რამდენიმე დღის განმავლობაში ტაიფუნი „მანგჰუტი“ მძვინვარებდა წყნარი ოკეანის დასავლეთ ნაწილსა და სამხრეთ ჩინეთის ზღვაში. ქვემოთ მოცემული ინფორმაცია იმ ფილიალებმა მოგვაწოდეს, რომლებიც სტიქიის ზონაში მცხოვრებ და-ძმებზე ზრუნავენ.

მიკრონეზია: 2018 წლის 10 სექტემბერს ტაიფუნი „მანგჰუტი“ თავს დაატყდა კუნძულ როტას, ჩრდილოეთ მარიანას კუნძულებიდან ერთ-ერთს. ასეთი ძლიერი ქარიშხალი კუნძულ როტას 2002 წლის შემდეგ არ უნახავს. საბედნიეროდ, არცერთი ჩვენი და-ძმა არ დაზარალებულა. კუნძულზე მდებარე ერთადერთი სამეფო დარბაზიც უვნებლად გადარჩა. მხოლოდ ერთ ძმას მოუწია დროებით სხვაგან გადასვლა, სანამ მის სახლს სარემონტო სამუშაოებს ჩაუტარებენ. კუნძულს ახლახან სარაიონო ზედამხედველი ეწვია და და-ძმები გაამხნევა.

ფილიპინები: 2018 წლის 15 სექტემბერს ტაიფუნმა „მანგჰუტმა“ (ადგილობრივად ცნობილია „ომპონგის“ სახელით) მეწყერი გამოიწვია კაგაიანის პროვინციაში. წელს „მანგჰუტი“ ყველაზე ძლიერი ქარიშხალი იყო ფილიპინებზე. დაღუპულთა რიცხვმა 81-ს მიაღწია.

სამწუხაროდ, ქარიშხლის შედეგად ბენგეტში ერთი ჩვენი და დაიღუპა და ოთხი ძმა დაზარალდა. თავდაპირველი მონაცემებით, დაზიანებულია ჩვენი და-ძმების 938 სახლი, 15 კი მთლიანად დანგრეულია. სტიქიის შედეგად დაზიანებულია 28 სამეფო დარბაზი, აქედან ერთი, მეწყერმა მთლიანად მიწასთან გაასწორა. და-ძმების ფიზიკურ, ემოციურ და სულიერ საჭიროებებზე ზრუნავს ბაგიოში, კაუაიანში, ლაოაგში და ტუგეგარაოში არსებული სტიქიური უბედურებებით დაზარალებულთა დახმარების ოთხი კომიტეტი. გამხნევების მიზნით უახლოეს დღეებში ფილიალის კომიტეტის ერთ-ერთი წევრი მოინახულებს აღნიშნულ ტერიტორიაზე მცხოვრებ და-ძმებს.

ჰონგ-კონგი: 2018 წლის 16 სექტემბერს ქარიშხალ „მანგჰუტის“ შედეგად ქალაქ ჰონგ-კონგში მეწყერი ჩამოწვა, რამაც ფილიალის ადმინისტრაციული შენობისა და საცხოვრებელი კომპლექსის მცირედი დაზიანებები გამოიწვია. მნიშვნელოვნად დაზიანდა მოწმეების ორი სახლი; ერთს ხე დაეცა, მეორეს კი ქარიშხალმა სახურავი ახადა. რამდენიმე სახლი წყალმა დააზიანა. სტიქიური უბედურებებით დაზარალებულთა დახმარების კომიტეტი ორგანიზებას უწევს, რომ ჰონგ-კონგში მცხოვრებ და-ძმებს პირველადი დახმარება გაეწიოთ.

გულწრფელად გვაღელვებს ტაიფუნ „მანგჰუტის“ შედეგად დაზარალებული და-ძმების მდგომარეობა და ვლოცულობთ მათთვის. გვანუგეშებს იმის ცოდნა, რომ ჩვენი თანაქრისტიანები მთელი მონდომებით ეხმარებიან გასაჭირში მყოფ და-ძმებს. ჩვენი გაერთიანებული სულიერი ოჯახი ნამდვილი კურთხევაა იეჰოვასგან (იგავები 17:17).