ibadah mulai mbangun ing dhaérah-dhaérah plosok sing angèl golèk bahan bangunan, contoné ing Meksiko lan pitung negara ing Amerika Tengah. Wiwit taun 2010, kantor cabang ing Meksiko ngawasi gawéan mbangun Balé Ibadah ing kabèh wilayah kuwi.

Abdi sing kusus mbangun Balé Ibadah ngadhepi tantangan wektu mbangun Balé Ibadah ing dhaérah plosok. Contoné, ing Panama, abdi kusus kuwi kudu numpak prau kira-kira telung jam supaya tekan ing panggonan sing dibangun Balé Ibadah. Uga, ing Negara Bagéan Chiapas ing Meksiko, kelompok sing mbangun Balé Ibadah kudu numpak pesawat cilik kanggo nggawa bahan bangunan menyang dhaérah plosok.

Wong-wong sing dudu Seksi Yéhuwah ing dhaérah kuwi ya péngin banget ndelok Balé Ibadah anyar. Contoné, wong lanang saka Honduras kandha nèk sakdurungé, ana wong sing péngin mbangun klub malam ing panggonan sing saiki dibangun Balé Ibadah Seksi-Seksi Yéhuwah. Ning, dhèwèké ora seneng panggonan kuwi digawé klub malam. Wektu Seksi-Seksi Yéhuwah kandha nèk arep mbangun Balé Ibadah ing panggonan kuwi, dhèwèké kandha, ”Wah senengé.”

Ing akèh panggonan, wong-wong padha nggumun merga sing mbangun wongé sregep-sregep. Wong lanang saka Guatemala kandha, ”Biyasané wong-wong wadon kuwi gawéané mung masak. Ning, wong wadon ing kéné nindakaké gawéané wong lanang. Aku nggumun banget ndelok wong wadon ngelas lan mlèster témbok. Nggumunaké tenan.” Akèh wong-wong ing dhaérah kono sing nggawakaké maeman lan cemilan kanggo para rélawan sing kerja mbangun Balé Ibadah ing kono.

Akèh wong sing ngelem bentuk bangunané Balé Ibadah. Ing Nikaragua, ana ahli bangunan sing kandha karo wali kota ing kutha kuwi nèk Balé Ibadahé Seksi-Seksi Yéhuwah kuwi dibangun nganggo material sing mutuné paling apik, luwih apik ketimbang bangunan-bangunan ing kutha kuwi.

Seksi-Seksi Yéhuwah dhéwé ya mesthi seneng banget nduwé panggonan ibadah. Sakwisé ana Balé Ibadah anyar, ana luwih akèh wong sing sinau Alkitab teka ing pakumpulan ibadah. Anggota jemaat ing Meksiko sing mèlu ngréwangi mbangun Balé Ibadah padha maturnuwun banget lan kandha, ”Maturnuwun Yéhuwah merga wis maringi hak istiméwa kanggo mbangun Balé Ibadah sing ngluhuraké lan ngurmati asma Yéhuwah.”