იერემია 12:1—17
12 შენ მართალი ხარ,+ იეჰოვა, როცა ჩემი საჩივრით მოგმართავ, როცა სამართალზე გელაპარაკები. რატომ არის წარმატებული ბოროტი ხალხის გზა?+ რატომ არიან უდარდელად ვერაგი ადამიანები?
2 შენ დარგე ისინი, ფესვს იდგამენ, წინ მიიწევენ და ნაყოფიც გამოაქვთ; მათ პირთან ახლოს ხარ, მათი თირკმელებისგან* კი — შორს.+
3 იეჰოვა, შენ კარგად მიცნობ,+ შენ მხედავ, ამოწმებ ჩემს გულს, შენთან არის თუ არა.+ გამოაცალკევე ისინი დასაკლავი ცხვარივით+ და დაკვლის დღისთვის გამოარჩიე.
4 როდემდე უნდა ხმებოდეს მიწა+ და ჭკნებოდეს მინდვრის ბალახი?!+ აღიგავნენ მხეცები და ფრინველები იქ მცხოვრებთა ბოროტების გამო,+ რომლებიც ამბობენ, ვერ ხედავსო ის ჩვენს მომავალს.
5 თუ ქვეითებთან ერთად სირბილი გღლის, ცხენებს როგორღა შეეჯიბრები სირბილში?+ იმედიანად ხარ მშვიდობიან ქვეყანაში?+ მაშ, როგორ მოიქცევი დიდებულ ტევრებს შორის იორდანის პირას?+
6 შენი ძმებიცა და მამაშენის სახლეულობაც ვერაგულად გექცევიან და ხმამაღლა მოგყვირიან.+ ნუ ერწმუნები მათ მხოლოდ იმიტომ, რომ კარგ რამეს გეუბნებიან.+
7 „ვტოვებ ჩემს სახლს,+ ჩემს მემკვიდრეობას;+ მტრებს ვუგდებ ხელში მას, ვინც მიყვარს*.+
8 ჩემი მემკვიდრეობა ისეა ჩემთვის, როგორც ლომი ტყეში; ხმას იმაღლებს ჩემ წინააღმდეგ, ამიტომაც შემძულდა იგი.+
9 ჭრელ მტაცებელ ფრინველად მექცა ჩემი მემკვიდრეობა;+ მტაცებელი ფრინველები დასტრიალებენ მას.+ მოდით, შეიკრიბეთ, მინდვრის მხეცებო, სხვებიც მოიყვანეთ საჭმელად.+
10 ბევრი მწყემსი+ სპობს ჩემს ვენახს+ და თელავს ჩემს ნაკვეთს;+ გაპარტახებულ უდაბნოდ აქცევენ ჩემს სასურველ+ ნაკვეთს.
11 გაპარტახდა+ და გახმა ის, გამიპარტახდა.+ მთელი მიწა გაპარტახდა, რადგან კაციშვილი არ არის ამის გულთან ახლოს მიმტანი.+
12 უდაბნოს დატკეპნილი გზებით მოდიან მძარცველები. იეჰოვას მახვილი ნთქავს ყველაფერს ქვეყნის კიდით კიდემდე.+ არც ერთ ხორციელს არა აქვს მშვიდობა.
13 ხორბალს თესავენ, მაგრამ ეკალს იმკიან.+ არაქათი ეცლებათ, მაგრამ ამაოდ.+ შეარცხვენთ მათ თავიანთი ნაყოფი, რადგან აენთება იეჰოვას რისხვა მათზე“.
14 აი რას ამბობს იეჰოვა: „ყველა ჩემს ბოროტ მეზობელს,+ რომლებიც ეხებიან იმ სამკვიდროს, ჩემს ხალხს, ისრაელს რომ მივეცი,+ ვძირკვავ თავიანთი მიწიდან.+ იუდას სახლსაც ამოვძირკვავ მათი შუაგულიდან.+
15 მათი ამოძირკვის შემდეგ კვლავ შევიწყალებ+ და დავაბრუნებ მათ, თითოეულს თავის სამკვიდროში და თითოეულს — თავის მიწაზე“.+
16 „თუ ისინი ჩემი ხალხის გზებს ისწავლიან და ჩემი სახელით დაიფიცებენ,+ ცოცხალიაო იეჰოვა, როგორც ჩემს ხალხს ასწავლეს ბაალის სახელით დაფიცება,+ მაშინ თვითონაც აშენდებიან ჩემს ხალხს შორის.+
17 მაგრამ თუ არ დამემორჩილებიან, ამოვძირკვავ ამ ხალხს, ამოვძირკვავ და გავანადგურებ“,+ — ამბობს იეჰოვა.
სქოლიოები
^ იგულისხმება ადამიანის ღრმა გრძნობები.
^ სიტყვასიტყვით — უყვარს ჩემს სულს. ებრაულად ნეფეშ. იხილეთ დანართი 2ა.
