კანონი 23:1—25
23 „სათესლეებჩაჭყლეტილი+ ან ასომოკვეთილი ვერ შევა იეჰოვას კრებულში.
2 ვერ შევა უკანონო+ ვაჟი იეჰოვას კრებულში; მეათე თაობამდე ვერავინ შევა იეჰოვას კრებულში.
3 ვერ შევა იეჰოვას კრებულში ვერც ამონელი და ვერც მოაბელი.+ მეათე თაობამდე, სამარადისოდ, ვერავინ შევა იეჰოვას კრებულში,
4 რადგან არ დაგეხმარნენ+ პურითა და წყლით, როცა ეგვიპტიდან გამოდიოდით,+ და დაიქირავეს თქვენ დასაწყევლად ბალაამ ბეორის ძე შუამდინარეთის ფეთორიდან.+
5 არ ისურვა იეჰოვამ, თქვენმა ღმერთმა, ბალაამის მოსმენა,+ არამედ იეჰოვამ, თქვენმა ღმერთმა, წყევლა კურთხევით შეგიცვალათ,+ რადგან უყვარდით იეჰოვას, თქვენს ღმერთს.+
6 ხელი არ შეუწყოთ მათ მშვიდობასა და კეთილდღეობას მთელი თქვენი სიცოცხლე, სამარადისოდ.+
7 არ შეიძულო ედომელი, შენი ძმაა იგი.+
არ შეიძულო ეგვიპტელი, რადგან ხიზანი იყავი მის ქვეყანაში.+
8 მათ ძეებს მესამე თაობაში შეეძლებათ იეჰოვას კრებულში შესვლა.
9 როცა გახვალ და დაბანაკდები შენი მტრის წინააღმდეგ, ერიდე ყოველივე ცუდს.+
10 თუ თქვენ შორის ვინმე გაუწმინდურდება ღამის თესლდენის გამო,+ გავიდეს ბანაკის გარეთ; არ შევიდეს ბანაკში.+
11 წყლით დაიბანოს საღამოს და მზის ჩასვლისას შევიდეს ბანაკში.+
12 ადგილი გექნება ბანაკის გარეთ და იქ გადი.
13 თან გქონდეს ბარი სხვა აღჭურვილობასთან ერთად და გარეთ ჩაჯდომისას ორმო ამოთხარე და ჩაფალი შენი განავალი,+
14 რადგან იეჰოვა, შენი ღმერთი დადის შენს ბანაკში, რომ გიხსნას+ და ხელში ჩაგიგდოს მტერი;+ წმინდა უნდა იყოს შენი ბანაკი,+ რომ უწესო არაფერი დაინახოს შენში და ზურგი არ გაქციოს.+
15 არ გადასცე მონა თავის ბატონს, თუ მას გამოექცევა და შენთან მოვა.+
16 შენთან იცხოვროს იმ ქალაქში, იმ ადგილზე, სადაც მოისურვებს.+ ცუდად არ მოეპყრო მას.+
17 ისრაელის არც ერთი ასული არ გახდეს ტაძრის მეძავი,+ არც ისრაელის ძე გახდეს ტაძრის მეძავი.+
18 არანაირი აღთქმისთვის არ შეიტანო მეძავის ქირა+ ან ძაღლის*+ საფასური იეჰოვას, შენი ღვთის სახლში, რადგან ორივე სისაძაგლეა იეჰოვასთვის, შენი ღვთისთვის.
19 არ გამოართვა შენს ძმას სარგებელი+ არც ფულზე, არც საჭმელზე+ და არც არაფერზე, რაც შეიძლება სარგებლით გაიცეს.
20 უცხოელს+ გამოართვი სარგებელი, მაგრამ შენს ძმას არ გამოართვა,+ რათა გაკურთხოს იეჰოვამ, შენმა ღმერთმა, ყველა შენს საქმეში იმ მიწაზე, რომლის დასაუფლებლადაც მიდიხარ.+
21 თუ აღთქმას დაუდებ იეჰოვას,+ შენს ღმერთს, არ დააყოვნო მისი შესრულება,+ რადგან მოგკითხავს იეჰოვა, შენი ღმერთი, და ეს ცოდვად ჩაგეთვლება.+
22 მაგრამ თუ აღთქმას არ დადებ, ცოდვად არ ჩაგეთვლება.+
23 დაიცავი შენი ბაგიდან გამოსული სიტყვა+ და ისე მოიქეცი, როგორც აღუთქვი იეჰოვას, შენს ღმერთს, ნებაყოფლობით შესაწირავად, რაც შენი ბაგით აღუთქვი.+
24 თუ შენი მოძმის ვენახში შეხვალ, იმდენი ყურძენი ჭამე, რომ სული გაიძღო, ოღონდ ჭურჭელში არ ჩაილაგო.+
25 თუ შენი მოძმის სამკალში შეხვალ, მოგლიჯე ხელით მწიფე თავთავები, ოღონდ ნამგალი არ მოიქნიო შენი მოძმის სამკალში“.+
სქოლიოები
^ როგორც ჩანს, იგულისხმება პედერასტი — კაცი, რომელსაც ძირითადად ბიჭებთან აქვს სქესობრივი ურთიერთობა.