Dongané Wong Wédok Wuta Dijawab
Seksi Yéhuwah ing Asia sing jenengé Yan Mei mbantu wong wédok wuta sing jenengé Ming Jie nyebrang. * Terus Ming Jie ngomong, ”Matur nuwun, ya. Muga-muga Gusti Allah mberkahi kowé.” Bar kuwi Yan Mei nawani Ming Jie kanggo sinau Alkitab. Ming Jie crita nèk dhèwèké wis ndonga saben dina bèn isa nemokké ibadah sing bener. Ngapa Ming Jie ndonga kaya ngono?
Ing taun 2008, Ming Jie nampa undangan saka kancané sing wuta kanggo teka ing gréja khusus kanggo wong cacad. Sakwisé ngrungokké ceramah ing gréja kuwi, Ming Jie dadi péngin banget maca Alkitab. Saksuwéné kira-kira enem sasi, Ming Jie wis maca Alkitab braille basa Cina saka Purwaning Dumadi nganti Wahyu. Merga maca Alkitab, Ming Jie dadi ngerti nèk ajaran gréja soal Tritunggal kuwi salah. Dhèwèké ya dadi ngerti nèk jenengé Gusti Allah kuwi Yéhuwah.
Terus, Ming Jie sadhar nèk wong-wong sing ana ing gréja ora nindakké ajarané Alkitab. Contoné, wong sing wuta diwènèhi panganan sisa padahal sing liyané ora. Kuwi nggawé Ming Jie kecéwa karo wong-wong sing ana ing gréja kuwi. Akhiré, Ming Jie nggolèk gréja liyané ing dhaérahé. Kuwi sebabé ngapa Ming Jie ndonga saben dina bèn nemokké ibadah sing bener.
Merga Yan Mei apikan, Ming Jie gelem sinau Alkitab. Terus, Ming Jie teka ing pertemuan ibadahé Seksi-Seksi Yéhuwah. Ming Jie ngomong, ”Aku ora bakal lali wektu pertama kali teka berhimpun. Wektu kuwi para sedulur pada nyambut aku. Aku terharu merga senajan aku wuta aku isa ngrasakké nèk para sedulur sayang karo aku.”
Ming Jie nggawé kemajuan lan mulai ajeg teka berhimpun. Ming Jie seneng nyanyi lagu-lagu Kerajaan. Ning, masalahé durung ana buku nyanyian braille ing basa Cina. Dadi, para sedulur ing jemaat mbantu Ming Jie nggawé buku nyanyian dhéwé. Butuh wektu 22 jam kanggo nyalin 151 lagu. Ing sasi April 2018, Ming Jie mulai nginjil lan nggunakké kira-kira 30 jam saben sasi.
Nyalin buku ing huruf braille kuwi ora gampang
Kanggo mbantu Ming Jie sing arep baptis, Yan Mei nggawèkké rekaman audio pertanyaan lan ayat Alkitab sing ana ing buku Diorganisasi untuk Melakukan Kehendak Yehuwa. Ing sasi Juli 2018, Ming Jie dibaptis. Dhèwèké kandha, ”Aku terharu merga ngrasakké katresnan para sedulur ing kebaktian. Aku bersyukur merga akhiré aku dadi bagéan saka ibadah sing bener.” (Yohanes 13:34, 35) Ming Jie péngin niru katresnané para sedulur. Akhiré, Ming Jie dadi perintis biasa.
^ Dudu jeneng asliné.