დაბადება 45:1—28
45 თავი ვეღარ შეიკავა იოსებმა მათ წინაშე, ვინც მასთან იდგა,+ და დაიყვირა: „ყველანი გადით აქედან!“ არავინ იდგა მასთან, როცა იოსებმა ძმებს თავისი ვინაობა გაუმხილა.+
2 ისე ხმამაღლა ატირდა,+ რომ გაიგეს ეგვიპტელებმა და ფარაონის სახლმა.
3 ბოლოს უთხრა იოსებმა თავის ძმებს: „იოსები ვარ. ცოცხალია მამაჩემი?“ შეძრწუნდნენ მისი ძმები და ვეღარაფერი უპასუხეს.+
4 იოსებმა თავის ძმებს სთხოვა: „მოდით ჩემთან“. ისინიც მივიდნენ.
შემდეგ უთხრა: «იოსები ვარ, თქვენი ძმა, ეგვიპტეში რომ გაყიდეთ.+
5 მაგრამ ახლა ნუ დამწუხრდებით+ და ნუ განრისხდებით საკუთარ თავზე, აქ რომ გამყიდეთ, რადგან ღმერთმა სიცოცხლის გადასარჩენად გამომგზავნა თქვენზე წინ.+
6 უკვე მეორე წელია, რაც შიმშილობაა დედამიწაზე+ და კიდევ ხუთ წელიწადს არ იქნება ხვნა და მკა.+
7 ღმერთმა გამომგზავნა თქვენზე წინ, რათა დარჩეთ+ დედამიწაზე და იცოცხლოთ დიდებული ხსნის წყალობით.
8 აქ თქვენ კი არ გამომგზავნეთ,+ არამედ ჭეშმარიტმა ღმერთმა, რომ დავენიშნე ფარაონის მამად,+ მთელი მისი სახლის ბატონად და მთელი ეგვიპტის მიწის მბრძანებლად.
9 ჩქარა წადით მამაჩემთან და უთხარით, აი რა დაგვაბარა შენმა ვაჟმა, იოსებმა-თქო: „ღმერთმა მთელი ეგვიპტის ბატონად დამნიშნა.+ ჩამოდი, ნუ დააყოვნებ.
10 იცხოვრე გოშენის მიწაზე,+ ჩემთან ახლოს, შენ, შენმა ვაჟებმა, შენი ვაჟების ვაჟებმა, შენმა ცხვარ-ძროხამ, მთელი შენი საბადებლითურთ.
11 მე მოგამარაგებ იქ საკვებით, რათა არ გაღატაკდეთ შენ, შენი სახლეულობა და შენი საბადებელი, რადგან კიდევ ხუთ წელიწადს იქნება შიმშილობა“.+
12 ახლა თქვენ და ჩემი ძმა ბენიამინი საკუთარი თვალით ხედავთ, რომ ჩემი ბაგეებით გელაპარაკებით.+
13 ამიტომ მოუყევით მამაჩემს მთელი ჩემი დიდების შესახებ ეგვიპტეში და იმ ყოველივეს შესახებ, რაც იხილეთ. იჩქარეთ და ჩამომიყვანეთ მამაჩემი».
14 კისერზე მოეხვია იგი ბენიამინს, თავის ძმას და ატირდა; ბენიამინიც ტიროდა მის კისერზე.+
15 აკოცა თავის ძმებს და ტიროდა;+ შემდეგღა დაელაპარაკნენ მას მისი ძმები.
16 გავრცელდა ეს ამბავი ფარაონის სახლში, ამბობდნენ, იოსების ძმები ჩამოსულანო. მოეწონათ ეს ფარაონსა და მის მსახურებს.+
17 ფარაონმა იოსებს უთხრა: „უთხარი შენს ძმებს, ასე გააკეთეთ-თქო: დატვირთეთ პირუტყვები და წადით ქანაანის მიწაზე,+
18 წამოიყვანეთ მამათქვენი, თქვენი სახლეულობა და ჩემთან ჩამოდით, რათა მოგცეთ ყოველივე კარგი ეგვიპტის მიწაზე და ჭამოთ ამ მიწის საუკეთესო ნაყოფი.+
19 ასე გააკეთეთ:+ წაიყვანეთ ურმები+ ეგვიპტის მიწიდან თქვენი ცოლ-შვილისთვის; ერთით მამათქვენი წამოიყვანეთ და ჩამოდით.+
20 ნუ დაგენანებათ თქვენი ქონება,+ რადგან ყოველივე კარგი ეგვიპტის მიწაზე თქვენი იქნება“.+
21 ისრაელის ვაჟებიც ასე მოიქცნენ. მისცა იოსებმა მათ ურმები ფარაონის ბრძანებისამებრ და საგზალიც+ გაატანა.
22 თითოეულს თითო მოსასხამი მისცა,+ ხოლო ბენიამინს — სამასი ვერცხლი და ხუთი მოსასხამი.+
23 ჩამოსასვლელად მამამისს გაუგზავნა ეგვიპტის დოვლათით დატვირთული ათი მამალი ვირი და მარცვლეულით, პურითა და საჭმლით დატვირთული ათი ჭაკი ვირი.
24 გაგზავნა თავისი ძმები და ისინიც წავიდნენ. უთხრა მათ: „ნუ იდავებთ გზაში“.+
25 წამოვიდნენ ეგვიპტიდან და მივიდნენ ქანაანის მიწაზე იაკობთან, თავიანთ მამასთან.
26 შეატყობინეს მას: „ცოცხალია იოსები, მთელი ეგვიპტის მიწის მბრძანებელია!“+ გული აუთრთოლდა მას, არ სჯეროდა.+
27 ყველაფერი რომ უთხრეს, რაც იოსებმა დააბარა, და თან დაინახა ურმები, რომლებიც იოსებს მის წასაყვანად გაეგზავნა, გაუცოცხლდა სული*+ მათ მამას, იაკობს.
28 თქვა ისრაელმა: „კმარა! ცოცხალია იოსები, ჩემი შვილი! წავალ და ვნახავ, სანამ მოვკვდები!“+
სქოლიოები
^ ებრაულად რუახ. იხილეთ დანართი 2ბ.
