ლევიანები 24:1—23
24 ელაპარაკა იეჰოვა მოსეს:
2 „უბრძანე ისრაელის ძეებს, რომ სუფთა, დაწურული ზეთისხილის ზეთი მოგიტანონ გასანათებლად,+ რათა მუდმივად ენთოს ლამპარი.+
3 აარონმა იზრუნოს იმაზე, რომ შეხვედრის კარავში, მოწმობის კიდობნის ფარდის გარეთ საღამოდან დილამდე მუდმივად ენთოს ლამპრები იეჰოვას წინაშე. ეს არის სამარადისო წესი თქვენი თაობებისთვის.
4 ყოველთვის გაწყობილი ჰქონდეს ლამპრები+ სუფთა ოქროს სალამპრეზე+ იეჰოვას წინაშე.+
5 აიღე წმინდად დაფქული ფქვილი და გამოაცხვე თორმეტი რგოლისებური კვერი; თითო კვერს ორი მეათედი ეფა უნდა მოხმარდეს.
6 ერთმანეთზე დააწყვე ექვს-ექვსი პური,+ ორ წყებად, სუფთა ოქროს მაგიდაზე იეჰოვას წინაშე.+
7 ზემოდან ორივეს გუნდრუკი მოაყარე; ეს იქნება გასახსენებელი პური,+ ცეცხლში დასაწვავი შესაწირავი იეჰოვასთვის.
8 ის ყოველ შაბათს უნდა აწყობდეს პურს იეჰოვას წინაშე.+ ეს არის ისრაელის ძეებთან დადებული მარადიული შეთანხმება.
9 ის აარონისა და მისი ვაჟებისთვის უნდა იყოს,+ რაც წმინდა ადგილას უნდა ჭამონ,+ რადგან მისთვის ის უწმინდესია იეჰოვასთვის ცეცხლში დასაწვავი შესაწირავიდან. ეს არის სამარადისო წესი“.
10 ერთი ისრაელი ქალის ვაჟი, რომელიც მას ეგვიპტელი კაცისგან ჰყავდა,+ მივიდა ისრაელის ძეებთან; ისრაელი ქალის ვაჟი და ისრაელი კაცი ერთმანეთს წაეჩხუბნენ+ ბანაკში.
11 ისრაელი ქალის ვაჟმა შეურაცხყო და დასწყევლა+ ღვთის სახელი.+ მიუყვანეს იგი მოსეს.+ დედამისი შელომითი დიბრის ქალიშვილი იყო, დანის ტომიდან.
12 დაკავებული ჰყავდათ+ იგი, სანამ გარკვევით არ გაუცხადდებოდათ იეჰოვას სიტყვა.+
13 უთხრა იეჰოვამ მოსეს:
14 „ბანაკის გარეთ გაიყვანეთ ის, ვინც დაიწყევლა.+ თავზე ხელები დაადოს მას ყველამ,+ ვინც ეს მოისმინა, და მთელმა კრებულმა ჩაქოლოს იგი.+
15 ასე უთხარი ისრაელის ძეებს: თუ ვინმე თავის ღმერთს დასწყევლის, პასუხი უნდა აგოს თავის ცოდვაზე.
16 იეჰოვას სახელის შეურაცხმყოფელი უნდა მოკვდეს;+ მთელმა კრებულმა უნდა ჩაქოლოს იგი. ღვთის სახელის შეურაცხყოფისთვის ხიზანიც უნდა მოკვდეს და მკვიდრიც.+
17 ის კაცი, ვინც ადამიანს, სულს მოკლავს, უნდა მოკვდეს.+
18 ვინც შინაურ ცხოველს, სულს მოკლავს, უნდა აანაზღაუროს; სული სულის სანაცვლოდ.+
19 თუ კაცი თავის მოძმეს დაასახიჩრებს, რაც მან გააკეთა, მასაც იგივე უნდა გაუკეთონ:+
20 მოტეხილობის სანაცვლოდ მოტეხილობა, თვალის სანაცვლოდ თვალი, კბილის სანაცვლოდ კბილი. ისევე დასახიჩრდეს ის, როგორც თვითონ დაასახიჩრებს სხვას.+
21 ვინც ცხოველს მოკლავს,+ უნდა აანაზღაუროს,+ მაგრამ კაცის მკვლელი უნდა მოკვდეს.+
22 ერთი სამართალი უნდა გქონდეთ ხიზნისთვისაც და მკვიდრისთვისაც,+ რადგან მე ვარ იეჰოვა, თქვენი ღმერთი“.+
23 ელაპარაკა მოსე ისრაელის ძეებს. ბანაკის გარეთ გაიყვანეს ის, ვინც დაიწყევლა, და ჩაქოლეს.+ ისე გააკეთეს ისრაელის ძეებმა, როგორც იეჰოვამ უბრძანა მოსეს.
