10 ᲗᲔᲑᲔᲠᲕᲐᲚᲘ, 2023 | ᲒᲐᲜᲐᲮᲚᲔᲑᲣᲚᲘ ᲘᲜᲤᲝᲠᲛᲐᲪᲘᲐ: 14 ᲘᲕᲚᲘᲡᲘ, 2023
ᲠᲣᲡᲔᲗᲘ

ᲒᲐᲜᲐᲮᲚᲔᲑᲣᲚᲘ ᲘᲜᲤᲝᲠᲛᲐᲪᲘᲐ — ᲒᲐᲛᲐᲛᲢᲧᲣᲜᲔᲑᲔᲚᲘ ᲒᲐᲜᲐᲩᲔᲜᲘ | მოსკოვის სასამართლო სამ ძმას ასამართლებს

მოსმენა

2023 წლის 12 ივლისს საველოვსკის რაიონულმა სასამართლომ (მოსკოვი) დამნაშავედ ცნო რომან მარეიევი, ანატოლი მარუნოვი და სერგეი ტოლოკონიკოვი. სასამართლომ რომანს ოთხწელიწად-ნახევრით შეუფარდა პატიმრობა, ანატოლის — ექვსწელიწად-ნახევრით, ხოლო სერგეის — ხუთი წლით. ანატოლი მაშინვე გადაიყვანეს საპატიმროში. რაც შეეხება რომანს და სერგეის, ისინი უკვე იმყოფებოდნენ საპატიმროში.

ზოგადი ინფორმაცია

რომან მარეიევი

დაბადების წელი: 1978 (მოსკოვი)

ბიოგრაფია: მუშაობდა მოსკოვის სატრანზიტო კომპანიაში. სანამ დააპატიმრებდნენ, უნარშეზღუდულ მშობლებზე ზრუნავდა.

როცა ბიბლიის კითხვა დაიწყო, მასზე განსაკუთრებული შთაბეჭდილება დანიელის წინასწარმეტყველებამ მოახდინა. იეჰოვას მოწმე 2002 წელს გახდა.

პირადი გამოცდილება

რა დაგეხმარა დადებითი განწყობის შენარჩუნებაში ხანგრძლივი პატიმრობისას?

ეს დამეხმარა იმის გაცნობიერებაში, რომ ყველაზე მეტად ჩემი ქცევით შემიძლია იეჰოვას განდიდება. საკანში პატიმრები თვეების განმავლობაში აკვირდებოდნენ ჩემს საქციელს და რეაქციებს. ამიტომ ახლაც ყოველდღე ვთხოვ იეჰოვას, წმინდა სულით დამეხმაროს, რომ მას მივბაძო თვისებების გამოვლენაში.

მივხვდი, რომ განსაცდელების მოლოდინში გაცილებით რთულად აღიქვამ მდგომარეობას, ვიდრე თავად განსაცდელის პირისპირ ყოფნისას. თუ ღმერთს მივენდობით, ის ხელჩაკიდებული გვატარებს „წყვდიადით მოცულ ხევში“ (ფსალმუნი 23:4). ერთადერთი, რაც მომეთხოვება ისაა, რომ მას ხელი არასოდეს გავუშვა. იეჰოვა ყოველთვის პოულობს გზას, რომ განმიმტკიცოს იმედი და სიმშვიდე და სიხარული მომცეს.

ანატოლი მარუნოვი

დაბადების წელი: 1953 (იზმაილი, უკრაინა)

ბიოგრაფია: პენსიაში გასვლამდე მუშაობდა გრაფიკულ დიზაინერად ერთ-ერთ გამომცემლობაში.

დაქორწინდა ალევტინაზე 1975 წელს. ჰყავთ ორი ვაჟი.

პირველად ალევტინამ დაიწყო ბიბლიის შესწავლა და მოინათლა 1994 წელს. ანატოლი, რომელიც იმ დროს გაზეთის რედაქციაში მუშაობდა, ძალიან მოიხიბლა ჩვენი პუბლიკაციების საბეჭდი მასალის ხარისხით. მოგვიანებით ბიბლიური წინასწარმეტყველებებით დაინტერესდა და 1999 წელს მოინათლა.

პირადი გამოცდილება

როგორ ემზადებოდით დევნისთვის?

მე და ჩემს ცოლს არასოდეს გვიფიქრია, რომ პოლიცია გვერდს აგვივლიდა. ამიტომ სათანადოდ ვემზადებოდით და ყურადღებით ვკითხულობდით დღის მუხლს, თითოეულ სტატიას და კრების შეხვედრაზე ნათქვამ ყოველს სიტყვას გულისყურით ვისმენდით, მათ შორის განცხადებებს. დღემდე ვცდილობთ, წერილობითი სახით მიღებულ მითითებებსაც სერიოზულად მოვეკიდოთ.

