ლევიანები 26:1—46
26 „არ გაიკეთოთ არაფრის მაქნისი ღმერთები,+ არ აღმართოთ ქანდაკება,+ არც წმინდა სვეტი, და არ დაიდგათ მოხატული ქვა+ თაყვანსაცემად თქვენს მიწაზე,+ რადგან მე ვარ იეჰოვა, თქვენი ღმერთი.
2 დაიცავით ჩემი შაბათები+ და გეშინოდეთ ჩემი საწმინდრის. მე ვარ იეჰოვა.
3 თუ ივლით ჩემი წესებით, დაიცავთ ჩემს მცნებებს და შეასრულებთ მათ,+
4 დროულად მოგცემთ წვიმას,+ მიწა მოგცემთ მოსავალს+ და მინდვრის ხე — თავის ნაყოფს.+
5 ლეწვა რთვლამდე გასტანს, რთველი კი — თესვამდე. გაძღებით თქვენი პურით+ და უსაფრთხოდ იცხოვრებთ თქვენს მიწაზე.+
6 მშვიდობას მოგცემთ იმ მიწაზე,+ დაწვებით და არავინ შეგაშინებთ;+ გავწყვეტ მავნებელ მხეცებს+ და თქვენს მიწას მახვილი არ მიეკარება.+
7 დაედევნებით მტერს+ და მახვილით დაეცემა თქვენ წინ.
8 ხუთნი ასს განდევნით და ასნი — ათი ათასს; მახვილით დაეცემა თქვენი მტერი თქვენ წინ.+
9 მოგხედავთ,+ ნაყოფიერს გაგხდით და გაგამრავლებთ,+ შევასრულებ თქვენთან დადებულ ჩემს შეთანხმებას.+
10 შეჭამთ ძველს, გასული წლისას,+ და გამოიტანთ ძველს, რათა ადგილი გაუთავისუფლოთ ახალს.
11 თქვენ შორის დავდგამ ჩემს კარავს+ და არ შეგიზიზღებთ ჩემი სული.+
12 ვივლი თქვენ შორის და ვიქნები თქვენი ღმერთი,+ თქვენ კი ჩემი ხალხი იქნებით.+
13 მე ვარ იეჰოვა, თქვენი ღმერთი, რომელმაც გამოგიყვანეთ ეგვიპტის მიწიდან, მათი მონობიდან,+ დავამსხვრიე თქვენი უღელი და წელში გაგმართეთ.+
14 მაგრამ თუ არ მომისმენთ და არ შეასრულებთ ჩემს მცნებებს,+
15 უარყოფთ ჩემს წესებს+ და თქვენი სული შეიზიზღებს ჩემს სამართალს, არ შეასრულებთ ჩემს მცნებებს და დაარღვევთ ჩემს შეთანხმებას,+
16 მაშინ ასე მოგექცევით: დაგცემთ შიშის ზარს, შეგყრით ჭლექსა+ და ციებ-ცხელებას, თვალებს დაგიბრმავებთ+ და სულებს დაგიძაბუნებთ.+ ტყუილუბრალოდ დათესავთ, რადგან მტერი შეგიჭამთ.+
17 მოვაქცევ ჩემს სახეს თქვენ წინააღმდეგ და მტერი დაგამარცხებთ.+ თქვენი მოძულეები გაგთელავენ+ და გაიქცევით, თუმცა მდევარი არ გეყოლებათ.+
18 თუ მაინც არ მომისმენთ, შვიდმაგად დაგსჯით თქვენი ცოდვებისთვის.+
19 დავამსხვრევ თქვენი ძლიერების სიამაყეს, თქვენს ცას რკინასავით გავხდი+ და მიწას — სპილენძივით.
