დონეცკის ოლქში საომარი მოქმედებების გაძლიერების შემდეგ, ძმა მიკოლა ბოჟედომოვმა რამდენიმე რეისი გააკეთა კრამატორსკში, რათა საომარი ზონიდან, რაც შეიძლება მეტი თანამორწმუნე გამოეყვანა.

სამწუხაროდ, 8 აპრილს, კრამატორსკის რკინიგზის სადგურის აფეთქებისას ძმა მიკოლა დაიღუპა. ის 58 წლის იყო.

აფეთქებას 50-ზე მეტი ადამიანის სიცოცხლე შეეწირა, რომელთა შორის, მიკოლას გარდა, ერთი ჩვენი დაც იყო. დაშავდა 100-ზე მეტი ადამიანი, მათ შორის ერთი ჩვენი ძმა. ჩვენი თანაქრისტიანები, რომლებიც აფეთქებას გადაურჩნენ, იხსენებენ, როგორ მოჰყვა ორ გამაყრუებელ აფეთქებას ჭურვების სროლა.

მიკოლას მეუღლე, ნინა ამბობს: „ჩემი მეუღლე სხვების ინტერესებს ყოველთვის საკუთარზე წინ აყენებდა. ის განსაკუთრებით ცდილობდა, ხანში შესულ და ფიზიკურად დაუძლურებულ და-ძმებს დახმარებოდა. და-ძმების გამოსაყვანად ყოველი მისი გამგზავრება კრამატორსკში უფრო და უფრო სახიფათო ხდებოდა. ეს მისი ბოლო რეისი უნდა ყოფილიყო“.

მიკოლასა და ნინას 32-წლიანი ქორწინება აკავშირებდათ. ორივენი 1997 წელს მოინათლნენ. მიკოლა მრავალი წელი კრებაში უხუცესად მსახურობდა და ერთგულად ასრულებდა ამ დავალებას. თანამორწმუნეები მხარში უდგანან ნინას და თავიანთ სიყვარულსა და მხარდაჭერაში არწმუნებენ. ნინა ამბობს: „და-ძმების მანუგეშებელი სიტყვები ძალიან მეხმარება ამ მძიმე წუთებში“.

ნინას ნუგეშს ბიბლიის კითხვაც ჰგვრის. მას განსაკუთრებით აძლიერებს ესაიას 40:28—31-ში ჩაწერილი სიტყვები. ის გვიზიარებს: „იეჰოვა მეხმარება ძალის მოკრებაში. მისგან განსაკუთრებულ სიყვარულს ვგრძნობ. ადრე მხოლოდ პუბლიკაციებში ვკითხულობდი, როგორ ავლენდა იეჰოვა ასეთ სიყვარულს ჩვენი და-ძმების მიმართ, მაგრამ ახლა ეს საკუთარ თავზეც გამოვცადე“.

ვლოცულობთ ნინასთვის და იმ და-ძმებისთვის, რომლებმაც ომში საყვარელი ადამიანები დაკარგეს. ვიცით, იეჰოვა კვლავაც ანუგეშებს და გააძლიერებს მათ (ფსალმუნი 20:2).