31 ᲘᲐᲜᲕᲐᲠᲘ, 2022 | ᲒᲐᲜᲐᲮᲚᲔᲑᲣᲚᲘ ᲘᲜᲤᲝᲠᲛᲐᲪᲘᲐ: 27 ᲛᲐᲠᲢᲘ, 2023
რუსეთი

ᲒᲐᲜᲐᲮᲚᲔᲑᲣᲚᲘ ᲘᲜᲤᲝᲠᲛᲐᲪᲘᲐ — ᲡᲐᲡᲯᲔᲚᲘᲡ ᲪᲕᲚᲘᲚᲔᲑᲐ | ლუდმილა სალიკოვას იეჰოვა აძლიერებს და ანუგეშებს

მოსმენა

2023 წლის 23 მარტს ჩელიაბინსკის საოლქო სასამართლომ მეორე სარჩელის საპასუხოდ ლუდმილა სალიკოვას წინააღმდეგ გამოტანილი ექვსწლიანი პირობითი სასჯელი ორწელიწად-ნახევრამდე შეამცირა. მისთვის გამოტანილი განაჩენი არ ითვალისწინებს თავისუფლების აღკვეთას.

2022 წლის 17 მარტს ჩელიაბინსკის საოლქო სასამართლომ არ დააკმაყოფილა ლუდმილა სალიკოვას საჩივარი.

2022 წლის 20 იანვარს სნეჟინსკის საქალაქო სასამართლომ (ჩელიაბინსკის ოლქი) დამნაშავედ ცნო ლუდმილა და ექვსწლიანი პირობითი სასჯელი შეუფარდა.

დროის დიაგრამა

2020 წლის ნოემბერი

სნეჟინსკში სამართალდამცავებმა იეჰოვას მოწმეების ოთხი სახლი გაჩხრიკეს, მათ შორის ლუდმილას სახლი. ჩხრეკა მის სამუშაო ადგილზეც ჩაატარეს. საბოლოოდ, მას სამსახური დაატოვებინეს.
2021 წლის 26 აგვისტო

ლუდმილას წინააღმდეგ აღიძრა სისხლის სამართლის საქმე. მას ბრალად დასდეს აკრძალული რელიგიური ორგანიზაციის შეხვედრების ორგანიზება და ქვეყანაში აკრძალული ლიტერატურის შემოტანა.
2021 წლის 8 დეკემბერი

დაიწყო სასამართლო მოსმენა.

ზოგადი ინფორმაცია

ლუდმილა სალიკოვა

დაბადების წელი: 1951 (სისერტი)

ბიოგრაფია: დაქორწინდა 1971 წელს. ჰყავს სამი ვაჟი. მეუღლე 2009 წელს დაეღუპა. ის ინჟინერ-ენერგეტიკოსად მუშაობდა თავის ქალაქში. უყვარს მოგზაურობა.

მისმა უფროსმა დამ ბიბლიის შესწავლა 1999 წელს დაიწყო. ექვსი თვის შემდეგ მას ლუდმილაც შეუერთდა. მან გაიგო, რა არის სიცოცხლის აზრი და ძალადობის, უსამართლობისა და ომების მიზეზი. მიღებულმა პასუხებმა დაარწმუნა, რომ ჭეშმარიტება იპოვა. მოინათლა 2002 წელს.

პირადი გამოცდილება

როგორ დაგაახლოვა იეჰოვასთან ამ განსაცდელებმა?

სანამ ჩემ წინააღმდეგ საქმე აღიძვრებოდა, ხშირად ჩემი თავის მიმართ ძალიან კრიტიკული ვიყავი და ვფიქრობდი, რომ იეჰოვა არ მაფასებდა. ამ განსაცდელმა სულ სხვანაირად შემახედა ამ საკითხს. ახლა უკვე აღარ მიჭირს, ღვთის სიყვარულში დავარწმუნო საკუთარი თავი. კარგად დავინახე, როგორ ვუყვარვარ იეჰოვას და როგორ მენდობა. წინააღმდეგ შემთხვევაში ის არ მარგუნებდა სასამართლოს წინაშე მისი სახელის განდიდების პატივს. ნებისმიერი სიტუაცია, რომელსაც იეჰოვა დაუშვებს, ჩემთვის კიდევ ერთი შესაძლებლობა იქნება, რომ მისი ნდობა გავამართლო.

ხომ არ გახსენდება რომელიმე და-ძმის სიტყვები, რომელმაც განსაკუთრებით გაგამხნევა?

პირველი პროცესის წინ ძალიან ვნერვიულობდი, ამიტომ ასე ვილოცე: „იეჰოვა, გთხოვ, მომეცი შენი წმინდა სული. გევედრები, იეჰოვა!“. სულ მოკლე ხანში ერთი დისგან შეტყობინება მივიღე. ის ასეთ რამეს მწერდა: „რწმენის გამოცდა რაღაცით სარეცხ მანქანას ჰგავს. ის აქეთ-იქით გატრიალებს, გაბრუნებს და გწურავს. სამაგიეროდ, ბოლოს სუფთა ხარ, იმაზე ბევრად უკეთესი, ვიდრე მანამდე იყავი. მთელი ამ ხნის მანძილზე ჩხრეკების, დაკითხვების და პროცესების დროს, რასაც ჰქვია, ბოლომდე გაიწურე. თუმცა ყველა ამ განსაცდელის წყალობით კიდევ უფრო ძვირფასი ადამიანი გახდი როგორც იეჰოვასთვის, ისე თითოეული ჩვენგანისთვის. დარწმუნებული ვართ, რომ ხვალ, სასამართლოს დროს, იეჰოვა თავის ძლიერ მკლავებში მოგაქცევს“. მივხვდი, რომ ეს იეჰოვასგან იყო. მას კარგად ესმოდა, რა მდგომარეობაში ვიყავი, ამიტომ ამ დის მეშვეობით კიდევ ერთხელ დამარწმუნა თავის სიყვარულში.

აშკარაა, იეჰოვა აძლიერებს და ანუგეშებს რუსეთში მცხოვრებ ჩვენს და-ძმებს. ჩვენი მოსიყვარულე ზეციერი მამა გვარწმუნებს, რომ ის გაუჩენს „სამართალს ობოლსა და ჩაგრულს, რათა ვეღარ შეაშინოს ისინი დედამიწის მკვიდრმა, მოკვდავმა კაცმა“ (ფსალმუნი 10:18).

შეიძლება აგრეთვე დაგაინტერესოთ

ᲡᲘᲐᲮᲚᲔᲔᲑᲘ

რწმენის გამო დაპატიმრებულები — რუსეთი

იეჰოვას მოწმეებს რუსეთში რწმენის გამო აპატიმრებენ. გაეცანით მათ ისტორიებს და ნახეთ ყველა იმ იეჰოვას მოწმის ჩამონათვალი, რომლებიც ამჟამად იმყოფებიან პატიმრობაში. შესაძლებელია ამ სიის ამობეჭდვაც.

ᲡᲘᲐᲮᲚᲔᲔᲑᲘ