20 ტყუილუბრალოდ დახარჯავთ ძალას, რადგან მიწა მოსავალს არ მოგცემთ+ და ხე — თავის ნაყოფს.+
21 თუ კვლავ ჩემ წინააღმდეგ ივლით და არ ისურვებთ, რომ მომისმინოთ, შვიდმაგად დაგცხებთ თქვენი ცოდვებისთვის.+
22 შემოგისევთ მინდვრის მხეცებს,+ ამოგიწყვეტენ შვილებს+ და მოგისპობენ შინაურ ცხოველებს, მცირერიცხოვანს გაგხდიან და გზებს გაგიუკაცრიელებენ.+
23 თუ მაინც არ გამოსწორდებით+ და ჩემ წინააღმდეგ ივლით,
24 მე თვითონ წამოვალ თქვენ წინააღმდეგ+ და მე თვითონ დაგცხებთ შვიდჯერ თქვენი ცოდვებისთვის.+
25 მოგივლენთ შურისძიების+ მახვილს შეთანხმების გამო.+ შეგროვდებით თქვენს ქალაქებში, მოგივლენთ ჭირს+ და მტრის ხელში ჩაცვივდებით.+
26 როცა დაგიმტვრევთ პურის საკიდელ ჯოხებს,+ ათი ქალი გამოგიცხობთ პურს ერთ ღუმელში+ და წონით მოგცემენ. შეჭამთ და ვერ გაძღებით.+
27 თუ ამის შემდეგაც არ მომისმენთ და ჩემ წინააღმდეგ ივლით,+
28 რისხვით წამოვალ თქვენ წინააღმდეგ+ და მე თვითონ დაგსჯით შვიდჯერ თქვენი ცოდვებისთვის.+
29 შეჭამთ თქვენი ვაჟებისა და თქვენი ასულების ხორცს.+
30 გავანადგურებ თქვენს წმინდა მაღლობებს+ და დავამხობ თქვენს სასაკმევლეებს, თქვენს გვამებს კი თქვენი ნეხვიანი კერპების ნამსხვრევებზე დავყრი+ და შეგიზიზღებთ ჩემი სული.+
31 მახვილს მივცემ თქვენს ქალაქებს+ და გავაპარტახებ თქვენს საწმინდრებს;+ აღარ ვიყნოსავ თქვენი მსხვერპლის დამამშვიდებელ სურნელებას.+
32 გავაპარტახებ თქვენს მიწას+ და თქვენი მტერი, რომელიც იქ დასახლდება, განცვიფრებული დაუწყებს მას ყურებას.+
33 მიმოგფანტავთ ხალხებში+ და გაშიშვლებულ მახვილს დაგადევნებთ.+ გაპარტახდება თქვენი მიწა+ და ნანგრევებად იქცევა თქვენი ქალაქები.
34 მაშინ გაპარტახების დროის განმავლობაში მიწა შაბათებს აინაზღაურებს, სანამ თქვენ მტრის მიწაზე იქნებით. მაშინ დაიცავს მიწა შაბათს, რათა აინაზღაუროს შაბათები.+
35 გაპარტახების დროის განმავლობაში დაიცავს მიწა შაბათს, რადგან არ იცავდა თქვენს შაბათებს, როცა იქ ცხოვრობდით.
36 დანარჩენებს+ მტრის მიწაზე ყოფნისას გულებში სიმხდალეს ჩავუდებ. ფოთლის შრიალზე ისე გაიქცევიან, თითქოს მახვილს გაურბიანო, და დაეცემიან, როცა მდევნელი არ ეყოლებათ.+
37 ერთმანეთზე წაიბორძიკებენ, თითქოს მახვილს გაურბიანო, მაგრამ მდევნელი არ ეყოლებათ; არ გექნებათ მტრისთვის წინააღმდეგობის გაწევის ძალა.+
38 დაიღუპებით ხალხებში+ და მტრის მიწა შეგჭამთ.
39 თქვენგან დარჩენილები მტრის მიწაზე დალპებიან+ თავიანთი დანაშაულის გამო; თავიანთი მამების დანაშაულის გამო+ მათთან ერთად დალპებიან.
40 აღიარებენ ორგულობით ჩადენილ თავიანთ და თავიანთი მამების დანაშაულს,+ ორგულად რომ მექცეოდნენ და ჩემ წინააღმდეგ დადიოდნენ.+
41 მეც წავალ მათ წინააღმდეგ+ და მტრის მიწაზე მივიყვან.+
იქნებ დამდაბლდეს+ მათი წინადაუცვეთელი გულები+ და პასუხი აგონ დანაშაულზე.
42 გავიხსენებ იაკობთან დადებულ შეთანხმებას;+ ისაკთან დადებულ შეთანხმებასაც+ გავიხსენებ და აბრაამთან დადებულ შეთანხმებასაც,+ და იმ მიწასაც გავიხსენებ.
43 მიატოვებენ ისინი იმ მიწას და აინაზღაურებს ის შაბათებს,+ სანამ მიტოვებული იქნება მათგან; ისინი პასუხს აგებენ თავიანთ დანაშაულზე,+ რადგან უგულებელყვეს ჩემი სამართალი+ და შეიზიზღა მათმა სულმა ჩემი წესები.+
44 ყოველივეს მიუხედავად, მაშინაც კი, როცა თავიანთი მტრის მიწაზე იქნებიან, არ უარვყოფ მათ+ და არ შევიზიზღებ,+ არ შევმუსრავ და არ დავარღვევ ჩემს შეთანხმებას+ მათთან; მე ვარ იეჰოვა, მათი ღმერთი.
45 მათთვის გავიხსენებ მათ წინაპრებთან დადებულ შეთანხმებას,+ ხალხთა თვალწინ რომ გამოვიყვანე ეგვიპტის მიწიდან,+ რათა მათი ღმერთი ვყოფილიყავი. მე ვარ იეჰოვა“.
46 ეს წესები, სამართალი+ და კანონები დაადგინა იეჰოვამ სინას მთაზე თავისსა და ისრაელის ძეებს შორის მოსეს მეშვეობით.+
