გამოსვლა 18:1—27
18 გაიგო ითრომ, მიდიანის მღვდელმა, მოსეს სიმამრმა,+ ყველაფერი, რაც ღმერთმა გაუკეთა მოსესა და ისრაელს, თავის ხალხს, როგორ გამოიყვანა იეჰოვამ ისრაელი ეგვიპტიდან.+
2 წამოიყვანა ითრომ, მოსეს სიმამრმა ციფორა, მოსეს ცოლი, რომელიც მანამდე გაგზავნილი ჰყავდა,
3 და მისი ორი ვაჟი,+ რომელთაგან ერთს ერქვა გერშომი*,+ რადგან ამბობდა ხიზანი გავხდიო უცხო მიწაზე,
4 მეორეს კი ელიეზერი*,+ რადგან ამბობდა მამაჩემის ღმერთია ჩემი შემწე, ვინაიდან მან მიხსნაო ფარაონის მახვილისგან.+
5 მივიდნენ მოსესთან ითრო, მოსეს სიმამრი, მისი ვაჟები და ცოლი უდაბნოში, სადაც ის იყო დაბანაკებული, ჭეშმარიტი ღვთის მთაზე.+
6 შეუთვალა მან მოსეს: „მოვედი შენი სიმამრი ითრო,+ შენს ცოლთან და ორივე ვაჟთან ერთად“.
7 მაშინვე გავიდა მოსე თავის სიმამრთან შესახვედრად, მიწაზე დაემხო და გადაკოცნა ის;+ ერთმანეთი მოიკითხეს და კარავში შევიდნენ.
8 მოუყვა მოსე თავის სიმამრს ყველაფერს, რაც იეჰოვამ ისრაელის გამო გაუკეთა ფარაონსა და ეგვიპტეს;+ იმ სიძნელეების შესახებაც მოუყვა, რაც მათ გზად შეხვდათ,+ და ისიც, როგორ იფარავდა მათ იეჰოვა.+
9 გაიხარა ითრომ იმ ყოველივე კარგის გამო, რაც იეჰოვამ ისრაელს გაუკეთა, როცა იხსნა ისინი ეგვიპტის ხელიდან.+
10 თქვა ითრომ: „კურთხეული იყოს იეჰოვა, რომელმაც დაგიხსნათ ეგვიპტისა და ფარაონის ხელიდან და დაიხსნა ხალხი ეგვიპტის ხელიდან.+
11 ახლა კი ვიცი, რომ ყველა სხვა ღმერთზე+ დიდია იეჰოვა. ეს მაშინ გამოჩნდა, როცა ეგვიპტელები კადნიერად იქცეოდნენ მათ წინააღმდეგ“.
12 შემდეგ აიღო ითრომ, მოსეს სიმამრმა, დასაწვავი შესაწირავი და მსხვერპლი ღვთისთვის შესაწირავად.+ მივიდნენ აარონი და ისრაელის ყველა უხუცესი ღვთის წინაშე მოსეს სიმამრთან პურის საჭმელად.+
13 მომდევნო დღეს, ჩვეულებისამებრ, დაჯდა მოსე, რომ ხალხისთვის სამართალი გაეჩინა;+ ხალხიც დილიდან საღამომდე იდგა მოსეს წინაშე.
14 დაინახა მოსეს სიმამრმა, რასაც აკეთებდა ის ხალხისთვის და უთხრა: „ხალხს რას უკეთებ?! რატომ ზიხარ მარტო, მთელი ხალხი კი შენ წინაშე დგას დილიდან საღამომდე?“
15 მიუგო მოსემ თავის სიმამრს: „მოდის ხალხი ჩემთან, რომ ღმერთს დავეკითხო.+
16 როცა რამე საქმე წამოეჭრებათ,+ ეს საქმე ჩემთან მოდის; მე უნდა გავუჩინო სამართალი ერთსაც და მეორესაც და ვამცნო ჭეშმარიტი ღვთის გადაწყვეტილებები და მისი კანონები“.+
17 ამაზე მოსეს სიმამრმა მიუგო მას: „არ არის კარგი, როგორც აკეთებ.
18 შენც დაიქანცები და შენთან მყოფი ხალხიც, რადგან მეტისმეტად დიდი ტვირთია შენთვის ეს საქმე.+ ამას მარტო ვერ გააკეთებ.+
19 მომისმინე,+ რჩევას მოგცემ და ღმერთი იქნება შენთან.+ იყავი ხალხის წარმომადგენელი ჭეშმარიტი ღვთის წინაშე+ და წარუდგინე ჭეშმარიტ ღმერთს მათი საქმეები.+
20 გააფრთხილე ისინი, რომ დაიცვან წესები და კანონები,+ ამცნე ის გზა, რომლითაც უნდა იარონ, და ის საქმე, რომელიც უნდა აკეთონ.+
21 შენ კი ამოარჩიე მთელი ხალხიდან უნარიანი,+ ღვთისმოშიში,+ სანდო+ და უკანონო შემოსავლის მოძულე კაცები;+ დააყენე ისინი ათასისთავებად,+ ასისთავებად, ორმოცდაათისთავებად და ათისთავებად.+
22 მათ გაუჩინონ სამართალი ხალხს საჭიროებისამებრ; ყველა დიდი საქმე შენთან მოიტანონ,+ ყველა პატარა საქმე კი თავად განსაჯონ. ასე შეიმსუბუქე საქმე და შენთან ერთად მათაც ატარონ ეს ტვირთი.+
23 თუ ასე გააკეთებ, და ღმერთიც გიბრძანებს, მაშინ გაუმკლავდები ამას და მთელი ეს ხალხიც მშვიდობით მივა თავის ადგილზე“.+
24 მაშინვე ყურად იღო მოსემ თავისი სიმამრის ნათქვამი და ყველაფერი ისე გააკეთა, როგორც მან უთხრა.+
25 ამოარჩია მოსემ მთელი ისრაელიდან უნარიანი კაცები და დააყენა ისინი ხალხის თავკაცებად:+ ათასისთავებად, ასისთავებად, ორმოცდაათისთავებად და ათისთავებად.
26 უჩენდნენ ისინი ხალხს სამართალს საჭიროებისამებრ. რთული საქმე მოსესთან მიჰქონდათ,+ პატარა საქმეებს კი თავად განსჯიდნენ.
27 გააცილა მოსემ თავისი სიმამრი+ და დაადგა ის თავის ქვეყანაში მიმავალ გზას.