რა გეხმარება მოთმინების შენარჩუნებაში?

იმ ყველაფრისადმი მადლიერება, რაც ჩვენმა ზეციერმა მამამ ჩემთვის და ჩემი ოჯახისთვის გააკეთა, მეხმარება, არ დავნებდე. განსაკუთრებით მადლიერი ვარ იმ მომავლისთვის, რასაც ის მორჩილ ადამიანებს ჰპირდება. ვიცით, რომ აღსასრული ახლოვდება. ახლა არ არის იმის დრო, რომ მოთმინება დავკარგო, მით უმეტეს, რომ ყოველთვის ვგრძნობ იეჰოვას მხარდაჭერას.

სერგეი ტოლოკონიკოვი

დაბადების წელი: 1972 (მოსკოვი)

ბიოგრაფია: დაქორწინდა მარიაზე 2004 წელს. 2003 წელს მარიამ ბიბლიის შესწავლა დაიწყო. სერგეი ძალიან კმაყოფილი იყო იმით, რომ თავის შეკითხვებზე ბიბლიიდან იღებდა პასუხებს. ამიტომ მალევე შეუერთდა მეუღლეს ბიბლიის შესწავლაში. ორივენი 2005 წელს მოინათლნენ.

პირადი გამოცდილება a

როგორ უკავშირდები მეუღლეს?

ჩვენ ძირითადად წერილების საშუალებით ვურთიერთობთ. სერგეი ბევრ ბიბლიურ მუხლს და ეპიზოდს იხსენიებს თავის წერილებში; მიგზავნის ბარათებს და ისეთ ნახატებსაც, რომლებიც ღიმილს მგვრის. ახლახან უფლება მომცეს, თვეში ორჯერ მოვინახულო სერგეი საათ-ნახევრის განმავლობაში. ჩემი სახლიდან ციხემდე სამი საათის სავალი გზაა. ასე რომ, ერთი ვიზიტისთვის მთელი დღე მჭირდება.

რა ისწავლე ამ პერიოდში?

მეც და სერგეიც დავრწმუნდით, რომ იეჰოვა ყველაფერს აკონტროლებს. ის არ დაუშვებს, რომ ვინმემ, იქნება ეს პროკურორი, მოსამართლე, გამომძიებელი თუ სხვა, გამოუსწორებელი ზიანი მოგვაყენოს.

რომანი, ანატოლი და სერგეი ჩვენთვის რწმენის ცოცხალი მაგალითები არიან. გვჯერა, რომ, როგორ რთულ სიტუაციაშიც არ უნდა აღმოვჩნდეთ, იეჰოვა ჩვენ გვერდით იქნება და არაფერი შეგვაშინებს (ფსალმუნი 23:4).

დროის დიაგრამა

2021 წლის 20 ოქტომბერი

მოსკოვში სამართალდამცავებმა ჩხრეკა ჩაატარეს იეჰოვას მოწმეთა რვა სახლში. სასამართლო საქმე აღიძრა რომანის, ანატოლისა და სერგეის წინააღმდეგ. მათ ბრალად დასდეს ექსტრემისტული ორგანიზაციის საქმიანობის ორგანიზება და სხვებზე ზეგავლენის მოხდენა ამ საქმიანობაში ჩართვის მიზნით. სამივე ძმა პოლიციის განყოფილებაში გადაიყვანეს.
2021 წლის 22 ოქტომბერი

რომანი და სერგეი დროებითი მოთავსების იზოლატორში გადაიყვანეს, ანატოლის კი შინაპატიმრობა შეუფარდეს.
2022 წლის 17 ივნისი

დაიწყო სასამართლო მოსმენა.

a ინტერვიუ აღებულია სერგეის მეუღლისგან, მარია პანკოვასგან, რადგან ამ სტატიის მომზადების დროს სერგეი დაკავებული იყო. დაქორწინების შემდეგ მარიას გვარი არ შეუცვლია.

შეიძლება აგრეთვე დაგაინტერესოთ

ᲡᲘᲐᲮᲚᲔᲔᲑᲘ

რწმენის გამო დაპატიმრებულები — რუსეთი

იეჰოვას მოწმეებს რუსეთში რწმენის გამო აპატიმრებენ. გაეცანით მათ ისტორიებს და ნახეთ ყველა იმ იეჰოვას მოწმის ჩამონათვალი, რომლებიც ამჟამად იმყოფებიან პატიმრობაში. შესაძლებელია ამ სიის ამობეჭდვაც.

ᲡᲘᲐᲮᲚᲔᲔᲑᲘ