უკვე ხუთი წელია, რაც მსოფლიო საძმო დიდი სიამოვნებით უყურებს ყოველთვიურ სულიერ პროგრამას JW მაუწყებლობაზე. კვლავაც მოუთმენლად ველით პროგრამებს, რომლებიც 2020 სამსახურებრივი წლისთვის არის დაგეგმილი. მიმოვიხილოთ, რა შესანიშნავი შედეგები იქნა მიღწეული 2014 წლის ოქტომბრის პირველი მაუწყებლობიდან მოყოლებული დღემდე.

ითარგმნება 185 ენაზე. თავდაპირველად ყოველთვიური პროგრამები მხოლოდ ინგლისურ ენაზე იყო ხელმისაწვდომი. 2015 წლის მაისში, ხელმძღვანელი საბჭოს გადაწყვეტილებით, პროგრამების თარგმნა 40-ზე მეტ ენაზე დაიწყო. ახლა კი, სულ რაღაც ოთხი წლის შემდეგ, მაუწყებლობის ყურება 185 ენაზეა შესაძლებელი.

შემთხვევები მსოფლიოს ყველა კუთხიდან. JW მაუწყებლობა მსოფლიო საძმოსთვის არის განკუთვნილი. ამიტომ უფრო და უფრო მეტი ვიდეო მზადდება მთელ მსოფლიოში მცხოვრები და-ძმების შესახებ, რომლებზეც ვიდეორგოლების მომზადებაზე პასუხისმგებელი ჯგუფები მუშაობენ. მაუწყებლობის ყოველთვიური პროგრამა მთავრდება ვიდეოკლიპით, რომელიც საშუალებას გვაძლევს, გავიცნოთ დაშორებულ ტერიტორიებზე მცხოვრები და-ძმები; აგრეთვე ვეწვიოთ კრებებს ისეთ ქვეყნებში, როგორებიცაა ეთიოპია, ისლანდია, მონღოლეთი, საიპანი, ტუვალუ და უგანდა. JW მაუწყებლობას 230 ქვეყანაში უყურებენ, მათ შორის ისეთ დაშორებულ და დროებით დასახლებულ ტერიტორიებზე, როგორიცაა სუბანტარქტიკულ სარტყელში მდებარე ჰერდისა და მაკდონალდის კუნძულები. მაუწყებლობაზე პროგრამის ატვირთვიდან ერთი თვის მანძილზე მისი ნახვის თუ ჩამოტვირთვის საშუალო რაოდენობა 8.6 მილიონს აღწევს.

უხვი და მრავალფეროვანი შინაარსი. დღემდე 60 საათზე მეტი ხანგრძლივობის მასალა მომზადდა, მათ შორის მოხსენებები, ინტერვიუები, შემთხვევები, ახალი ამბები და ინსცენირებები. მას შემდეგ, რაც პირველად გამოიცა მუსიკალური კლიპი „ცხოვრების საუკეთესო გზა“, მუსიკალური კლიპები ყოველთვიური პროგრამის განუყოფელი ნაწილი გახდა. ეს სიმღერები ითარგმნება 368 ენაზე.

წამყვანები. თავდაპირველად პროგრამას მხოლოდ ხელმძღვანელი საბჭოს წევრები უძღვებოდნენ. მოგვიანებით მათ ეხმარებოდნენ ხელმძღვანელი საბჭოს კომიტეტის დამხმარეები, რომლებსაც დროდადრო თავადაც მიჰყავდათ ამა თუ იმ თვის პროგრამა. მთლიანობაში ყოველთვიურ მაუწყებლობას 29 ძმა უძღვება.

მადლიერების გამომხატველი კომენტარები. შეერთებულ შტატებში მცხოვრები ერთი ძმა, რომელსაც არც თუ ისე დიდი ხნის წინ ინსულტი დაემართა და ჯანმრთელობა სერიოზულად შეერყა, განსაკუთრებით აფასებს მუსიკალურ კლიპებს. ის ამბობს: „სულიერ თემებზე აგებული მუსიკალური კლიპების მოსმენა განწყობას მიმაღლებს და ძალებს მმატებს, რომ ამ დიდ განსაცდელს გავუმკლავდე. მაოცებს ის, თუ როგორ მეხმარება ეს კლიპები ქრისტიანული თვისებების გაუმჯობესებაში. მადლობას გიხდით ამისთვის!“.

2016 წლის ნოემბრის თვის პროგრამის ყურების შემდეგ შეერთებულ შტატებში მცხოვრებმა ოჯახმა, რომელსაც სიმსივნით დაავადებული ვაჟი დაეღუპა, ასეთი სიტყვები თქვა: «ცრემლები ღაპაღუპით მოგვდიოდა, როდესაც ვუყურებდით მუსიკალურ კლიპს „ეს დრო ნანატრი“. ჩვენი თავი ვიდეოში ნაჩვენები მშობლების ადგილას წარმოვიდგინეთ, რომლებიც თავიანთ მკვდრეთით აღდგენილ შვილს სამოთხეში ხვდებიან. როცა ვფიქრობთ, რომ მეტის ატანა აღარ შეგვიძლია, იეჰოვა ყოველთვის გვარწმუნებს, რომ მას ესმის ჩვენი და დაგვეხმარება ამ დიდ ტკივილთან გამკლავებაში. ეს მუსიკალური კლიპი იეჰოვას პასუხი იყო ჩვენს გულმხურვალე ლოცვებზე».

უკრაინაში მცხოვრები ცოლ-ქმარი თავიანთ მადლიერებას ყოველთვიურ პროგრამებთან დაკავშირებით შემდეგი სიტყვებით გამოხატავს: „დიდი მადლობა JW მაუწყებლობისთვის; ისეთი გრძნობა გვაქვს, თითქოს ხელმძღვანელი საბჭოს წევრები ჩვენი ოჯახის წევრები არიან“.

ვემადლიერებით იეჰოვას დროული სულიერი საზრდოსთვის, რომელიც ღვთის ხალხს მთელი მსოფლიოს მასშტაბით აერთიანებს (1 პეტრე 2:17).