ეფესოელები 2:1—22
2 თქვენ კი ღმერთმა გაგაცოცხლათ, თუმცა მკვდრები იყავით თქვენს დანაშაულსა და ცოდვებში,+
2 რომლებშიც ერთ დროს დადიოდით ქვეყნიერების* გავლენით,+ იმ ჰაერის ძალაუფლების მთავრის+ ანუ იმ სულის+ გავლენით, რომელიც ახლა ურჩობის ძეებში მოქმედებს.+
3 ერთ დროს ჩვენც ყველანი მათ შორის ვიყავით და ჩვენი ხორცის სურვილებისამებრ ვიქცეოდით,+ ვასრულებდით ჩვენი ხორცისა+ და ფიქრების ნებას და სხვების მსგავსად ბუნებით რისხვის+ შვილები ვიყავით.
4 გულმოწყალებით მდიდარმა ღმერთმა+ კი თავისი დიდი სიყვარულით, რომლითაც შეგვიყვარა,+
5 ქრისტესთან ერთად გაგვაცოცხლა, როცა მკვდრები ვიყავით შეცოდებებში+ (წყალობით ხართ გადარჩენილნი),+
6 ერთად აღგვადგინა+ და დაგვსხა ზეცაში+ ქრისტე იესოსთან ერთობაში,
7 რათა მომავალში*+ აჩვენოს თავისი წყალობის განუზომელი სიმდიდრე+ ჩვენ მიმართ გამოვლენილი სიკეთით ქრისტე იესოსთან ერთობაში.+
8 ამ წყალობით ხართ გადარჩენილნი რწმენის მეშვეობით+ და ეს თქვენი დამსახურება კი არ არის,+ არამედ ღვთის ძღვენია.+
9 არა, ეს საქმეების გამო არ მომხდარა,+ რომ კვეხნის მიზეზი არავის ჰქონდეს.+
10 ჩვენ მისი შრომის ნაყოფი ვართ+ და ქრისტე იესოსთან ერთობაში+ ვიყავით შექმნილნი+ კარგი საქმეებისთვის,+ რომლებიც ღმერთმა წინასწარ გაგვიმზადა,+ რომ მათში ვიაროთ.
11 ამიტომ გახსოვდეთ, რომ ხორცის მიხედვით წინათ უცხოტომელები იყავით,+ „წინადაუცვეთელობას“ გიწოდებდნენ ისინი, ვისაც ეწოდებოდა „წინადაცვეთა“, რაც ხელით სრულდება ხორცზე.+
12 გახსოვდეთ, რომ იმ დროს ქრისტეს გარეშე იყავით,+ ისრაელისგან გაუცხოებულები+ და დანაპირების შეთანხმებებისთვის უცხოები,+ უიმედოები+ და უღმერთოები იყავით ქვეყნიერებაში.+
13 ერთ დროს შორს მყოფნი, ახლა ქრისტეს სისხლით+ გახდით ახლოს მყოფნი ქრისტე იესოსთან ერთობაში,
14 რადგან ის არის ჩვენი მშვიდობა,+ მან გააერთიანა+ ორი მხარე+ და დაანგრია მათ შორის კედელი,+ რომელიც ყოფდა+ მათ.
15 თავისი ხორცით+ გააუქმა მტრობა,+ მცნებების კანონი, რომელიც დადგენილებებს შეიცავს,+ რათა ორი ხალხისგან+ ერთი ახალი ადამიანი+ შეექმნა თავისთან ერთობაში, მშვიდობა დაემყარებინა
16 და შესძლებოდა ბოლომდე შეერიგებინა+ ღმერთთან ორივე ხალხი ერთ სხეულში+ წამების+ ბოძის* მეშვეობით, რადგან მან საკუთარი თავით მოსპო მტრობა.+
17 ის მოვიდა და გაუწყათ სასიხარულო ცნობა მშვიდობის შესახებ+ თქვენ, შორს მყოფთ, და მშვიდობა — ახლოს მყოფთ,+
18 რადგან მისი მეშვეობით ჩვენ, ორივე ხალხს+ გვაქვს მისასვლელი+ მამასთან ერთი სულით.+
19 ამიტომ უკვე აღარა ხართ უცხოები+ და ხიზნები,+ არამედ წმინდათა+ თანამოქალაქენი+ და ღვთის ოჯახის+ წევრები ხართ,
20 მოციქულთა+ და წინასწარმეტყველთა+ საძირკველზე+ დაშენებულნი, თვითონ ქრისტე იესო კი ამ საძირკვლის ქვაკუთხედია.+
21 მასთან ერთობაში მთელი შენობა, თანაზომიერად შეერთებული,+ წმინდა ტაძრად შენდება იეჰოვასთვის.+
22 მასთან ერთობაში+ თქვენც შენდებით სამკვიდრებლად, სადაც ღმერთი დამკვიდრდება სულით.+
სქოლიოები
^ ბერძნულად ეონ, რაც ნიშნავს გარკვეულ სისტემას ან წყობას.
^ სიტყვასიტყვით — მომავალ სისტემებში. ბერძნულად ეონას, რაც ნიშნავს გარკვეულ სისტემებს ან წყობას.
^ იხილეთ დანართი 3გ.
