გამოსვლა 16:1—36
16 დაიძრნენ ისინი ელიმიდან,+ და ეგვიპტის მიწიდან მათი გამოსვლის მეორე თვის მეთხუთმეტე დღეს მივიდა ისრაელის ძეების მთელი კრებული ელიმსა და სინას შორის მდებარე სინის უდაბნოში.+
2 დაიწყო დრტვინვა ისრაელის ძეების მთელმა კრებულმა უდაბნოში მოსესა და აარონის წინააღმდეგ.+
3 ეუბნებოდნენ მათ ისრაელის ძეები: „ნეტავ დავხოცილიყავით+ იეჰოვას ხელით ეგვიპტის მიწაზე, ხორცით სავსე ქოთნებს რომ ვუსხედით+ და პურს ძღომამდე ვჭამდით. გამოგვიყვანეთ ამ უდაბნოში, მთელი კრებული შიმშილით რომ დაგვხოცოთ“.+
4 უთხრა იეჰოვამ მოსეს: „პურს გაწვიმებთ ციდან;+ ყოველდღე გავიდეს ხალხი და შეაგროვოს თითოეულმა თავისი სამყოფი,+ რათა გამოვცადო ისინი, ივლიან თუ არა ჩემი კანონით.+
5 მეექვსე დღეს მოამზადონ+ და შინ წაიღონ იმაზე ორჯერ მეტი, რასაც ყოველდღე იღებენ“.+
6 უთხრეს მოსემ და აარონმა ისრაელის ყველა ძეს: „საღამოს გაიგებთ, რომ იეჰოვამ გამოგიყვანათ ეგვიპტის მიწიდან.+
7 დილით კი დაინახავთ იეჰოვას დიდებას,+ რადგან გაიგონა იეჰოვამ, რომ მის წინააღმდეგ დრტვინავდით. ჩვენ ვინა ვართ, რომ ჩვენ წინააღმდეგ დრტვინავთ?!“
8 განაგრძო მოსემ: „საღამოს იეჰოვა ხორცს მოგცემთ საჭმელად, დილით კი — პურს გასაძღომად, რადგან გაიგონა იეჰოვამ, რომ მის წინააღმდეგ დრტვინავთ. ჩვენ ვინა ვართ?! თქვენ ჩვენ წინააღმდეგ კი არა, იეჰოვას წინააღმდეგ დრტვინავთ“.+
9 უთხრა მოსემ აარონს: «უთხარი ისრაელის ძეების მთელ კრებულს: „წარდექით იეჰოვას წინაშე, რადგან გაიგონა მან თქვენი დრტვინვა“».+
10 როცა ელაპარაკა აარონი ისრაელის ძეების მთელ კრებულს, შებრუნდნენ ისინი უდაბნოსკენ, და რას ხედავენ! იეჰოვას დიდება გამოჩნდა ღრუბელში.+
11 უთხრა იეჰოვამ მოსეს:
12 «გავიგონე ისრაელის ძეების დრტვინვა.+ უთხარი მათ: „ორ საღამოს შორის* შეჭამთ ხორცს, დილით კი პურით გაძღებით+ და გაიგებთ, რომ მე ვარ იეჰოვა, თქვენი ღმერთი“».+
13 ასეც მოხდა. მოევლინა საღამო ხანს მწყერი+ და დაფარა ბანაკი, დილით კი ბანაკის გარშემო მიწა ნამით იყო დაფარული.+
14 ნამის აორთქლების შემდეგ უდაბნოს ზედაპირზე გამოჩნდა რაღაც ხრაშუნა,+ თრთვილივით წვრილი.+
15 ეს რომ ისრაელის ძეებმა დაინახეს, ერთმანეთს ეკითხებოდნენ, ეს რა არისო, რადგან არ იცოდნენ, რა იყო. მოსემ უთხრა მათ: «ეს ის პურია, რომელიც იეჰოვამ მოგცათ საჭმელად.+
16 ასე ბრძანა იეჰოვამ: „აკრიფეთ თითოეულმა იმდენი, რამდენსაც შეჭამთ. აიღეთ კაცზე თითო ომერი*+ იმ სულთა რაოდენობის მიხედვით, რამდენიც კარავში გყავთ“».
17 ასეც მოიქცნენ ისრაელის ძეები. აკრიფეს, ზოგმა — ბევრი, ზოგმა კი — ცოტა.
