დაბადება 26:1—35
26 აბრაამის დროინდელი შიმშილობის+ შემდეგ კიდევ ერთხელ ჩამოვარდა შიმშილობა იმ მიწაზე, რის გამოც ისაკი გერარისკენ+ გაემართა ფილისტიმელთა მეფე აბიმელექთან.
2 გამოეცხადა იეჰოვა მას და უთხრა:+ «ნუ წახვალ ეგვიპტეში. იმ მიწაზე იცხოვრე, რომელსაც გიჩვენებ.+
3 შეეხიზნე ამ მიწას,+ მე ვიქნები შენთან და გაკურთხებ; შენ და შენს შთამომავალს მოგცემთ მთელ ამ მიწებს+ და შევასრულებ იმას, რაც აბრაამს, მამაშენს შევფიცე,+
4 „ცის ვარსკვლავებივით გავამრავლებ შენს შთამომავალს, მას მივცემ მთელ ამ მიწებს+ და დედამიწის ყველა ერი შენი შთამომავლის მეშვეობით იკურთხება“»,+
5 რადგან მოუსმინა აბრაამმა ჩემს ხმას და ასრულებდა ჩემ წინაშე თავის მოვალეობებს, ჩემს ბრძანებებს, წესებსა და კანონებს“.+
6 გერარში დასახლდა ისაკი.+
7 იქაური კაცები ეკითხებოდნენ მას მის ცოლზე, ის კი ეუბნებოდა, ჩემი დააო,+ რადგან ეშინოდა, ეთქვა, ჩემი ცოლიაო; ამბობდა, მომკლავენო აქაური კაცები რებეკას გამო, ვინაიდან მიმზიდველი+ იყო იგი.
8 ის უკვე კარგა ხანს ცხოვრობდა იქ. ერთხელ, როცა ფილისტიმელთა მეფე აბიმელექი სარკმლიდან იყურებოდა, დაინახა, რომ ეალერსებოდა ისაკი რებეკას, თავის ცოლს.+
9 მაშინვე მოუხმო აბიმელექმა ისაკს და უთხრა: „მართლა შენი ცოლი ყოფილა! რატომ თქვი, ჩემი დააო?“ ისაკმა მიუგო: „ვიფიქრე, არ მომკლან-მეთქი მისი გულისთვის“.+
10 მაგრამ აბიმელექმა უთხრა: „ეს რა გვიყავი?!+ ცოტაც და ჩემი ხალხიდან ვიღაცა დაწვებოდა მასთან და დანაშაულს ჩაგვადენინებდი!“+
11 უბრძანა ხალხს აბიმელექმა: „ვინც ხელს ახლებს ამ კაცს და მის ცოლს, სიკვდილი არ ასცდება!“
12 დაიწყო ისაკმა თესვა იმ მიწაზე+ და იმ წელს ერთი ასად აიღო მოსავალი,+ რადგან კურთხეული იყო იეჰოვასგან.+
13 გამდიდრდა ეს კაცი და უფრო და უფრო მეტს იძენდა, სანამ დიდძალი სიმდიდრე არ მოიხვეჭა.+
14 გაუმრავლდა ცხვრის ფარა, საქონელი და მსახურებიც.+ შეშურდათ+ ეს ფილისტიმელებს.
15 მამამისის, აბრაამის მსახურთა მიერ ამოთხრილი ჭები+ მიწით ამოავსეს+ ფილისტიმელებმა.
16 უთხრა აბიმელექმა ისაკს: „წადი ჩვენი მიწიდან, რადგან ჩვენზე მეტად გაძლიერდი“.+
17 წავიდა ისაკი, დაბანაკდა გერარის+ ხევში და იქ ცხოვრობდა.
18 ხელახლა დაიწყო მან წყლის ჭების ამოთხრა, რომლებიც აბრაამის დროს იყო ამოთხრილი და აბრაამის სიკვდილის შემდეგ ფილისტიმელებმა ამოავსეს.+ არქმევდა იმავე სახელებს, რაც აბრაამმა დაარქვა.+
19 თხრიდნენ ისაკის მსახურები ხევში და მიაგნეს სუფთა წყლის ჭას.
20 გერარელმა მწყემსებმა დავა დაუწყეს ისაკის მწყემსებს:+ „ჩვენია წყალი!“ ამიტომ დაარქვა მან ჭას ესეკი*, რადგან იქ ეკამათებოდნენ მას.
21 კიდევ ერთი ჭა ამოთხარეს და მასზეც დაუწყეს დავა; ამიტომ მან სიტნა* უწოდა მას.
22 წავიდა იქიდან და კიდევ ერთი ჭა ამოთხარა,+ მაგრამ აღარ შედავებიან მასზე; ამიტომ რეხობოთი* უწოდა მას და თქვა: „ვრცელი ადგილი+ მოგვცა იეჰოვამ და ნაყოფიერი გაგვხადა დედამიწაზე“.+
23 იქიდან ბეერ-შებაში+ ავიდა იგი.
24 იმ ღამით იეჰოვა გამოეცხადა მას და უთხრა: „მე მამაშენის, აბრაამის ღმერთი ვარ.+ ნუ გეშინია,+ რადგან შენთანა ვარ; გაკურთხებ და გავამრავლებ შენს შთამომავალს ჩემი მსახურის, აბრაამის გამო“.+
25 ააგო მან სამსხვერპლო და იეჰოვას სახელს მოუხმო.+ გაშალა იქ კარავი+ და დაიწყეს ისაკის მსახურებმა ჭის ამოთხრა.
26 მივიდა მასთან აბიმელექი გერარიდან თავის ახლო მეგობართან, ახუზათთან, და თავისი ჯარის მხედართმთავარ ფიქოლთან ერთად.+
27 ისაკმა უთხრა: „რატომ მოხვედით ჩემთან?! თქვენ ხომ შემიძულეთ და გამიშვით თქვენი მიწიდან?!“+
28 ამაზე მათ მიუგეს: «ჩვენ ცხადად დავინახეთ, რომ იეჰოვა შენთან ყოფილა.+ ამიტომ ვთქვით: „შევფიცოთ ერთმანეთს+ და დავდოთ შენთან შეთანხმება,+
29 რომ ცუდს არაფერს გაგვიკეთებ, როგორც ჩვენ არ გვიხლია შენთვის ხელი, მხოლოდ კარგი გაგიკეთეთ და მშვიდობით+ გამოგიშვით. იეჰოვასგან ხარ კურთხეული“».+
30 გაუმართა მათ ნადიმი და მათაც ჭამეს და სვეს.+
31 დილით ადრე ადგნენ და ერთმანეთს შეჰფიცეს.+ გაუშვა ისინი ისაკმა და მშვიდობით+ წავიდნენ.
32 იმავე დღეს მოვიდნენ ისაკის მსახურები, შეატყობინეს ჭის ამოთხრის+ ამბავი და უთხრეს: „ვიპოვეთ წყალი!“
33 დაარქვა მას შიბა*. ამიტომაც ჰქვია იმ ქალაქს დღემდე ბეერ-შება*.+
34 ორმოცი წლისა იყო ესავი, როცა ხეთელი ბეერის ასული იეჰუდითი და ხეთელი ელონის ასული ბასმათი+ მოიყვანა ცოლად.
35 სულს უმწარებდნენ ისინი ისაკსა და რებეკას.+
სქოლიოები
^ ნიშნავს დავას, ჩხუბს.
^ ნიშნავს დაბრალებას.
^ ნიშნავს ვრცელ ადგილებს.
^ ნიშნავს ფიცს ან შვიდს.
^ იხილეთ 21:31-ის სქოლიო.
