უკრაინაში მცხოვრები იეჰოვას მოწმეები სიხარულით შეეგებნენ სპეციალურ კონგრესზე ლვოვში ჩასულ და-ძმებს. კონგრესი 2018 წლის 6—8 ივლისს გაიმართა. 3 300-ზე მეტი დელეგატი ჩავიდა უკრაინაში 9 ქვეყნიდან იმისთვის, რომ მიეღოთ სულიერი საზრდო კონგრესზე, სახელწოდებით „იყავით გაბედულები!“ გარდა ამისა, სტუმრები დიდად გაამხნევა უკრაინელი და-ძმების სტუმართმოყვარეობამ და გულთბილმა დახვედრამ.

სამზადისი 2017 წლის აპრილში დაიწყო; მომდევნო 15 თვის განმავლობაში ადგილობრივი მოწმეები თავს არ ზოგავდნენ, რომ კარგად მომზადებულიყვნენ კონგრესისთვის და ჩამოსული და-ძმებისთვის სათანადო მასპინძლობა გაეწიათ. სტუმრები გაეცნენ უკრაინის კულტურას, ნახეს და მოისმინეს უკრაინული ხალხური ცეკვები და სიმღერები და დააგემოვნეს ტრადიციული კერძები. მოეწყო ექსკურსიები ადგილობრივ მუზეუმებში, უძველეს ციხე-სიმაგრეებსა და გასაოცარი სილამაზის კარპატების მთებში. განსაკუთრებით აღსანიშნავია ის, რომ სტუმრებს შესაძლებლობა მიეცათ, ადგილობრივ და-ძმებთან ერთად მიეღოთ მონაწილეობა სამქადაგებლო მსახურებაში.

კონგრესი ლვოვის არენაზე გაიმართა. დამსწრეთა უმაღლესმა რიცხვმა 25 000-ს გადააჭარბა. ზოგი მოხსენება 15 სხვადასხვა სტადიონსა და მრავალ სამეფო დარბაზში გადაიცემოდა მთელი ქვეყნის მასშტაბით. მთლიანობაში, პროგრამა 125 000-ზე მეტმა ადამიანმა მოისმინა; მონათლულთა რიცხვმა შეადგინა 1 420.

ივან რიჰერმა, უკრაინის ფილიალის წარმომადგენელმა, აღნიშნა: „ჩვენ დიდი მონდომებით ჩავებით ამ განსაკუთრებული მოვლენისთვის მზადების საქმეში, რათა სათანადოდ დავხვედროდით სხვადასხვა ქვეყნიდან ჩამოსულ და-ძმებს. სიამოვნებით გავუწიეთ ჩვენს ძვირფას სტუმრებს მასპინძლობა; ყველამ ვიგრძენით ერთიანობისა და გაბედულების ფასი, რაც ჩვენს დიდ ოჯახში სუფევს და რომელიც კიდევ უფრო გაძლიერდა ამ ძვირფასი ღონისძიების დროს“ (ფსალმ. 133:1).