დაბადება 35:1—29
35 უთხრა ღმერთმა იაკობს: „ადექი, წადი ბეთელში და იქ იცხოვრე,+ აუგე სამსხვერპლო ჭეშმარიტ ღმერთს, რომელიც მაშინ გამოგეცხადა, როცა შენს ძმას, ესავს, გაურბოდი“.+
2 უთხრა იაკობმა თავის სახლეულობასა და ყველა მასთან მყოფს: „მოიშორეთ უცხო ღმერთები,+ განიწმინდეთ და გამოიცვალეთ მოსასხამები.+
3 ავდგეთ და წავიდეთ ბეთელში, სამსხვერპლოს ავუგებ იქ ჭეშმარიტ ღმერთს, რომელმაც გასაჭირის დროს მიპასუხა+ და ჩემთან იყო იმ გზაზე, რომლითაც წავედი“.+
4 მისცეს იაკობს ყველა უცხო ღმერთი,+ რომლებიც ჰქონდათ, და საყურეები, ყურებზე რომ ეკიდათ, და ჩამარხა+ ისინი იაკობმა დიდი ხის ქვეშ შექემის მახლობლად.
5 დაიძრნენ იქიდან. ღვთის შიშმა მოიცვა მათ გარშემო მდებარე ქალაქები+ და არ დაედევნენ იაკობის ვაჟებს.
6 ბოლოს მივიდნენ იაკობი და ყველა მასთან მყოფი ლუზში+ ანუ ბეთელში, რომელიც ქანაანის ქვეყანაშია.
7 ააგო იქ სამსხვერპლო და დაარქვა იმ ადგილს ელ-ბეთელი*, რადგან ჭეშმარიტი ღმერთი გამოეცხადა იქ, როდესაც თავის ძმას გაურბოდა.+
8 მოკვდა რებეკას ძიძა დებორა+ და დამარხეს ბეთელის მისადგომებთან დიდი ხის ქვეშ. ამიტომ დაარქვა მან იმ ადგილს ალონ-ბაქუთი*.
9 კიდევ გამოეცხადა ღმერთი ფადან-არამიდან+ მომავალ იაკობს და აკურთხა იგი.+
10 უთხრა ღმერთმა მას: „იაკობია+ შენი სახელი, მაგრამ ამიერიდან აღარ გერქმევა იაკობი, ისრაელი იქნება შენი სახელი“; და ისრაელი+ დაარქვა მას.
11 ღმერთმა უთხრა: „მე ვარ ყოვლისშემძლე ღმერთი.+ ინაყოფიერე და გამრავლდი. ერები და ხალხთა კრებული გამოვლენ შენგან და მეფეები — შენი საზარდულიდან.+
12 იმ მიწას, რომელიც აბრაამსა და ისაკს მივეცი, მოგცემთ+ შენ და შენს შთამომავალს“.+
13 ამაღლდა ღმერთი იმ ადგილიდან, სადაც მას ელაპარაკა.+
14 აღმართა იაკობმა ქვის სვეტი იქ, სადაც იგი ელაპარაკა მას,+ და დასაღვრელი შესაწირავი და ზეთი დაასხა.+
15 იაკობი ისევ ბეთელს+ ეძახდა იმ ადგილს, სადაც მას ღმერთი ელაპარაკა.
16 შემდეგ დაიძრნენ ბეთელიდან. ჯერ კიდევ დიდი მანძილი იყო ეფრათამდე,+ როცა რახელს მშობიარობა დაეწყო; გაუძნელდა მშობიარობა.+
17 როცა გაუჭირდა მშობიარობა, ბებიაქალმა უთხრა: „ნუ გეშინია, ახლაც ვაჟი გეყოლება“.+
18 სული*+ რომ ამოსდიოდა (კვდებოდა),+ მას ბენ-ონი დაარქვა, მამამისმა კი — ბენიამინი.+
19 მოკვდა რახელი და ეფრათის ანუ ბეთლემის გზაზე დამარხეს.+
20 აღმართა იაკობმა სვეტი მის სამარხზე. რახელის საფლავის სვეტი დღემდე აღმართულია.+
21 დაიძრა იქიდან ისრაელი და გაშალა კარავი ედერის კოშკიდან+ მოშორებით.
22 იმ მიწაზე იყო ისრაელი დაბანაკებული,+ როცა წავიდა რეუბენი და მამამისის ხარჭასთან, ბილჰასთან, დაწვა.+ გაიგო ეს ისრაელმა.
თორმეტი ვაჟი ჰყავდა იაკობს.
23 ლეასგან ჰყავდა რეუბენი — პირმშო,+ სიმონი, ლევი, იუდა, ისაქარი და ზებულონი;
24 რახელისგან კი — იოსები და ბენიამინი;
25 ბილჰასგან, რახელის მოახლისგან, ჰყავდა დანი და ნაფთალი;
26 ზილფასგან კი, ლეას მოახლისგან — გადი და აშერი. ესენი არიან იაკობის ვაჟები, რომლებიც მას ფადან-არამში შეეძინა.
27 ბოლოს მივიდა იაკობი მამამისთან, ისაკთან, მამრეში,+ კირიათ-არბაში,+ იგივე ხებრონში, სადაც აბრაამი და ისაკი ხიზნები იყვნენ.+
28 ისაკის სიცოცხლის დღეები ას ოთხმოც წელიწადს ითვლიდა.+
29 მოკვდა ისაკი მოხუცი და დღეებით მაძღარი+ და შეუერთდა თავის ხალხს; მისმა ვაჟებმა, ესავმა და იაკობმა, დამარხეს იგი.+
სქოლიოები
^ ნიშნავს ბეთელის ღმერთს.
^ ნიშნავს ტირილის დიდ ხეს.
^ ანუ სიცოცხლე. ებრაულად ნეფეშ. იხილეთ დანართი 2ა.
