დაბადება 20:1—18
20 დაიძრა აბრაამი იქიდან+ და ნეგების მიწაზე დაბანაკდა. კადეშსა+ და შურს+ შორის დასახლდა და ხიზნობდა გერარში.+
2 აბრაამმა კვლავ თქვა თავის ცოლზე, ჩემი დააო.+ გერარის მეფე აბიმელექმა* კი გაგზავნა კაცები და მოაყვანინა სარა.+
3 გამოეცხადა ღმერთი აბიმელექს ღამით სიზმარში და უთხრა: „იცოდე, მოკვდები მაგ ქალის გამო, რომელიც წამოიყვანე,+ რადგან სხვისი ცოლია იგი*“.+
4 აბიმელექი ჯერ არ გაჰკარებოდა მას,+ ამიტომ უთხრა: „იეჰოვა, განა გაანადგურებ ნამდვილად მართალ ერს?+
5 მან ხომ მითხრა, ჩემი დააო, და ქალმაც — ჩემი ძმააო იგი?! ეს პატიოსანი გულითა და სუფთა ხელით გავაკეთე“.+
6 ამაზე ჭეშმარიტმა ღმერთმა მიუგო სიზმარში: „ვიცი, რომ ეს პატიოსანი გულით გააკეთე.+ მე გაკავებდი ჩემ წინააღმდეგ შეცოდებისგან;+ ამიტომ არ დავუშვი, რომ მას გაჰკარებოდი.+
7 ახლა კი დაუბრუნე ცოლი იმ კაცს, რადგან წინასწარმეტყველია იგი,+ და ის ილოცებს შენთვის.+ ასე იცოცხლებ. მაგრამ თუ არ დაუბრუნებ მას, იცოდე, რომ მოკვდებით შენც და ყველა შენიანიც“.+
8 ადგა დილით ადრე აბიმელექი, მოუხმო თავის მსახურებს და ყველაფერი თქვა მათ გასაგონად. მათ ძალიან შეეშინდათ.
9 შემდეგ მოუხმო აბიმელექმა აბრაამს და უთხრა: „ეს რა გვიყავი, რა შეგცოდე, ასეთ დიდ ცოდვაში რომ გაგვხვიე მე და ჩემი სამეფო?!+ ასეთი რამ არ უნდა გაგეკეთებინა ჩემთვის“.+
10 კვლავ უთხრა აბიმელექმა აბრაამს: „რა განზრახვით გააკეთე ეს?“+
11 აბრაამმა მიუგო: „ვფიქრობდი, არ არის აქ ღვთის შიში+ და მომკლავენ-მეთქი ჩემი ცოლის გამო, ამიტომ მოვიქეცი ასე.+
12 თანაც, მართლა ჩემი დაა იგი, მამაჩემის ქალიშვილია, მაგრამ არა დედაჩემისგან; ჩემი ცოლი გახდა.+
13 როცა ღმერთმა მამაჩემის სახლიდან წამომიყვანა,+ ვუთხარი მას, სიკეთეს*+ გამიკეთებ თუ იტყვი, სადაც მივალთ, რომ შენი ძმა ვარ-მეთქი“.+
14 მისცა აბიმელექმა აბრაამს ცხვარ-ძროხა, მსახურები და მოახლეები და დაუბრუნა მას სარა, მისი ცოლი,+
15 და უთხრა მას აბიმელექმა: „აი, ჩემი მიწა. სადაც მოგეწონოს, იქ იცხოვრე“.+
16 შემდეგ სარას უთხრა: „ათას ვერცხლს ვაძლევ შენს ძმას.+ ეს იქნება ნიშანი+ შენთან მყოფებისა და ყველას თვალში, რომ არ ყოფილხარ შეურაცხყოფილი“.
17 ილოცა აბრაამმა ჭეშმარიტი ღვთის მიმართ+ და განკურნა ღმერთმა აბიმელექი, მისი ცოლი და მხევლები და დაუბრუნდათ შვილების შობის უნარი,
18 რადგან აბრაამის ცოლის, სარას გამო, იეჰოვამ ყველა ქალს დაუხშო საშვილოსნო აბიმელექის სახლში.+
