დაბადება 34:1—31
34 ლეას ასული დინა,+ რომელიც მან იაკობს გაუჩინა, იმ ქვეყნის ასულების+ სანახავად გადიოდა ხოლმე.+
2 დაინახა იგი შექემმა, იმ ქვეყნის მთავრის, ხიველი ხამორის ძემ,+ წაიყვანა, დაწვა მასთან და გააუპატიურა.+
3 მიეწება მისი სული დინას, იაკობის ასულს, შეუყვარდა ყმაწვილი ქალი და სიყვარულში არწმუნებდა.
4 ბოლოს შექემმა უთხრა ხამორს, მამამისს:+ „მომიყვანე ცოლად ეს ყმაწვილი ქალი“.+
5 გაიგო იაკობმა, რომ შეურაცხყო მან მისი ასული. იმ დროს მისი ვაჟები მინდორში იყვნენ მის ფარასთან.+ ხმა არ ამოუღია იაკობს მათ დაბრუნებამდე.+
6 ბოლოს წავიდა ხამორი, შექემის მამა, იაკობთან დასალაპარაკებლად.+
7 როგორც კი გაიგეს იაკობის ვაჟებმა ეს ამბავი, მაშინვე დაბრუნდნენ მინდვრიდან. შეურაცხყოფილად იგრძნეს თავი და გაცეცხლდნენ,+ რადგან მან სამარცხვინო საქმე ჩაიდინა ისრაელის წინააღმდეგ და დაწვა იაკობის ასულთან;+ ასეთი რამ არ უნდა მომხდარიყო.+
8 უთხრა მათ ხამორმა: „შეიყვარა ჩემი ვაჟის სულმა თქვენი ასული.+ გთხოვთ, ცოლად მიათხოვეთ+
9 და დაგვიმოყვრდით.+ თქვენი ასულები ჩვენ მოგვეცით და ჩვენი ასულები თქვენ წაიყვანეთ.+
10 იცხოვრეთ ჩვენთან და მიწაც მოიხმარეთ. იცხოვრეთ, ივაჭრეთ და დამკვიდრდით“.+
11 შექემმა დინას მამასა და ძმებს უთხრა: „წყალობა მაპოვნინეთ თქვენს თვალში; რასაც მეტყვით, ყველაფერს მოგცემთ.
12 დამაკისრეთ დიდძალი ურვადი და ძღვენი,+ ყველაფერს მოგცემთ, რასაც მეტყვით, ოღონდ ეს ყმაწვილი ქალი მომათხოვეთ“.
13 მზაკვრულად უპასუხეს იაკობის ვაჟებმა შექემსა და ხამორს, მამამისს, რადგან შეურაცხყო მან მათი და, დინა.+
14 მათ უთხრეს: „ვერ გავაკეთებთ ასეთ რამეს, ვერ მივცემთ ჩვენს დას წინადაუცვეთელ+ კაცს, რადგან შეურაცხყოფაა ეს ჩვენთვის.
15 მხოლოდ იმ პირობით დაგთანხმდებით, თუ ჩვენნაირები გახდებით და თქვენგან ყოველი მამაკაცი წინადაიცვეთს.+
16 მერე მოგცემთ ჩვენს ასულებს და თქვენს ასულებს ჩვენ წავიყვანთ; ვიცხოვრებთ თქვენთან და ერთი ხალხი გავხდებით.+
17 მაგრამ თუ არ მოგვისმენთ და არ გაიკეთებთ წინადაცვეთას, წავიყვანთ ჩვენს ქალს და წავალთ“.
18 მოეწონათ მათი სიტყვა ხამორსა და შექემს, ხამორის ვაჟს.+
19 არ დაუყოვნებია იმ ყმაწვილ კაცს პირობის შესრულება,+ რადგან ძალიან მოსწონდა იაკობის ასული. ის ყველაზე პატივდებული+ იყო მამამისის მთელ სახლში.+
20 გავიდნენ ხამორი და შექემი, ხამორის ვაჟი, ქალაქის კარიბჭესთან და ელაპარაკნენ ქალაქში მცხოვრებ კაცებს:+
21 „ეს ხალხი მშვიდობისმოყვარეობით გვექცევა.+ იცხოვრონ ჩვენთან და ივაჭრონ, რადგან ეს მიწა საკმაოდ ვრცელია.+ მოვიყვანოთ მათი ასულები ცოლად, მათ კი ჩვენი ასულები მივათხოვოთ.+
22 მხოლოდ იმ პირობით დაგვთანხმდებიან ისინი, რომ ჩვენთან იცხოვრონ და ერთი ხალხი გავხდეთ, თუ მათსავით წინადაიცვეთს+ ჩვენგან თითოეული მამაკაცი.
23 განა ჩვენი არ იქნება მათი ქონება, სიმდიდრე და ცხვარ-ძროხა?!+ ოღონდ დავთანხმდეთ მათ, რომ ჩვენთან იცხოვრონ“.+
24 ქალაქის კარიბჭესთან გამოსულებმა, ყველამ მოუსმინა ხამორსა და შექემს, მის ვაჟს, და წინადაიცვითა ყველა მამაკაცმა, ყველამ, ვინც ქალაქის კარიბჭესთან იყო გამოსული.
25 მესამე დღეს, როცა ტკივილები ჰქონდათ,+ იაკობის ორმა ვაჟმა, სიმონმა და ლევიმ,+ დინას ძმებმა,+ აიღეს მახვილები და ისე შევიდნენ იმ ქალაქში, რომ ეჭვი არავის აუღია, და ამოხოცეს კაცები.+
26 მახვილით+ მოკლეს ხამორი და მისი ვაჟი შექემიც; წამოიყვანეს დინა შექემის სახლიდან და წამოვიდნენ.+
27 იაკობის სხვა ვაჟები კი თავს დაესხნენ სასიკვდილოდ დაჭრილებს და გაძარცვეს ქალაქი თავიანთი დის შეურაცხყოფის გამო.+
28 წამოიყვანეს მათი ცხვარ-ძროხა, ვირები და წამოიღეს ყველაფერი ქალაქიდან და მინდვრიდან.+
29 წამოიღეს მთელი მათი ქონება, ტყვედ წამოიყვანეს მათი ცოლ-შვილი და მთლიანად გაუძარცვეს სახლები.+
30 ეს რომ იაკობმა გაიგო, სიმონსა და ლევის უთხრა:+ „უბედურება დამატეხეთ თავს და შეაზიზღეთ ჩემი თავი ამ ქვეყნის მკვიდრთ,+ ქანაანელებსაც და ფერიზელებსაც; მე მცირერიცხოვანი ვარ,+ ჩემ წინააღმდეგ შეიკრიბებიან, თავს დამესხმიან და ჩემს სახლთან ერთად მოვისპობი“.
31 მათ კი მიუგეს: „განა მეძავივით უნდა მოპყრობოდნენ ჩვენს დას?!“+
