ნიუ-იორკი — 2016 წლის აგვისტოში იეჰოვას მოწმეებმა დაასრულეს მსოფლიო მთავარი სამმართველოს მშენებლობა უორიკში. ამ ახალი შენობების ეკოდიზაინით მოწმეებმა დიდი აღიარება მოიპოვეს. ორგანიზაცია GBI-მ (Green Building Initiative) იეჰოვას მოწმეებს უმაღლესი ჯილდო „Four Green Globes“ (ოთხი მწვანე გლობუსი) გადასცა შვიდივე შენობისთვის, რომლებიც მათი შეფასების კრიტერიუმებს აკმაყოფილებდნენ. GBI არის ორგანიზაცია, რომელიც სერთიფიცირებას სთავაზობს კომერციული დანიშნულების შენობებს და ადგენს, რა ზემოქმედებას ახდენს ესა თუ ის შენობა გარემოზე.

შაინა ვაინშტაინი, GBI-ს მთავარი მენეჯერი, აღნიშნავს: «ქვეყნის მასშტაბით 965 პროექტიდან მხოლოდ 64-მა მიიღო უმაღლესი ჯილდო „Four Green Globes“. იეჰოვას მოწმეებისთვის ბევრს ნიშნავს ამ ჯილდოს მიღება, რადგან ეს კარგად აჩვენებს, რამდენად სერიოზულად ეკიდებიან ისინი წყლის, ელექტროენერგიისა და საწვავი რესურსების რაციონალურად გამოყენებას, ამასთანავე, გარემოს დაცვას».

GBI-ს ოფიციალური ვებ-გვერდის მიხედვით, GBI არის „არაკომერციული ორგანიზაცია, რომლის მიზანიც ეკოლოგიური მშენებლობის დანერგვაა, რაც გულისხმობს რესურსების ეფექტურად გამოყენებას და როგორც ჯანმრთელობისთვის, ისე გარემოსთვის უსაფრთხო შენობების აგებას“. ეს ორგანიზაცია აფასებს ახლად აგებულ შენობებს, მის დიზაინსა და ფუნქციონირებას, შემდეგ კი შეფასების შედეგებს აქვეყნებს. როგორც წესი, შეფასების პროცესში ჩართულია მესამე პირი, ექსპერტი, რომელიც ადგენს, რამდენად ობიექტურად ასახავს GBI-ს შეფასებები არსებულ სურათს.

დეივიდ ბინი, რომელიც შეერთებულ შტატებში იეჰოვას მოწმეთა შენობების ეკოლოგიურ დიზაინზეა პასუხისმგებელი, აღნიშნავს: „ჩვენ ძალიან ვაფასებთ ამ ჯილდოებს. ეს იმაზე მოწმობს, რომ მშენებლობაში მონაწილეები უდიდესი გულმოდგინებით უდგებოდნენ საქმეს, რათა აეშენებინათ კომპლექსი, რომელიც სანიმუშოდ ასახავდა ეკოლოგიური მშენებლობისთვის დამახასიათებელ თავისებურებებს. სწორედ ამის შედეგია, რომ მთავარი სამმართველოს შენობები შესანიშნავად ერწყმის უორიკის ტყე-პარკს“.

მოწმეების მიზანი იყო, მათ კუთვნილ ტერიტორიაზე არსებული ხეები მაქსიმალურად შეენარჩუნებინათ, ხოლო ტერიტორიის გაწმენდისას მოჭრილი ხეები სამშენებლო მასალად გამოეყენებინათ. უორიკის ტყე-პარკის ყოფილი მენეჯერი ჯეფრი ჰაჩინსონი ამბობს: „იეჰოვას მოწმეებმა ძალიან კარგი გადაწყვეტილება მიიღეს, რომ ტერიტორიის გასუფთავების მიზნით მოჭრილი ხეები სამშენებლო მასალად გამოიყენეს. მოწმეები ქებას იმსახურებენ იმისთვის, რომ გარემოს დაცვასთან დაკავშირებული საკითხები ზედმიწევნით გაითვალისწინეს“. შაინა ვაინშტაინი აღნიშნავს: „უორიკის პროექტი იმის შესანიშნავ მაგალითს წარმოადგენს, თუ როგორი უნდა იყოს ეკოლოგიური დიზაინი და მშენებლობა“.

უორიკის სამშენებლო კომიტეტის თავმჯდომარე რიჩარდ დევაინი გვიყვება: „ათწლეულების განმავლობაში ჩვენი ორგანიზაცია ყოველმხრივ ცდილობდა, ბრწყინვალე იერსახე შეენარჩუნებინა ბრუკლინში არსებული ჩვენი შენობებისთვის. გადაწყვეტილი გვაქვს, მსგავსადვე ვიზრუნოთ ჩვენს ახალ კომპლექსზე და, ამასთანავე, უორიკის ტყე-პარკს ბუნებრივი სილამაზე არ დავუკარგოთ“.

საკონტაქტო პირი:

დეივიდ სიმონიანი, საინფორმაციო სამსახური, ტელ. +1-845-524-3000