იესო ნავეს ძე 5:1—15
5 როცა გაიგეს იორდანის დასავლეთით მცხოვრებმა ამორეველთა+ მეფეებმა და ზღვასთან მცხოვრებმა ქანაანელთა+ მეფეებმა, რომ იეჰოვამ იორდანის წყალი დააშრო ისრაელის ძეების გადასასვლელად, გულები შეუკრთათ+ და მხნეობა დაკარგეს ისრაელის ძეების შიშით.+
2 მაშინ იეჰოვამ უთხრა იესო ნავეს ძეს: „კაჟის დანები გააკეთე და კიდევ ერთხელ, მეორედ წინადაცვითე+ ისრაელის ძეები“.
3 იესო ნავეს ძემაც გააკეთა კაჟის დანები და წინადაცვითა ისრაელის ძეები გიბათ-ჰაარალოთში.+
4 აი რატომ წინადაცვითა ისინი: ეგვიპტიდან გამოსული ყველა მამაკაცი, ყველა მეომარი, უდაბნოში დაიხოცა+ გზაში ეგვიპტიდან გამოსვლის შემდეგ;
5 ვინც ეგვიპტიდან გამოვიდა, ყველა წინადაცვეთილი იყო, მაგრამ ვინც უდაბნოში, გზაში დაიბადა ეგვიპტიდან გამოსვლის შემდეგ, არ ყოფილა წინადაცვეთილი;
6 ისრაელის ძეებმა ორმოცი წელი+ იარეს უდაბნოში, სანამ მთლიანად არ გაწყდა ეგვიპტიდან გამოსული ბრძოლისუნარიანი ხალხი, რომლებმაც არ მოუსმინეს იეჰოვას ხმას. მათ იეჰოვამ დაუფიცა, რომ ვერასოდეს იხილავდნენ მიწას,+ რომლის ჩვენთვის მოცემაც იეჰოვამ მათ მამა-პაპას დაუფიცა,+ მიწას, სადაც რძე და თაფლი მოედინება.+
7 მათი ადგილი მათ შვილებს მისცა.+ წინადაცვითა ესენი იესო ნავეს ძემ, რადგან წინადაუცვეთელები იყვნენ, გზაში მათი წინადაცვეთა არ მომხდარა.
8 როცა დაასრულეს მთელი ერის წინადაცვეთა, დარჩნენ ისინი თავიანთ ბანაკებში ჭრილობის მოშუშებამდე.+
9 უთხრა იეჰოვამ იესო ნავეს ძეს: „დღეს ჩამოგაშორეთ* ეგვიპტის სირცხვილი“.+ იმ ადგილს გილგალი*+ ეწოდა და დღემდე ასე ჰქვია.
10 ცხოვრობდნენ ისრაელის ძეები გილგალში და თვის მეთოთხმეტე დღეს,+ საღამოს, იერიხონის უკაცრიელ ველზე პასექი აღნიშნეს.
11 პასექის მეორე დღეს, სწორედ იმ დღეს ჭამეს აღებული მოსავლიდან უფუარი პური+ და ქუმელი.
12 შეწყდა მანანა მეორე დღეს, როცა აღებული მოსავლიდან ჭამეს. აღარ ეძლეოდათ მანანა ისრაელის ძეებს+ და იმ წელს ქანაანის მიწის მოსავალს ჭამდნენ.+
13 როცა იესო ნავეს ძე იერიხონთან იყო, გაიხედა და დაინახა მის წინ მდგარი კაცი,+ რომელსაც ხელში შიშველი მახვილი ეჭირა.+ მივიდა მასთან იესო ნავეს ძე და ჰკითხა: „მტერი ხარ თუ მოყვარე?“
14 მან მიუგო: „იეჰოვას ლაშქრის მეთაური ვარ, ახლა მოვედი“.+ პირქვე დაემხო იესო ნავეს ძე, მდაბლად თაყვანი სცა+ და უთხრა: „რას ეტყვის ჩემი ბატონი თავის მსახურს?“
15 იეჰოვას ლაშქრის მეთაურმა მიუგო იესო ნავეს ძეს: „გაიხადე სანდლები, წმინდა ადგილზე დგახარ“. მაშინვე ასე მოიქცა იესო ნავეს ძე.+
