მათე 14:1—36
14 იმ დროს იესოს ამბავი გამგებელმა ჰეროდემ* გაიგო+
2 და თავის მსახურებს უთხრა: „ეს იოანე ნათლისმცემელია. ის მკვდრეთით აღდგა და ამიტომ ხდება სასწაულები მისი მეშვეობით“.+
3 ჰეროდემ თავისი ძმის, ფილიპეს ცოლის ჰეროდიას გამო შეაპყრობინა იოანე, შეაბორკვინა და საპყრობილეში ჩააგდებინა,+
4 რადგან იოანე ჰეროდეს ეუბნებოდა, არა გაქვს მისი ყოლის უფლებაო.+
5 ჰეროდე მას მოკვლასაც უპირებდა, მაგრამ ხალხისა ეშინოდა, რადგან წინასწარმეტყველად მიაჩნდათ იგი.+
6 ჰეროდეს დაბადების დღეზე+ ჰეროდიას ქალიშვილმა იცეკვა და ისე ასიამოვნა ჰეროდეს,
7 რომ ის ფიცით დაჰპირდა ყველაფრის მიცემას, რასაც კი სთხოვდა.+
8 მაშინ მან, დედისგან დარიგებულმა, უთხრა: „მომიტანე იოანე ნათლისმცემლის თავი ლანგრით“.+
9 შეწუხდა მეფე, მაგრამ ფიცისა და სტუმრების გამო ბრძანა, მიეტანათ.+
10 გაგზავნა ხალხი საპყრობილეში და თავი მოაკვეთინა იოანესთვის.
11 მიიტანეს თავი ლანგრით და გადასცეს ქალიშვილს, მან კი დედას მიუტანა.+
12 ბოლოს მივიდნენ იოანეს მოწაფეები, ცხედარი წაიღეს და დამარხეს,+ შემდეგ კი იესოსთან წავიდნენ და შეატყობინეს.
13 ეს რომ მოისმინა, იესო უკაცრიელ ადგილზე წავიდა იქიდან ნავით, რათა განმარტოებულიყო,+ მაგრამ ხალხმა რომ გაიგო, ფეხით გაჰყვა მას ქალაქებიდან.
14 ნავიდან რომ გადმოვიდა და უამრავი ხალხი დაინახა, გული დაეწვა+ მათ გამო და მათი ავადმყოფები განკურნა.+
15 როცა მოსაღამოვდა, მივიდნენ მასთან მოწაფეები და უთხრეს: „უკაცრიელი ადგილია, თანაც უკვე გვიანია. გაუშვი ეს ხალხი, რომ წავიდნენ სოფლებში და თავიანთთვის საჭმელი იყიდონ“.+
16 იესომ მიუგო: „არ არის საჭირო მათი წასვლა, თქვენ მიეცით საჭმელი“.+
17 მათ უთხრეს: „ხუთი პურისა და ორი თევზის მეტი არაფერი გვაქვს“.+
18 მან უთხრა: „აქ მომიტანეთ“.
19 შემდეგ ხალხს უბრძანა, ბალახზე დამსხდარიყვნენ, აიღო ხუთი პური და ორი თევზი, ცას ახედა, ილოცა*,+ დაამტვრია პურები და მოწაფეებს ჩამოურიგა, მოწაფეებმა კი — ხალხს.+
20 ყველამ ჭამა და გაძღა; დარჩენილი ნატეხებით კი თორმეტი კალათი გაავსეს;+
21 ხუთი ათასამდე კაცმა ჭამა, თუ არ ჩავთვლით ქალებსა და ბავშვებს.+
22 იესომ დაუყოვნებლივ უბრძანა თავის მოწაფეებს, ნავში ჩამსხდარიყვნენ და მასზე ადრე გადასულიყვნენ მეორე ნაპირზე, სანამ ის ხალხს გაუშვებდა.+
23 ხალხი რომ გაუშვა, მარტო ავიდა მთაზე, რომ ელოცა.+ თუმცა გვიანი იყო, ის იქ მარტო დარჩა.
24 იმ დროისთვის ნავი ძალიან შორს იყო ნაპირიდან. ცურვა ჭირდა, რადგან პირქარის გამო ტალღები+ ეხეთქებოდა ნავს.
25 იესო ღამის მეოთხე გუშაგობისას ზღვაზე სიარულით მივიდა მათთან.+
26 მოწაფეებმა ზღვაზე მოსიარულე რომ დაინახეს, აფორიაქდნენ, თქვეს, მოჩვენებააო+ და შიშისგან ყვირილი ატეხეს.
27 იესო მაშინვე დაელაპარაკა მათ: „გამაგრდით,+ მე ვარ, ნუ გეშინიათ!“
28 პეტრემ მიუგო: „უფალო, თუ ეს შენ ხარ, მიბრძანე, მოვიდე შენთან წყალდაწყალ“.
29 მან უთხრა: „მოდი!“ პეტრე ნავიდან გადმოვიდა+ და წყალდაწყალ გაემართა იესოსკენ.
30 მაგრამ ქარიშხალმა შეაშინა, ჩაძირვა დაიწყო და დაიყვირა: „უფალო, მიხსენი!“
31 იესომ მაშინვე ხელი გაუწოდა, დაიჭირა და უთხრა: „მცირე რწმენის მქონევ, რატომ დაეჭვდი?“+
32 როცა ისინი ნავში ჩასხდნენ, ქარიშხალი ჩადგა.
33 ნავში მყოფებმა მდაბლად თაყვანი სცეს მას და უთხრეს: „შენ მართლა ღვთის ძე ხარ“.+
34 ისინი გაღმა გავიდნენ და მივიდნენ გენესარეთის მხარეში.+
35 იქაურმა ხალხმა იცნო ის და დაგზავნეს კაცები მთელ შემოგარენში და მიუყვანეს მას ყველა ავადმყოფი.+
36 ისინი ეხვეწებოდნენ, მხოლოდ მოსასხამის ფოჩზე შეგეხებითო.+ ვინც შეეხო, ყველა სრულიად გამოჯანმრთელდა.