1993 წლის 7 აგვისტოს კიევში გაიმართა საერთაშორისო კონგრესი, სახელწოდებით „ღვთიური სწავლება“, რომელსაც 16 ქვეყნიდან თითქმის 65 000 ადამიანი დაესწრო და 7 402 ადამიანი მოინათლა. იეჰოვას ხალხის თანამედროვე ისტორიაში ასეთი ფართომასშტაბიანი ნათლობა არასდროს ყოფილა. დღემდე არ ავიწყდებათ ეს განსაკუთრებული მოვლენა იმ და-ძმებს, რომლებიც მაშინ მოინათლნენ.

მონათლულთა შორის იყვნენ ვოლოდიმირი და მისი მეუღლე ალა. მაშინ ეს წყვილი პირველად დაესწრო კონგრესს. ისინი იხსენებენ: „მანამდე მხოლოდ პუბლიკაციებში ვკითხულობდით მსოფლიო საძმოს შესახებ, მაგრამ კონგრესზე საკუთარი თვალით ვნახეთ, როგორი საძმო გვყავს. მას შემდეგ ყველა კონგრესს ვესწრებით და და-ძმების მაგალითზე ვხედავთ, რომ თუ იეჰოვას პირველ ადგილზე დავაყენებთ, ნამდვილად ბედნიერები ვიქნებით“.

ერთი ძმა ოლექსანდრი იმ 50 და-ძმას შორის იყო, რომლებიც მისი კრებიდან მოინათლნენ. ის იხსენებს: „ასეთი ერთობისა და სიყვარულის შემხედვარე ცრემლებს ვერ ვიკავებდი. დავრწმუნდი, რომ მართლა მოსიყვარულე სულიერი ოჯახის წევრი ვიყავი. დღემდე იგივე ემოციები მიჩნდება, როცა კონგრესებს ვესწრები“.

ერთმა დამ, ლუდმილამ, რომელიც ამ კონგრესზე მოინათლა, აღნიშნა: „კონგრესის პროგრამამ დამანახა, რამდენად მნიშვნელოვანია სულიერი მიზნების დასახვა. სწორედ მაშინ გადავწყვიტე, მთელი ჩემი დრო იეჰოვასთვის მიმეძღვნა. ასე რომ, უკვე 28 წელია, სრული დროით ვმსახურობ. ამ წლების მანძილზე იეჰოვას არასდროს დავუტოვებივარ მხარდაჭერის გარეშე“.

1993 წელს კიევში ჩატარებული საერთაშორისო კონგრესი მართლაც დასამახსოვრებელი მოვლენა იყო. მას შემდეგ უკრაინაში მაუწყებელთა რიცხვი თითქმის გასამმაგდა. დღესაც აშკარაა, რომ იეჰოვა კურთხევებს არ აკლებს იმ უკრაინელებს, რომლებიც მისადმი მსახურებას ირჩევენ, თავს უძღვნიან მას და ინათლებიან (გამოსვლა 32:26).