გამოსვლა 20:1—26
20 თქვა ღმერთმა ეს სიტყვები:+
2 „მე ვარ იეჰოვა, შენი ღმერთი,+ რომელმაც გამოგიყვანე ეგვიპტის მიწიდან, მონობის სახლიდან.+
3 არ გყავდეს სხვა ღმერთები+ ჩემ გარდა.
4 არ გაიკეთო არც ქანდაკება და არც არანაირი მსგავსება იმისა, რაც მაღლა ცაშია, რაც დაბლა მიწაზეა და რაც წყალშია, მიწის ქვემოთ.+
5 არ სცე მათ თაყვანი და არ ემსახურო,+ რადგან მე, იეჰოვა, შენი ღმერთი, განსაკუთრებული ერთგულების+ მომთხოვნი ღმერთი* ვარ, ვსჯი ძეებს მესამე და მეოთხე თაობამდე ჩემი მოძულე მამების დანაშაულის გამო,+
6 მაგრამ მეათასე თაობამდე ვავლენ სიკეთეს* მათ მიმართ, ვისაც ვუყვარვარ და ვინც იცავს ჩემს მცნებებს.+
7 არ ახსენო უღირსად+ შენი ღვთის, იეჰოვას სახელი, რადგან დაუსჯელს არ დატოვებს იეჰოვა მას, ვინც უღირსად ახსენებს მის სახელს.+
8 გახსოვდეს შაბათი დღე, რომ წმინდა ჰყო იგი,+
9 იმუშავე და ექვს დღეს აკეთე შენი საქმეები;+
10 მეშვიდე დღე კი შენი ღვთის, იეჰოვას შაბათია.+ არანაირი საქმე არ გააკეთო არც შენ, არც შენმა ვაჟმა, არც შენმა ასულმა, არც შენმა მონამ, არც შენმა მხევალმა, არც შენმა შინაურმა ცხოველმა და არც შენი კარიბჭის შიგნით მცხოვრებმა ხიზანმა;+
11 ვინაიდან ექვს დღეს ქმნიდა იეჰოვა ცას, დედამიწას, ზღვასა და ყველაფერს, რაც მათშია,+ და მეშვიდე დღეს დაისვენა.+ ამიტომ აკურთხა იეჰოვამ შაბათი დღე და წმინდა ჰყო ის.+
12 პატივი ეცი მამას და დედას,+ რათა დღეგრძელი იყო იმ მიწაზე, რომელსაც იეჰოვა, შენი ღმერთი გაძლევს.+
13 არ მოკლა.+
14 არ იმრუშო.+
15 არ მოიპარო.+
16 არ გამოხვიდე ცრუმოწმედ შენი მოძმის წინააღმდეგ.+
17 არ ისურვო შენი მოძმის სახლი, არ ისურვო შენი მოძმის ცოლი,+ არც მისი მონა, არც მისი მხევალი, არც მისი ხარი, არც მისი ვირი და არაფერი, რაც შენი მოძმისაა“.+
18 ესმოდა მთელ ხალხს ქუხილისა და საყვირის ხმა და ხედავდნენ ელვასა და კვამლს, რომელიც მთას ასდიოდა. თრთოდა ხალხი ნანახისა და მოსმენილის გამო და მოშორებით იდგნენ.+
19 უთხრეს მათ მოსეს: „შენ გველაპარაკე და ჩვენ მოგისმენთ, ოღონდ ღმერთი ნუ დაგველაპარაკება, თორემ დავიხოცებით“.+
20 მიუგო მოსემ ხალხს: „ნუ გეშინიათ, რადგან თქვენ გამოსაცდელად მოვიდა ჭეშმარიტი ღმერთი,+ რომ გქონდეთ მისი შიში და არ შესცოდოთ“.+
21 მოშორებით იდგა ხალხი, მოსე კი მიუახლოვდა შავ ღრუბელს, სადაც ჭეშმარიტი ღმერთი იყო.+
22 უთხრა იეჰოვამ მოსეს:+ «ასე უთხარი ისრაელის ძეებს: „თქვენი თვალით იხილეთ, რომ ზეციდან გელაპარაკეთ.+
23 არ გააკეთოთ ვერცხლისა და ოქროს ღმერთები და არ გყავდეთ ისინი ჩემ გვერდით.+
24 მიწისგან+ ამიგე სამსხვერპლო და ზედ შესწირე დასაწვავი მსხვერპლი და მშვიდობის მსხვერპლი*, შენი ცხვარ-ძროხა.+ ყოველ ადგილას, სადაც სამახსოვროს გავხდი ჩემს სახელს, მოვალ შენთან და გაკურთხებ.+
25 თუ ქვის სამსხვერპლოს ამიგებ, თლილი ქვით არ ააგო. სატეხი არ მიაკარო, თორემ შებღალავ.+
26 არ გაუკეთო ჩემს სამსხვერპლოს საფეხურები ასასვლელად, რათა არ გამოჩნდეს მასზე შენი სასირცხო ადგილები“».
სქოლიოები
^ „განსაკუთრებული ერთგულების მომთხოვნი ღმერთი“ ანუ მოშურნე ღმერთი, რომელიც არ იწყნარებს მეტოქეობას.
^ იხილეთ 15:13-ის სქოლიო.
^ ან საზიარო მსხვერპლი.