18 აწყვეს ომერით და არც ბევრის შემგროვებელს ჰქონია ზედმეტი და არც ცოტას შემგროვებელს — ნაკლები.+ თითოეულმა იმდენი აიღო, რამდენსაც შეჭამდა.
19 უთხრა მოსემ მათ: „დილამდე არავინ არაფერი დატოვოს“.+
20 მაგრამ არ მოუსმინეს მოსეს. როცა ზოგიერთი დილამდე ტოვებდა, მატლი უჩნდებოდა მას და ყარდა.+ განურისხდა მათ მოსე.+
21 დილაობით თითოეული იმდენს აგროვებდა,+ რამდენსაც შეჭამდა. მზე რომ დააცხუნებდა, ის დნებოდა.
22 მეექვსე დღეს ორჯერ მეტი პური შეაგროვეს,+ კაცზე ორი ომერი. მივიდნენ მოსესთან კრებულის თავკაცები და შეატყობინეს ეს.
23 მან უთხრა: „აი რა თქვა იეჰოვამ. ხვალ შაბათის დღესასწაულია, იეჰოვას წმინდა შაბათი.+ რასაც გამოაცხობთ, გამოაცხვეთ, და რასაც მოხარშავთ, მოხარშეთ;+ ხოლო რაც მოგრჩებათ, დილამდე შეინახეთ“.
24 მათაც შეინახეს დილამდე, როგორც მოსემ ბრძანა; არც აყროლებულა ის და არც მატლი გასჩენია.+
25 თქვა მოსემ: „ჭამეთ ის დღეს, რადგან დღეს იეჰოვას შაბათია.+ დღეს ვერ იპოვით მას მინდორში.
26 ექვს დღეს შეაგროვებთ, მეშვიდე დღე კი შაბათია.+ მაშინ არაფერი იქნება“.
27 მაინც გავიდა ზოგი მეშვიდე დღეს მოსაგროვებლად, თუმცა ვერაფერი იპოვეს.
28 უთხრა იეჰოვამ მოსეს: „ხალხო, როდემდე არ უნდა იცავდეთ ჩემს მცნებებსა და კანონებს?+
29 გახსოვდეთ, რომ იეჰოვამ მოგცათ შაბათი.+ ამიტომ გაძლევთ ის მეექვსე დღეს ორი დღის პურს. დარჩით თქვენ-თქვენს ადგილზე+ და არავინ გავიდეს თავისი ადგილიდან მეშვიდე დღეს“.
30 იზეიმა ხალხმა შაბათი მეშვიდე დღეს.+
31 უწოდა მას ისრაელის სახლმა „მანანა“*. ქინძის თესლივით თეთრი იყო ის და თაფლიანი კვერის გემო ჰქონდა.+
32 შემდეგ თქვა მოსემ: «აი რა ბრძანა იეჰოვამ: „აიღეთ ის, ერთი ომერი, თაობიდან თაობაში შესანახად,+ რათა ნახონ მათ ის პური, რომელსაც უდაბნოში გაჭმევდით, როცა ეგვიპტის მიწიდან გამოგიყვანეთ“».+
33 უთხრა მოსემ აარონს: „აიღე დოქი, ჩაყარე მასში ერთი ომერი მანანა და დადგი იეჰოვას წინაშე თაობიდან თაობაში შესანახად“.+
34 როგორც იეჰოვამ უბრძანა მოსეს, დადგა ის აარონმა შესანახად მოწმობის კიდობნის*+ წინ.
35 ორმოცი წელი ჭამდნენ ისრაელის ძეები მანანას,+ სანამ დასახლებულ მიწაზე მივიდოდნენ.+ მანანას ჭამდნენ ისინი, სანამ ქანაანის მიწის საზღვრამდე მივიდოდნენ.+
36 ომერი ეფის* მეათედია.
სქოლიოები
^ იხილეთ 12:6-ის სქოლიო.
^ დაახლოებით 2,2 ლიტრი. იხილეთ დანართი 6ა.
^ შესაძლოა ნიშნავდეს: „ეს რა არის?“ (ებრ. მან ჰუ). იხილეთ მე-15 მუხლი.
^ როგორც ჩანს, ეს იყო კიდობანი, რომელშიც ინახებოდა მნიშვნელოვანი საბუთები.
^ დაახლოებით 22 ლიტრი. იხილეთ დანართი 6ა.
