მანილა, ფილიპინები — ფილიპინებზე იეჰოვას მოწმეებმა გამანადგურებელი ტაიფუნის, „ნოკ-ტენის“ („ნინა“), შედეგად დაზიანებული და დანგრეული სახლების შეკეთებასა და აშენებას გაუწიეს ორგანიზება.

2016 წლის 25 დეკემბერს მე-4 კატეგორიის გამანადგურებელმა ტაიფუნმა „ნოკ-ტენმა“ ფილიპინებზე ბიკოლის რეგიონს გადაუარა. საინფორმაციო სააგენტოები იტყობინებიან, რომ სტიქიამ 10 ადამიანი იმსხვერპლა და 390 000-ზე მეტი შენობა დააზიანა. სტიქიის შედეგად არც ერთი იეჰოვას მოწმე სერიოზულად არ დაშავებულა, თუმცა მოწმეების 300-ზე მეტი სახლი და 24 სამეფო დარბაზი (თაყვანისცემისთვის განკუთვნილი შენობა) დაზიანდა ან სრულიად განადგურდა. დაზარალებულ თანამორწმუნეთა დასახმარებლად იეჰოვას მოწმეების ადგილობრივმა ფილიალმა დაუყოვნებლივ ჩამოაყალიბა დაზარალებულთა დახმარების კომიტეტი ქალაქ ნაგაში.

დინ ჯეისეკი, იეჰოვას მოწმეთა წარმომადგენელი ფილიპინებზე, აღნიშნავს: „ამ დროისთვის ჩვენმა მოხალისეებმა თანამორწმუნეთა 271 სახლი და 22 სამეფო დარბაზი შეაკეთეს. ვფიქრობთ, რომ სამშენებლო ბრიგადები დარჩენილი 38 სახლისა და 2 სამეფო დარბაზის შეკეთებას 2017 წლის აპრილამდე დაასრულებენ“.

იეჰოვას მოწმეების მსოფლიო სამქადაგებლო საქმიანობასა და სტიქიური უბედურებით დაზარალებულთა დახმარებას ხელმძღვანელი საბჭო უწევს ორგანიზებას, რისთვისაც ნებაყოფლობით შესაწირავებს იყენებს. მთელ მსოფლიოში 8 მილიონზე მეტი იეჰოვას მოწმეა, რომელთაგან 209 000-ზე მეტი ფილიპინებზე ცხოვრობს.

საკონტაქტო პირები:

საერთაშორისო: დეივიდ სიმონიანი, საინფორმაციო სამსახური, ტელ. +1-845-524-3000

ფილიპინები: დინ ჯეისეკი, ტელ. +63-2-224-4444